꧋ꦱꦼꦂꦱꦤ꧀ Quick ꦲꦩꦁꦱꦸꦭꦶ꧇ ꦩꦤꦮꦶꦧꦺꦴꦠꦼꦤ꧀ꦲꦁꦱꦭ꧀ꦢꦩꦼꦭ꧀꧈ꦲꦶꦁꦒꦶꦃꦱꦧꦭꦺꦴꦚ꧀ꦗꦏꦸꦭꦲꦶꦁꦏꦁꦱꦩ꧀ꦥꦸꦤ꧀ꦏꦼꦩꦮꦺꦴꦤ꧀꧉ꦲꦤꦔꦶꦁꦩꦤꦮꦶꦲꦁꦱꦭ꧀ꦲꦁꦱꦭꦤ꧀꧈ꦥꦸꦤꦥꦧꦺꦴꦠꦼꦤ꧀ꦏꦼꦏꦛꦲꦼꦤ꧀ꦱꦲꦸꦥꦩꦶꦏꦸꦭꦚꦸꦮꦸꦤ꧀ꦒꦁꦱꦭ꧀ꦥꦽꦱꦺꦤ꧀ꦱꦏꦶꦁꦒꦸꦁꦒꦸꦔꦶꦁꦲꦁꦱꦭ꧀ꦲꦁꦱꦭꦤꦶꦥꦸꦤ꧀ꦮꦲꦸ꧉
꧋ꦏꦸꦭꦭꦗꦼꦁꦮꦶꦕꦤ꧀ꦠꦼꦤ꧀꧇ ꦭꦸꦮꦶꦃꦧꦼꦕꦶꦏ꧀ꦢꦶꦠꦩ꧀ꦠꦺꦴꦏꦏꦼꦧꦲꦼꦱꦥꦸꦭꦸꦃꦥꦽꦱꦺꦤ꧀꧈ꦲꦩꦂꦒꦱꦼꦂꦱꦤ꧀ Quick ꦧꦶꦱꦲꦸꦒꦲꦶꦭꦁꦚꦮꦤꦼ꧈ꦲꦺꦴꦫꦧꦼꦢꦏꦪꦲꦏꦸꦏꦧꦺꦃ꧉
꧋ꦱꦼꦂꦱꦤ꧀ Quick ꦲꦩꦁꦱꦸꦭꦶ꧇ ꦤꦸꦮꦸꦤ꧀ꦱꦔꦼꦠ꧀꧇ꦧꦤ꧀ꦢꦫ꧈ꦲꦤꦔꦶꦁꦥꦩꦁꦒꦶꦃꦏꦸꦭ꧈ꦱꦩꦤ꧀ꦠꦼꦤ꧀ꦥꦸꦤꦶꦏꦏꦼꦏꦛꦲꦼꦤ꧀꧈ꦒꦁꦱꦭ꧀ꦥꦽꦱꦺꦤ꧀ꦏꦼꦩꦮꦺꦴꦤ꧀ꦏꦸꦭꦱꦩ꧀ꦥꦸꦤ꧀ꦤꦫꦶꦩꦃꦱꦔꦼꦠ꧀꧉
꧋ꦢꦢꦺꦴꦱ꧀ꦲꦶꦁꦒꦶꦃꦭꦗꦼꦁꦏꦠꦩ꧀ꦠꦺꦴꦏꦏꦼꦤ꧀꧈ꦧꦶꦭꦶꦃꦱꦼꦂꦱꦤ꧀ Quick ꦧꦝꦼꦥꦶꦏꦤ꧀ꦠꦸꦏ꧀ꦒꦁꦱꦭ꧀ꦥꦽꦱꦺꦤ꧀ꦱꦏꦶꦁꦲꦁꦱꦭ꧀ꦲꦁꦱꦭꦤꦶꦥꦸꦤ꧀ꦏꦲꦺꦴꦤ꧀ꦠꦸꦔꦤ꧀ꦱꦩꦤ꧀ꦠꦼꦤ꧀ꦥꦸꦤꦶꦏꦩꦤꦮꦶꦏꦭꦏꦸꦮꦤꦶꦥꦸꦤ꧀ꦱꦲꦼꦱꦲꦩꦶꦠꦸꦫꦸꦠ꧀ꦲꦶꦁꦥꦽꦤ꧀ꦠꦃ꧉ꦱꦱꦩ꧀ꦥꦸꦤꦶꦥꦸꦤ꧀ꦱꦼꦂꦱꦤ꧀ Quick ꦭꦗꦼꦁꦢꦶꦥꦸꦤ꧀ꦱꦸꦏꦤꦶꦲꦸꦚ꧀ꦗꦸꦏ꧀ꦲꦸꦚ꧀ꦗꦸꦏꦤ꧀꧈ꦱꦲꦏꦥꦸꦫꦶꦃꦔꦸꦚ꧀ꦗꦸꦏ꧀꧈ꦩꦶꦤꦺꦴꦁꦏꦥꦏꦸꦂꦩꦠꦤ꧀꧈ꦩꦸꦫꦶꦃꦲꦶꦁꦏꦁꦧꦝꦼꦢꦶꦥꦸꦤ꧀ꦠꦶꦤ꧀ꦢꦏꦏꦼꦤ꧀ꦮꦲꦸꦱꦒꦼꦢꦊꦱ꧀ꦠꦤ꧀ꦠꦸꦤ꧀ꦏꦤ꧀ꦛꦶꦮꦶꦭꦸꦗꦼꦁ꧈ꦲꦤꦔꦶꦁꦱꦼꦂꦱꦤ꧀ꦐꦸꦮꦶꦕ꧀ꦏ꧀ꦧꦺꦴꦠꦼꦤ꧀ꦥꦸꦫꦸꦤ꧀ꦭꦶꦁꦒꦶꦃ꧈ꦧꦺꦴꦏ꧀ꦩꦤꦮꦶꦗꦭꦫꦤ꧀ꦱꦏꦶꦁꦏꦸꦭꦶꦤꦲꦢꦼꦒꦶꦁꦱꦫꦝꦝꦸ꧉ꦱꦼꦂꦱꦤ꧀ Quick ꦲꦮꦶꦕꦤ꧀ꦠꦼꦤ꧀꧇ꦧꦤ꧀ꦢꦫꦧꦤ꧀ꦢꦫ꧈ꦥꦸꦤꦥꦱꦥꦸꦤꦶꦏꦏꦸꦭꦏꦥꦼꦠꦁꦢꦢꦺꦴꦱ꧀ꦮꦂꦒꦤꦶꦁꦥꦒꦸꦪꦸꦧꦤ꧀ꦲꦶꦁꦏꦁꦲꦩ꧀ꦧꦼꦧꦪꦤꦶꦲꦶꦁꦒꦁꦱꦭ꧀ꦥꦽꦱꦺꦤꦤ꧀ꦥꦸꦤꦶꦏ꧈ꦏꦥꦉꦁꦩꦠꦸꦂꦱꦏꦼꦝꦶꦏ꧀꧉
꧋ꦥꦤꦸꦮꦸꦤꦶꦥꦸꦤ꧀ꦱꦼꦂꦱꦤ꧀ Quick ꦮꦲꦸꦱꦤꦭꦶꦏꦏꦥꦉꦔꦏꦼꦤ꧀꧉ꦱꦼꦂꦱꦤ꧀ꦭꦗꦼꦁꦤꦼꦝꦏꦠꦿꦔꦤ꧀꧈ꦱꦥꦶꦤ꧀ꦠꦼꦤ꧀ꦩꦼꦁꦒꦃꦲꦒꦼꦔꦶꦁꦱꦼꦭꦲꦶꦁꦏꦁꦧꦝꦼꦏꦗꦼꦧ꧀ꦭꦺꦴꦱꦏꦼꦤ꧀꧉
