꧋ꦠꦶꦪꦁꦤꦩꦲꦶꦫꦲꦶꦁꦝꦸꦱꦸꦤ꧀ꦤꦪꦸꦒꦺꦴꦤ꧀ꦝꦔꦽꦗ꧈ꦯꦸꦫꦏꦂꦠ꧈ꦏꦭꦠꦁꦒꦭ꧀ 4 ꦮꦸꦭꦤ꧀ꦥꦸꦤꦶꦏꦲꦶꦁꦮꦚ꧀ꦕꦶꦗꦩ꧀ꦒꦁꦱꦭ꧀ꦱꦺꦴꦤ꧀ꦠꦼꦤ꧀꧈ꦤꦸꦗꦸꦱꦮꦼꦒ꧀ꦭꦁꦏꦸꦁꦮꦺꦴꦤ꧀ꦠꦼꦤ꧀ꦲꦶꦁꦏꦽꦠꦼꦒ꧀ꦱꦼꦥꦸꦂꦲꦶꦁꦏꦁꦥꦚ꧀ꦗꦁ꧈ꦏꦼꦠꦸꦁꦏꦱꦼꦥꦸꦂ N.I.S. ꦱꦏꦶꦁꦯꦼꦩꦫꦁꦭꦁꦏꦸꦁ꧈ꦭꦗꦼꦁꦏꦼꦥ꧀ꦭꦶꦤ꧀ꦝꦼꦱ꧀꧈ꦧꦢꦤ꧀ꦤꦶꦥꦸꦤ꧀ꦠꦸꦒꦼꦭ꧀ꦢꦢꦺꦴꦱ꧀ꦏꦭꦶꦃ꧉ꦥꦸꦤꦶꦏꦥꦤ꧀ꦠꦼꦱ꧀ꦢꦢꦺꦴꦱ꧀ꦥꦼꦥꦺꦔꦼꦠ꧀꧉
꧋ꦧꦝꦼꦲꦢꦼꦒ꧀ꦒꦶꦁ Ambachtsschool ꦲꦶꦁꦦꦸꦂꦮꦏꦼꦂꦠꦏꦛꦃꦲꦶꦁꦏꦁꦲꦁꦒꦠꦺꦴꦱ꧀ꦱꦏꦼꦤ꧀꧈ꦧꦺꦴꦠꦼꦤ꧀ꦔꦼꦩꦸꦁꦔꦏꦼꦤ꧀ꦱꦼꦏꦸꦭ꧀ꦏꦸꦩꦶꦱꦶꦮꦭꦤ꧀ꦢꦶꦏꦼꦩꦮꦺꦴꦤ꧀꧈ꦱꦤꦢꦾꦤ꧀ꦒꦺꦴꦭꦺꦴꦁꦔꦤ꧀ꦥꦿꦶꦧꦸꦩꦶꦲꦸꦒꦶꦩꦏꦠꦼꦤ꧀꧉ꦠꦸꦮꦶꦤ꧀ꦱꦩ꧀ꦥꦸꦤ꧀ꦮꦺꦴꦤ꧀ꦠꦼꦤ꧀ꦮꦂꦠꦺꦴꦱ꧀ꦱꦏꦶꦁ Technisch onderwijs꧈ꦧꦶꦭꦶꦃꦥꦱꦶꦠꦺꦤ꧀ꦲꦶꦁꦏꦁꦧꦝꦼꦏꦁꦒꦼꦒꦿꦶꦪꦥꦸꦤꦶꦏꦲꦁꦱꦭ꧀ꦭꦭꦲꦤ꧀ꦤꦤ꧀꧈ꦓꦸꦥꦼꦂꦩꦺꦤ꧀ꦧꦝꦼꦥꦫꦶꦁꦥꦶꦠꦸꦭꦸꦁꦔꦤ꧀꧉
꧋ꦲꦭ꧀ꦠꦼꦱꦺꦥ꧀ꦲꦶꦁꦦꦔꦤ꧀ꦝꦂꦫꦤ꧀꧈ꦨꦚ꧀ꦗꦂꦏꦭꦶꦥꦸꦕꦁ꧈ꦏꦊꦥꦠ꧀ꦠꦤ꧀ꦔꦁꦒꦼꦲꦂꦠꦤꦩꦸꦁꦱꦏꦼꦝꦶꦏ꧀ꦱꦔꦼꦠ꧀꧉ꦲꦤꦺꦃꦲꦶꦥꦸꦤ꧀ꦢꦺꦤꦺꦭꦗꦼꦁꦏꦼꦱꦃ꧉
