ꦤꦥꦩꦭꦶꦃꦲꦩꦂꦒꦶꦠꦶꦠꦶꦪꦁꦮꦲꦸꦱꦩ꧀ꦥꦸꦤ꧀ꦲꦤꦼꦏ꧀ꦱꦺꦤ꧀ꦤꦶꦥꦶꦪꦩ꧀ꦧꦏ꧀ꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦁꦥꦁꦒꦲꦺꦴꦠ꧀ꦠꦤ꧀ꦥꦁꦒꦲꦺꦴꦠ꧀ꦠꦤ꧀ꦲꦶꦁꦠꦤꦃꦠꦤꦃꦏꦶꦊꦤ꧀ꦤꦤ꧀ꦲꦶꦁꦮꦼꦏ꧀ꦢꦭ꧀ꦱꦩꦁꦏꦼꦥꦸꦤꦶꦏ꧉ꦏꦮꦺꦴꦤ꧀ꦠꦼꦤ꧀ꦤꦤ꧀ꦲꦶꦁꦏꦁꦩꦏꦠꦼꦤ꧀ꦮꦲꦸ꧈ꦏꦲꦸꦩ꧀ꦧꦼꦫꦃꦲꦶꦁꦤꦒꦫꦶꦫꦸꦱ꧀ꦧꦺꦴꦠꦼꦤ꧀ꦱꦸꦩꦼꦉꦥ꧀ꦧꦧꦂꦥꦶꦱꦤ꧀꧈ꦲꦶꦁꦏꦁꦢꦶꦥꦸꦤ꧀ꦱꦸꦩꦼꦉꦥ꧀ꦥꦶꦲꦶꦁꦒꦶꦃꦤꦩꦸꦁꦧꦫꦁꦲꦶꦁꦏꦁꦤꦭꦺꦴꦁꦱꦤꦭꦺꦴꦁꦱ꧈ꦉꦏꦲꦺꦴꦱ꧀ꦠꦸꦮꦶꦤ꧀ꦲꦮꦺꦴꦤ꧀ꦲꦮꦺꦴꦤ꧀꧈ꦏꦢꦺꦴꦱ꧀ꦢꦼꦤꦼꦲꦶꦁꦏꦁꦏꦠꦼꦫꦁꦔꦏꦼꦤ꧀ꦢꦼꦤꦶꦁꦥꦔꦒꦼꦁꦔꦶꦁꦏꦺꦴꦩ꧀ꦩꦸꦤꦶꦱ꧀ꦲꦶꦁꦠꦤꦃꦫꦸꦱ꧀ꦔꦿꦶꦏꦸ꧉
꧋ꦲꦸꦥꦩꦶꦠꦶꦠꦶꦪꦁꦫꦸꦱ꧀ꦧꦺꦴꦠꦼꦤ꧀ꦢꦶꦥꦸꦤ꧀ꦲꦼꦔꦺꦭ꧀ꦲꦼꦔꦺꦭ꧀ꦏꦁꦒꦼꦲꦤꦶꦭꦂꦠꦤꦃꦮꦸꦠꦃꦫꦃꦲꦶꦥꦸꦤ꧀꧈ꦠꦼꦩ꧀ꦠꦸꦤꦶꦥꦸꦤ꧀ꦠꦶꦠꦶꦪꦁꦫꦸꦱ꧀ꦱꦏꦶꦁꦠꦤꦃꦩꦺꦴꦚ꧀ꦕꦮꦲꦸ꧈ꦲꦶꦁꦏꦁꦱꦩꦶꦩꦤ꧀ꦠꦸꦏ꧀ꦩꦿꦶꦏꦸ꧈ꦠꦸꦩꦸꦤ꧀ꦠꦼꦤ꧀ꦭꦗꦼꦁꦤꦶꦭꦂꦤꦒꦫꦶꦤꦶꦥꦸꦤ꧀ꦱꦲꦧꦺꦴꦠꦼꦤ꧀ꦱꦸꦩꦼꦢꦾꦮꦁꦱꦸꦭ꧀ꦩꦭꦶꦃ꧈ꦱꦱꦉꦁꦔꦤ꧀ꦏꦭꦶꦪꦤ꧀ꦠꦶꦠꦶꦪꦁꦩꦺꦴꦚ꧀ꦕ꧈ꦲꦶꦁꦏꦁꦏꦼꦱꦃꦲꦶꦥꦸꦤ꧀ꦱꦏꦶꦁꦔꦿꦶꦏꦸꦏꦭꦶꦪꦤ꧀ꦲꦸꦫꦸꦠ꧀ꦲꦸꦫꦸꦠ꧀ꦠꦤ꧀꧉ꦱꦩꦁꦏꦼꦠꦶꦠꦶꦪꦁꦩꦺꦴꦚ꧀ꦕꦲꦶꦁꦏꦁꦱꦩꦶꦮꦺꦴꦤ꧀ꦠꦼꦤ꧀ꦲꦶꦁꦤꦒꦫꦶꦫꦸꦱ꧀ꦥꦸꦤꦶꦏꦥꦫꦮꦮꦏꦶꦭ꧀ꦭꦶꦁꦩꦱ꧀ꦏꦥꦼꦗꦼꦂꦩꦤ꧀ꦱꦲꦄꦩꦼꦫꦶꦏꦃ꧈ꦲꦶꦁꦏꦁꦢꦸꦢꦸꦤꦸꦁꦮꦺꦴꦤ꧀ꦠꦼꦤ꧀ꦲꦶꦁꦔꦿꦶꦏꦸꦏꦁꦒꦼꦱꦮꦠꦮꦶꦱ꧀ꦩꦺꦴꦁꦱꦥꦽꦭꦸꦲꦔ꧀ꦭꦢꦺꦴꦱ꧀ꦱꦶꦧꦫꦁꦮꦂꦤꦶꦮꦂꦤꦶꦠꦸꦩꦿꦥ꧀ꦏꦧꦸꦢꦶꦢꦪꦤ꧀ꦏꦧꦸꦢꦶꦢꦪꦤ꧀ꦲꦶꦁꦤꦒꦫꦶꦫꦸꦱ꧀ꦔꦿꦶꦏꦸ꧉ꦠꦸꦩꦿꦥ꧀ꦠꦶꦠꦶꦪꦁꦮꦲꦸꦲꦗꦶꦤꦶꦁꦱꦢꦪꦥꦿꦤꦠꦤ꧀ꦤꦶꦥꦸꦤ꧀ꦤꦒꦫꦶ꧈ꦲꦶꦁꦒꦶꦃꦧꦺꦴꦠꦼꦤ꧀ꦱꦒꦼꦢ꧀ꦏꦝꦼꦭꦶꦏ꧀ꦲꦏꦼꦤ꧀꧉ꦭꦤ꧀ꦲꦶꦁꦱꦩꦁꦏꦼꦲꦶꦁꦒꦺꦴꦭꦺꦴꦁꦔꦤ꧀ꦤꦶꦥꦸꦤ꧀ꦥꦁꦒꦲꦺꦴꦠ꧀ꦠꦤ꧀ꦲꦶꦁꦠꦤꦃꦌꦫꦺꦴꦥꦃ꧈ꦱꦩ꧀ꦥꦸꦤ꧀ꦏꦱꦸꦩꦼꦉꦥ꧀ꦥꦤ꧀꧈ꦏꦢꦺꦴꦱ꧀ꦥꦸꦤ꧀ꦢꦶꦕꦫꦕꦫꦤꦶꦥꦸꦤ꧀ꦤꦒꦫꦶꦫꦸꦱ꧀ꦲꦚꦩ꧀ꦧꦸꦠ꧀ꦢꦩꦼꦭ꧀ꦱꦲꦏꦢꦺꦴꦱ꧀ꦥꦸꦤ꧀ꦢꦶꦕꦫꦤꦶꦥꦸꦤ꧀ꦲꦔꦗꦼꦁꦔꦏꦼꦤ꧀ꦝꦠꦼꦁꦥꦁꦒꦼꦱꦁꦔꦤ꧀ꦤꦶꦁꦠꦶꦪꦁ꧈ꦲꦶꦁꦏꦁꦩꦏꦠꦼꦤ꧀ꦮꦲꦸꦲꦚ꧀ꦗꦭꦂꦫꦶꦏꦛꦃꦲꦶꦁꦠꦶꦪꦁꦲꦶꦁꦏꦁꦭꦗꦼꦁꦧꦺꦴꦠꦼꦤ꧀ꦥꦶꦠꦢꦺꦴꦱ꧀ꦝꦠꦼꦁꦏꦩꦗꦼꦁꦔꦤ꧀ꦤꦶꦁꦤꦒꦫꦶꦫꦸꦱ꧀꧉
꧋ꦩꦭꦃꦱꦠꦸꦁꦒꦶꦭ꧀ꦭꦶꦁꦥꦔꦒꦼꦁꦩꦱ꧀ꦏꦥꦼꦲꦶꦁꦨꦺꦂꦭꦶꦤ꧀꧈ꦲꦶꦁꦏꦁꦲꦚꦢꦺꦤ꧀ꦤꦶꦩꦼꦱꦶꦤ꧀ꦩꦼꦱꦶꦤ꧀ꦝꦠꦼꦁꦤꦒꦫꦶꦫꦸꦱ꧀꧈ꦕꦫꦶꦪꦺꦴꦱ꧀ꦩꦏꦠꦼꦤ꧀꧇ꦏꦤ꧀ꦛꦶꦱꦼꦤꦼꦁꦔꦶꦁꦩꦤꦃꦏꦸꦭꦔꦶꦤ꧀ꦠꦸꦤ꧀ꦤꦏꦼꦤ꧀ꦠꦸꦏꦁꦠꦸꦏꦁꦏꦸꦭꦝꦠꦼꦁꦤꦒꦫꦶꦫꦸꦱ꧀꧈ꦱꦸꦥꦢꦺꦴꦱ꧀ꦲꦤꦠꦤꦶꦩꦼꦱꦶꦤ꧀ꦩꦼꦱꦶꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦥꦧꦿꦶꦏ꧀ꦔꦿꦶꦏ꧉ꦱꦮꦁꦱꦸꦭ꧀ꦭꦶꦥꦸꦤ꧀ꦠꦶꦠꦶꦪꦁꦮꦲꦸꦱꦏꦶꦁꦤꦒꦫꦶꦫꦸꦱ꧀꧈ꦢꦢꦺꦴꦱ꧀ꦏꦺꦴꦩ꧀ꦩꦸꦤꦶꦱ꧀ꦩꦭꦶꦃꦥꦸꦫꦸꦤ꧈ꦱꦮꦼꦒ꧀ꦩꦤꦃꦲꦶꦥꦸꦤ꧀ꦲꦧꦿꦶꦠ꧀ꦱꦏꦼꦝꦶꦏ꧀ꦏꦼꦩꦮꦺꦴꦤ꧀ꦧꦺꦴꦠꦼꦤ꧀꧈ꦥꦶꦏꦤ꧀ꦠꦸꦏ꧀ꦏꦶꦥꦸꦤ꧀ꦥꦩꦁꦒꦶꦃꦲꦶꦁꦏꦁꦩꦏꦠꦼꦤ꧀ꦥꦸꦤꦶꦏ꧈ꦤꦩꦸꦁꦱꦊꦧꦼꦠ꧀ꦠꦶꦥꦸꦤ꧀ꦮꦠꦮꦶꦱ꧀ꦠꦲꦸꦤ꧀ꦏꦼꦩꦮꦺꦴꦤ꧀꧉
(ꦧꦝꦼꦏꦱꦩ꧀ꦧꦼꦠ꧀ꦠꦤ꧀)
ꦥꦮꦂꦠꦺꦴꦱ꧀ꦱꦏꦶꦁꦄꦢ꧀ꦩꦶꦤꦶꦱ꧀ꦠꦿꦱꦶ
