ꦠ꧀ꦠꦶꦥꦸꦤ꧀꧈ꦩꦿꦶꦏ꧀ꦱꦤ꧀ꦤꦶꦱꦭꦃꦱꦠꦸꦁꦒꦶꦭ꧀ꦭꦶꦥꦸꦤ꧀ꦥꦧꦿꦶꦏ꧀ꦒꦼꦤ꧀ꦝꦶꦱ꧀꧈ꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦢꦼꦩꦏ꧀ꦲꦶꦗꦺꦴ꧉
꧋ꦱꦼꦢꦾꦠꦩꦩꦂꦠꦺꦴꦱ꧀ꦱꦏꦼꦤ꧀꧇ ꦏꦂꦱꦢꦊꦩ꧀ꦱꦩ꧀ꦥꦼꦪꦤ꧀ꦢꦊꦩ꧀ꦲꦶꦁꦏꦁꦯꦶꦤꦸꦲꦸꦤ꧀ꦏꦁꦗꦼꦁꦯꦸꦭ꧀ꦠꦤ꧀ꦲꦶꦁꦔꦪꦺꦴꦪꦏꦂꦠ꧈ꦱꦩ꧀ꦥꦸꦤ꧀ꦱꦉꦩ꧀ꦧꦒ꧀ꦏꦭꦶꦪꦤ꧀ꦥꦢꦸꦏꦠꦸꦮꦤ꧀ꦉꦱꦶꦝꦺꦤ꧀꧈ꦱꦭꦺꦴꦮꦺꦴꦁꦔꦶꦥꦸꦤ꧀ꦫꦢꦺꦤ꧀ꦮꦢꦤꦢ꧀ꦮꦶꦗꦯꦼꦮꦪ꧈ꦲꦶꦁꦏꦁꦢꦶꦥꦸꦤ꧀ꦏꦂꦱꦏ꧀ꦲꦏꦼꦤ꧀ꦲꦁꦒꦼꦤ꧀ꦠꦺꦴꦱ꧀ꦱꦶꦢꦢꦺꦴꦱ꧀ꦥꦔꦒꦼꦁꦏꦤ꧀ꦠꦺꦴꦂꦏꦺꦴꦩ꧀ꦠꦧꦶꦭꦶꦠꦶꦠ꧀ꦏꦱ꧀ꦏꦫꦠꦺꦴꦤ꧀꧇ ꦒꦸꦱ꧀ꦠꦶꦫꦢꦺꦤ꧀ꦩꦱ꧀ꦯꦸꦲꦄꦠ꧀ꦩꦗꦶ꧉ꦏꦏꦂꦱꦏ꧀ꦲꦏꦼꦤ꧀ꦢꦢꦺꦴꦱ꧀ꦏꦺꦴꦤ꧀ꦠꦿꦺꦴꦭ꧀ꦭꦶꦂꦥꦼꦏꦼꦤ꧀ꦏꦧꦸꦥꦠꦺꦤ꧀ꦧꦤ꧀ꦠꦸꦭ꧀꧇ ꦧꦤ꧀ꦢꦫꦫꦢꦺꦤ꧀ꦩꦱ꧀ꦯꦪꦶꦢꦸ꧈ꦥꦸꦠꦿꦠꦶꦠꦶꦭꦫꦤ꧀ꦤꦶꦥꦸꦤ꧀ꦱꦸꦮꦂꦒꦶꦱꦩ꧀ꦥꦼꦪꦤ꧀ꦢꦊꦩ꧀ꦏꦁꦗꦼꦁꦓꦸꦱ꧀ꦠꦶꦦꦔꦼꦫꦤ꧀ꦲꦢꦶꦦꦠꦶꦲꦟꦺꦴꦩ꧀꧉
꧋ꦱꦏꦶꦁꦔꦪꦺꦴꦓꦾꦏꦂꦠꦏꦮꦂꦠꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦠꦸꦮꦤ꧀ Mr. ꦫꦢꦺꦤ꧀ꦏꦂꦠꦤꦒꦫ꧈ꦄꦩ꧀ꦠꦼꦤꦂꦲꦶꦁꦏꦁꦏꦧꦶꦪꦤ꧀ꦠꦺꦴꦏ꧀ꦲꦏꦼꦤ꧀ꦭꦤ꧀ꦢꦿꦢ꧀ꦲꦶꦁꦔꦪꦺꦴꦓꦾ꧈ꦏꦠꦼꦠꦼꦥ꧀ꦥꦏꦼꦤ꧀ꦢꦢꦺꦴꦱ꧀ꦥꦔꦂꦱꦭꦤ꧀ꦢꦿꦢ꧀ꦲꦶꦁꦦꦩꦼꦏꦱ꧀ꦱꦤ꧀꧉
꧋Arneta ꦩꦂꦠꦺꦴꦱ꧀ꦱꦏꦼꦤ꧀꧈ꦦꦩꦉꦤ꧀ꦠꦃꦩꦼꦤ꧀ꦠꦱ꧀ꦤꦩ꧀ꦥꦶꦥꦮꦂꦠꦺꦴꦱ꧀꧈ꦧꦶꦭꦶꦃꦏꦭꦩꦊꦩ꧀ 26/27 ꦗꦤꦸꦮꦫꦶꦥꦸꦤꦶꦏ꧈ꦲꦶꦁꦏꦁꦏꦮꦁꦮꦺꦴꦤ꧀ꦠꦼꦤ꧀ꦏꦧꦼꦱ꧀ꦩꦺꦤ꧀ꦲꦒꦼꦁꦲꦒꦼꦁꦔꦤ꧀꧈ꦲꦶꦁꦏꦁꦲꦚ꧀ꦗꦭꦂꦫꦶꦮꦺꦴꦤ꧀ꦠꦼꦤ꧀ꦒꦿꦶꦪꦤꦶꦁꦠꦶꦪꦁꦧꦸꦩꦶꦭꦤ꧀ꦠꦶꦪꦁꦡꦾꦺꦴꦁꦲ꧀ꦮ 70 ꦲꦶꦗꦶ꧈ꦲꦶꦁꦏꦁꦠꦼꦭꦱ꧀ꦢꦼꦤꦶꦁꦏꦿꦺꦴꦝꦤ꧀ꦤꦶꦁꦭꦠꦸꦮꦲꦸ꧉ꦏꦫꦸꦒꦶꦪꦤ꧀ꦤꦶꦥꦸꦤ꧀ꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦮꦺꦴꦤ꧀ꦠꦼꦤ꧀ f 100.000꧉
꧋ꦮꦺꦴꦤ꧀ꦠꦼꦤ꧀ꦥꦮꦂꦠꦺꦴꦱ꧀꧈ꦧꦼꦚ꧀ꦗꦶꦁꦠꦁꦒꦭ꧀ 17 ꦩꦉꦠ꧀ꦲꦶꦁꦔꦗꦼꦁꦥꦸꦤꦶꦏ꧈ꦲꦶꦁꦥꦸꦫꦮꦺꦭ꧀ꦠꦼꦥꦿꦺꦝꦼꦤ꧀꧈ꦧꦝꦼꦢꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦥꦉꦥꦠ꧀ꦠꦤ꧀ꦥꦽꦭꦸꦤꦶꦥꦸꦤ꧀ꦧꦝꦼꦲꦔꦽꦩ꧀ꦧꦒ꧀ꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀ꦫꦤ꧀ꦠꦩꦤ꧀ꦠꦸꦩꦿꦥ꧀ꦲꦶꦁꦠꦲꦸꦤ꧀ 1929꧉
꧋ꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦱꦢꦱꦢꦶꦤ꧀ꦠꦼꦤ꧀ꦱꦥꦿꦶꦏꦶ꧈ꦫꦢꦺꦤ꧀ꦲꦢꦶꦥꦠꦶꦲꦂꦪꦯꦸꦮꦺꦴꦤ꧀ꦢ꧈ꦧꦸꦥꦠꦶꦲꦶꦁꦦꦛꦶ꧈ꦠꦩ꧀ꦥꦶꦒꦚ꧀ꦗꦂꦫꦤ꧀ꦧꦶꦤ꧀ꦠꦁꦩꦱ꧀ꦲꦒꦼꦁꦱꦏꦶꦁꦤꦒꦫꦶ꧉ꦲꦶꦁꦏꦁꦲꦩꦫꦶꦁꦔꦏꦼꦤ꧀ꦥꦢꦸꦏꦠꦸꦮꦤ꧀ van Gulick꧈ꦉꦱꦶꦝꦺꦤ꧀ꦲꦶꦁꦯꦼꦩꦫꦁ꧉ꦲꦶꦁꦢꦶꦤ꧀ꦠꦼꦤ꧀ꦮꦲꦸꦲꦶꦁꦥꦤ꧀ꦝꦥꦏꦧꦸꦥꦠꦺꦤ꧀ꦦꦛꦶꦮꦺꦴꦤ꧀ꦠꦼꦤ꧀ꦥꦱꦩꦸꦮꦤ꧀ꦲꦶꦁꦏꦁꦏꦗꦼꦤꦼꦁꦔꦤ꧀ꦢꦼꦤꦶꦁꦥꦫꦧꦸꦥꦠꦶꦲꦶꦁ꧇ ꦑꦸꦢꦸꦱ꧀꧈ꦗꦦꦫ꧈ꦦꦸꦂꦮꦢꦢꦶ꧈ꦢꦼꦩꦏ꧀꧈ꦯꦼꦩꦫꦁꦱꦂꦠꦲꦶꦁꦏꦁꦧꦸꦥꦠꦶꦲꦶꦁꦉꦩ꧀ꦧꦁ꧉ꦩꦏꦠꦼꦤ꧀ꦲꦸꦒꦶꦄꦩ꧀ꦠꦼꦤꦂꦮꦭꦤ꧀ꦢꦶꦠꦸꦮꦶꦤ꧀ꦥꦿꦶꦧꦸꦩꦶꦲꦶꦁꦒꦶꦃꦏꦛꦃ꧉
꧋ꦱꦏꦶꦁꦯꦸꦫꦧꦪꦏꦮꦂꦠꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦠꦸꦮꦤ꧀ Mr. ꦯꦸꦧꦿꦠ꧈ꦮꦺꦠ꧀ꦎꦤ꧀ꦝꦼꦂꦲꦶꦁꦔꦿꦶꦏ꧈ꦧꦝꦼꦔꦠꦸꦂꦫꦏꦼꦤ꧀ꦱꦼꦫꦠ꧀ꦥꦤꦸꦮꦸꦤ꧀ꦤꦤ꧀꧈ꦩꦸꦫꦶꦃꦲꦶꦁꦯꦸꦫꦧꦪꦢꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦥꦩꦸꦭꦁꦔꦤ꧀ꦏꦫꦗꦶꦤꦤ꧀ꦠꦸꦮꦶꦤ꧀ꦏꦒꦸꦤꦤ꧀ꦠꦸꦩꦿꦥ꧀ꦠꦶꦠꦶꦪꦁꦧꦸꦩꦶ꧉
꧋ꦮꦺꦴꦤ꧀ꦠꦼꦤ꧀ꦥꦮꦂꦠꦺꦴꦱ꧀꧈ꦧꦶꦭꦶꦃꦯꦩ꧀ꦥꦼꦪꦤ꧀ꦢꦊꦩ꧀ꦲꦶꦁꦏꦁꦯꦶꦤꦸꦲꦸꦤ꧀ꦏꦁꦗꦼꦁꦯꦸꦯꦸꦲꦸꦤꦤ꧀ꦲꦶꦁꦯꦸꦫꦏꦂꦠ꧈ꦧꦝꦼꦏꦥꦶꦱꦸꦁꦱꦸꦁꦧꦶꦤ꧀ꦠꦁꦥꦉꦤ꧀ꦠꦃꦦꦿꦱ꧀ꦩꦤ꧀꧈ꦲꦶꦁꦏꦁꦧꦝꦼꦔꦠꦸꦂꦫꦏꦼꦤ꧀ꦠꦸꦮꦤ꧀ꦏꦺꦴꦁꦱꦸꦭ꧀ꦗꦼꦤ꧀ꦢꦿꦭ꧀꧉
꧋ꦱꦼꦫꦠ꧀ꦏꦧꦂ Warna-Warta ꦩꦂꦠꦺꦴꦱ꧀ꦱꦏꦼꦤ꧀꧇ ꦥꦫꦥꦸꦠꦿꦢꦊꦩ꧀ꦱꦩ꧀ꦥꦼꦪꦤ꧀ꦢꦊꦩ꧀ꦲꦶꦁꦏꦁꦯꦶꦤꦸꦲꦸꦤ꧀ꦲꦯꦸꦫꦏꦠ꧈ꦲꦶꦁꦒꦶꦃꦥꦸꦤꦶꦏ꧇ ꦑꦁꦗꦼꦁꦥꦔꦼꦫꦤ꧀ꦲꦂꦪꦕꦏꦿꦤꦶꦔꦿꦠ꧀꧈ꦑꦁꦗꦼꦁꦥꦔꦼꦫꦤ꧀ꦲꦂꦪꦑꦸꦱꦸꦩꦪꦸꦢ꧈ꦑꦁꦗꦼꦁꦥꦔꦼꦫꦤ꧀ꦲꦂꦪꦲꦢꦶꦮꦶꦗꦪ(ꦮꦂꦒꦫꦢ꧀ꦏꦮꦸꦭ)ꦭꦤ꧀ꦑꦁꦗꦼꦁꦥꦔꦼꦫꦤ꧀ꦲꦂꦪꦩꦁꦑꦸꦤꦶꦔꦿꦠ꧀꧈ꦱꦩꦶꦥꦶꦤꦫꦶꦁꦔꦤ꧀ꦒꦚ꧀ꦗꦂꦫꦤ꧀ꦱꦿꦶꦤꦸꦒꦿꦲꦎꦁꦏ 2꧉
꧋ꦝꦼꦥꦂꦠꦼꦩꦺꦤ꧀ꦎꦤ꧀ꦢꦼꦂꦮꦶꦱ꧀ꦩꦂꦠꦺꦴꦱ꧀ꦱꦏꦼꦤ꧀꧇ ꦮꦶꦮꦶꦠ꧀ꦠꦁꦒꦭ꧀ꦱꦥꦶꦱꦤ꧀ꦮꦸꦭꦤ꧀ꦥꦸꦤꦶꦏ꧈ꦥꦩꦸꦭꦁꦔꦤ꧀ꦥꦩꦸꦭꦁꦔꦤ꧀ꦥꦂꦠꦶꦏꦸꦭꦶꦂꦲꦶꦁꦏꦁꦧꦝꦼꦏꦥꦫꦶꦁꦔꦤ꧀ꦱꦸꦧ꧀ꦱꦶꦝꦶꦒꦸꦥꦽꦩꦺꦤ꧀꧈ꦲꦶꦁꦒꦶꦃꦥꦸꦤꦶꦏ꧇ ꦥꦩꦸꦭꦁꦔꦤ꧀ꦮꦭꦤ꧀ꦢꦶꦠꦶꦒ 1 ꦲꦶꦁꦓ꧀ꦭꦼꦩꦺꦴꦉ꧈2 ꦲꦶꦁꦦꦿꦧꦭꦶꦁꦒ꧈ꦭꦤ꧀ 3 ꦲꦶꦁꦯꦸꦏꦧꦸꦩꦶ꧉H.C.S.