꧋ꦏꦮꦂꦠꦺꦴꦱ꧀ꦱꦏꦼꦤ꧀꧈Solosche Electrische Mij.꧉ꦒꦝꦃꦥꦚꦸꦮꦸꦤ꧀ꦝꦠꦼꦁꦒꦼꦮꦺꦱ꧀ꦠꦼꦊꦏꦼꦫꦢ꧀ꦧꦝꦼꦥꦱꦁꦢꦶꦭꦃꦌꦭꦺꦏ꧀ꦠꦿꦶꦱ꧀ꦮꦺꦴꦤ꧀ꦠꦼꦤ꧀ꦄꦥ꧀ꦝꦺꦭ꧀ꦭꦶꦁꦧꦮꦃꦩꦢꦶꦪꦸꦤ꧀꧈ꦤꦔꦶꦁꦠꦸꦩꦿꦥ꧀ꦒꦼꦩꦶꦤ꧀ꦠꦼꦩꦢꦶꦪꦸꦤ꧀ꦒꦝꦃꦏꦮꦿꦠ꧀ꦠꦤ꧀꧉
꧋ꦩꦶꦠꦸꦫꦸꦠ꧀ꦥꦮꦂꦠꦺꦴꦱ꧀ꦱꦏꦶꦁ Aneta ꦠꦸꦮꦤ꧀ de Jeer꧈ꦲꦶꦁꦏꦁꦱꦩ꧀ꦥꦸꦤ꧀ꦏꦕꦼꦥꦼꦁꦭꦗꦼꦁꦏꦶꦤ꧀ꦠꦸꦤ꧀ꦤꦏꦼꦤ꧀ꦝꦠꦼꦁꦒꦿꦶꦪꦱꦏꦶꦠ꧀ꦲꦺꦮꦃꦲꦶꦁꦨꦺꦴꦒꦺꦴꦂ꧈ꦱꦸꦥꦢꦺꦴꦱ꧀ꦏꦥꦿꦶꦏ꧀ꦱꦏꦱꦫꦱ꧀ꦱꦤ꧀ꦤꦶꦁꦲꦺꦔꦼꦠ꧀ꦠꦤ꧀ꦤꦶꦥꦸꦤ꧀꧉ꦥꦫꦝꦺꦴꦏ꧀ꦠꦼꦂꦲꦶꦁꦏꦁꦩꦫꦶꦏ꧀ꦱ꧈ꦲꦩꦱ꧀ꦠꦤ꧀ꦤꦶꦧꦶꦭꦶꦃꦥꦼꦫꦔꦤ꧀ꦤꦶꦁꦥꦶꦏꦶꦂꦫꦤ꧀ꦤꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦁꦏꦶꦫꦁꦱꦫꦱ꧀꧉ꦥꦥꦿꦶꦏ꧀ꦱꦤ꧀ꦤꦶꦁꦝꦺꦴꦏ꧀ꦠꦼꦂꦲꦶꦁꦏꦁꦩꦏꦠꦼꦤ꧀ꦮꦲꦸ꧈ꦠꦸꦩꦿꦥ꧀ꦥꦶꦁꦥꦔꦢꦶꦭ꧀ꦭꦤ꧀ꦪꦸꦱ꧀ꦠꦶꦱꦶꦲꦁꦒꦭꦶꦃꦢꦩꦼꦭ꧀ꦥꦏꦺꦮꦼꦢ꧀꧈ꦩꦏꦠꦼꦤ꧀ꦲꦸꦒꦶꦠꦸꦩꦿꦥ꧀ꦏꦁꦗꦼꦁꦠꦸꦮꦤ꧀ꦲꦶꦁꦏꦁꦮꦶꦕꦏ꧀ꦱꦟ꧈ꦲꦶꦁꦧꦧ꧀ꦲꦁꦒꦺꦤ꧀ꦤꦶꦥꦸꦤ꧀ꦧꦝꦼꦤꦶꦤ꧀ꦢꦏ꧀ꦲꦏꦼꦤ꧀ꦥꦔꦸꦮꦲꦺꦴꦱ꧀ꦚꦶꦁꦏꦶꦂꦫꦏꦼꦤ꧀ꦢꦏ꧀ꦮꦤ꧀꧉ꦭꦁꦏꦸꦁꦒꦩ꧀ꦥꦶꦭ꧀ꦧꦶꦭꦶꦃꦥꦥꦿꦶꦏ꧀ꦱꦤ꧀ꦤꦶꦁꦝꦺꦴꦏ꧀ꦠꦼꦂꦮꦲꦸꦚꦫꦶꦪꦺꦴꦱ꧀ꦱꦏꦼꦤ꧀꧇ꦥꦶꦏꦶꦂꦫꦤ꧀ꦤꦶꦥꦸꦤ꧀ de Jeer ꦱꦫꦱ꧀꧈ꦲꦸꦠꦮꦶꦧꦺꦴꦠꦼꦤ꧀ꦱꦫꦱ꧀ꦧꦧꦂꦥꦶꦱꦤ꧀꧉
꧋ꦲꦶꦁꦝꦸꦱꦸꦤ꧀ꦠꦩ꧀ꦧꦸꦤ꧀꧈ꦩꦺꦱ꧀ꦠꦼꦂꦏꦺꦴꦂꦟꦺꦭꦶꦱ꧀꧈ꦮꦺꦴꦤ꧀ꦠꦼꦤ꧀ꦭꦉꦲꦸꦩꦸꦂ 10 ꦏꦭꦶꦪꦤ꧀ 14 ꦠꦲꦸꦤ꧀꧈ꦱꦩꦶꦏꦼꦉꦁꦔꦤ꧀ꦗꦭꦂꦫꦤ꧀ꦉꦧꦠ꧀ꦠꦤ꧀ꦥꦼꦊꦩ꧀꧈ꦭꦉꦲꦶꦁꦏꦁꦲꦒꦼꦁꦤꦩꦏ꧀ꦲꦏꦼꦤ꧀ꦢꦢꦩꦼꦭ꧀ꦧꦼꦤ꧀ꦝꦺꦴ꧈ꦔꦤ꧀ꦠꦺꦴꦱ꧀ꦲꦢꦩꦼꦭ꧀ꦠꦶꦮꦱ꧀ꦱꦶꦁꦩꦼꦁꦱꦃꦲꦶꦥꦸꦤ꧀꧉
꧋ꦏꦭꦲꦶꦁꦢꦶꦤ꧀ꦠꦼꦤ꧀ꦱꦭꦱꦠꦁꦒꦭ꧀ 10 ꦮꦸꦭꦤ꧀ꦥꦸꦤꦶꦏ꧈ꦏꦁꦗꦼꦁꦠꦸꦮꦤ꧀ꦲꦶꦁꦏꦁꦕꦏ꧀ꦱꦟꦊꦁꦒꦃꦏꦺꦴꦤ꧀ꦥꦼꦫꦺꦤ꧀ꦱꦶꦤꦩ꧀ꦥꦺꦤ꧀ꦤꦶꦱꦺꦴꦮꦤ꧀ꦤꦶꦥꦸꦤ꧀ꦲꦸꦥ꧀ꦧꦼꦱ꧀ꦠꦶꦂ I.E.V. ꦮꦺꦴꦤ꧀ꦠꦼꦤ꧀ꦲꦶꦁꦨꦺꦴꦒꦺꦴꦂ꧈ꦢꦔꦸꦤꦶꦥꦸꦤ꧀ꦔꦤ꧀ꦠꦺꦴꦱ꧀ꦏꦭꦶꦃꦗꦩ꧀꧉ꦲꦶꦁꦏꦁꦢꦶꦥꦸꦤ꧀ꦉꦩ꧀ꦧꦒ꧀ꦲꦶꦁꦔꦿꦶꦏꦸꦲꦶꦁꦧꦧ꧀ꦏꦱꦩꦫꦤ꧀ꦤꦶꦥꦸꦤ꧀ I.E.V. ꦢꦺꦤꦺꦥꦩꦉꦤ꧀ꦠꦃꦏꦼꦠꦶꦔꦭ꧀ꦧꦺꦴꦠꦼꦤ꧀ꦲꦁꦒꦥ꧀ꦥꦼꦝꦠꦼꦁ I.E.V. ꦮꦲꦸ꧉ꦏꦁꦗꦼꦁꦠꦸꦮꦤ꧀ꦲꦶꦁꦏꦁꦮꦶꦕꦏ꧀ꦱꦨꦏꦥꦿꦗꦚ꧀ꦗꦶ꧈ꦧꦝꦼꦲꦁꦒꦤ꧀ꦠꦺꦴꦱ꧀ꦱꦏꦼꦤ꧀ꦝꦠꦼꦁꦥꦿꦏꦮꦶꦱ꧀ꦥꦿꦏꦮꦶꦱ꧀ꦱꦶꦥꦸꦤ꧀ꦮꦭꦤ꧀ꦢꦶꦥꦿꦤꦏꦤ꧀ꦏꦤ꧀ꦛꦶꦲꦺꦴꦩ꧀ꦧꦺꦂ꧉ꦥꦿꦏꦮꦶꦱ꧀ꦥꦿꦏꦮꦶꦱ꧀ꦲꦶꦁꦏꦁꦏꦉꦩ꧀ꦧꦒ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦺꦴꦤ꧀ꦥꦼꦫꦺꦤ꧀ꦱꦶꦔꦿꦶꦏꦸꦧꦝꦼꦢꦶꦥꦸꦤ꧀ꦫꦩ꧀ꦥꦸꦁꦔꦏꦼꦤ꧀ꦢꦼꦤꦶꦁꦲꦸꦥ꧀ꦧꦼꦱ꧀ꦠꦶꦂ I.E.V. ꦱꦂꦠꦭꦗꦼꦁꦧꦝꦼꦏꦲꦸꦚ꧀ꦗꦸꦏ꧀ꦲꦏꦼꦤ꧀ꦝꦠꦼꦁꦏꦁꦗꦼꦁꦠꦸꦮꦤ꧀ꦲꦏꦁꦮꦶꦕꦏ꧀ꦱꦟ꧈ꦠꦸꦮꦶꦤ꧀ꦧꦝꦼꦢꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦏꦺꦴꦤ꧀ꦥꦼꦫꦺꦤ꧀ꦱꦶꦩꦭꦶꦃ꧉ꦧꦼꦚ꧀ꦗꦶꦁꦏꦺꦴꦤ꧀ꦥꦼꦫꦺꦤ꧀ꦱꦶꦮꦲꦸ꧈ꦫꦲꦺꦴꦱ꧀ꦏꦮꦿꦠ꧀ꦠꦤ꧀ꦤꦶꦥꦸꦤ꧀ I.E.V. ꦧꦝꦼꦢꦶꦥꦸꦤ꧀ꦲꦶꦕꦭ꧀ꦭꦶ꧉
꧋ꦏꦮꦂꦠꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦲꦶꦁꦏꦁꦧꦸꦥꦠꦶꦲꦶꦁꦨꦠꦮꦶꦤꦼꦠꦼꦥ꧀ꦥꦏꦼꦤ꧀ꦥꦫꦥꦔꦸꦭꦸꦱꦗꦮꦶꦤꦶꦁꦏꦶꦛꦨꦠꦮꦶ꧈ꦩꦤꦮꦶꦧꦝꦼꦤꦶꦏꦃꦲꦏꦼꦤ꧀ꦠꦶꦪꦁꦏꦼꦢꦃꦩꦸꦥꦏꦠ꧀ꦠꦤ꧀ꦏꦭꦶꦪꦤ꧀