Page:Kajawen 09 1928-02-01.pdf/5

ꦠꦽꦩ꧀ꦲꦤꦺꦁ​ꦥꦥꦽꦩꦤ꧀꧈꧃ꦲꦶꦁꦠꦼꦥꦶꦤꦶꦁꦥꦸꦤꦁꦩꦼꦒꦥꦸꦠꦶꦃ꧈ꦥꦤ꧀ꦏꦮꦸꦂꦪꦤ꧀ꦏꦶꦠꦿꦶꦤꦶꦁ​ꦥꦢꦼꦱꦤ꧀꧈​ꦠꦤ꧀ꦥꦲꦼ​ꦭꦶꦂ​ꦱꦶꦱꦶꦤꦺꦴꦩ꧀ꦩꦼ꧈​ꦏꦁ​ꦠꦼꦤ꧀ꦠꦽꦩ꧀ꦲꦏꦼꦏꦼꦩꦸꦭ꧀꧈​ꦲꦔꦤ꧀ꦠꦶ​ꦩꦿꦶꦁ​ꦱꦶꦂꦤꦤꦶꦁ​ꦲꦠꦶꦱ꧀꧈​ꦏꦁ​ꦤꦸꦩꦸꦱ꧀ꦱꦶ​ꦱꦫꦶꦫ꧈​ꦲꦤꦿꦸꦱ꧀ꦲꦶꦁ​ꦧꦧꦭꦸꦁ​꧈​ꦪꦺꦏꦸ​ꦚꦠꦤꦶꦁ​ꦏꦲꦤꦤ꧀꧈​ꦏꦁ​ꦠꦶꦤꦼꦩꦸ​ꦲꦤꦺꦁ​ꦱꦫꦱ꧀ꦱꦤ꧀ꦤꦶꦁ​ꦧꦸꦩꦶ꧈​ꦥꦩ꧀ꦧꦧꦂꦫꦶꦁ​ꦏꦮꦱ꧉

꧃ꦢꦼꦤꦶꦁꦚꦠꦫꦱꦤꦶꦫꦺꦁꦲꦠꦶꦱ꧀꧈ꦲꦁꦒꦸꦁꦔꦼꦩ꧀ꦧꦼꦁ​ꦲꦤꦤꦶꦫꦺꦁ​ꦠꦶꦂꦠ꧈​ꦏꦁ​ꦩꦮꦺꦃ​ꦥꦔꦸꦫꦶꦥ꧀ꦥꦤ꧀ꦤꦼ꧈​ꦱꦔ꧀ꦒꦾꦤꦶꦁ​ꦠꦤꦼꦩ꧀ꦠꦸꦮꦸꦃ꧈​ꦏꦁ​ꦠꦸꦩꦸꦮꦸꦃ​ꦔꦽꦉꦁ​ꦒ​ꦧꦸꦩꦶ꧈​ꦢꦢꦾ​ꦢꦪ​ꦢꦶꦤꦪꦤ꧀꧈​ꦥꦔꦸꦮꦱꦤꦶꦥꦸꦤ꧀꧈​ꦥꦸꦮꦫ​ꦲꦶꦁ​ꦢꦢꦶꦤꦶꦫ꧈​ꦱꦮꦂꦤꦤꦶꦁ​ꦏꦲꦤꦤ꧀ꦏꦁ​ꦏꦠꦺꦴꦤ꧀ꦱꦩꦶ꧈​ꦲꦩꦸꦁ​ꦱꦂꦮ​ꦥꦿꦪꦺꦴꦒ꧉​

꧃ꦥꦤ꧀ꦱꦚꦠꦏꦮꦱꦤꦶꦁꦮꦶꦢ꧀ꦝꦶ꧈ꦢꦺꦤ꧀ꦤꦩꦮꦺꦃꦫꦫꦱ꧀ꦱꦶꦁꦱꦮꦁꦔꦤ꧀꧈​ꦠꦤ꧀ꦥ​ꦥꦶꦥꦶꦤ꧀ꦝꦤ꧀ꦱꦼꦁ​ꦱꦼꦩ꧀ꦩꦼ꧈​ꦧꦼꦢ​ꦭꦤ꧀ꦲꦤꦤꦶꦥꦸꦤ꧀꧈​ꦲꦶꦁ​ꦏꦒꦸꦤꦤ꧀ꦏꦂꦪꦤꦶꦁ​ꦗꦤ꧀ꦩꦶ꧈​ꦤꦢꦾꦤ꧀ꦱꦂꦮ​ꦱꦩ꧀ꦧꦢ꧈​ꦠꦶꦤꦼꦩꦸꦤꦼ​ꦠꦩ꧀ꦠꦸ꧈​ꦩꦏ꧀ꦱꦶꦃ​ꦲꦤ​ꦏꦁ​ꦤꦤꦕꦢ꧀꧈​ꦢꦼꦤꦶꦁ​ꦲꦩꦸꦁ​ꦲꦶꦔꦁ​ꦒꦼꦥ꧀ꦒꦸꦤꦤꦶꦁ​ꦗꦤ꧀ꦩꦶ꧈​ꦏꦁ​ꦲꦫꦤ꧀ꦏꦭꦸꦮꦶꦃꦲꦤ꧀꧉​