꧋ꦊꦁꦒꦤꦤ꧀ꦤꦺꦴꦩꦼꦂ 2113 ꦲꦶꦁꦝꦩ꧀ꦥꦒ꧀꧉ꦏꦗꦮꦺꦤ꧀ꦏꦁꦒꦼ 5 ꦭꦁꦒꦤ꧀ꦤꦤ꧀ꦱꦩ꧀ꦥꦸꦤ꧀ꦏꦏꦶꦤ꧀ꦠꦸꦤ꧀ꦤꦤ꧀ꦤꦭꦶꦏ 12-1-'28꧉ꦄꦢꦿꦺꦱ꧀ 2113 ꦱꦩ꧀ꦥꦸꦤ꧀ꦏꦲꦼꦮꦃꦲꦤ꧀꧉ꦧꦧꦢ꧀ꦠꦤꦃꦗꦮꦶꦏꦼꦢꦃꦠꦸꦩ꧀ꦧꦱ꧀꧉
꧋ꦊꦁꦒꦤ꧀ꦤꦤ꧀ꦤꦺꦴꦩꦼꦂ 188 ꦲꦶꦁꦡꦽꦁꦒꦭꦺꦏ꧀꧉ꦏꦗꦮꦺꦤ꧀ꦤꦺꦴꦩꦼꦂ 43-53 ꦱꦩ꧀ꦥꦸꦤ꧀ꦠꦼꦭꦱ꧀꧉ꦲꦂꦠ f 1.50 ꦏꦁꦒꦺꦏ꧀ꦮꦂꦠꦭ꧀ꦥꦸꦤꦶꦏ꧈ꦤꦔꦶꦁꦤꦺꦴꦩꦼꦂ 1 ꦢꦸꦩꦸꦒꦶ 3 ꦲꦶꦁꦒꦶꦃꦲꦸꦒꦶꦱꦩ꧀ꦥꦸꦤ꧀ꦠꦼꦭꦱ꧀꧈ꦏꦭꦸꦁꦱꦺꦤ꧀ꦲꦁꦒꦺꦤ꧀ꦥꦚ꧀ꦗꦼꦤꦼꦁꦔꦤ꧀ꦥꦫꦶꦁꦏꦧꦂ꧉
꧋ꦊꦁꦒꦤ꧀ꦤꦤ꧀ꦤꦺꦴꦩꦼꦂ 200 ꦲꦶꦁꦑ꧀ꦭꦛꦺꦤ꧀꧉ꦱꦼꦫꦠ꧀ꦤꦩꦤꦩꦤꦶꦁꦭꦁꦒꦤ꧀ꦤꦤ꧀ꦲꦺꦁꦒꦭ꧀ꦱꦩ꧀ꦥꦸꦤ꧀ꦏꦠꦩ꧀ꦥꦶ꧉ꦩꦤꦮꦶꦲꦂꦠꦱꦩ꧀ꦥꦸꦤ꧀ꦝꦠꦼꦁꦱꦮꦼꦒ꧀ꦏꦏꦶꦤ꧀ꦠꦸꦤ꧀ꦤꦤ꧀ꦏꦗꦮꦺꦤ꧀꧈ꦱꦲꦥꦚ꧀ꦗꦼꦤꦼꦁꦔꦤ꧀ꦭꦗꦼꦁꦥꦶꦏꦤ꧀ꦠꦸꦏ꧀ꦒꦿꦠꦶꦱ꧀꧉
꧋ꦊꦁꦒꦤꦤ꧀ꦤꦺꦴꦩꦼꦂ 1139 ꦲꦶꦁꦡꦶꦁꦏꦶꦂ꧉ꦭꦁꦒꦤꦤ꧀ꦏꦲꦼꦠꦁꦮꦶꦮꦶꦠ꧀ 1-2-'28꧉
ꦥꦮꦂꦠꦺꦴꦱ꧀ꦱꦏꦶꦁꦉꦝꦏ꧀ꦱꦶ
꧋ꦊꦁꦒꦤꦤ꧀ꦤꦺꦴꦩꦼꦂ 3109꧉ꦥꦚ꧀ꦗꦸꦫꦸꦁꦥꦚ꧀ꦗꦼꦤꦼꦁꦔꦤ꧀ꦧꦺꦴꦠꦼꦤ꧀ꦏꦥꦕꦏ꧀꧈ꦲꦩꦂꦒꦶꦏꦼꦥꦚ꧀ꦗꦁꦔꦼꦤ꧀꧉ꦢꦺꦤꦺꦮꦺꦴꦱ꧀ꦱꦶꦁꦏꦂꦱꦥꦚ꧀ꦗꦼꦤꦼꦁꦔꦤ꧀ꦩꦸꦫꦶꦃꦠꦶꦪꦁꦒꦝꦃꦥꦶꦪꦤ꧀ꦢꦼꦭ꧀ꦝꦠꦼꦁꦝꦺꦴꦏ꧀ꦠꦼꦂ꧈ꦥꦸꦤꦶꦏꦊꦉꦱ꧀ꦱꦔꦼꦠ꧀꧉ꦩꦤꦮꦶꦏꦶꦤ꧀ꦠꦸꦤ꧀ꦥꦚ꧀ꦗꦸꦫꦸꦁꦥꦿꦪꦺꦴꦒꦶꦏꦥꦼꦤ꧀ꦝꦼꦠ꧀ꦮꦺꦴꦱ꧀ꦱꦶꦥꦸꦤ꧀ꦏꦼꦩꦮꦺꦴꦤ꧀꧉
꧋ꦠꦸꦮꦤ꧀ S. ꦩꦶꦲꦂꦗ꧈ꦥꦚ꧀ꦗꦸꦫꦸꦁꦥꦚ꧀ꦗꦼꦤꦼꦁꦔꦤ꧀ꦧꦺꦴꦠꦼꦤ꧀ꦏꦥꦕꦏ꧀꧈ꦲꦩꦂꦒꦶꦤꦩꦸꦁꦚꦫꦶꦪꦺꦴꦱ꧀ꦱꦏꦼꦤ꧀ꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀ꦠꦶꦪꦁꦱꦠꦸꦁꦒꦭ꧀꧉ꦧꦧ꧀ꦥꦏꦧꦂꦫꦤ꧀ꦱꦩ꧀ꦥꦸꦤ꧀ꦏꦱꦺꦥ꧀꧉ꦢꦺꦤꦺꦧꦧ꧀ꦏꦥꦉꦁꦥꦚ꧀ꦗꦼꦤꦼꦁꦔꦤ꧀ꦧꦝꦼꦢꦢꦺꦴꦱ꧀ꦊꦁꦒꦤꦤ꧀ꦏꦗꦮꦺꦤ꧀꧈ꦥꦿꦪꦺꦴꦒꦶꦭꦗꦼꦁꦔꦶꦤ꧀ꦠꦸꦤ꧀ꦤꦤꦲꦂꦠꦉꦒꦶꦤꦶꦥꦸꦤ꧀ꦫꦸꦩꦶꦪꦶꦤ꧀꧉
꧋ꦠꦸꦮꦤ꧀ S.S. ꦢꦶꦲꦂꦗ꧈ꦲꦶꦁꦡꦶꦁꦏꦶꦂ꧈ꦯꦭꦠꦶꦒ꧈ꦥꦛꦺꦴꦏ꧀ꦏꦤ꧀ꦤꦶꦁꦫꦠ꧀ꦗꦮꦶꦔꦁꦒꦼꦱꦱ꧀ꦠꦿꦭꦠꦶꦤ꧀ꦲꦶꦁꦒꦶꦃꦤꦩꦸꦁꦏꦢꦺꦴꦱ꧀ꦲꦶꦁꦏꦁꦥꦚ꧀ꦗꦼꦤꦼꦁꦔꦤ꧀ꦔꦤ꧀ꦢꦶꦏꦏ꧀ꦲꦏꦼꦤ꧀꧉