ꦒꦺꦴꦭꦺꦴꦁꦔꦤ꧀ꦤꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦭꦤ꧀ꦢꦿꦢ꧀꧈ꦩꦸꦫꦶꦃꦱꦒꦼꦢ꧀ꦤꦼꦠꦼꦥ꧀ꦥꦶꦲꦁꦒꦺꦤ꧀ꦤꦶꦁꦤꦶꦤ꧀ꦢꦏ꧀ꦲꦏꦼꦤ꧀ꦮꦗꦶꦧ꧀꧈ꦲꦮꦶꦠ꧀ꦏꦛꦃꦥꦔꦸꦭꦸꦲꦶꦁꦏꦁꦢꦺꦫꦺꦁꦱꦸꦩꦼꦉꦥ꧀ꦪꦼꦏ꧀ꦠꦺꦴꦱ꧀ꦲꦶꦁꦧꦧ꧀ꦠꦸꦩꦶꦤ꧀ꦢꦏ꧀ꦏꦶꦁꦤꦶꦏꦃ꧉
꧋ꦤꦭꦶꦏꦢꦶꦤ꧀ꦠꦼꦤ꧀ꦱꦼꦠꦸꦏꦼꦥꦼꦁꦏꦼꦂ꧈ꦥꦸꦭꦶꦱꦶꦲꦶꦁꦯꦸꦫꦧꦪꦚꦼꦥꦼꦁꦱꦠꦸꦁꦒꦭ꧀ꦭꦶꦁꦥꦺꦴꦏꦿꦸꦭ꧀ꦧꦩ꧀ꦧꦸꦧꦺꦴꦁꦱꦡꦶꦪꦺꦴꦁꦲ꧀ꦮꦤꦩꦚꦺꦴꦡꦤ꧀ꦆꦤ꧀꧈ꦏꦢꦏ꧀ꦮꦚꦺꦴꦧꦶꦲꦩ꧀ꦧꦼꦱꦼꦭ꧀ꦭꦶꦝꦠꦼꦁꦱꦮꦼꦤꦺꦃꦲꦶꦁꦄꦩ꧀ꦠꦼꦤꦂꦭꦸꦲꦸꦂ꧉
꧋ꦝꦼꦏꦸꦫꦶꦂꦩꦂꦠꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦲꦶꦁꦧꦮꦃꦔꦪꦺꦴꦓꦾꦏꦶꦢꦸꦭ꧀꧈ꦩꦼꦤ꧀ꦠꦱ꧀ꦧꦼꦤ꧈ꦏꦛꦃꦝꦸꦱꦸꦤ꧀ꦝꦸꦱꦸꦤ꧀ꦲꦶꦁꦏꦁꦏꦼꦊꦧ꧀ꦧꦤ꧀꧈ꦮꦶꦮꦶꦠ꧀ꦠꦶꦥꦸꦤ꧀ꦗꦮꦃꦮꦺꦴꦤ꧀ꦠꦼꦤ꧀ꦲꦶꦁꦢꦶꦤ꧀ꦠꦼꦤ꧀ꦗꦸꦩꦸꦮꦃꦏꦼꦥꦼꦁꦏꦼꦂ꧈ꦢꦼꦉꦱ꧀ꦱꦔꦼꦠ꧀꧈ꦭꦺꦥꦺꦤ꧀ꦭꦺꦥꦺꦤ꧀ꦔꦤ꧀ꦠꦺꦴꦱ꧀ꦱꦩꦶꦭꦸꦧꦺꦂ꧉
