ꦧꦁꦏꦼꦩꦠꦸꦂꦝꦠꦼꦁꦑꦥ꧀ꦠꦶꦤ꧀ꦎꦂꦩꦼꦩꦏꦠꦼꦤ꧀꧇ꦱꦩ꧀ꦥꦸꦤ꧀ꦲꦤ꧀ꦢꦢꦺꦴꦱꦏꦼꦤ꧀ꦥꦁꦒꦭꦶꦃ꧈ꦧꦤ꧀ꦢꦫꦏꦥ꧀ꦠꦶꦤ꧀꧈ꦱꦶꦫꦲꦶꦥꦸꦤ꧀ꦧꦁꦏꦼꦥꦸꦤꦶꦏꦲꦶꦕꦭ꧀꧈ꦏꦶꦤ꧀ꦠꦼꦤ꧀ꦏꦸꦭꦱꦩꦁꦏꦼꦩꦺꦴꦤ꧀ꦝꦺꦴꦏ꧀ꦮꦺꦴꦤ꧀ꦠꦼꦤ꧀ꦥꦁꦒꦼꦤꦤꦶꦁꦥꦸꦭꦶꦱꦶꦔꦤ꧀ꦝꦥ꧀ꦔꦿꦶꦏ꧈ꦏꦢꦺꦴꦱ꧀ꦥꦸꦤ꧀ꦢꦶꦩꦭꦶꦃꦠꦶꦪꦁꦏꦸꦭꦧꦺꦴꦠꦼꦤ꧀ꦒꦝꦃꦥꦸꦤꦥꦥꦸꦤꦥꦏꦁꦒꦼꦲꦤꦁꦒꦸꦭꦔꦶꦥꦤꦼꦩ꧀ꦥꦸꦲꦶꦁꦥꦸꦭꦶꦱꦶ꧈ꦲꦩꦶꦭꦧꦁꦏꦼꦮꦻꦴꦭꦗꦼꦁꦏꦸꦭꦲꦗꦼꦔꦏꦼꦤ꧀ꦏꦁꦒꦼꦠꦼꦠꦩꦺꦁ꧈ꦏꦸꦭꦏꦶꦤ꧀ꦠꦼꦤ꧀ꦩꦤꦮꦶꦏꦶꦪꦠ꧀ꦱꦲꦏꦏꦼꦤ꧀꧉ꦆꦁꦱꦥꦸꦤꦶꦏꦏꦸꦭꦚꦸꦮꦸꦤ꧀ꦥꦔꦥꦸꦤ꧀ꦠꦼꦤ꧀꧈ꦢꦼꦤꦼꦒꦸꦭꦸꦤꦶꦥꦸꦤ꧀ꦭꦗꦼꦁꦥꦸꦠꦸꦁ꧈ꦲꦶꦁꦏꦁꦲꦚ꧀ꦗꦭꦫꦶꦱꦶꦫꦲꦶꦥꦸꦤ꧀ꦧꦁꦏꦼꦮꦻꦴꦢꦶꦥꦸꦤ꧀ꦕꦼꦥꦼꦁꦲꦶꦁꦥꦸꦭꦶꦱꦶ꧉ ꧋ꦱꦱꦩ꧀ꦥꦸꦤꦶꦥꦸꦤ꧀ꦯꦼꦂꦱꦤ꧀ Quick ꦩ꧀ꦥꦸꦁꦲꦁꦒꦺꦤꦶꦥꦸꦤ꧀ꦮꦶꦕꦤ꧀ꦠꦼꦤ꧀꧈ꦏꦺꦴꦫꦶꦭꦗꦼꦁꦏꦧꦶꦏꦏ꧀ꦩꦭꦶꦃ꧈ꦱꦭꦗꦼꦔꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦲꦒꦺꦤ꧀ꦥꦸꦭꦶꦱꦶꦏꦭꦶꦃꦭꦸꦩꦼꦧꦼꦠ꧀ꦲꦶꦁꦏꦩꦂꦔꦿꦶꦏꦸ꧈ꦏꦭꦶꦃꦏꦭꦶꦲꦶꦥꦸꦤ꧀ꦏꦼꦠꦶꦔꦭ꧀ꦊꦩꦼꦱ꧀ꦭꦤ꧀ꦉꦒꦼꦢ꧀꧈ꦲꦶꦁꦏꦁꦱꦠꦸꦁꦒꦭ꧀ꦚꦼꦥꦼꦔꦶꦫꦩ꧀ꦧꦸꦠꦶꦁꦱꦶꦫꦃꦧꦁꦏꦼꦱꦫꦤꦏꦕꦼꦁꦏꦶꦮꦶꦁꦠꦸꦮꦶꦤ꧀ꦢꦶꦥꦸꦤ꧀ꦠꦼꦧꦶꦲꦏꦼꦤ꧀꧉ ꧋ꦠꦸꦮꦤ꧀ꦥꦿꦺꦴꦥꦼꦱꦺꦴꦂꦱꦔꦼꦠ꧀ꦤꦼꦥ꧀ꦱꦸꦤꦶꦥꦸꦤ꧀ꦱꦂꦠꦥꦶꦠꦏꦺꦤ꧀ꦩꦏꦠꦼꦤ꧀꧇ꦄꦥꦏꦉꦥ꧀ꦩꦸ꧈ꦢꦼꦤꦼꦲꦸꦗꦸꦒ꧀ꦲꦸꦗꦸꦒ꧀ꦮꦤꦶꦩꦊꦧꦸꦲꦶꦁꦏꦩꦂꦏꦸ꧉ꦄꦥꦏꦺꦴꦮꦼꦲꦁꦒꦮꦭꦪꦁꦥꦔꦸꦮꦱ꧉ ꧋ꦲꦒꦺꦤ꧀ꦥꦸꦭꦶꦱꦶꦲꦶꦁꦏꦁꦱꦠꦸꦁꦒꦭ꧀꧈ꦭꦗꦼꦁꦩꦁꦱꦸꦭꦶꦏꦭꦶꦲꦤ꧀ꦤꦸꦢꦶꦔꦶꦧꦢꦤꦶꦁꦧꦁꦏꦼꦲꦶꦁꦏꦁꦏꦧꦸꦤ꧀ꦠꦼꦭ꧀ꦲꦶꦁꦩꦺꦴꦫꦶ꧇ꦭꦥꦸꦤꦶꦏ꧉ ꧋ꦲꦒꦺꦤ꧀ꦥꦸꦭꦶꦱꦶꦱꦠꦸꦁꦒꦭꦶꦥꦸꦤ꧀ꦮꦶꦕꦤ꧀ꦠꦼꦤ꧀ꦱꦂꦮꦶꦲꦔꦁꦏꦠ꧀ꦱꦶꦫꦲꦶꦁꦧꦁꦏꦼ꧇ꦭꦥꦸꦤꦶꦏ꧉ꦲꦮꦶꦠ꧀ꦲꦶꦁꦏꦁꦲꦱ꧀ꦩꦏꦁꦗꦼꦁꦱꦿꦶꦤꦉꦤ꧀ꦢꦿ꧈ꦏꦸꦭꦠꦶꦪꦁꦏꦼꦏꦭꦶꦃꦮꦗꦶꦧ꧀ꦤꦼꦝꦏꦠꦿꦔꦤ꧀ꦝꦠꦼꦁꦠꦶꦪꦁꦥꦸꦤꦶꦏ꧈ꦢꦼꦤꦼꦠꦶꦪꦁꦥꦸꦤꦶꦏꦮꦤꦶꦮꦤꦶꦲꦩ꧀ꦧꦼꦏ꧀ꦠꦧꦁꦏꦼꦮꦺꦴꦤ꧀ꦠꦼꦤ꧀ꦲꦶꦁꦩꦂꦒꦶꦏꦤ꧀ꦛꦶꦱꦼꦱꦶꦝꦼꦩꦤ꧀꧉ꦥꦶꦪꦩ꧀ꦧꦏꦶꦥꦸꦤ꧀ꦥꦸꦤꦶꦏꦤꦼꦩ꧀ꦥꦸꦃꦝꦠꦼꦁꦏꦸꦭꦩꦮꦶꦩꦶꦒꦸꦤꦏꦏꦼꦤ꧀ꦧꦁꦏꦼꦮꦻꦴ꧈ꦲꦶꦁꦏꦁꦥꦸꦤꦶꦏꦥꦶꦪꦩ꧀ꦧꦏꦶꦥꦸꦤ꧀ꦏꦼꦢꦃꦏꦸꦭꦕꦼꦥꦼꦁ꧉ꦱꦭꦗꦼꦔꦶꦥꦸꦤ꧀ꦲꦒꦺꦤ꧀ꦥꦸꦭꦶꦱꦶꦮꦻꦴꦭꦗꦼꦁꦮꦶꦕꦤ꧀ꦠꦼꦤ꧀ꦏꦭꦶꦲꦤ꧀ꦱꦼꦂꦱꦤ꧀ꦩꦏꦠꦼꦤ꧀꧇ꦲꦼ꧈ꦩꦱ꧀꧈ꦱꦩ꧀ꦥꦼꦪꦤ꧀ꦤꦸꦫꦸꦠ꧀ꦤꦥꦧꦺꦴꦠꦼꦤ꧀꧈ꦪꦺꦤ꧀ꦧꦺꦴꦠꦼꦤ꧀ꦤꦸꦫꦸꦠ꧀꧈ꦏꦸꦭꦧ꧀ꦭꦼꦁꦒꦸ꧉ ꧋ꦩꦶꦉꦁꦥꦽꦤ꧀ꦠꦲꦶꦁꦲꦒꦺꦤ꧀ꦥꦸꦭꦶꦱꦶꦩꦏꦠꦼꦤ꧀ꦮꦻꦴ꧈ꦯꦼꦂꦱꦤ꧀ Quick ꦥ꧀ꦱꦸꦱꦔꦼꦠ꧀꧈ꦱꦲꦭꦗꦼꦁꦲꦺꦧꦃꦧꦢꦤꦶꦥꦸꦤ꧀ꦧꦝꦼꦩꦼꦤ꧀ꦝꦼꦠ꧀ꦧꦁꦏꦼꦲꦶꦁꦏꦁꦮꦺꦴꦤ꧀ꦠꦼꦤ꧀ꦲꦶꦁꦩꦼꦗ꧈ꦲꦶꦁꦏꦁꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦧꦝꦼꦏꦥꦶꦒꦸꦤꦏꦏꦼꦤ꧀ꦏꦁꦒꦼꦢꦼꦢꦩꦼꦭ꧀ꦩꦭꦶꦃ꧉ꦱꦤꦭꦶꦏꦲꦒꦺꦤ꧀ꦥꦸꦭꦶꦱꦶꦏꦼꦏꦭꦶꦃꦮꦻꦴꦭꦗꦼꦁꦩꦼꦤ꧀ꦝꦼꦠ꧀ꦢꦼꦢꦩꦼꦭꦶꦥꦸꦤ꧀ꦥꦼꦤ꧀ꦛꦸꦁ꧉ ꧋ꦱꦸꦩꦼꦉꦥ꧀ꦩꦏꦠꦼꦤ꧀ꦮꦻꦴ꧈ꦑꦥꦶꦠꦤ꧀ Orme