꧃ꦧꦼꦢꦭꦮꦤ꧀ꦲꦤꦤꦶꦁꦢꦸꦩꦢꦶ꧈ꦤꦢꦾꦤ꧀ꦲꦩꦸꦁꦏꦲꦤꦤꦶꦁꦩꦼꦒ꧈​ꦏꦁ​ꦫꦸꦩꦼꦁ​ꦒ​ꦔꦮꦶꦪꦠ꧀ꦠꦼ꧈​ꦫꦱꦤꦶꦫ​ꦔꦼꦭꦔꦸꦠ꧀꧈​ꦪꦺꦤ꧀ꦫꦶꦤꦫꦱ꧀ꦭꦤ꧀ꦠꦸꦱ꧀ꦱꦶꦁ​ꦲꦠꦶ꧈​ꦒꦒꦱ꧀ꦏꦮꦱꦤ꧀ꦤꦶꦫ꧈​ꦲꦶꦁ​ꦏꦁ​ꦩꦲ​ꦲꦓꦸꦁ​꧈​ꦥꦩꦔꦸꦤ꧀ꦤꦶꦫꦺꦁ​ꦱꦮꦁ​ꦔꦤ꧀꧈​ꦏꦺꦴꦁ​ꦱꦶ​ꦲꦺꦮꦸꦃ​ꦒꦶꦤꦒꦥ꧀ꦥꦤ꧀ꦲꦶꦁ​ꦥꦔꦽꦠꦶ꧈​ꦲꦶꦁ​ꦏꦭꦸꦮꦶꦃꦲꦤ꧀ꦤꦶꦫ꧉

꧄ꦏꦁꦠꦶꦤꦼꦩꦸꦩꦸꦁꦱꦂꦮꦥꦿꦪꦺꦴꦒꦶ꧈ꦭꦤ꧀ꦩꦸꦤ꧀ꦥꦔꦠ꧀ꦤꦼꦫꦃꦲꦶ​ꦏꦮꦸꦭ꧈​ꦤꦢꦾꦤ꧀ꦩꦸꦁ​ꦱꦮꦁ​ꦔꦤ꧀ꦧꦲꦼ꧈​ꦱꦪꦼꦏ꧀ꦠꦶ​ꦮꦺꦃ​ꦥꦏꦤ꧀ꦠꦸꦏ꧀꧈​ꦲꦔꦼꦤꦤ꧀ꦤꦶ​ꦮꦫꦱ꧀ꦱꦶꦁ​ꦲꦠꦶ꧈​ꦠꦼꦩꦃ​ꦤꦸꦤꦸꦤ꧀ꦠꦸꦤ꧀ꦩꦫꦁ​꧈​ꦠꦼꦤ꧀ꦠꦽꦩ꧀ꦩꦶꦫꦺꦁ​ꦏꦭ꧀ꦧꦸ꧈​ꦔꦶꦁ​ꦗꦠꦶꦤꦼ​ꦏꦁ​ꦩꦁ​ꦏꦤ꧈​ꦩꦸꦁ​ꦠꦸꦩꦸꦮꦸꦃ​ꦲꦶꦁ​ꦠꦾꦱ꧀ꦱꦶꦁ​ꦗꦤ꧀ꦩ​ꦏꦁ​ꦩꦩꦿꦶꦃ꧈​ꦮꦿꦸꦃ​ꦲꦢꦶꦤꦶꦁ​ꦥꦔꦿꦱ꧉

꧄ꦲꦮꦶꦠ꧀ꦗꦤ꧀ꦩꦏꦥꦿꦃꦠꦤ꧀ꦩꦂꦢꦸꦭꦶ꧈ꦩꦿꦶꦁꦲꦺꦭꦺꦴꦏ꧀ꦩꦾꦁ​ꦪꦺꦴꦒꦾꦤꦶꦁ​ꦱꦮꦁ​ꦔꦤ꧀꧈​ꦏꦁ​ꦢꦲꦠ꧀ꦲꦱꦿꦶ​ꦫꦫꦱ꧀ꦱꦼ꧈​ꦏꦢꦶ​ꦒꦩ꧀ꦧꦂ​ꦲꦶꦁ​ꦭꦸꦲꦸꦂ꧈​ꦏꦁ​ꦥꦶꦤꦼꦛ​ꦏꦢꦶ​ꦱꦪꦼꦏ꧀ꦠꦶ꧈​ꦭꦩꦸꦤ꧀ꦠ​ꦚꦶꦥꦠ꧀ꦠꦤ꧈​ꦲꦤꦤꦼ​ꦱꦠꦸꦲꦸ꧈​ꦧꦪ​ꦫꦶꦤꦱ​ꦱꦚꦠ꧈​ꦲꦔꦼꦤꦤ꧀ꦤꦶ​ꦩꦫꦶꦁ​ꦕꦶꦥ꧀ꦠꦤꦶꦫꦺꦁ​ꦲꦠꦶ꧈​ꦏꦁ​ꦠꦸꦩꦸꦮꦸꦃ​ꦢꦢꦏ꧀ꦏꦤ꧀꧉​

꧄ꦲꦮꦶꦠ꧀ꦩꦱ꧀ꦛꦶꦠꦸꦩꦤ꧀ꦢꦸꦏ꧀ꦩꦿꦶꦁꦝꦶꦫꦶ꧈ꦠꦸꦁꦠꦸꦩ꧀ꦩꦶꦫ​ꦲꦮꦤꦶꦁ​ꦏꦱꦽꦥ꧀ꦥꦤ꧀꧈​ꦩꦮꦺꦃ​ꦲꦺꦴꦱꦶꦏ꧀ꦏꦶꦁ​ꦫꦱꦤꦼ꧈​ꦭꦤ꧀ꦫꦸꦩꦱ​ꦢꦸꦩꦸꦤꦸꦁ​꧈​ꦲꦤꦺꦁ​ꦢꦺꦴꦤ꧀ꦏꦁ​ꦩꦶꦉꦤ​ꦲꦠꦶ꧈​ꦩꦾꦁ​ꦔ꧀ꦭꦔꦸꦠ꧀ꦠꦶꦁ​ꦒꦒꦱ꧀ꦱꦤ꧀꧈​ꦱꦪ​ꦮꦸꦮꦸꦃ​ꦮꦸꦮꦸꦃ꧈​ꦏꦭꦩꦸꦤ꧀ꦠ​ꦏꦮꦶꦗꦶꦭ꧀ꦭ꧈​ꦪꦼꦏ꧀ꦠꦶ​ꦲꦂꦱ​ꦩꦼꦩꦼꦛ​ꦏꦁ​ꦩꦼꦒ​ꦥꦸꦠꦶꦃ꧈​ꦥꦫꦤ꧀ꦱꦮꦸꦱꦶꦁ​ꦱꦶꦂꦤ꧉​

꧄ꦕꦶꦥ꧀ꦠꦤꦶꦁꦠꦾꦱ꧀ꦏꦁꦩꦁꦏꦤꦪꦼꦏ꧀ꦠꦶ꧈ꦧꦁꦏꦶꦠ꧀ꦲꦤ꧀ꦠꦸꦏ꧀ꦮꦭꦸꦪꦤ꧀ꦏꦁ​ꦚꦠ꧈​ꦮꦸꦱ꧀ꦱꦶꦁ​ꦱꦶꦂꦤ​ꦥꦼꦥꦼꦠꦼꦁ​ꦔꦼ꧈​ꦩꦺꦱꦶ​ꦒꦸꦩ꧀ꦭꦂꦫꦶꦁ​ꦮꦸꦗꦸꦢ꧀꧈​ꦏꦁ​ꦲꦫꦫꦱ꧀ꦧꦸꦩꦶ​ꦱꦶꦤꦸꦁ​ꦒꦶꦁ​꧈​ꦲꦶꦔꦸꦏꦶꦂ​ꦏꦲꦼꦭꦺꦴꦏ꧀ꦏꦤ꧀꧈​ꦏꦮꦱꦤꦶꦁ​ꦩꦸꦭ꧀ꦏꦸ꧈​ꦭꦤ꧀ꦏꦺꦧꦼꦏ꧀ꦏꦤ꧀ꦱꦂꦮ​ꦲꦤ꧈​ꦥꦭ​ꦧꦺꦴꦒ​ꦩꦶꦮꦃ​ꦱꦔ꧀ꦒꦾꦤꦶꦁ​ꦫꦶꦗꦼꦏꦶ꧈​ꦏꦁ​ꦱꦸꦩꦫꦃ​ꦱꦩꦺꦴꦮ꧉​