ꦪꦺꦴꦥꦝꦢꦶꦢꦼꦊꦁ꧉ꦏꦤ꧀ꦛꦶꦉꦏꦲꦺꦴꦱ꧀ꦱꦔꦼꦠ꧀꧈ꦏꦸꦭꦏꦏꦭꦶꦃꦭꦗꦼꦁꦲꦤ꧀ꦢꦸꦢꦸꦠ꧀ꦥꦿꦺꦴꦥꦼꦱꦺꦴꦂ Higgs ꦱꦏꦶꦁꦥꦼꦤ꧀ꦝꦼꦩ꧀ꦩꦤ꧀ꦤꦶꦥꦸꦤ꧀꧉
꧋ꦏꦸꦭꦏꦏꦭꦶꦃꦭꦗꦼꦁꦚꦸꦩꦼꦉꦥ꧀ꦥꦶ꧈ꦱꦤꦢꦾꦤ꧀ꦫꦲꦶꦤꦶꦥꦸꦤ꧀ꦏꦼꦠꦶꦔꦭ꧀ꦕꦼꦩꦼꦁꦱꦲꦲꦁꦒꦶꦒꦺꦴꦤ꧀ꦤꦶ꧈ꦲꦤꦔꦶꦁꦧꦼꦒ꧀ꦗꦱꦔꦼꦠ꧀ꦢꦺꦤꦺꦠꦏ꧀ꦱꦶꦃꦒꦼꦱꦁ꧈ꦥꦶꦪꦩ꧀ꦧꦏ꧀ꦏꦶꦥꦸꦤ꧀ꦲꦔꦼꦧꦃꦲꦏꦼꦤ꧀ꦠꦔꦤ꧀ꦤꦶꦥꦸꦤ꧀ꦱꦲꦒꦼꦉꦁꦒꦼꦉꦁ꧉
꧋ꦏꦸꦭꦮꦶꦕꦤ꧀ꦠꦼꦤ꧀꧇ꦏꦶꦫꦏꦸ꧇ꦧꦚꦸꦱꦶꦁꦧꦶꦱꦩꦫꦱ꧀ꦱꦏꦼꦝꦺꦮꦺꦏ꧀ꦏꦼ꧉
꧋ꦏꦭꦥꦸꦤꦶꦏꦭꦗꦼꦁꦠꦸꦮꦸꦃꦥꦔꦿꦲꦺꦴꦱ꧀ꦲꦶꦁꦏꦁꦔꦸꦮꦠꦺꦴꦱ꧀ꦱꦏꦼꦤ꧀꧈ꦒꦼꦤ꧀ꦢꦸꦭ꧀ꦥꦱꦁꦔꦺꦴꦤ꧀ꦠꦺꦴꦪꦲꦶꦁꦏꦁꦱꦠꦸꦁꦒꦭ꧀ꦱꦩ꧀ꦥꦸꦤ꧀ꦏꦺꦴꦛꦺꦴꦁꦲꦶꦁꦱꦢꦺꦫꦺꦁꦔꦶꦥꦸꦤ꧀ꦥꦿꦲꦫ꧈ꦤꦔꦶꦁꦒꦼꦤ꧀ꦢꦸꦭ꧀ꦱꦠꦸꦁꦒꦭ꧀ꦭꦶꦥꦸꦤ꧀ꦩꦭꦶꦃ꧈ꦲꦶꦁꦏꦁꦲꦒꦼꦁꦱꦲꦏꦧꦸꦤ꧀ꦠꦼꦭ꧀ꦩꦮꦶꦱꦶꦚ꧀ꦗꦁꦏꦤ꧀ꦢꦼꦭ꧀꧈ꦥꦸꦤꦶꦏꦠꦏ꧀ꦱꦶꦃꦲꦶꦱꦶꦠꦶꦒꦁꦥꦿꦥꦠ꧀꧈ꦱꦩꦤ꧀ꦠꦼꦤ꧀ꦥꦸꦤꦶꦏꦩꦤꦮꦶꦱꦏꦶꦁꦢꦪꦤꦶꦁꦧꦼꦤ꧀ꦠꦺꦂꦲꦶꦁꦏꦁꦱꦔꦼꦠ꧀꧈ꦠꦺꦴꦪꦤꦶꦥꦸꦤ꧀ꦧꦺꦴꦠꦼꦤ꧀ꦔꦸꦮꦧ꧀꧉ꦩꦤꦮꦶꦠꦺꦴꦪꦤꦶꦥꦸꦤ꧀ꦔꦸꦮꦧ꧀꧈ꦱꦩ꧀ꦥꦸꦤ꧀ꦠꦩ꧀ꦠꦸꦥꦿꦺꦴꦥꦼꦱꦺꦴꦂ Higgs ꦧꦝꦼꦥꦼꦗꦃ꧈ꦩꦏꦠꦼꦤ꧀ꦲꦸꦒꦶꦏꦸꦭꦏꦏꦭꦶꦃ꧈ꦩꦤꦮꦶꦧꦺꦴꦠꦼꦤ꧀ꦲꦺꦁꦒꦭ꧀ꦲꦺꦁꦒꦭ꧀ꦮꦺꦴꦤ꧀ꦠꦼꦤ꧀ꦥꦶꦠꦸꦭꦸꦁꦔꦤ꧀ꦝꦠꦼꦁ꧉ꦏꦥꦶꦠꦤ꧀ Orme ꦔꦸꦭꦶꦂꦠꦸꦠꦸꦥ꧀ꦥꦶꦁꦒꦼꦤ꧀ꦢꦸꦭ꧀꧈ꦏꦸꦭꦥꦶꦪꦩ꧀ꦧꦏ꧀ꦏꦭꦥꦸꦤꦶꦏꦧꦺꦴꦠꦼꦤ꧀ꦏꦺꦴꦔꦤ꧀ꦲꦩ꧀ꦧꦶꦏꦏ꧀꧉ꦱꦭꦗꦼꦁꦔꦶꦥꦸꦤ꧀ꦏꦥꦶꦠꦤ꧀ Orme ꦏꦤ꧀ꦛꦶꦲꦸꦤ꧀ꦠꦸꦤꦶꦥꦸꦤ꧀ꦚꦺꦴꦥꦺꦴꦠ꧀ꦱꦸꦩ꧀ꦥꦼꦭ꧀ꦭꦶꦁꦒꦼꦒꦼꦤ꧀ꦢꦸꦭ꧀꧈ꦲꦶꦁꦏꦁꦢꦶꦥꦸꦤ꧀ꦥꦱꦁꦢꦼꦤꦶꦁꦱꦼꦂꦱꦤ꧀ Quick ꦏꦤ꧀ꦛꦶꦔꦠꦺꦴꦱ꧀ꦲꦠꦺꦴꦱ꧀ꦮꦺꦴꦤ꧀ꦠꦼꦤ꧀ꦱꦔꦤ꧀ꦝꦥ꧀ꦥꦶꦁꦠꦸꦠꦸꦠꦸꦥ꧀꧈ꦱꦸꦏꦸꦂꦫꦶꦁꦄꦭ꧀ꦭꦃ꧈ꦢꦺꦤꦺꦠꦺꦴꦪꦤꦶꦥꦸꦤ꧀ꦧꦺꦴꦠꦼꦤ꧀ꦔꦸꦮꦧ꧀꧉ꦲꦶꦁꦔꦿꦶꦏꦸꦏꦥꦶꦠꦤ꧀ Orme ꦭꦗꦼꦁꦤꦺꦠꦺꦱ꧀ꦱꦏꦼꦤ꧀ꦠꦺꦴꦪꦱꦮꦠꦮꦶꦱ꧀ꦠꦺꦠꦺꦱ꧀ꦮꦺꦴꦤ꧀ꦠꦤ꧀ꦲꦶꦁꦭꦩ꧀ꦧꦼꦤꦶꦥꦸꦤ꧀ꦲꦶꦁꦏꦁꦒꦫꦶꦁꦩꦼꦏꦶꦁꦏꦶꦁ꧈ꦱꦲꦏꦸꦭꦱꦸꦩꦼꦉꦥ꧀꧈ꦥꦶꦪꦩ꧀ꦧꦏ꧀ꦏꦶꦥꦸꦤ꧀ꦲꦁꦒꦼꦒꦼꦠ꧀ꦭꦩ꧀ꦧꦼꦔꦤ꧀ꦠꦺꦴꦱ꧀ꦩꦼꦢꦭ꧀ꦫꦃꦲꦶꦥꦸꦤ꧀꧈ꦱꦏꦶꦁꦲꦁꦒꦺꦤ꧀ꦤꦶꦁꦧꦝꦼꦔꦩ꧀ꦥꦼꦠ꧀ꦲꦮꦤꦶꦥꦸꦤ꧀ꦔꦼꦭꦏ꧀ꦱꦔꦼꦠ꧀ꦮꦲꦸ꧉ꦥꦶꦪꦩ꧀ꦧꦏ꧀ꦏꦶꦥꦸꦤ꧀ꦱꦒꦼꦢ꧀ꦔꦩ꧀ꦥꦼꦠ꧀ꦔꦼꦭꦏ꧀ꦏꦶꦥꦸꦤ꧀ꦮꦲꦸ꧈ꦱꦲꦠꦤ꧀ꦥꦔꦺꦴꦩ꧀ꦧꦼꦠꦺꦴꦪꦱꦠꦺꦠꦺꦱ꧀ꦠꦺꦠꦺꦱ꧀ꦱ꧈ꦒꦼꦤ꧀ꦢꦸꦭ꧀ꦭꦶꦥꦸꦤ꧀ꦭꦗꦼꦁꦢꦶꦥꦸꦤ꧀ꦲꦸꦭꦸꦁꦔꦏꦼꦤ꧀ꦝꦠꦼꦁꦏꦸꦭꦱꦂꦮꦶꦮꦶꦕꦤ꧀ꦠꦼꦤ꧀ꦩꦏꦠꦼꦤ꧀꧇ꦏꦺꦴꦮꦼꦏꦸꦮꦶꦠꦸꦮꦝꦼꦮꦼ Adams꧈ꦲꦺꦭꦶꦔ꧇ꦠ꧉
꧋ꦱꦥꦸꦤꦶꦏꦏꦸꦭꦲꦶꦁꦏꦁꦏꦼꦥꦼꦔꦶꦤ꧀ꦱꦔꦼꦠ꧀꧈ꦠꦸꦗꦸꦤꦶꦥꦸꦤ꧀ꦏꦸꦭꦱꦒꦼꦢ꧀ꦔꦩ꧀ꦥꦼꦠ꧀ꦔꦼꦭꦏ꧀ꦮꦲꦸ꧉ꦏꦸꦭꦭꦗꦼꦁꦭꦶꦁꦒꦶꦃꦱꦲꦲꦤ꧀ꦢꦺꦏꦺꦏ꧀ꦲꦏꦼꦤ꧀ꦱꦶꦫꦃꦲꦶꦥꦸꦤ꧀ꦥꦿꦺꦴꦥꦼꦱꦺꦴꦂ Higgs ꦮꦺꦴꦤ꧀ꦠꦼꦤ꧀ꦲꦶꦁꦝꦼꦁꦏꦸꦭ꧀ꦏꦸꦭ꧈ꦏꦸꦭꦭꦗꦼꦁꦤꦺꦠꦺꦱ꧀ꦱꦶꦱꦠꦺꦠꦺꦱ꧀ꦱꦠꦺꦠꦺꦱ꧀ꦮꦺꦴꦤ꧀ꦠꦼꦤ꧀ꦲꦶꦁꦭꦩ꧀ꦧꦼꦤꦶꦥꦸꦤ꧀ꦲꦶꦁꦏꦁꦒꦫꦶꦁꦮꦲꦸ꧈ꦥꦶꦤꦁꦒꦶꦃꦲꦶꦥꦸꦤ꧀ꦲꦁꦒꦸꦩꦸꦤ꧀ꦤꦏꦼꦤ꧀ꦱꦔꦼꦠ꧀꧈ꦱꦧꦧ꧀ꦱꦊꦧꦼꦠ꧀ꦠꦶꦥꦸꦤ꧀ꦱꦩꦼꦤꦶꦠ꧀ꦏꦼꦩꦮꦺꦴꦤ꧀꧈ꦥꦶꦪꦩ꧀ꦧꦏ꧀ꦏꦶꦥꦸꦤ꧀ꦱꦩ꧀ꦥꦸꦤ꧀ꦭꦶꦁꦒꦶꦃꦗꦼꦗꦼꦒ꧀꧈ꦱꦲꦭꦗꦼꦁꦚꦺꦴꦧꦶꦔꦽꦧꦠ꧀ꦒꦼꦤ꧀ꦢꦸꦭ꧀ꦮꦲꦸꦏꦭꦶꦪꦤ꧀ꦠꦔꦤ꧀ꦤꦶꦥꦸꦤ꧀ꦏꦭꦶꦃ꧉
꧋ꦱꦉꦁꦒꦼꦤ꧀ꦢꦸꦭ꧀ꦮꦲꦸꦏꦸꦭꦱꦶꦁꦏꦶꦂꦫꦏꦼꦤ꧀꧈ꦥꦿꦺꦴꦥꦼꦱꦺꦴꦂ Higgs ꦲꦔꦔ꧀ꦭꦸꦃꦩꦏꦠꦼꦤ꧀꧇ꦲꦝꦸꦃ꧈ꦩꦤꦸꦁꦱꦏꦛꦶꦏ꧀ꦠꦼꦒꦠꦼꦩꦼꦤ꧀꧈ꦠꦼꦒꦠꦸꦂꦩꦸꦁꦩꦶꦏꦶꦂꦲꦮꦏ꧀ꦏꦼꦝꦼꦮꦼ꧉
꧋ꦏꦤ꧀ꦛꦶꦉꦏꦲꦺꦴꦱ꧀ꦏꦸꦭꦮꦶꦕꦤ꧀ꦠꦼꦤ꧀ꦩꦏꦠꦼꦤ꧀꧇ꦢꦼꦊꦁꦔꦼꦤ꧀꧇ꦠ Higgs꧈Orme ꦭꦤ꧀ꦲꦏꦸꦝꦼꦮꦼꦩꦺꦃꦩꦠꦶꦗꦭꦂꦫꦤ꧀ꦱꦏꦔꦼꦭꦏ꧀ꦏꦼ꧈ꦲꦺꦮꦢꦺꦤꦺꦲꦏꦸꦱꦏꦭꦺꦴꦫꦺꦴꦤ꧀ꦲꦺꦴꦫꦔꦶꦕꦶꦥ꧀ꦥꦶꦧꦚꦸꦤꦼꦧꦧꦂꦥꦶꦱꦤ꧀꧈ꦪꦺꦤ꧀ꦧꦚꦸꦲꦶꦏꦶꦏꦸꦢꦸꦲꦒꦮꦼꦱ꧀ꦭꦩꦼꦠ꧀ꦩꦸ꧈ꦏꦺꦴꦮꦼꦲꦶꦪꦏꦼꦤꦔꦺꦴꦩ꧀ꦧꦼꦧꦚꦸꦲꦶꦏꦶꦏꦧꦺꦃ꧈ꦲꦏꦸꦏꦧꦺꦃꦲꦶꦏꦶꦏꦱꦱꦂꦲꦤꦲꦶꦁꦱꦒꦫꦮꦼꦝꦶ꧈ꦢꦢꦶꦏꦸꦢꦸꦱꦶꦁꦒꦼꦩꦶ꧉ꦪꦺꦤ꧀ꦧꦚꦸꦤꦼꦏꦺꦴꦲꦺꦴꦩ꧀ꦧꦼꦏꦧꦺꦃ꧈ꦏꦺꦴꦮꦼꦩꦼꦁꦏꦺꦴꦧꦏꦭ꧀ꦔꦼꦭꦏ꧀ꦩꦤꦺꦃꦭꦤ꧀ꦩꦠꦶ꧉