ꦭꦗꦼꦁꦲꦤꦼꦔꦲꦶꦠꦶꦪꦁꦲꦶꦁꦏꦁꦱꦩꦶꦒꦽꦗꦼꦒꦤ꧀ꦥꦸꦤꦶꦏ꧈ꦮꦶꦕꦤ꧀ꦠꦼꦤꦶꦥꦸꦤ꧀꧇ꦲꦼ꧈ꦲꦥꦏꦺꦴꦮꦼꦏꦧꦺꦃꦥꦝꦲꦺꦢꦤ꧀꧉ꦮꦼꦫꦸꦲ꧈ꦪꦺꦤ꧀ꦥꦠꦶꦤꦼꦮꦺꦴꦁꦮꦢꦺꦴꦤ꧀ꦲꦶꦏꦶꦮꦶꦱ꧀ꦲꦤꦥꦠꦁꦲꦺꦮꦸꦠꦻꦴꦤ꧀꧉ꦲꦒꦺꦤ꧀ꦥꦸꦭꦶꦱꦶꦲꦶꦁꦏꦁꦚꦼꦥꦼꦔꦶꦱꦶꦫꦃꦮꦻꦴꦭꦗꦼꦁꦮꦶꦕꦤ꧀ꦠꦼꦤ꧀ꦝꦠꦼꦁꦏꦚ꧀ꦕꦤꦶꦥꦸꦤ꧀ꦩꦏꦠꦼꦤ꧀꧇ꦪꦠꦭꦃ꧈ꦏꦶꦫꦏꦸꦲꦶꦏꦶꦱꦭꦃꦱꦮꦶꦗꦶꦤꦶꦁꦧꦁꦏꦼꦏꦁꦮꦶꦱ꧀ꦠꦸꦮꦧꦔꦼꦠ꧀꧈ꦭꦤ꧀ꦢꦶꦱꦶꦩ꧀ꦥꦼꦤ꧀ꦲꦶꦁꦩꦸꦱꦺꦪꦸꦩ꧀꧉ꦪꦩꦺꦩ꧀ꦥꦼꦂ꧈ꦭꦪꦏ꧀ꦲꦩ꧀ꦧꦸꦤꦼꦲꦥꦼꦏ꧀ꦧꦔꦼꦠ꧀꧉ꦯꦱꦩ꧀ꦥꦸꦤꦶꦥꦸꦤ꧀ꦮꦶꦕꦤ꧀ꦠꦼꦤ꧀ꦩꦏꦠꦼꦤ꧀꧈ꦭꦗꦼꦁꦲꦔꦩ꧀ꦧꦼꦠ꧀ꦱꦶꦫꦲꦶꦁꦧꦁꦏꦼ꧈ꦱꦲꦭꦗꦼꦁꦏꦒ꧀ꦭꦼꦛꦏꦏꦼꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦩꦼꦗ꧉ꦱꦩꦁꦏꦼꦱꦠꦸꦁꦒꦭ꧀ꦭꦤ꧀ꦱꦠꦸꦁꦒꦭꦶꦥꦸꦤ꧀ꦱꦩꦶꦱꦸꦏꦏꦠꦿꦔꦤ꧀ꦥꦶꦪꦩ꧀ꦧꦏ꧀ꦥꦶꦪꦩ꧀ꦧꦏ꧀꧉ꦄꦒꦺꦤ꧀ꦥꦸꦭꦶꦱꦶꦏꦼꦏꦭꦶꦃꦮꦻꦴꦱꦉꦁꦲꦁꦒꦺꦤꦶꦁꦏꦶꦱꦶꦤꦤ꧀ꦱꦩ꧀ꦥꦸꦤ꧀ꦢꦶꦥꦸꦤ꧀ꦗꦩ꧀ꦥꦺꦤꦶꦩꦮꦶꦲꦺꦴꦩ꧀ꦧꦺꦤ꧀ꦲꦺꦴꦩ꧀ꦧꦺꦤ꧀ꦲꦁꦒꦸꦂꦏꦭꦶꦃꦒꦼꦭꦱ꧀