avtomoʙil̦ karəv vial odlamp. No tənguejka mon mata vuikje vensən. Mon vuaja vuje rast komtəs jog. A vьjem kav̦n kimnen ja motorən, mon jurda, jev vueje koʙlə.
— No, — cil̦ke Moksan, — parovos ni avtomoʙil̦ jev vueje koʙlə. No təintə lij vigk par kimnest ja motorəst, ꞩto sinət vuaj ləhkə ej tol̦ke kol̦os vьjem kavnə no ja vənsə. Motor vənsən iʙi ni sugkə, ni porjas cienkhə. Pastline ꞓuep son nəmp n̦unen. Vil̦kes sopt mənəv son mil̦t ja jugke gara puadtəv.
A par kimnen vənas tujꞩuvəv ꞓofta surəl̦t, gu pak̦ tuafanse olmnedte. Kodꞓet sinət parohodən. Ꞩur̦mus mier parohod jodtəv el̦a jenə piejve.
Par kimn ja motor vuodtəv olmət jemne mil̦te ja jogə mil̦te ja mier mil̦te. Ja nьdtꞩə mogka vənas, jurta, lev, kogk vuejev jodte ꞓaz̦ mil̦te ja ꞓaz̦ vul̦n, gu kul̦.
Təgka lev ruv̦t vənas, kienc ja kugk̦, ja sinət vuejet sajdate al̦t ꞓud̦ olmnedte. Sij kahta lev jugke goren. Sij jodtəv nьdtꞩə odlьne, gu parohod.
No təkvenmus pajk tədta lij, ꞩto olmə viekvudte motorən vuejev ad̦t kьrte, gu lon̦t.
No təst Sahkrə n̦uꞓkej ja riegkude:
— Mən sarnak ton, Moksan! Jev vuej olmə kьrte, gu lon̦t.
— Jev, vuejev, — cil̦ke Moksan, — mon idꞓ uine təna iƶan ꞓal̦meguim.