꧋ꦗꦸꦫꦸꦥꦔꦸꦫꦸꦱ꧀ꦥꦢꦒꦁꦔꦤ꧀ꦱꦼꦥꦼꦝꦃꦠꦿꦺꦴꦥꦶꦏꦭ꧀ꦲꦶꦁꦨ꧀ꦭꦶꦠꦂ꧈ꦲꦶꦁꦏꦁꦏꦤ꧀ꦠꦺꦴꦂꦫꦶꦥꦸꦤ꧀ꦲꦒꦼꦁꦩꦁꦒꦺꦤ꧀ꦲꦶꦁꦯꦩꦫꦁ꧈ꦤꦩ Weller ꦏꦼꦱꦃꦏꦤ꧀ꦛꦶꦲꦩ꧀ꦧꦼꦏ꧀ꦠꦲꦂꦠꦲꦶꦁꦏꦁꦢꦢꦺꦴꦱ꧀ꦠꦁꦒꦼꦭ꧀ꦭꦤꦥꦸꦤ꧀꧉ꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦁꦧꦫꦁꦧꦫꦁꦲꦶꦁꦏꦁꦏꦠꦶꦭꦂꦲꦶꦁꦒꦿꦶꦪꦤꦶꦥꦸꦤ꧀꧈ꦧꦺꦴꦠꦼꦤ꧀ꦩꦗꦗꦶ꧉
꧋ꦠꦸꦮꦤ꧀ꦯꦩꦸꦢꦿ꧈ꦥꦤꦸꦤ꧀ꦠꦸꦤ꧀ꦏꦺꦴꦩ꧀ꦩꦸꦤꦶꦱ꧀ꦲꦶꦁꦏꦁꦱꦩ꧀ꦥꦸꦤ꧀ꦢꦶꦥꦸꦤ꧀ꦫꦩ꧀ꦥꦸꦁꦔꦶꦲꦶꦁꦥꦔꦢꦶꦭ꧀ꦭꦤ꧀ꦭꦤ꧀ꦢꦿꦢ꧀ꦲꦶꦁꦨꦠꦮꦶ꧈ꦏꦲꦸꦏꦸꦩ꧀ 20 ꦠꦲꦸꦤ꧀꧈ꦫꦸꦩꦶꦪꦶꦤ꧀ꦤꦫꦶꦩꦃ꧈ꦱꦥꦸꦤꦶꦏꦲꦥꦺꦭ꧀꧉
꧋ꦏꦭꦠꦁꦒꦭ꧀ 16 ꦮꦸꦭꦤ꧀ꦥꦸꦤꦶꦏ꧈ꦲꦶꦁꦕꦶꦏꦺꦴꦭꦺꦴꦠꦺꦴꦏ꧀꧈ꦕꦶꦪꦚ꧀ꦗꦸꦂ꧈ꦮꦺꦴꦤ꧀ꦠꦼꦤ꧀ꦎꦠꦺꦴꦧꦶꦱ꧀ꦤꦸꦧꦿꦸꦏ꧀ꦲꦸꦮꦶꦠ꧀꧈ꦮꦺꦴꦤ꧀ꦠꦼꦤ꧀ꦠꦶꦪꦁꦲꦶꦁꦏꦁꦠꦶꦮꦱ꧀ 3 ꦲꦶꦁꦏꦁꦤꦤ꧀ꦝꦁꦠꦠꦸꦏꦛꦃ꧉
꧋ꦏꦭꦲꦶꦁꦢꦶꦤ꧀ꦠꦼꦤ꧀ꦩꦶꦁꦒꦸꦏꦼꦥꦼꦁꦏꦼꦂ꧈ꦮꦚ꧀ꦕꦶꦗꦩ꧀ 9.40 ꦲꦶꦁꦦꦤ꧀ꦠꦼꦏꦶꦪꦫꦃꦠꦥꦼꦭ꧀ꦮꦠꦼꦱ꧀ꦭꦁꦏꦠ꧀ꦡꦩꦶꦲꦄꦤ꧀꧈ꦏꦼꦫꦲꦺꦴꦱ꧀ꦮꦺꦴꦤ꧀ꦠꦼꦤ꧀ꦭꦶꦤ꧀ꦝꦸ꧈ꦔꦤ꧀ꦠꦺꦴꦱ꧀ꦮꦺꦴꦤ꧀ꦠꦼꦤ꧀ꦥꦼꦛꦶꦠꦺꦴꦱ꧀ꦱꦤ꧀ꦠꦸꦮꦶꦤ꧀