꧋ꦥꦿꦺꦴꦥꦼꦱꦺꦴꦂ Higgs ꦲꦩꦤꦃꦱꦏꦼꦝꦥ꧀꧈ꦱꦲꦭꦗꦼꦁꦠꦸꦩꦼꦁꦔꦱꦂꦮꦶꦮꦶꦕꦤ꧀ꦠꦼꦤ꧀ꦩꦏꦠꦼꦤ꧀꧇
꧋ꦲꦗꦢꦢꦶꦲꦠꦶꦩꦸ꧈ꦲꦏꦸꦱꦲꦶꦏꦶꦩꦼꦫꦸꦃꦲꦶꦪꦺꦤ꧀ꦲꦏꦸꦝꦼꦮꦼꦏꦁꦩꦶꦏꦶꦂꦩꦼꦚꦁꦲꦮꦏ꧀ꦏꦸꦝꦼꦮꦼꦲꦶꦏꦶ꧉ꦲꦤꦔꦶꦁꦲꦶꦁꦱꦗꦿꦺꦴꦤꦼꦒꦼꦤ꧀ꦢꦸꦭ꧀ꦲꦶꦏꦸꦲꦶꦱꦶꦤꦼꦧꦚꦸꦫꦏ꧀ꦲꦏꦺꦃ꧈ꦲꦪꦺꦴꦲꦏꦸꦏꦧꦺꦃꦥꦝꦔꦺꦴꦩ꧀ꦧꦼꦱꦕ꧀ꦭꦼꦒꦸꦏ꧀ꦏꦤ꧀꧈ꦱꦧꦧ꧀ꦪꦺꦤ꧀ꦲꦺꦴꦫꦩꦁꦏꦺꦴꦤꦺꦴ꧈ꦲꦏꦸꦏꦧꦺꦃꦲꦺꦴꦫꦧꦶꦱꦲꦩ꧀ꦧꦕꦸꦠ꧀ꦠꦏꦼ꧉
꧋ꦱꦭꦗꦼꦁꦔꦶꦥꦸꦤ꧀ꦏꦸꦭꦱꦢꦪꦭꦗꦼꦁꦱꦩꦶꦔꦺꦴꦩ꧀ꦧꦼ꧈ꦲꦶꦁꦏꦁꦏꦁꦒꦼꦠꦏꦼꦂꦒꦼꦭꦱ꧀ꦩꦚ꧀ꦕꦶꦲꦭꦶꦠ꧀꧈ꦲꦶꦁꦏꦁꦧꦺꦴꦠꦼꦤ꧀ꦱꦒꦼꦢ꧀ꦲꦶꦱꦶꦭꦁꦏꦸꦁꦏꦛꦃꦠꦶꦤꦶꦩ꧀ꦧꦁꦒꦼꦭꦱ꧀ꦲꦁꦒꦸꦂ꧉ꦱꦠꦸꦁꦒꦭ꧀ꦱꦠꦸꦁꦒꦭ꧀ꦲꦁꦱꦭ꧀ꦔꦺꦴꦩ꧀ꦧꦼꦠꦶꦒꦁꦒꦼꦭꦱ꧀꧈ꦲꦶꦁꦏꦁꦏꦕꦼꦕꦼꦥ꧀ꦏꦤ꧀ꦛꦶꦲꦭꦺꦴꦤ꧀ꦲꦭꦺꦴꦤ꧀ꦤꦤ꧀꧉ꦏꦭꦥꦸꦤꦶꦏꦏꦸꦭꦱꦢꦪꦲꦁꦒꦝꦃꦲꦶꦥꦔꦿꦲꦺꦴꦱ꧀꧈ꦧꦶꦭꦶꦃꦏꦸꦭꦱꦢꦪꦱꦠꦸꦁꦒꦭ꧀ꦱꦠꦸꦁꦒꦭ꧀ꦭꦶꦥꦸꦤ꧀ꦱꦒꦼꦢ꧀ꦤꦼꦭꦱ꧀ꦱꦏꦼꦤ꧀ꦠꦺꦴꦪꦱꦲꦼꦧ꧀ꦭꦺꦒ꧀꧈ꦧꦺꦴꦏ꧀ꦩꦤꦮꦶꦩꦭꦃꦭꦁꦏꦸꦁꦱꦏꦶꦁꦱꦩꦤ꧀ꦠꦼꦤ꧀꧉ꦲꦺꦮꦢꦺꦤꦺꦠꦺꦴꦪꦱꦏꦼꦝꦶꦏ꧀ꦮꦲꦸꦢꦪꦤꦶꦥꦸꦤ꧀ꦲꦁꦒꦸꦩꦸꦤ꧀ꦤꦏꦼꦤ꧀꧈ꦏꦸꦭꦱꦢꦪꦫꦸꦩꦲꦺꦴꦱ꧀ꦒꦼꦱꦁꦩꦭꦶꦃ꧉
꧋ꦏꦤ꧀ꦛꦶꦤꦿꦠꦱ꧀ꦲꦶꦁꦥꦼꦝꦸꦠ꧀꧈ꦏꦸꦭꦱꦒꦼꦢ꧀ꦤꦶꦔꦭ꧀ꦭꦶꦒꦸꦩꦸꦏ꧀ꦒꦸꦩꦸꦏ꧀꧈ꦲꦶꦁꦏꦁꦏꦠꦼꦢꦃꦲꦏꦼꦤ꧀ꦢꦼꦤꦶꦁꦠꦶꦠꦶꦪꦁꦰꦼꦲꦸꦝꦠꦼꦁꦏꦸꦭꦱꦢꦪ꧈ꦧꦶꦭꦶꦃꦲꦶꦁꦔꦿꦶꦏꦸꦥꦸꦤꦶꦏꦥꦥꦤ꧀ꦤꦶꦁꦱꦶꦔꦧꦫꦺꦴꦁ꧉
꧋ꦏꦸꦭꦮꦶꦕꦤ꧀ꦠꦼꦤ꧀꧇ꦤꦺꦏ꧀ꦏꦤꦏꦲꦼꦥꦁꦒꦺꦴꦤ꧀ꦤꦤ꧀ꦤꦶꦁꦱꦶꦔꦧꦫꦺꦴꦁ꧈ꦩꦼꦱ꧀ꦛꦶꦤꦼ꧈ꦲꦶꦁꦏꦺꦴꦤꦺꦴꦲꦶꦪꦲꦤꦧꦚꦸꦤꦼ꧉ꦲꦪꦺꦴꦥꦝꦚꦺꦴꦧꦩꦼꦚꦁꦥꦁꦒꦺꦴꦤ꧀ꦤꦤ꧀ꦏꦤꦏꦲꦼ꧈ꦤꦺꦏ꧀ꦤꦺꦏ꧀ꦏꦼꦱꦏꦏꦺꦴꦤꦺꦴꦧꦶꦱꦮꦼꦫꦸꦃꦢꦸꦤꦸꦁꦔꦶꦁꦥꦏꦩ꧀ꦥꦸꦁꦔꦤ꧀꧉
꧋ꦱꦭꦗꦼꦁꦔꦶꦥꦸꦤ꧀ꦏꦸꦭꦱꦢꦪꦤꦸꦤ꧀ꦠꦼꦤ꧀ꦩꦶꦮꦶꦠ꧀ꦠꦶꦭꦸꦩꦩ꧀ꦥꦃꦏꦤ꧀ꦛꦶꦉꦏꦲꦺꦴꦱ꧀ꦱꦔꦼꦠ꧀꧈ꦮꦕꦸꦕꦭ꧀ꦭꦶꦁꦱꦶꦔꦧꦫꦺꦴꦁꦲꦶꦁꦏꦁꦱꦩ꧀ꦥꦸꦤ꧀ꦩꦶꦠꦸꦭꦸꦁꦔꦶꦝꦠꦼꦁꦒꦼꦱꦁꦏꦸꦭꦱꦢꦪ꧈ꦲꦤꦔꦶꦁꦲꦶꦁꦏꦁꦱꦥꦸꦤꦶꦏꦲꦠꦺꦴꦱ꧀ꦱꦶꦥꦸꦤ꧀ꦏꦢꦺꦴꦱ꧀ꦧꦭꦧꦒ꧀꧈ꦏꦼꦥꦼꦏ꧀ꦱꦢꦶꦥꦸꦤ꧀ꦠꦶꦭꦂ꧈ꦲꦤꦔꦶꦁꦱꦚ꧀ꦗꦠꦱꦚ꧀ꦗꦠꦏꦧꦼꦏ꧀ꦠ꧉ꦱꦢꦶꦤ꧀ꦠꦼꦤ꧀ꦩꦸꦥꦸꦠ꧀ꦭꦩ꧀ꦥꦃꦏꦸꦭꦱꦢꦪꦩꦶꦁꦒꦃꦱꦲꦩꦸꦝꦸꦤ꧀ꦉꦢꦶ꧉ꦱꦏꦼꦝꦥ꧀ꦱꦏꦼꦝꦥ꧀ꦏꦺꦤ꧀ꦢꦼꦭ꧀꧈ꦥꦽꦭꦸꦔꦺꦴꦩ꧀ꦧꦼꦠꦺꦴꦪꦱꦠꦺꦠꦺꦱ꧀꧈ꦭꦤ꧀ꦠꦤ꧀ꦱꦃꦲꦔꦗꦼꦁꦲꦗꦼꦁꦱꦒꦼꦢ꧀ꦢꦱꦸꦩꦼꦉꦥ꧀ꦝꦠꦼꦁꦔꦶꦥꦸꦤ꧀ꦠꦶꦠꦶꦪꦁꦲꦶꦁꦏꦁꦧꦝꦼꦠꦸꦠꦸꦭꦸꦁ꧈ꦲꦶꦁꦏꦁꦢꦶꦥꦸꦤ꧀ꦥꦔꦒꦼꦁꦔꦶꦱꦼꦂꦱꦤ꧀ Quick ꦱꦏꦶꦁꦱꦶꦱꦶꦃꦲꦶꦁꦒꦸꦩꦸꦏ꧀ꦔꦿꦶꦏ꧈ꦱꦸꦏꦸꦂꦱꦒꦼꦢ꧀ꦱꦸꦩꦼꦉꦥ꧀ꦝꦠꦼꦁꦥꦏꦩ꧀ꦥꦸꦁꦔꦤ꧀ꦤꦶꦥꦸꦤ꧀꧉ꦩꦶꦭꦲꦶꦁꦒꦶꦃꦱꦪꦼꦏ꧀ꦠꦺꦴꦱ꧀꧈ꦱꦥꦶꦱꦤ꧀ꦏꦭꦏꦸꦭꦱꦢꦪꦱꦸꦩꦼꦉꦥ꧀ꦢꦸꦤꦸꦁꦔꦶꦁꦥꦏꦩ꧀ꦥꦸꦁꦔꦤ꧀ꦮꦲꦸ꧈ꦲꦤꦔꦶꦁꦱꦉꦁꦏꦸꦭꦱꦢꦪꦢꦸꦩꦸꦒꦶꦥꦸꦕꦏ꧀ꦏꦶꦁꦉꦢꦶ꧈ꦏꦸꦭꦱꦢꦪꦱꦸꦩꦼꦉꦥ꧀꧈ꦧꦶꦭꦶꦃꦥꦸꦤꦶꦏꦤꦩꦸꦁꦮꦮꦪꦁꦔꦤ꧀ꦲꦶꦁꦲꦮꦁꦲꦮꦁꦏꦼꦩꦮꦺꦴꦤ꧀꧉ꦲꦶꦁꦏꦁꦩꦏꦠꦼꦤ꧀ꦥꦸꦤꦶꦏꦱꦠꦸꦁꦒꦶꦭ꧀ꦭꦶꦁꦒꦺꦴꦝꦉꦚ꧀ꦕꦤꦲꦶꦁꦏꦁꦲꦢꦩꦼꦭ꧀ꦱꦏꦶꦠ꧀ꦠꦶꦁꦩꦤꦃꦠꦸꦩꦿꦥ꧀ꦠꦶꦠꦶꦪꦁꦲꦶꦁꦏꦁꦧꦝꦼꦥꦼꦗꦃꦗꦭꦂꦫꦤ꧀ꦏꦱꦠ꧀ꦠꦤ꧀꧉