꧈ꦭꦗꦼꦁꦱꦩꦶꦏꦼꦱꦃ꧈ꦲꦤꦔꦶꦁꦱꦢꦺꦫꦺꦔꦶꦥꦸꦤ꧀ꦏꦼꦱꦃꦩꦮꦶꦚꦛꦼꦠꦶꦤꦩꦤꦩꦤꦶꦥꦸꦤ꧀ꦠꦼꦠꦶꦪꦁꦲꦶꦁꦏꦁꦱꦩꦶꦮꦺꦴꦤ꧀ꦠꦼꦤ꧀ꦲꦶꦁꦔꦿꦶꦏꦸꦠꦸꦮꦶꦤ꧀ꦤꦩꦤꦶꦁꦧꦁꦏꦼꦒꦫꦶꦁꦮꦻꦴ꧉ꦱꦏꦼꦱꦲꦶꦥꦸꦤ꧀ꦥꦸꦭꦶꦱꦶꦏꦭꦶꦃꦭꦗꦼꦁꦏꦩꦶꦉꦔꦤ꧀ꦮꦶꦕꦤ꧀ꦠꦼꦤꦶꦥꦸꦤ꧀ꦱꦼꦂꦱꦤ꧀ꦲꦶꦁꦏꦁꦤꦥ꧀ꦱꦸꦮꦻꦴꦩꦏꦠꦼꦤ꧀꧇ꦝꦸꦃꦧꦤ꧀ꦢꦫꦧꦤ꧀ꦢꦫ꧈ꦩꦸꦒꦶꦏꦥꦉꦔꦔꦒꦼꦩ꧀ꦉꦩ꧀ꦧꦒ꧀ꦏꦸꦭꦥꦸꦤꦶꦏ꧈ꦱꦩꦸꦏꦮꦶꦱ꧀ꦥꦸꦤꦶꦏꦢꦺꦫꦺꦁꦠꦩ꧀ꦠꦸꦚꦺꦴꦕꦺꦴꦒꦶꦏꦭꦶꦲꦤ꧀ꦮꦸꦗꦸꦢꦶꦥꦸꦤ꧀꧈ꦲꦸꦥꦩꦶꦤꦶꦥꦸꦤ꧀ꦏꦼꦩꦮꦺꦴꦤ꧀ꦠꦶꦪꦁꦲꦶꦁꦏꦁꦱ꧀ꦭꦼꦪꦺꦴꦫꦤ꧀ꦝꦮꦃꦲꦶꦁꦱꦶꦠꦶ꧈ꦥꦸꦤꦶꦏꦢꦺꦫꦺꦁꦏꦶꦤꦤ꧀ꦠꦼꦤ꧀ꦩꦤꦮꦶꦥꦶꦪꦩ꧀ꦧꦏꦶꦥꦸꦤ꧀ꦩꦼꦤ꧀ꦢꦼꦩ꧀꧈ꦱꦒꦼꦢ꧀ꦲꦸꦒꦶꦥꦶꦪꦩ꧀ꦧꦏꦶꦥꦸꦤ꧀ꦥꦸꦤꦶꦏꦲꦺꦢꦤ꧀꧈ꦲꦸꦠꦮꦶꦝꦼꦔ꧀ꦒ꧀ꦭꦼꦁ꧈ꦩꦏꦠꦼꦤ꧀ꦲꦸꦒꦶꦧꦁꦏꦼꦥꦸꦤꦶꦏꦧꦺꦴꦠꦼꦤ꧀ꦏꦼꦔꦶꦁꦢꦶꦥꦸꦤ꧀ꦮꦱ꧀ꦠꦤꦶꦧꦁꦏꦼꦢꦸꦥꦺꦃꦧꦢꦤꦶꦥꦸꦤ꧀ꦲꦱꦽꦥ꧀ꦲꦸꦠꦮꦶꦏꦏꦼꦤ꧀꧈ꦱꦒꦼꦢ꧀ꦲꦸꦒꦶꦥꦸꦤꦶꦏꦱꦠꦸꦁꦒꦭꦶꦁꦩꦸꦩ꧀ꦩꦶꦪꦼꦲꦭꦶꦪꦱ꧀ꦧꦁꦏꦼꦒꦫꦶꦁ꧈ꦏꦢꦺꦴꦱ꧀ꦢꦼꦤꦼꦲꦶꦁꦏꦁꦱꦩ꧀ꦥꦸꦤ꧀ꦏꦥꦿꦶꦏ꧀ꦱꦤꦤ꧀ꦲꦶꦁꦥꦚ꧀ꦗꦼꦤꦼꦔꦤ꧀ꦱꦢꦪꦮꦻꦴ꧉ꦱꦩ꧀ꦥꦸꦤ꧀ꦏꦭꦶꦭꦤ꧀꧉ꦯꦱꦩ꧀ꦥꦸꦤꦶꦁꦲꦶꦁꦒꦿꦶꦪꦱꦼꦥꦼꦤ꧀ꦩꦭꦶꦃ꧈ꦱꦲꦧꦁꦏꦼꦱꦩ꧀ꦥꦸꦤ꧀ꦢꦶꦥꦸꦤ꧀ꦫꦶꦩꦠꦶ꧈ꦭꦗꦼꦁꦱꦒꦼꦢ꧀ꦲꦔ꧀ꦭꦗꦼꦔꦏꦼꦤ꧀ꦉꦩ꧀ꦧꦒ꧀ꦲꦶꦁꦔꦗꦼꦁꦮꦻꦴ꧉ꦩꦶꦠꦸꦫꦸꦠ꧀ꦉꦩ꧀ꦧꦒꦶꦥꦸꦤ꧀ꦡꦸꦮꦤ꧀ꦦꦿꦺꦴꦥꦼꦱꦺꦴꦂ Higgs꧈ꦏꦸꦭꦭꦗꦼꦁꦲꦤ꧀ꦢꦩꦼꦭ꧀ꦥꦿꦠꦼꦭꦤ꧀ꦏꦮꦺꦴꦤ꧀ꦠꦼꦤꦤꦶꦁꦱꦢꦪꦥꦶꦫꦤ꧀ꦠꦺꦴꦱ꧀ꦥꦶꦫꦤ꧀ꦠꦺꦴꦱ꧀ꦲꦶꦁꦏꦁꦥꦽꦭꦸꦏꦧꦼꦏ꧀ꦠꦏꦼꦏꦼꦱꦲꦤ꧀ꦮꦻꦴ꧈ꦭꦤ꧀ꦏꦸꦭꦱꦢꦪꦱꦩꦶꦱꦉꦩ꧀ꦧꦒ꧀꧈ꦧꦶꦭꦶꦃꦏꦲꦺꦴꦤ꧀ꦠꦸꦔꦤꦶꦥꦸꦤ꧀ꦲꦶꦁꦠꦼꦩ꧀ꦧꦼꦧꦝꦼꦏꦧꦒꦶꦮꦫꦢꦶꦤ꧀꧈ꦢꦼꦤꦼꦩꦤꦮꦶꦱꦭꦃꦱꦠꦸꦁꦒꦭ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦁꦥꦼꦗꦃ꧈ꦧꦒꦼꦪꦤꦶꦥꦸꦤ꧀ꦮꦻꦴꦭꦗꦼꦁꦏꦧꦒꦼꦩꦭꦶꦃꦝꦠꦼꦁꦲꦶꦁꦏꦁꦏꦤ꧀ꦠꦸꦤ꧀꧉ꦆꦁꦱꦏꦮꦶꦠ꧀ꦥꦚ꧀ꦕꦺꦤꦶꦥꦸꦤ꧀ꦏꦸꦭꦧꦺꦴꦠꦼꦤ꧀ꦲꦚꦺꦴꦤ꧀ꦝꦺꦴꦔꦶ꧈ꦲꦮꦶꦠ꧀ꦏꦼꦱꦃꦏꦸꦭꦥꦸꦤꦶꦏꦤꦩꦸꦁꦥꦽꦭꦸꦧꦝꦼꦔꦼꦤ꧀ꦠꦱ꧀ꦲꦤꦏ꧀ꦏꦸꦭ꧈ꦲꦤꦔꦶꦁꦱꦤꦺꦱꦶꦥꦸꦤ꧀ꦱꦩꦶꦕꦫꦶꦪꦺꦴꦱ꧀꧈ꦧꦶꦭꦶꦃꦲꦶꦁꦠꦼꦩ꧀ꦧꦼꦮꦶꦁꦏꦶꦔꦶꦥꦸꦤ꧀ꦏꦸꦭꦱꦢꦪꦫꦏ꧀ꦲꦶꦁꦒꦶꦃꦏꦼꦢꦃꦒꦼꦱꦁ꧈ꦭꦤ꧀ꦲꦸꦥꦩꦶꦏꦸꦭꦔꦤ꧀ꦠꦺꦴꦱ꧀ꦢꦸꦩꦸꦒꦶꦲꦶꦁꦥꦼꦗꦃ꧈ꦠꦩ꧀ꦠꦸꦤꦶꦥꦸꦤ꧀ꦲꦤꦏ꧀ꦏꦸꦭꦫꦏ꧀ꦲꦶꦁꦒꦶꦃꦏꦼꦢꦃꦒꦝꦃꦲꦂꦠꦏꦁꦒꦼꦒꦼꦱꦔꦶꦥꦸꦤ꧀꧈ꦗꦭꦫꦤ꧀ꦱꦏꦶꦁꦥꦸꦤꦶꦏ꧈ꦏꦸꦭꦲꦶꦁꦒꦶꦃꦭꦗꦼꦁꦩꦶꦠꦸꦫꦸꦠ꧀꧉ꦱꦱꦩ꧀ꦥꦸꦤꦶꦥꦸꦤ꧀ꦩꦏꦠꦼꦤ꧀꧈ꦑꦥꦶꦠꦤ꧀ꦎꦂꦩꦼꦭꦗꦼꦁꦥꦶꦠꦏꦺꦤ꧀꧈ꦱꦸꦥꦢꦺꦴꦱ꧀ꦏꦠꦩ꧀ꦠꦺꦴꦏ꧀ꦤꦏꦸꦮꦗꦶꦧꦤꦶꦁꦱꦠꦸꦁꦒꦭ꧀ꦱꦠꦸꦁꦒꦭꦶꦥꦸꦤ꧀꧈ꦥꦸꦁꦏꦱꦤꦶꦁꦉꦩ꧀ꦧꦒ꧀꧈ꦏꦸꦭꦢꦶꦥꦸꦤ꧀ꦮꦗꦶꦧꦏꦼꦤ꧀ꦢꦢꦺꦴꦱ꧀ꦕꦸꦕꦸꦏꦶꦁꦭꦩ꧀ꦥꦃꦥꦶꦠꦼꦢꦃꦩꦂꦒꦶ꧈ꦦꦿꦺꦴꦥꦼꦱꦺꦴꦂꦲ꦳ꦶꦒ꧀ꦒ꧀ꦱ꧀ꦢꦶꦥꦸꦤ꧀ꦮꦗꦶꦧꦏꦼꦤ꧀ꦢꦢꦺꦴꦱ꧀ꦗꦸꦫꦸꦧꦱꦤꦶꦥꦸꦤ꧀꧈ꦭꦤ꧀ꦑꦥꦶꦠꦤ꧀ꦎꦂꦩꦼꦢꦢꦺꦴꦱ꧀ꦲꦶꦤ꧀ꦱꦶꦚꦸꦫꦶꦥꦸꦤ꧀ꦠꦸꦮꦶꦤ꧀ꦥꦔꦒꦼꦔꦶꦁꦥꦿꦗꦸꦫꦶꦠ꧀꧉
(ꦧꦝꦼꦏꦱꦩ꧀ꦧꦼꦠꦤ꧀)꧉
ꦥꦮꦂꦠꦺꦴꦱ꧀ꦱꦏꦶꦁꦉꦝꦏ꧀ꦱꦶꦫꦢꦺꦤ꧀ꦯꦸꦩꦢꦶꦂꦗ꧈ꦲꦶꦁꦦꦏꦭꦺꦴꦔꦤ꧀꧉ꦦꦏꦧꦫꦤ꧀ꦥꦚ꧀ꦗꦼꦤꦼꦔꦤ꧀ꦱꦩ꧀ꦥꦸꦤ꧀ꦏꦮꦿꦠ꧀ꦲꦶꦁꦑꦗꦮꦺꦤ꧀꧉ꦤꦸꦮꦸꦤ꧀꧉ꦥꦶꦠꦏꦺꦤ꧀ꦥꦚ꧀ꦗꦼꦤꦼꦔꦤ꧀ꦧꦧ꧀ꦠꦶꦪꦁꦥꦸꦤꦶꦏ꧈ꦲꦶꦁꦒꦶꦃꦲꦶꦁꦏꦁꦚꦩ꧀ꦧꦸꦠ꧀ꦢꦩꦼꦭ꧀ꦲꦶꦁꦏꦗꦮꦺꦤ꧀꧉ꦲꦱꦉꦁꦥꦸꦤꦶꦏꦥꦚ꧀ꦗꦼꦤꦼꦔꦤ꧀ꦏꦏꦶꦤ꧀ꦠꦸꦤꦤ꧀ꦏꦗꦮꦺꦤ꧀ꦩꦶꦤꦺꦴꦁꦏꦕꦺꦴꦤ꧀ꦠꦺꦴ꧈ꦱꦸꦏꦸꦂꦏꦥꦉꦁꦩꦿꦢꦶꦤꦏꦼꦤ꧀꧈ꦩꦸꦫꦶꦃꦮꦺꦴꦤ꧀ꦠꦼꦤ꧀ꦥꦫꦩꦶꦠꦿꦲꦶꦁꦏꦁꦭꦗꦼꦁꦏꦥꦉꦁꦱꦩꦶꦊꦁꦒꦤꦤ꧀꧉ꦮꦁꦱꦸꦭꦤ꧀ꦥꦶꦠꦏꦺꦤꦶꦥꦸꦤ꧀ꦠꦸꦮꦤ꧀ꦯ꧀꧉ꦣꦶꦂꦗꦱꦸꦩꦂꦠꦲꦶꦁꦑꦿꦏ꧀ꦱꦴꦤ꧀꧉
I.ꦲꦶꦱꦶꦤꦶꦁꦦꦚ꧀ꦗꦶꦦꦸꦱ꧀ꦠꦏꦏꦭꦶꦲꦤ꧀ꦑꦗꦮꦺꦤ꧀ꦧꦼꦢ꧉
II.ꦊꦁꦒꦤꦤ꧀ꦦꦚ꧀ꦗꦶꦦꦸꦱ꧀ꦠꦏꦏꦭꦶꦲꦤ꧀ꦑꦗꦮꦺꦤ꧀ꦧꦧꦂꦥꦱꦤ꧀꧈ꦧꦺꦴꦠꦼꦤ꧀ꦲꦁꦱꦭ꧀ꦱꦸꦢꦤ꧀꧉ꦟꦔꦶꦁꦠꦶꦪꦁꦱꦒꦼꦢ꧀ꦲꦔ꧀ꦭꦼꦧꦼꦠꦏꦼꦤ꧀ꦊꦁꦒꦤꦤ꧀ꦱꦮꦂꦤꦶꦕꦕꦃꦱꦏꦮꦤ꧀ꦲꦶꦗꦶ꧈ꦠꦸꦮꦶꦤ꧀ꦱꦩ꧀ꦥꦸꦤ꧀ꦲꦩ꧀ꦧꦪꦂ꧈ꦲꦁꦱꦭ꧀ꦱꦭꦃꦱꦠꦸꦁꦒꦭꦶꦁꦏꦭꦮꦂꦠꦶꦮꦻꦴꦊꦭꦲꦤꦤ꧀꧉
III.ꦏꦗꦮꦺꦤ꧀ꦥꦚ꧀ꦕꦺꦤ꧀ꦲꦶꦱꦶꦤꦶꦥꦸꦤ꧀ꦏꦴꦁꦏꦃꦏꦢꦺꦴꦱ꧀ꦤꦩꦤꦶꦥꦸꦤ꧀꧉
