꧋ꦲꦶꦁꦔꦿꦶꦏꦶꦧꦺꦴꦠꦼꦤ꧀ꦥꦽꦭꦸꦏꦕꦫꦶꦪꦺꦴꦱ꧀ꦱꦏꦼꦤ꧀ꦏꦭꦩꦿꦶꦪꦼꦩ꧀ꦏꦏꦭꦶꦃꦮꦲꦸꦏꦧꦺꦴꦪꦺꦴꦁꦝꦠꦼꦁꦩꦡꦫꦩ꧀꧈ꦱꦲꦱꦭꦗꦼꦁꦔꦶꦥꦸꦤ꧀ꦏꦾꦲꦶꦗꦓꦸꦂꦏꦧꦼꦏ꧀ꦠꦝꦠꦼꦁꦨꦠꦮꦶ꧉ꦲꦶꦁꦔꦿꦶꦏꦶꦕꦼꦏꦥ꧀ꦲꦔꦤ꧀ꦝꦂꦫꦏꦼꦤ꧀ꦧꦶꦭꦶꦃꦩꦿꦶꦪꦼꦩ꧀ꦏꦾꦲꦶꦗꦓꦸꦂꦢꦸꦩꦸꦒꦶꦤꦶꦁꦱꦩꦁꦏꦺꦢꦢꦺꦴꦱ꧀ꦥꦸꦥꦸꦤ꧀ꦝꦺꦤ꧀ꦤꦶꦁꦠꦶꦪꦁꦏꦛꦃ꧉
꧋ꦗꦸꦫꦸꦧꦱꦲꦶꦁꦔꦪꦺꦴꦓꦾꦏꦂꦠ꧉
꧋ꦲꦶꦁꦱꦱꦶꦱꦶꦃꦥꦸꦤꦶꦏꦒꦩ꧀ꦧꦂꦫꦶꦥꦸꦤ꧀ꦫꦢꦺꦤ꧀ ꦯꦸꦗꦤꦡꦶꦂꦠꦏꦸꦱꦸꦩ꧈ꦗꦸꦫꦸꦧꦱꦲꦶꦁꦔꦪꦺꦴꦓꦾ (keterangan foto)
꧋ꦫꦢꦺꦤ꧀ ꦯꦸꦗꦤꦮꦲꦸꦏꦊꦉꦱ꧀ꦥꦸꦠꦿꦏꦥꦺꦤꦏ꧀ꦏꦤ꧀ꦤꦶꦥꦸꦤ꧀ꦱꦸꦮꦂꦒꦶꦫꦢꦺꦤ꧀ꦲꦢꦶꦦꦠꦶꦡꦶꦂꦠꦏꦸꦱꦸꦩ꧈ꦧꦸꦥꦠꦶꦲꦶꦁꦏꦫꦔꦚꦂ꧈ꦲꦶꦁꦏꦁꦲꦱ꧀ꦩꦤꦶꦥꦸꦤ꧀ꦩꦶꦱꦸꦮꦸꦂ꧉
꧋ꦲꦶꦁꦤꦭꦶꦏꦲꦭꦶꦠ꧀ꦠꦶꦥꦸꦤ꧀꧈ꦫꦢꦺꦤ꧀ ꦯꦸꦗꦤꦲꦤ꧀ꦝꦺꦫꦺꦏ꧀ꦲꦶꦁꦏꦁꦲꦸꦮ꧈ꦱꦲꦏꦱꦶꦤꦲꦺꦴꦏ꧀ꦲꦏꦼꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦥꦩꦸꦭꦁꦔꦤ꧀ꦮꦭꦤ꧀ꦢꦶꦲꦤ꧀ꦝꦥ꧀ꦠꦸꦮꦶꦤ꧀ꦱꦒꦼꦢ꧀ꦭꦸꦭꦸꦱ꧀ꦲꦶꦁꦥꦤ꧀ꦢꦢꦂꦫꦤ꧀ K.E. ꦩꦶꦭꦱꦉꦁꦲꦶꦁꦠꦲꦸꦤ꧀ 1901 ꦩꦊꦧꦼꦠ꧀ꦲꦶꦁꦥꦩꦸꦭꦁꦔꦤ꧀ H.B.S. ꦲꦶꦁꦯꦼꦩꦫꦁ꧉ꦲꦶꦁꦠꦲꦸꦤ꧀ 1907 ꦭꦸꦭꦸꦱ꧀ꦱꦏꦶꦁ H.B.S. ꦭꦗꦼꦁꦚꦩ꧀ꦧꦸꦠ꧀ꦢꦩꦼꦭ꧀ꦮꦺꦴꦤ꧀ꦠꦼꦤ꧀ꦲꦶꦁ N.I.S ꦲꦶꦁꦯꦼꦩꦫꦁ꧉ꦱꦉꦁꦲꦁꦱꦭ꧀ꦱꦠꦲꦸꦤ꧀ꦭꦗꦼꦁꦥꦶꦤ꧀ꦝꦃꦝꦠꦼꦁꦏꦤ꧀ꦠꦺꦴꦂꦲꦒꦼꦁ S.J.S. ꦤꦔꦶꦁꦭꦗꦼꦁꦤꦼꦝꦏꦺꦤ꧀ꦢꦼꦭ꧀꧈ꦲꦮꦶꦠ꧀ꦮꦺꦴꦤ꧀ꦠꦼꦤ꧀ꦲꦶꦁꦔꦿꦶꦏꦸꦧꦺꦴꦠꦼꦤ꧀ꦒꦝꦃꦥꦔꦗꦼꦁꦲꦗꦼꦁꦲꦶꦁꦏꦁꦲꦒꦼꦁ꧉
꧋ꦲꦶꦁꦠꦲꦸꦤ꧀ 1909 ꦥꦚ꧀ꦗꦼꦤꦼꦁꦔꦤ꧀ꦤꦶꦥꦸꦤ꧀ꦏꦠꦼꦠꦼꦥ꧀ꦥꦏꦼꦤ꧀ꦢꦢꦺꦴꦱ꧀ꦗꦸꦫꦸꦱꦼꦫꦠ꧀ꦏꦺꦴꦤ꧀ꦠꦿꦺꦴꦭꦶꦂꦔꦿꦁꦏꦼꦥ꧀ꦥꦢꦩꦼꦭ꧀ꦭꦤ꧀ꦄꦗꦸꦁꦗꦏ꧀ꦱꦲꦶꦁꦨꦃꦫꦮ꧉ꦦꦢꦩꦼꦭ꧀ꦭꦤ꧀ꦮꦲꦸꦲꦢꦩꦼꦭ꧀ꦥꦤꦸꦗꦸꦤꦶꦁꦒꦭꦶꦃ꧈ꦲꦮꦶꦠ꧀ꦲꦶꦁꦔꦗꦼꦁꦥꦚ꧀ꦕꦺꦤ꧀ꦱꦩ꧀ꦥꦸꦤ꧀ꦒꦝꦃꦥꦚꦸꦮꦸꦤ꧀ꦝꦠꦼꦁꦲꦶꦁꦏꦁꦲꦸꦮ꧈ꦲꦶꦁꦱꦮꦼꦢꦭ꧀ꦭꦶꦥꦸꦤ꧀ꦱꦏꦶꦁ H.B.S. ꦏꦥꦉꦁꦔꦩꦒꦁꦮꦺꦴꦤ꧀ꦠꦼꦤ꧀ꦲꦶꦁꦏꦧꦸꦥꦠꦺꦤ꧀꧈ꦤꦔꦶꦁꦲꦶꦁꦏꦁꦲꦸꦮꦧꦺꦴꦠꦼꦤ꧀ꦩꦉꦁꦔꦏꦼꦤ꧀꧈ꦲꦩꦂꦒꦶꦥꦏꦺꦮꦼꦢ꧀ꦲꦶꦁꦒꦭꦶꦃꦧꦶꦭꦶꦃꦮꦺꦴꦤ꧀ꦠꦼꦤ꧀ꦱꦤ꧀ꦠꦤꦲꦶꦁꦏꦁꦕꦼꦥꦼꦁꦢꦩꦼꦭ꧀ꦤꦸꦁꦒꦶꦭ꧀ꦱꦏꦧꦸꦥꦠꦺꦤ꧀꧉
꧋ꦲꦶꦁꦠꦲꦸꦤ꧀ 1910 ꦏꦮꦶꦱꦸꦝꦢꦢꦺꦴꦱ꧀ꦄꦗꦸꦁꦗꦏ꧀ꦱꦮꦺꦴꦤ꧀ꦠꦼꦤ꧀ꦲꦶꦁꦦꦸꦂꦮꦢꦢꦶ(ꦓꦿꦺꦴꦧꦺꦴꦒ꧀ꦒꦤ꧀)꧈ꦠꦸꦮꦶꦤ꧀ꦲꦶꦁꦠꦲꦸꦤ꧀ 1912 ꦢꦢꦺꦴꦱ꧀ꦗꦏ꧀ꦱꦲꦶꦁꦏꦼꦤ꧀ꦝꦭ꧀꧈ꦲꦶꦁꦱꦊꦧꦼꦠ꧀ꦠꦶꦁꦠꦲꦸꦤ꧀ 1918 