Page:Mga Binalaybay V.3.pdf/15

7

  TUNGOD sa mga baybayon

 Ang guban sang karabela ⁽³⁾

 Naghalabok kuyos nila

 Kay sila’ng mapalayag;

 Kag sa isa ka kalibutan

 Mangangaway nga bilidhon

 Sang puthaw sila nagbalon

 Nga magapalamihag.
----------
  KAG ang tanan hilinugyaw

 Ang tanan lunsay himaya

 Kinagual nga dagaya

 Sa sulod sadtong’ siudad;

 Bisan diin nahadunggan

 Matunog nga patikpatik

 Sang tambor nga naglagatik

 Sa tanan lang nga higad.
----------
  PINALUKPAN sing linibo

 Ang tanan nga sakayan

 Tunog nga makalilisang

 Sang nagngurob nga kanyon,

 Kag sa mga taliaway

 Ang tumandok nga katsila

 Nagyaob nga may himaya

 Kag labing’ mahigugmaon.
----------
  PAALAM, siling niya sa ila,

 Mga anak kong’ pinalangga,

 Isganan nga mananangga

 Sang duta nga tumandok;

 Punihi kabulahanan

 Ang aton pungsod nga Espana

 Sining’ inyo pagkampanya

 Sa dagat nga nasuok.
----------
  SAMTANG amat nga nagaantad

 Sa huyop nga may kahinhin

 Sang may kabugnaw nga hangin

 Kag may dakong’ kakunyag,

 Ang tanan nagpanghimaya

 Sa tingog nga balaanon

 Ang tuman kabulahanon —

 Maisog nga pagpalayag.