꧋ꦏꦸꦭꦩꦁꦱꦸꦭꦶꦩꦤꦮꦶꦧꦺꦴꦠꦼꦤ꧀ꦱꦒꦼꦢ꧀ꦱꦸꦏꦏꦠꦿꦔꦤ꧀ꦲꦶꦁꦧꦧ꧀ꦥꦸꦤꦶꦏ꧈ꦲꦩꦂꦒꦶꦏꦸꦭꦢꦺꦫꦺꦁꦤꦠꦼꦱꦸꦩꦼꦉꦥ꧀ꦝꦠꦼꦁꦱꦼꦭꦱꦼꦭꦮꦲꦸ꧉ꦲꦤꦔꦶꦁꦏꦸꦭꦲꦶꦁꦒꦶꦃꦩꦔꦽꦠꦺꦴꦱ꧀꧈ꦧꦶꦭꦶꦃꦱꦼꦭꦥꦸꦤꦶꦏꦠꦩ꧀ꦠꦸꦲꦒꦼꦁꦱꦔꦼꦠ꧀꧈ꦧꦺꦴꦏ꧀ꦩꦤꦮꦶꦲꦒꦼꦔꦶꦥꦸꦤ꧀ꦱꦩꦶꦏꦭꦶꦪꦤ꧀ꦒꦿꦶꦗ꧉
꧋ꦱꦼꦂꦱꦤ꧀ Quick ꦕꦫꦶꦪꦺꦴꦱ꧀ꦩꦏꦠꦼꦤ꧀꧇ ꦱꦲꦸꦥꦩꦶꦱꦼꦭꦮꦲꦸꦲꦒꦼꦔꦶꦥꦸꦤ꧀ꦱꦒꦿꦶꦗ꧈ꦠꦩ꧀ꦠꦸꦤꦶꦥꦸꦤ꧀ꦤꦼꦭꦱꦏꦼꦤ꧀ꦏꦛꦃ꧉ꦲꦶꦁꦏꦁꦏꦁꦒꦼꦔꦿꦶꦱꦏ꧀ꦥꦸꦤꦶꦏꦏꦼꦢꦃꦝꦶꦤꦩꦶꦠ꧀꧈ꦲꦤꦔꦶꦁꦧꦝꦼꦏꦮꦿꦠꦼꦤ꧀ꦱꦲꦸꦥꦩꦶꦏꦛꦲꦶꦥꦸꦤ꧀ꦱꦩꦤ꧀ꦠꦼꦤ꧀ꦢꦶꦥꦸꦤ꧀ꦲꦼꦮꦿꦠ꧀ꦲꦶꦁꦲꦸꦤ꧀ꦠꦩꦼꦢꦭ꧀ꦱꦒꦤ꧀ꦠꦼꦤ꧀ꦮꦼꦝꦶ꧉ꦏꦢꦺꦴꦱ꧀ꦥꦸꦤ꧀ꦢꦶꦩꦼꦁꦒꦲꦶꦁꦥꦚ꧀ꦗꦼꦤꦼꦔꦤ꧀꧈ꦧꦤ꧀ꦢꦫꦏꦥꦶꦠꦤ꧀꧈ꦲꦸꦥꦩꦶꦤꦩꦸꦁꦲꦩ꧀ꦧꦼꦏ꧀ꦠꦥꦶꦫꦤ꧀ꦠꦺꦴꦱꦶꦥꦸꦤ꧀ꦏꦼꦩꦮꦺꦴꦤ꧀꧈ꦥꦚ꧀ꦗꦼꦤꦼꦔꦤ꧀ꦫꦏ꧀ꦲꦶꦁꦒꦶꦃꦠꦏ꧀ꦱꦶꦃꦲꦺꦔꦼꦠ꧀ꦝꦠꦼꦁꦥꦶꦫꦤ꧀ꦠꦺꦴꦱꦶꦥꦸꦤ꧀ꦲꦤ꧀ꦝꦶꦤꦩꦶꦠ꧀ꦠꦶꦪꦁꦧꦸꦂ꧈ꦲꦶꦁꦏꦁꦲꦢꦩꦼꦭ꧀ꦠꦶꦮꦱꦶꦁꦥꦶꦤ꧀ꦠꦼꦤ꧀ꦥꦶꦤ꧀ꦠꦼꦤ꧀ꦠꦶꦪꦁ꧈ꦱꦲꦠꦶꦪꦁꦏꦏꦤ꧀ꦠꦸꦤꦤꦶꦥꦸꦤ꧀ꦱꦩꦶꦏꦢꦺꦴꦱ꧀ꦢꦶꦥꦸꦤ꧀ꦫꦕꦸꦤ꧀꧉
꧋ꦏꦥꦶꦠꦤ꧀ Orme ꦩꦁꦱꦸꦭꦶ꧇ ꦲꦶꦪ꧈ꦲꦏꦸꦲꦶꦱꦶꦃꦲꦺꦭꦶꦁ꧈ꦲꦤꦔꦶꦁꦱꦲꦶꦏꦶꦲꦤꦥꦶꦫꦤꦶꦁꦲꦤ꧀ꦝꦶꦤꦩꦶꦠ꧀ꦏꦁꦭꦸꦮꦶꦃꦏꦸꦮꦠ꧀ꦩꦤꦺꦃ꧈ꦲꦸꦠꦮꦥꦚ꧀ꦗꦼꦧ꧀ꦭꦸꦒꦼꦔꦿꦸꦱꦏ꧀ꦤꦱꦏꦏꦼꦧꦔꦼꦠ꧀꧈ꦗꦗꦭ꧀ꦱꦼꦱꦸꦏ꧀ꦥꦝꦒꦺꦴꦭꦺꦏ꧀ꦏꦠꦿꦔꦤ꧀꧈ꦱꦼꦂꦱꦤ꧀꧉
꧋ꦱꦼꦂꦱꦤ꧀ Quick ꦥꦶꦠꦏꦺꦤ꧀꧇ ꦲꦶꦁꦒꦶꦃꦧꦤ꧀ꦢꦫꦏꦥꦶꦠꦤ꧀꧈ꦲꦤꦔꦶꦁꦱꦶꦤ꧀ꦠꦼꦤ꧀ꦲꦶꦁꦏꦁꦲꦩ꧀ꦧꦪꦂꦥꦸꦤꦶꦏ꧉ꦲꦮꦶꦠ꧀ꦧꦝꦼꦧꦺꦴꦠꦼꦤ꧀ꦱꦒꦼꦢ꧀ꦲꦁꦱꦭ꧀ꦭꦠꦸꦲꦶꦁꦏꦁꦲꦩ꧀ꦧꦧꦪꦤꦶꦥꦸꦤꦶꦏꦩꦤꦮꦶꦧꦺꦴꦠꦼꦤ꧀ꦏꦤ꧀ꦛꦶꦲꦂꦠ꧉ꦏꦸꦭꦱꦩ꧀ꦥꦸꦤ꧀ꦔꦼꦠꦁ꧈ꦧꦶꦭꦶꦃꦉꦒꦶꦤꦶꦁꦥꦶꦫꦤ꧀ꦠꦺꦴꦱ꧀ꦥꦶꦫꦤ꧀ꦠꦺꦴꦱ꧀ꦏꦁꦒꦼꦲꦚ꧀ꦗꦼꦧ꧀ꦭꦸꦒꦏꦼꦤ꧀ꦮꦲꦸꦭꦤ꧀ꦱꦚ꧀ꦗꦠꦱꦺꦏꦼꦠ꧀ꦱꦲꦺꦴꦧꦠ꧀ꦩꦶꦩꦶꦱꦶꦥꦸꦤ꧀꧈ꦭꦤ꧀ꦱꦤꦺꦱ꧀ꦱꦤꦺꦱꦶꦥꦸꦤ꧀ꦩꦭꦶꦃꦲꦶꦁꦏꦁꦥꦽꦭꦸꦥꦽꦭꦸ꧈ꦏꦢꦺꦴꦱ꧀ꦠꦲꦸꦤ꧀ꦠꦱꦥꦤꦸꦁꦒꦶꦭꦤꦶꦥꦸꦤ꧀꧈ꦥꦸꦤꦶꦏꦧꦺꦴꦠꦼꦤ꧀ꦏꦶꦫꦁꦱꦏꦶꦁ 18.009 ꦫꦸꦥꦶꦪꦃ꧉