ꦱꦏꦶꦁꦏꦥꦉꦁꦔꦶꦁꦦꦩꦫꦺꦤ꧀ꦠꦃꦏꦝꦮꦸꦃꦲꦤ꧀ꦤꦶꦤ꧀ꦢꦏ꧀ꦏꦏꦼꦤ꧀ꦥꦢꦩꦼꦭ꧀ꦭꦤ꧀ꦄꦗꦸꦁꦏꦺꦴꦤ꧀ꦠꦿꦺꦴꦭꦶꦂꦭꦤꦿꦺꦤ꧀ꦠꦼꦎꦤ꧀ꦢꦼꦂꦱꦸꦏ꧀꧈ꦤꦔꦶꦁꦲꦶꦁꦠꦲꦸꦤ꧀ 1920 ꦭꦗꦼꦁꦏꦏꦺꦤ꧀ꦢꦼꦭ꧀ꦭꦤ꧀ꦏꦭꦪꦤ꧀ꦲꦸꦂꦩꦠ꧀꧉ꦲꦶꦁꦱꦮꦠꦮꦶꦱ꧀ꦮꦸꦭꦤ꧀ꦩꦭꦶꦃꦏꦠꦼꦠꦼꦥ꧀ꦥꦏꦼꦤ꧀ꦕꦼꦥꦼꦁꦢꦩꦼꦭ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦤ꧀ꦠꦺꦴꦂꦗꦸꦫꦸꦧꦱꦤ꧀ꦲꦶꦁꦔꦪꦺꦴꦓꦾꦏꦂꦠ꧈ꦱꦲꦱꦉꦁꦲꦶꦁꦠꦲꦸꦤ꧀ 1923 ꦏꦮꦶꦱꦸꦝꦢꦢꦺꦴꦱ꧀ꦄꦗꦸꦁꦠꦿꦤ꧀ꦱ꧀ꦭꦠꦸꦂ(ꦗꦸꦫꦸꦧꦱ)ꦲꦸꦒꦶꦮꦺꦴꦤ꧀ꦠꦼꦤ꧀ꦲꦶꦁꦔꦿꦶꦏꦸ꧉ꦮꦸꦱꦤꦱꦉꦁꦲꦶꦁꦮꦸꦭꦤ꧀ꦱꦺꦥ꧀ꦠꦺꦩ꧀ꦧꦼꦂ 1925꧈ꦏꦝꦮꦸꦃꦲꦤ꧀ꦩꦏꦶꦭ꧀ꦭꦶꦥꦢꦩꦼꦭ꧀ꦭꦤ꧀ꦗꦸꦫꦸꦧꦱ꧈ꦲꦶꦁꦱꦭꦗꦼꦁꦔꦶꦥꦸꦤ꧀ꦭꦗꦼꦁꦏꦠꦼꦠꦼꦥ꧀ꦥꦏꦼꦤ꧀ꦥꦶꦱꦤ꧀꧉ꦥꦁꦏꦠ꧀ꦗꦸꦫꦸꦧꦱꦥꦸꦤꦶꦏꦠꦸꦩꦿꦥ꧀ꦥꦶꦥꦸꦤ꧀ꦲꦶꦁꦏꦫꦠꦺꦴꦤ꧀ꦗꦮꦶꦯꦸꦫꦏꦂꦠꦠꦸꦮꦶꦤ꧀ꦔꦪꦺꦴꦓꦾꦏꦂꦠꦏꦒꦺꦴꦭꦺꦴꦁꦥꦁꦏꦠ꧀ꦲꦒꦼꦁ꧉
꧋ꦥꦚ꧀ꦗꦼꦤꦼꦁꦔꦤ꧀ꦤꦶꦥꦸꦤ꧀ꦮꦲꦸꦲꦸꦒꦶꦏꦠꦶꦔꦭ꧀ꦠꦸꦩꦸꦠ꧀ꦲꦔꦼꦩꦺꦴꦂꦫꦶꦲꦺꦴꦩ꧀ꦧꦾꦏ꧀ꦏꦶꦁꦏꦩꦗꦼꦁꦔꦤ꧀ꦥꦿꦶꦧꦸꦩꦶ꧉ꦧꦺꦴꦠꦼꦤ꧀ꦭꦁꦏꦸꦁ#ꦏꦗꦮꦺꦤ꧀ꦔꦠꦸꦂꦫꦏꦼꦤ꧀ꦏꦱꦸꦒꦼꦁꦔꦤ꧀ꦝꦸꦩꦠꦼꦁꦥꦚ꧀ꦗꦼꦤꦼꦁꦔꦤ꧀ꦤꦶꦥꦸꦤ꧀꧉