ꦱꦏꦮꦤ꧀꧈1 ꦲꦶꦁꦨꦺꦴꦤ꧀ꦢꦮꦱ꧈2 ꦡꦁꦒꦼꦫꦁ꧈3 ꦦꦺꦴꦂꦝꦼꦏꦺꦴꦏ꧀꧈ꦭꦤ꧀ 4 ꦲꦶꦁꦔꦚ꧀ꦗꦸꦏ꧀꧉H.I.S.꧉ꦱꦏꦮꦤ꧀꧈1 ꦲꦶꦁꦏꦸꦁ(ꦨꦭꦶ)꧈2 ꦲꦶꦁꦩꦼꦝꦤ꧀꧈3 ꦲꦶꦁꦡꦼꦒꦭ꧀꧈ꦭꦤ꧀ 4 ꦲꦶꦁꦕꦶꦭꦕꦥ꧀꧉ꦱꦼꦏꦏꦼꦭ꧀ꦱꦼꦏꦸꦭ꧀ꦠꦶꦒ꧈1 ꦲꦶꦁꦲꦿꦮ꧈2 ꦲꦶꦁꦨꦠꦮꦶ꧈ꦭꦤ꧀ 3 ꦲꦶꦁꦯꦸꦫꦏꦂꦠ꧉
꧋ꦤꦒꦫꦶꦮꦭꦤ꧀ꦢꦶ
꧋ꦱꦏꦶꦁꦄꦩ꧀ꦱꦼꦠꦼꦂꦝꦩ꧀ꦏꦮꦂꦠꦺꦴꦱ꧀ꦱꦏꦼꦤ꧀꧇ ꦏꦁꦗꦼꦁꦯꦿꦶꦨꦒꦼꦤ꧀ꦝꦩꦲꦫꦗꦥꦸꦠꦿꦶꦲꦶꦁꦟꦺꦢꦼꦂꦭꦤ꧀꧈ꦩꦫꦶꦁꦔꦶꦢꦂꦩꦲꦂꦠꦏꦁꦒꦼꦤꦶꦤ꧀ꦢꦏ꧀ꦲꦏꦼꦤ꧀ꦥꦥꦿꦶꦏ꧀ꦱꦤ꧀ꦲꦶꦁꦱꦊꦧꦼꦠ꧀ꦠꦶꦥꦸꦤ꧀ꦱꦩꦸꦢꦿꦆꦤ꧀ꦝꦺꦴꦤꦼꦯꦶꦪꦃꦔꦿꦶꦏꦶ꧉
꧋ꦱꦏꦶꦁꦨꦺꦴꦱ꧀ꦏꦸꦥ꧀(ꦤꦒꦫꦶꦮꦭꦤ꧀ꦢꦶ)ꦏꦭꦠꦁꦒꦭ꧀ 27 ꦗꦤꦸꦮꦫꦶꦥꦸꦤꦶꦏ꧈Aneta ꦩꦂꦠꦺꦴꦱ꧀ꦱꦏꦼꦤ꧀ꦏꦢꦺꦴꦱ꧀ꦲꦶꦁꦔꦤ꧀ꦝꦥ꧀ꦥꦸꦤꦶꦏ꧇
꧋ꦠꦸꦮꦤ꧀ T. Ottolander꧈ꦲꦶꦁꦒꦶꦃꦥꦸꦤꦶꦏꦱꦠꦸꦁꦒꦶꦭ꧀ꦭꦶꦁꦄꦃꦭꦶꦠꦤꦶꦧꦺꦠꦤꦶꦧꦺꦴꦁꦱꦮꦭꦤ꧀ꦢꦶ꧈ꦲꦶꦁꦏꦁꦱꦩ꧀ꦥꦸꦤ꧀ꦏꦱꦸꦮꦸꦤ꧀ꦤꦩꦶꦤꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦠꦤꦃꦲꦶꦤ꧀ꦢꦶꦪꦔꦿꦶꦏꦶ꧈ꦢꦺꦫꦺꦁꦢꦔꦸꦥꦸꦤꦶꦏꦔꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦉꦱꦺꦥ꧀ꦱꦶꦮꦺꦴꦤ꧀ꦠꦼꦤ꧀ꦲꦶꦁꦲꦺꦴꦠꦺꦭ꧀ Klassen (ꦲꦶꦁꦒꦶꦃꦲꦶꦁꦤꦒꦫꦶꦮꦭꦤ꧀ꦢꦶ)ꦲꦶꦁꦏꦁꦲꦚ꧀ꦗꦼꦤꦼꦁꦔꦶꦉꦱꦺꦥ꧀ꦱꦶꦮꦲꦸꦏꦛꦃꦱꦔꦼꦠ꧀꧈ꦩꦶꦤꦺꦴꦁꦏꦥꦏꦸꦂꦩꦠ꧀ꦠꦤ꧀ꦤꦶꦥꦸꦤ꧀ꦠꦸꦮꦤ꧀ Ottolander ꦮꦲꦸ꧈ꦲꦺꦴꦠꦺꦭ꧀ꦏꦥꦗꦁꦥꦗꦁꦩꦮꦶꦱꦼꦱꦼꦏꦂꦫꦤ꧀ꦲꦺꦢꦶꦱꦔꦼꦠ꧀꧉ꦲꦶꦁꦏꦁꦢꦢꦺꦴꦱ꧀ꦗꦸꦫꦸꦭꦭꦢꦺꦴꦱ꧀ꦥꦫꦱꦼꦠꦸꦝꦺꦤ꧀ꦲꦶꦁꦥꦩꦸꦭꦁꦔꦤ꧀ꦭꦸꦲꦸꦂꦠꦠꦤꦺꦤ꧀ꦲꦶꦁ Utrecht ꦲꦶꦁꦏꦁꦱꦩꦶꦩꦔꦁꦒꦼꦚꦫꦗꦺꦴꦔꦺꦴꦱ꧀꧈ꦠꦸꦮꦶꦤ꧀ꦥꦫꦤꦺꦴꦤꦃꦤꦺꦴꦤꦃꦲꦶꦁꦏꦁꦱꦩꦶꦩꦔꦁꦒꦼꦱꦫꦸꦁꦱꦲꦫꦱꦸꦏ꧀ꦏꦤ꧀ꦏꦼꦧꦪꦏ꧀꧉ꦢꦺꦤꦺꦲꦶꦁꦏꦁꦲꦔꦺꦱ꧀ꦠꦿꦺꦤꦶꦉꦱꦺꦥ꧀ꦱꦶꦮꦲꦸ꧈ꦏꦗꦮꦶꦠꦶꦠꦶꦪꦁꦨꦺꦴꦱ꧀ꦏꦸꦥ꧀ꦥꦶꦪꦩ꧀ꦧꦏ꧀꧈ꦲꦸꦒꦶꦠꦶꦭꦱ꧀ꦝꦶꦉꦏ꧀ꦠꦸꦂꦠꦠꦤꦺꦤ꧀ꦲꦶꦁꦲꦶꦤ꧀ꦢꦶꦪꦔꦿꦶꦏꦶ꧈ꦥꦢꦸꦏꦠꦸꦮꦤ꧀ Dr. H.J. Lovink꧉ꦠꦸꦮꦤ꧀ Prof. Dr. Jeswiet꧈ꦠꦸꦮꦤ꧀ Prof. Dr. Roepke꧈ꦭꦤ꧀ꦠꦸꦮꦤ꧀ Prof. Ham꧈ꦠꦶꦒꦠꦶꦒꦤꦶꦥꦸꦤ꧀ꦒꦸꦫꦸꦲꦒꦼꦁꦲꦶꦁꦥꦩꦸꦭꦁꦔꦤ꧀ꦭꦸꦲꦸꦂꦱ꧀ꦧꦸꦠ꧀ꦔꦶꦁꦒꦶꦭ꧀꧈ꦏꦗꦮꦶꦥꦸꦤꦶꦏ꧇ ꦏꦁꦗꦼꦁꦫꦢꦺꦤ꧀ꦲꦢꦶꦦꦠꦶꦲꦂꦪꦮꦶꦫꦟꦠꦏꦸꦱꦸꦩꦃ꧈ꦨꦸꦥꦠꦶꦲꦶꦁꦨꦤ꧀ꦝꦸꦁ꧈ꦠꦸꦮꦤ꧀ Ir. Baars ꦥꦔꦚ꧀ꦗꦸꦂꦫꦶꦁꦏꦺꦴꦩ꧀ꦩꦸꦤꦶꦱ꧀ꦲꦶꦁꦏꦁꦱꦩꦁꦏꦼꦱꦩ꧀ꦥꦱꦩ꧀ꦥꦸꦤ꧀ꦩꦤ꧀ꦠꦸꦤ꧀ꦢꦢꦺꦴꦱ꧀ꦏꦺꦴꦩ꧀ꦩꦸꦤꦶꦱ꧀꧈ꦭꦤ꧀ꦠꦏ꧀ꦱꦶꦃꦏꦛꦃꦩꦭꦶꦃꦱꦤꦺꦱ꧀ꦱꦤꦺꦱ꧀ꦱꦶꦥꦸꦤ꧀꧉ꦱꦭꦗꦼꦁꦔꦶꦥꦸꦤ꧀ꦤꦸꦤ꧀ꦠꦼꦤ꧀ꦢꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦝꦲꦂꦥꦶꦱ꧀ꦠ꧉
ꦥꦮꦂꦠꦺꦴꦱ꧀ꦱꦏꦶꦁꦉꦝꦏ꧀ꦱꦶ
꧋ꦠꦸꦮꦤ꧀ꦥꦿꦮꦶꦫꦲꦶꦁꦔꦪꦺꦴꦓꦾ꧈ꦥꦚ꧀ꦗꦸꦫꦸꦁꦥꦚ꧀ꦗꦼꦤꦼꦁꦔꦤ꧀ꦧꦺꦴꦠꦼꦤ꧀ꦏꦥꦕꦏ꧀꧈ꦲꦮꦶꦠ꧀ꦤꦩꦸꦁꦢꦢꦺꦴꦱ꧀ꦥꦽꦭꦸꦤꦶꦁꦠꦶꦪꦁꦱꦒꦺꦴꦭꦺꦴꦁꦔꦤ꧀ꦤꦶꦥꦸꦤ꧀ꦥꦶꦪꦩ꧀ꦧꦏ꧀꧉
꧋ꦊꦁꦒꦤꦤ꧀ꦤꦺꦴꦩꦼꦂ 2912꧉ꦏꦶꦤ꧀ꦠꦸꦤ꧀ꦤꦤ꧀ꦒꦩ꧀ꦧꦂꦱꦩ꧀ꦥꦸꦤ꧀ꦢꦸꦩꦸꦒꦶ꧉ꦩꦤꦮꦶꦩꦚ꧀ꦗꦸꦫꦸꦁꦝꦠꦼꦁꦏꦗꦮꦺꦤ꧀꧈ꦢꦶꦥꦸꦤ꧀ꦔꦭꦩꦠ꧀ꦠꦤꦝꦠꦼꦁꦉꦝꦏ꧀ꦱꦶꦏꦗꦮꦺꦤ꧀꧉
