24
Antara tello mènggoe saellana Gulliver mennang perrang djărèja, lodjhoe ḍateng otosanna Rato Belepoeskoe, parlo njo'ona abăḍămè moso naghără Lillipoet.
Bi' Sang Rato Lillipoet Gulliver ladjhoe èangkat dhăddhi prèsiḍènna komèsi sè ngarembhăghǎ bhăb băḍămè djărèja. Djǎrèja Sang Rato ḍa' Gulliver, kangsè dhăddhi tanḍhǎ pamondjoengnga para Mantrè (Minister) è Lillipoet paḍă angrasa èkabăbă'aghi.
Gulliver ta' terro maberră'a tangghoenganna naghără sè kala, tjoma noro' adhillă bhăi, sopadjă băḍămèan djărèja langghengnga.
Tanto bhăi potosanna Rato Belépoeskoe narèma kalaban bhoengana atè; sabab ḍă'- aḍă'na abăʼna ngèra tanto naghără Belépoeskoe, bhǎkal narèma'a tangghoengan sè tjè ' berră'na.
Apa parostèlla Gulliver băb băḍămè djărèja andhåddhiaghi korang sarodjoe'na Sang Rato Lillipoet, apa polè para pongghăbăna paḍă tjè' ta' sennengnga. Robăna kakabbhi padă tada' sè ènga'a, djhǎ' sanjatana tjoma Gulliver sorang sè dhăddhi lantaranna kamen Sang Rato kontrak băḍămèan nanganna. Dări pangghăliănna djărèja ta' nekket sakalè ḍă' moso. Mangka kasokanna Sang Rato bǎn para Raad pasèmoan lebbi bettjè' mosona èpatompessa sakalè. Nangèng Gulliver ijă tjè' ta' mofakatta da' kasokanna Sang Rato sè mara djărèja, sarta bhareng ngèra djha' prostèlla bhǎkal ta' ètorota, Gulliver ladjhoe makalowar otja' towa, mon Sang Rato koko, ta' kasokan norotè panjo’onna Gulliver băb kontrak bădămèan djǎrèja, abă'na ta' nolongana orèng Lillipoet polè, mon paghi' kadhǎddhian aperrang polè moso orèng Belépoeskoe. Sabab bilă ta' kowat njandhăng sangsara dări berră'na tèndes sanna naghǎră Lillipoet, tanto Rato Belépoeskoe pas nangtang perrang polè. Djărèja la mastè.
Mèjarsa atorra Gulliver bărijă djărèja Sang Rato ijă ladjhoe mètorot, nangèng sanjatana ta' renna, molana molaè è bǎkto djǎrèja saterrossa Sang Rato èlang asèna da' Gulliver. Nangèng parkara djărèja ta' èkatara'aghi.
Saellana sabătara abiddhă sè arembhăk parkara băḍămèan djărèja, perrang ladjhoe èamboeaghi. Dhinèng otosan dări Belépoeskoe ella apaamètan molèa ka naghărăna, ngondjhoekkaghiă sorat kontrak, sopadjǎ èlabheddhăna moso ratona. Sabelloenna mantjal, njepper ghalloe da' bengkona Gulliver aberri' tarèma kasi, sabab djhǎ' sakènga Gulliver ta' bellas, tanto naghărăna kalèr sarta nèspa saèssèna, terros ka ratona sakalè. Otosan ngotja' dă' Gulliver, djhǎ' abǎ'na ngembhăn dhǎboena ratona, èdhika'aghi ngondjhăng, sopadjă Gulliver apasèjara da' Belépoeskoe. Gulliver ija njangghoebhi. Padjhăt èsaddjhă'aghi sè terro nèngghoeǎ kabădă❜ănna naghără Belépoeskoe băn orèngnga. Otosan ngèding sangghoebbha Gulliver, ladjhoe apaamètan molè kalaban soka bhoengana atè.
È bǎkto pekpekkan, Gulliver njabis da' adjoenanna Sang Rato Lillipoet, mator njo'on èdhi, kalèllana amaèn da' Belépoeskoe.