꧋ꦲꦶꦁꦔꦿꦶꦏꦸꦏꦱꦥꦸꦠ꧀ꦲꦶꦁꦢꦭꦸ꧈ꦭꦤ꧀ꦉꦢꦶꦉꦢꦶꦤꦶꦥꦸꦤ꧀ꦠꦤ꧀ꦱꦃꦠꦏ꧀ꦱꦶꦃꦠꦼꦧꦶꦃꦏꦼꦩꦮꦺꦴꦤ꧀꧈ꦏꦸꦭꦱꦢꦪꦱꦩ꧀ꦥꦸꦤ꧀ꦧꦺꦴꦠꦼꦤ꧀ꦏꦺꦴꦔꦤ꧀ꦩꦭꦶꦃ꧈ꦱꦲꦱꦏꦶꦁꦏꦱꦺꦴꦏ꧀ꦲꦶꦁꦱꦪꦃ꧈ꦏꦸꦭꦱꦢꦪꦭꦗꦼꦁꦱꦩꦶꦲꦩ꧀ꦧꦿꦸꦏ꧀꧉ꦠꦺꦴꦪꦤꦶꦥꦸꦤ꧀ꦱꦔꦸꦩꦺꦃꦠꦼꦭꦱ꧀ꦧꦧꦂꦥꦶꦱꦤ꧀꧉ꦲꦸꦗꦸꦒ꧀ꦲꦸꦗꦸꦒ꧀ꦥꦿꦺꦴꦥꦼꦱꦺꦴꦂ Higgs ꦭꦗꦼꦁꦕꦫꦶꦪꦺꦴꦱ꧀꧈ꦧꦶꦭꦶꦃꦥꦶꦪꦩ꧀ꦧꦏ꧀ꦏꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦁꦢꦶꦥꦸꦤ꧀ꦱꦸꦩꦼꦉꦥ꧀ꦥꦶ꧈ꦲꦺ꧈ꦲꦶꦁꦒꦶꦃꦥꦚ꧀ꦕꦺꦤ꧀ꦱꦪꦼꦏ꧀ꦠꦺꦴꦱ꧀꧈ꦧꦺꦴꦠꦼꦤ꧀ꦔꦤ꧀ꦠꦺꦴꦱ꧀ꦠꦶꦒꦁꦢꦱꦩꦺꦠꦼꦂꦱꦏꦶꦁꦔꦿꦶꦏꦸ꧈ꦏꦸꦭꦱꦢꦪꦱꦸꦩꦼꦉꦥ꧀ꦕꦼꦛ꧈ꦮꦺꦴꦤ꧀ꦠꦼꦤ꧀ꦱꦧꦁꦱꦤꦶꦁꦩꦚ꧀ꦗꦔꦤ꧀ꦱꦒꦿꦺꦴꦩ꧀ꦧꦺꦴꦭ꧀꧈ꦲꦶꦁꦏꦁꦭꦸꦩꦩ꧀ꦥꦃꦱꦏꦶꦁꦱꦠꦸꦁꦒꦶꦭ꧀ꦭꦶꦁꦲꦫꦲꦫꦝꦠꦼꦁꦲꦫꦲꦫꦱꦤꦺꦱ꧀ꦱꦶꦥꦸꦤ꧀꧈ꦏꦤ꧀ꦛꦶꦲꦔ꧀ꦭꦁꦏꦸꦁꦔꦶꦒꦸꦩꦸꦏ꧀ꦒꦸꦩꦸꦏ꧀ꦮꦲꦸ꧉(ꦧꦝꦼꦏꦱꦩ꧀ꦧꦼꦠ꧀ꦠꦤ꧀)