꧋ꦏꦸꦭꦚꦩ꧀ꦧꦼꦠꦶ꧇ꦏꦶꦤ꧀ꦠꦼꦤ꧀ꦏꦸꦭꦲꦂꦠꦱꦩꦤ꧀ꦠꦼꦤ꧀ꦥꦸꦤꦶꦏꦏꦸꦭꦲꦶꦁꦒꦶꦃꦒꦝꦃ꧈ꦲꦤꦔꦶꦁꦲꦮꦂꦤꦶꦲꦼꦩꦱ꧀꧉ꦱꦁꦥꦸꦠꦿꦶꦫꦠꦸꦤꦶꦁꦄꦨꦠꦶ꧈ꦲꦁꦒꦺꦤꦶꦥꦸꦤ꧀ꦥꦫꦶꦁꦲꦼꦩꦱ꧀ꦝꦠꦼꦁꦏꦸꦭ꧈ꦏꦛꦲꦶꦥꦸꦤ꧀ꦱꦏꦸꦮꦮꦶꦏꦸꦭꦲꦩ꧀ꦧꦼꦏ꧀ꦠ꧉
꧋ꦏꦥꦶꦠꦤ꧀ Orme ꦭꦗꦼꦁꦮꦶꦕꦤ꧀ꦠꦼꦤ꧀꧇ ꦱꦤꦢꦾꦤ꧀ꦏꦸꦭꦥꦸꦤꦶꦏꦩ꧀ꦭꦫꦠ꧀ꦲꦤꦔꦶꦁꦩꦤꦮꦶꦥꦽꦭꦸ꧈ꦏꦸꦭꦲꦶꦁꦒꦶꦃꦱꦒꦼꦢ꧀ꦔꦸꦫꦸꦤꦶꦲꦂꦠ 6000 ꦫꦸꦥꦶꦪꦃ꧈ꦲꦩꦶꦭꦧꦧ꧀ꦲꦂꦠꦧꦺꦴꦠꦼꦤ꧀ꦥꦽꦭꦸꦏꦩꦤꦃꦥꦚ꧀ꦗꦁ꧉ꦲꦶꦁꦏꦁꦢꦢꦺꦴꦱ꧀ꦥꦶꦠꦏꦼꦤꦤ꧀ꦱꦩꦁꦏꦼ꧈ꦲꦶꦁꦒꦶꦃꦥꦸꦤꦶꦏꦥꦸꦤꦥꦏꦸꦭꦱꦢꦪꦱꦩ꧀ꦥꦸꦤ꧀ꦫꦸꦗꦸꦏ꧀꧈ꦲꦤꦶꦤ꧀ꦢꦏꦏꦼꦤ꧀ꦥꦢꦩꦼꦭꦤ꧀ꦮꦲꦸꦔꦤ꧀ꦠꦺꦴꦱ꧀ꦱꦫꦩ꧀ꦥꦸꦔꦶꦥꦸꦤ꧀꧈ꦱꦤꦢꦾꦤ꧀ꦮꦺꦴꦤ꧀ꦠꦼꦤꦥꦸꦤꦥꦥꦸꦤꦥꦏꦼꦩꦮꦺꦴꦤ꧀꧉
꧋ꦏꦸꦭꦱꦢꦪꦱꦩꦶꦲꦩꦁꦱꦸꦭꦶꦩꦤꦮꦶꦥꦸꦫꦸꦤ꧀꧉
꧋ꦱꦭꦗꦼꦔꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦱꦭꦃꦱꦠꦸꦁꦒꦭ꧀ꦲꦶꦁꦏꦁꦥꦶꦠꦏꦺꦤ꧀ꦩꦏꦠꦼꦤ꧀꧇ ꦥꦸꦤꦥꦠꦏ꧀ꦱꦶꦃꦮꦺꦴꦤ꧀ꦠꦼꦤ꧀ꦲꦶꦁꦏꦁꦧꦝꦼꦒꦝꦃꦉꦩ꧀ꦧꦒ꧀ꦩꦭꦶꦃ꧉
꧋ꦏꦸꦭꦲꦩꦁꦱꦸꦭꦶ꧇ꦎ꧈ꦲꦶꦁꦒꦶꦃ꧉ꦏꦸꦭꦏꦱꦸꦥꦺꦤ꧀ꦩꦶꦠꦸꦁꦏꦱ꧀ꦩꦏꦠꦼꦤ꧀꧈ꦩꦤꦮꦶꦏꦸꦭꦱꦢꦪꦲꦶꦁꦠꦼꦩ꧀ꦧꦼꦱꦒꦼꦢ꧀ꦢꦸꦩꦸꦒꦶꦲꦶꦁꦏꦶꦛꦩꦸꦂ꧈ꦱꦩ꧀ꦥꦸꦤ꧀ꦥꦶꦱꦤ꧀ꦥꦶꦱꦤ꧀ꦮꦺꦴꦤ꧀ꦠꦼꦤ꧀ꦱꦭꦃꦱꦠꦸꦁꦒꦭ꧀ꦲꦶꦁꦏꦁꦏꦸꦩꦮꦤꦶꦲꦔꦽꦫꦶꦝꦸꦝꦠꦼꦁꦯꦁꦥꦸꦠꦿꦶ Walda Nagasta꧉ꦲꦮꦶꦠ꧀ꦩꦤꦮꦶꦱꦭꦃꦱꦠꦸꦁꦒꦭ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦁꦏꦱꦸꦥꦺꦤ꧀ꦲꦶꦁꦧꦧ꧀ꦥꦸꦤꦶꦏ꧈ꦱꦒꦼꦢ꧀ꦲꦸꦒꦶꦧꦺꦴꦁꦱꦄꦧꦠꦶꦲꦩꦼꦗꦲꦶꦝꦠꦼꦁꦏꦸꦭꦱꦢꦪ꧈ꦲꦩꦂꦒꦶꦯꦁꦥꦸꦠꦿꦶ Walda Nagasta ꦥꦸꦤꦶꦏꦱꦠꦸꦁꦒꦶꦭꦶꦁꦮꦤꦶꦠꦲꦶꦁꦏꦁꦏꦲꦗꦶꦲꦗꦶ꧈ꦏꦼꦔꦶꦔꦶꦥꦸꦤ꧀ꦏꦿꦩꦤꦩꦸꦁꦏꦭꦶꦪꦤ꧀ꦱꦝꦺꦫꦺꦏꦶꦥꦸꦤ꧀ꦥꦶꦪꦩ꧀ꦧꦏ꧀꧉
