This page has been validated.
- Nga sakop kag mga utod sa among' pagtuluohan,
- Nga sa kahidaitan sang Roma, si Domiciano
- Nagpakita nga sia labing' makaluluoy
- Kag mabangis nga anak. Si Tito maluluy-on,
- Apang wala'y katarong kag wala'y kabantugan.
- Ang pagkamaluluy-on luyag sang mga hari.
- Mga salang' pabay-an nga dili pagsilutan
- Di buhat sa kaluoy sa isang' nagahigugma
- Sang katarong. Ang mga pagbulot-an gasumbong
- Sa iya sing masupok kag ini ang masinggit
- Sa langit nga'ng kapintas gingamit nga kaluoy!
- Kon si Eustaquio naglapas, ang mga pagbulot-an
- Ni Trajano matum-ok sa iya; ikaw ang sa iya
- Bagay nga magbulos. Si Jupiter gabuot
- Sa imo sa kalangitan, kag ikaw sa kay Jove
- Malipayon kag hilway nagagahum sa duta!
- Ang duta may hidait, kon mga pagbulot-an
- Nga matarong may iya sia sang isang' pagtuo.
ADRIANO. Sugiri ako, Cornelio, si Jupiter bala
- Gatamod sa aton sa langit diin sia gamando?
CORNELIO. Maayo nga butang sa Roma nga magpati
- Ang tanan nga si Jove sa aton nagatulok.
ADRIANO. Apang sa dakharian dako'ng bulig ni Eustaquio!
CORNELIO. Kon batok sa mga diwa, sia wala gahatag
- Maskin ano nga bulig sa Roma sa inaway!
- Sa iya halimbawa nahimo yang' magtuo
- Madamo sa kay Kristo niyang' pagtuluohan;
- Kag pagdugang sing bag-ong' panaksi sa pagtuo
- Samaron niya'ng Roma. Kon ang sa kay Trajano
- Pagbulot-an kag butkon mong' makusog sarang
