ꦉꦩ꧀ꦧꦒ꧀ꦒꦶꦥꦸꦤ꧀ꦯꦼꦩꦂ꧈ꦓꦫꦺꦁꦭꦤ꧀꧈ꦦꦼꦠꦿꦸꦏ꧀꧈ꦲꦶꦁꦮꦸꦏꦶꦂꦭꦮꦸ꧉
꧋ꦧꦧ꧀꧈ꦒꦫꦒꦫ꧈ꦮꦂꦤꦱꦫꦶ
꧋ꦯꦼꦩꦂ꧇ ꦲꦸꦫꦲꦸꦫꦲꦸꦊꦂꦏꦩ꧀ꦧꦁ꧇ ꧄ ꦭꦸꦮꦶꦃꦗꦶꦧꦼꦒ꧀ꦫꦱꦤꦼꦮꦺꦴꦁꦱꦸꦒꦶꦃꦲꦸꦠꦁ... ꦤꦶꦁꦤꦺꦴꦁ꧈ꦤꦶꦁꦤꦺꦴꦁ꧈ꦤꦺꦴꦁꦤꦺꦴꦁꦤꦶꦁ꧈ꦤꦺꦴꦁꦤꦺꦴꦁꦤꦺꦴꦁꦤꦶꦁ... ꦠꦶꦩꦸꦤ꧀ꦉꦚꦸꦃꦉꦚꦸꦃ꧈ꦠꦔꦶꦧꦔꦸꦤ꧀ꦏꦽꦔꦸꦃꦏꦽꦔꦸꦃ꧉ꦲꦝꦸꦃꦧꦶꦪꦸꦁ...
꧋ꦦꦼꦠꦿꦸꦏ꧀꧇ ꦭꦃ꧈ꦲꦶꦏꦶꦤꦺꦏ꧀ꦏꦾꦲꦶꦤꦼ꧉ꦮꦺꦴꦁꦮꦶꦱ꧀ꦠꦸꦮꦥꦶꦏꦸꦤ꧀꧈ꦫꦩ꧀ꦧꦸꦠ꧀ꦤꦮꦶꦱ꧀ꦥꦸꦠꦶꦃ꧈ꦠꦼꦏꦲꦸꦫꦤ꧀ꦲꦸꦫꦤ꧀ꦤꦼꦠꦶꦩꦸꦤ꧀ꦉꦚꦸꦃꦉꦚꦸꦃ꧉ꦲꦥꦏꦸꦮꦠ꧀... ꦏꦏꦁꦓꦫꦺꦁ꧈ꦲꦺꦁꦒꦭ꧀ꦩꦽꦤꦼꦪ꧉ꦫꦩ꧈ꦩꦼꦤ꧀ꦢꦼꦩ꧀ꦏꦼꦕꦸꦧꦸꦁ꧉
꧋ꦓꦫꦺꦁ꧇ ꦲꦺꦴꦱ꧀... ꦲꦺꦴꦱ꧀... ꦲꦺꦴꦱ꧀...
꧋ꦦꦼꦠꦿꦸꦏ꧀꧇ ꦮꦃ꧈ꦔꦺꦱꦺꦱ꧀꧈ꦏꦪꦱꦼꦥꦸꦂꦭꦁꦱꦶꦂ꧉
꧋ꦓꦫꦺꦁ꧇ ꦲꦤꦲꦥꦠ꧈ꦠꦿꦸꦏ꧀꧉ꦠꦼꦏꦔꦸꦤ꧀ꦢꦁꦲꦸꦮꦺꦴꦁꦭꦒꦶꦏꦶꦪꦃꦏꦶꦪꦃ꧉ꦲꦥꦲꦤꦧꦸꦫꦸꦏ꧀ꦏꦤ꧀꧉ꦤꦺꦏ꧀ꦤꦺꦏ꧀ꦏꦼꦲꦤꦮꦺꦴꦁꦮꦺꦮꦺꦃꦏꦼꦱꦱꦂ꧉
꧋ꦦꦼꦠꦿꦸꦏ꧀꧇ ꦲꦤꦸ꧈ꦫꦩꦲꦶꦏꦸꦏꦪꦮꦺꦴꦁꦧꦫꦶꦁ꧈ꦠꦼꦏꦲꦸꦫꦲꦸꦫꦏꦩ꧀ꦧꦶꦗꦺꦴꦒꦼꦢ꧀ꦢꦤ꧀꧈ꦢꦏ꧀ꦲꦫꦤ꧀ꦤꦶꦏꦼꦱꦸꦫꦸꦥ꧀ꦥꦤ꧀꧉ꦩꦸꦭꦤꦼꦲꦏꦸꦲꦺꦁꦒꦭ꧀ꦔꦸꦤ꧀ꦢꦁꦏꦺꦴꦮꦼ꧉
꧋ꦓꦫꦺꦁ꧇ ꦭꦺꦴ꧈ꦏꦺꦴꦮꦼꦱꦶꦁꦏꦸꦫꦁꦔꦽꦠꦶ꧉ꦫꦩꦗꦺꦴꦒꦼꦢ꧀ꦢꦤ꧀ꦲꦶꦏꦸꦫꦏ꧀ꦉꦥꦼꦠꦶꦱꦶ꧉ꦲꦏꦸꦏꦿꦸꦔꦸꦮꦂꦠ꧈ꦪꦺꦤ꧀ꦫꦩꦮꦶꦱ꧀ꦢꦢꦶꦮꦂꦒ꧇ ꦏ꧀ꦭꦼꦧ꧀꧉ꦩꦭꦃꦭꦪꦁꦏꦧꦂꦭꦺꦴꦏꦺꦴꦩꦺꦴꦠꦶꦦ꧀ꦱꦶꦁꦏꦫꦶꦝꦼꦮꦼꦲꦶꦏꦶꦚꦿꦶꦠꦏ꧀ꦲꦏꦼ꧈ꦪꦺꦤ꧀ꦏꦾꦲꦶꦤꦼꦲꦉꦥ꧀ꦢꦶꦥꦸꦂꦱꦼꦠꦺꦭ꧀ꦢꦢꦶ꧇ ꦝꦤ꧀ꦱꦼꦂ꧉ꦭꦤ꧀ꦱꦶꦩꦏ꧀ꦲꦉꦥ꧀ꦢꦢꦶ꧇ ꦝꦤ꧀ꦱꦼꦫꦺꦱ꧀꧉
꧋ꦯꦼꦩꦂ꧇ ꦮꦶꦪꦃ꧈ꦮꦶꦪꦃ꧈ꦧꦺꦴꦕꦃꦥꦝꦲꦺꦴꦫꦲꦸꦫꦸꦱ꧀꧉ꦥꦁꦒꦫꦥ꧀ꦥꦼꦩꦼꦚꦁꦮꦺꦴꦁꦠꦸꦮꦱꦒꦼꦊꦩ꧀ꦒꦼꦊꦩ꧀꧉ꦩꦫ꧉꧉꧉ꦥꦝꦩꦸꦤꦶꦪꦩꦤꦺꦃ꧈ꦱꦶꦢꦢꦏ꧀ꦲꦺꦴꦤ꧀ꦛꦺꦭ꧀ꦏꦺꦴꦮꦼ꧉
꧋ꦦꦼꦠꦿꦸꦏ꧀꧇ ꦤꦶꦁꦫꦏ꧀ꦱꦧꦼꦤꦼꦂꦫꦼꦧꦲꦼ꧇ꦠ꧇ꦩ꧉De appel valt niet ver van den stam꧈ꦠꦼꦒꦼꦱ꧀ꦱꦼ꧇ ꦠꦶꦧꦤꦶꦁꦲꦥꦼꦭ꧀ꦲꦶꦏꦸꦲꦺꦴꦫꦲꦢꦺꦴꦃꦱꦏꦲꦶꦁꦲꦸꦮꦶꦠ꧉ꦄꦂꦠꦶꦤꦼ꧇ ꦥꦔꦶꦫꦲꦶꦫꦲꦶꦏꦸꦩꦱ꧀ꦛꦶꦲꦺꦴꦫꦲꦢꦺꦴꦃꦏꦫꦺꦴꦚꦠꦤꦼ꧉ꦢꦢꦶꦱꦶꦁꦲꦺꦴꦫꦲꦸꦫꦸꦱ꧀ꦲꦶꦏꦸꦱꦶꦫꦩ꧈ꦲꦥꦏꦁꦓꦫꦺꦁ꧉ꦱꦶꦁꦗꦺꦴꦒꦼꦢ꧀ꦢꦤ꧀ꦲꦥꦱꦶꦁꦔꦼꦭꦺꦴꦏ꧀ꦲꦏꦼ꧉ꦱꦲꦸꦥꦩꦝꦺꦏ꧀ꦱ꧀ꦭꦶꦫꦤꦼꦗꦺꦴꦒꦼꦢ꧀ꦢꦤ꧀ꦩꦲꦸꦧꦚ꧀ꦗꦸꦂꦱꦼꦠꦿꦶꦏꦼꦭ꧀꧈ꦲꦥꦲꦺꦴꦫꦢꦢꦶꦒꦮꦼꦤꦶꦁꦲꦤꦏ꧀꧉ꦧꦼꦤꦼꦂꦫꦼꦫꦏ꧀ꦠꦿꦶꦩꦏꦱꦶꦃ꧈ꦢꦶꦪꦼꦭꦶꦁꦔꦏꦼꦮꦺꦴꦁꦲꦼꦤꦺꦴꦩ꧀ꦲꦶꦏꦸ꧉
꧋ꦯꦼꦩꦂ꧇ ꦲꦺꦭꦺꦴ꧈ꦧꦚ꧀ꦗꦸꦂꦲꦉꦥ꧀ꦔꦭꦃꦲꦏꦼꦮꦺꦴꦁꦠꦸꦮ꧈ꦲꦏꦸꦫꦏ꧀ꦮꦶꦱ꧀ꦭꦮꦱ꧀ꦲꦺꦴꦭꦺꦃꦏꦸꦩꦔꦤ꧀ꦲꦸꦪꦃ꧈ꦲꦏꦸꦮꦗꦶꦧ꧀ꦩꦶꦠꦸꦠꦸꦂꦫꦶꦲꦤꦏ꧀꧈ꦢꦸꦢꦸꦲꦤꦏ꧀ꦱꦶꦁꦩꦶꦠꦸꦠꦸꦂꦫꦶꦮꦺꦴꦁꦠꦸꦮ꧈ꦲꦶꦏꦸꦏꦸꦮꦭꦠ꧀꧉
꧋ꦓꦫꦺꦁ꧇ ꦭꦃꦏꦸꦮꦶꦤꦺꦏ꧀ꦥꦿꦶꦪꦪꦶꦏꦺꦴꦭꦺꦴꦠ꧀꧈ꦱꦶꦁꦢꦶꦲꦼꦤ꧀ꦢꦼꦭ꧀ꦲꦼꦤ꧀ꦢꦼꦭ꧀ꦭꦏꦼꦩꦸꦁꦲꦼꦁꦒꦺꦴꦤ꧀ꦤꦼꦩꦔꦤ꧀ꦲꦸꦪꦃ꧉ꦲꦉꦥ꧀ꦲꦼꦤ꧀ꦠꦺꦏ꧀ꦲꦸꦪꦃꦱꦢꦶꦤꦱꦧꦠꦏꦲꦼ꧈ꦪꦺꦤ꧀ꦩꦸꦭꦁꦲꦤꦏ꧀ꦏꦼꦏꦪꦩꦁꦏꦺꦴꦤꦺꦴꦲꦶꦏꦸ꧈ꦲꦶꦏꦸꦲꦫꦤ꧀ꦮꦺꦴꦁꦠꦸꦮꦩꦗꦼꦤꦸꦤ꧀꧉
꧋ꦦꦼꦠꦿꦸꦏ꧀꧇ ꦲꦏꦸꦥꦿꦺꦴ꧈ꦏꦫꦺꦴꦏꦺꦴꦮꦼꦏꦁꦓꦫꦺꦁ꧉ꦪꦺꦤ꧀ꦮꦺꦴꦁꦠꦸꦮꦩꦸꦭꦁꦲꦭꦚꦁꦲꦤꦏ꧀꧈ꦲꦶꦏꦸꦥꦠꦸꦠ꧀꧇ ꦢꦶꦭꦲꦸꦠ꧀꧉