꧋ꦥꦿꦺꦴꦥꦼꦱꦺꦴꦂ Higgs ꦮꦶꦕꦤ꧀ꦠꦼꦤ꧀ꦝꦠꦼꦁꦏꦥꦶꦠꦤ꧀ꦩꦏꦠꦼꦤ꧀꧇ ꦏꦺꦴꦮꦼꦏꦿꦸꦔꦸ Olivier꧈ꦏꦶꦫꦏꦸꦲꦁꦒꦺꦴꦤꦼꦝꦺꦴꦏ꧀ꦠꦼꦂꦔꦺꦴꦩꦺꦴꦁꦩꦁꦏꦺꦴꦤꦺꦴꦏꦸꦮꦶ꧈ꦱꦶꦁꦢꦶꦏꦉꦥꦏꦼꦏꦺꦴꦮꦼ꧈ꦗꦭꦫꦤ꧀ꦭꦶꦪꦭꦶꦪꦤꦼꦮꦶꦱ꧀ꦏꦼꦭꦶꦮꦠ꧀ꦲꦸꦩꦸꦉꦏꦁꦒꦺꦴꦩꦁꦏꦺꦴꦤꦺꦴꦏꦸꦮꦶ꧉
꧋ꦏꦥꦶꦠꦤ꧀ꦭꦗꦼꦁꦮꦶꦕꦤ꧀ꦠꦼꦤ꧀ꦱꦼꦩꦸꦏꦭꦶꦚ꧀ꦕꦸꦠꦤ꧀꧈ꦩꦸꦭꦪꦧꦼꦤꦼꦂ꧈ꦱꦠꦼꦩꦼꦤꦼꦩꦺꦴꦤꦺꦴ꧈ꦲꦏꦸꦝꦼꦮꦼꦲꦸꦩꦸꦂꦏꦸꦪꦮꦶꦱ꧀ꦏꦼꦭꦶꦮꦠ꧀꧈ꦭꦤ꧀ꦠꦸꦩꦿꦥꦼꦲꦏꦸꦝꦼꦮꦼ꧈ꦥꦚ꧀ꦗꦼꦤꦼꦔꦤ꧀ꦩꦸꦲꦺꦴꦫꦥꦽꦭꦸꦚꦩꦫꦏꦼꦲꦏꦸꦩꦸꦁꦒꦸꦲꦶꦁꦲꦪꦸꦤꦼꦤꦺꦴꦤꦃꦲꦶꦉꦁꦩꦲꦸ꧉
꧋ꦱꦼꦂꦱꦤ꧀ Quick ꦲꦧꦶꦧꦶꦱꦶꦏ꧀ꦱꦗꦏ꧀ꦮꦢꦺꦴꦱ꧀꧇ ꦧꦤ꧀ꦢꦫ꧈ꦱꦩ꧀ꦥꦸꦤ꧀ꦱꦺꦴꦏ꧀ꦲꦸꦩꦸꦏ꧀ꦱꦲꦺꦱ꧀ꦠꦸ꧈ꦱꦩ꧀ꦥꦸꦤ꧀ꦱꦺꦴꦏ꧀ꦲꦸꦩꦸꦏ꧀꧈ꦲꦮꦶꦠ꧀ꦠꦶꦪꦁꦲꦺꦱ꧀ꦠꦿꦶꦥꦸꦤꦶꦏꦱꦠꦸꦁꦒꦶꦭꦶꦁꦧꦫꦁꦲꦶꦁꦏꦁꦧꦺꦴꦠꦼꦤ꧀ꦏꦼꦔꦶꦁꦏꦠꦩ꧀ꦠꦺꦴꦏꦏꦼꦤ꧀꧈ꦢꦶꦤ꧀ꦠꦼꦤ꧀ꦥꦸꦤꦶꦏꦏꦼꦠꦶꦔꦭ꧀ꦫꦕꦸꦤ꧀꧈ꦧꦼꦚ꧀ꦗꦶꦁꦲꦺꦚ꧀ꦗꦶꦁꦏꦼꦠꦶꦔꦭ꧀ꦩꦧꦼꦤ꧀꧈ꦤꦩꦸꦁꦦꦔꦼꦫꦤ꧀ꦥꦶꦪꦩ꧀ꦧꦏ꧀ꦲꦶꦁꦏꦁꦔꦸꦤꦶꦔꦤꦶꦩꦼꦁꦒꦲꦶꦁꦱꦧꦧ꧀ꦱꦧꦧꦶꦥꦸꦤ꧀꧉ꦲꦩꦶꦭꦥꦚ꧀ꦗꦼꦤꦼꦔꦤ꧀ꦱꦩ꧀ꦥꦸꦤ꧀ꦲꦸꦩꦸꦏ꧀꧈ꦲꦩꦂꦒꦶꦠꦶꦪꦁꦲꦺꦱ꧀ꦠꦿꦶꦥꦸꦤꦶꦏꦱꦒꦼꦢ꧀ꦲꦔꦥꦸꦱꦶꦥꦚ꧀ꦗꦼꦤꦼꦔꦤ꧀꧈ꦏꦢꦺꦴꦱ꧀ꦲꦶꦁꦏꦁꦱꦩ꧀ꦥꦸꦤ꧀ꦏꦭꦩ꧀ꦥꦲꦤ꧀ꦲꦶꦁꦢꦶꦤ꧀ꦠꦼꦤ꧀ꦏꦭꦮꦶꦔꦶ꧉
꧋ꦏꦥꦶꦠꦤ꧀ Orme ꦮꦶꦕꦤ꧀ꦠꦼꦤ꧀ꦱꦗꦏ꧀ꦲꦩꦼꦩ꧀ꦩꦏꦠꦼꦤ꧀꧇ ꦮꦶꦱ꧀ꦩꦼꦤꦼꦁ꧈ꦲꦗꦕꦿꦶꦠꦲꦔ꧀ꦒ꧀ꦭꦢꦿꦃꦩꦁꦏꦺꦴꦤꦺꦴ꧈ꦮꦶꦱ꧀ꦲꦸꦤ꧀ꦢꦁꦤꦏꦽꦠꦧꦲꦼ꧉ꦲꦤꦔꦶꦁꦏꦭꦥꦸꦤꦶꦏꦥꦿꦺꦴꦥꦼꦱꦺꦴꦂ Higgs ꦏꦢꦺꦴꦱ꧀ꦏꦸꦭꦶꦤꦤꦶꦥꦸꦤ꧀ꦲꦶꦁꦏꦁꦏꦱꦂꦥꦸꦤꦏ꧈ꦭꦗꦼꦁꦒꦸꦩꦸꦗꦼꦁꦭꦠꦃ꧉ꦏꦸꦭꦥꦶꦪꦩ꧀ꦧꦏ꧀ꦭꦗꦼꦁꦲꦁꦒꦒꦱ꧀꧈ꦲꦩꦂꦒꦶꦲꦶꦁꦔꦗꦼꦁꦏꦸꦭꦏꦢꦺꦴꦱ꧀ꦏꦠꦶꦔꦭ꧀ꦏꦭꦤꦶꦥꦸꦤ꧀ꦱꦁꦥꦸꦠꦿꦶꦲꦩ꧀ꦧꦶꦏꦏ꧀ꦏꦸꦏꦸꦝꦸꦔꦶꦥꦸꦤ꧀꧈ꦭꦤ꧀ꦱ꧀ꦮꦫꦤꦶꦥꦸꦤ꧀ꦉꦚꦃꦏꦩꦶꦉꦔꦤ꧀ꦲꦶꦁꦏꦸꦥꦶꦁꦏꦸꦭ꧈ꦠꦼꦏꦮꦺꦴꦤ꧀ꦠꦼꦤ꧀ꦲꦶꦁꦔꦿꦶꦏꦶꦏꦲꦸꦔꦼꦭꦏꦼꦤ꧀ꦤꦺꦴꦤꦃꦕꦼꦩꦼꦁ꧉(ꦧꦝꦼꦏꦱꦩ꧀ꦧꦼꦠꦤ꧀)