ꦩꦼꦱꦶꦤ꧀ꦚꦼꦫꦠ꧀ꦏꦼꦧꦭꦶꦏ꧀꧈ꦭꦶꦤ꧀ꦝꦸꦮꦲꦸꦲꦸꦒꦶꦏꦿꦲꦺꦴꦱ꧀ꦱꦏꦶꦁꦏ꧀ꦮꦭꦯꦶꦩ꧀ꦥꦁ꧈ꦦꦁꦏꦭꦤ꧀ꦧꦿꦤ꧀ꦝꦤ꧀꧈ꦡꦚ꧀ꦗꦸꦁꦥꦸꦫꦠꦸꦮꦶꦤ꧀ꦦꦼꦂꦭꦏ꧀꧈ꦢꦔꦸꦤꦶꦥꦸꦤ꧀꧇꧖꧇ꦱꦼꦏꦺꦴꦤ꧀꧉
꧋ꦏꦭꦠꦁꦒꦭ꧀ 11 ꦮꦸꦭꦤ꧀ꦥꦸꦤꦶꦏ꧈ꦱꦫꦝꦝꦸꦗꦮꦶꦤꦩꦧꦝꦸꦢ꧀꧈ꦲꦶꦁ Gewestelijk Militairen Commandant ꦨꦺꦴꦂꦤꦼꦪꦺꦴꦥꦱꦶꦱꦶꦂꦏꦶꦭꦺꦤ꧀꧈ꦤꦭꦶꦏꦱꦮꦼꦒ꧀ꦥꦠꦿꦺꦴꦭ꧀ꦭꦶꦮꦺꦴꦤ꧀ꦠꦼꦤ꧀ꦲꦶꦁꦎꦤ꧀ꦢꦼꦂꦄꦥ꧀ꦝꦺꦭꦶꦁꦩꦶꦠꦲꦎ꧈ꦧꦲꦶꦠꦤꦶꦥꦸꦤ꧀ꦏꦼꦧꦭꦶꦏ꧀꧈ꦭꦗꦼꦁꦥꦼꦗꦃꦏ꧀ꦭꦼꦊꦥ꧀꧉
꧋ꦏꦭꦢꦶꦤ꧀ꦠꦼꦤ꧀ꦗꦸꦩꦸꦮꦃꦏꦼꦥꦼꦁꦏꦼꦂ꧈ꦱꦕꦼꦭꦏ꧀ꦏꦶꦁꦔꦢꦶꦭꦸꦮꦶꦃ꧈ꦏꦼꦝꦶꦫꦶ꧈ꦮꦺꦴꦤ꧀ꦠꦼꦤ꧀ꦎꦠꦺꦴꦧꦶꦱ꧀ꦏꦏꦭꦶꦃꦒꦝꦃꦲꦤ꧀ꦤꦶꦥꦸꦤ꧀ꦥꦱꦼꦮꦤ꧀ꦎꦠꦺꦴꦦꦤ꧀ꦝꦮ꧈ꦲꦶꦁꦏꦼꦝꦶꦫꦶꦱꦩꦶꦠꦸꦧꦿꦸꦏ꧀ꦏꦤ꧀꧉ꦮꦺꦴꦤ꧀ꦠꦼꦤ꧀ꦠꦶꦪꦁꦲꦶꦁꦏꦁꦏꦼꦠꦶꦮꦱ꧀ꦱꦤ꧀ꦏꦏꦭꦶꦃ꧈ꦏꦼꦠꦠꦺꦴꦤ꧀ 18 ꦱꦩꦶꦢꦶꦥꦸꦤ꧀ꦲꦸꦥꦏꦫꦮꦺꦴꦤ꧀ꦠꦼꦤ꧀ꦲꦶꦁꦒꦿꦶꦪꦏꦶꦠ꧀ꦒꦩ꧀ꦧꦶꦂꦫꦤ꧀꧈ꦠꦸꦮꦶꦤ꧀ꦮꦺꦴꦤ꧀ꦠꦼꦤ꧀ꦱꦠꦸꦁꦒꦭ꧀ꦲꦶꦁꦏꦁꦢꦶꦥꦸꦤ꧀ꦲꦸꦥꦏꦫꦮꦺꦴꦤ꧀ꦠꦼꦤ꧀ꦲꦶꦁꦥꦺꦴꦭꦶꦏ꧀ꦭꦶꦤꦶꦏ꧀ꦱꦼꦩꦩ꧀ꦥꦶꦂ꧉
