Page:Mga Binalaybay V.3.pdf/181

173

   Sin-o’ng, subong sa imo, nga puno’y kasadya
Malupad, mahagdo mga kabulakan
Gahigugma’y putli kag may katam-isan,
Kag mag-amba sa ila sang kagha mo’g gugma?
----------
   Kon abi ako tingog nga katingalahan
Sang isa ka talon nga makahalawhaw,
Ako magaamba sa gab-i kag adlaw
Luyo’ng suba’g sulog nga nagaambahan.
----------
   Ang sapatsapat nga mga pakpakan,
Nga gaagum matam-is kalwasan sa patag,
Kag ang mga kanding nga may mga duag,
Sa hilamong’ lunhaw nga dira gahampang;
----------
   Ay, tanan sila mga malipayon
Sa akon sa dungog ko kag sa akon kalautan.
Madaot nga aligutgot sang mga katawhan,
Dumot nga malain, labing’ malubhaon!
----------
   Ginahingabot bisan diin lamang,
Bisan diin lamang kailo’g wala’y palad
Anano’ng sa duta sa akon gahulat,
Kundi’ng kalinong sang maayong’ lulobngan?
----------
   Ginasapak man ayhan ang akon nga pag-antos
Sining’ kalibutan nga bulag, malaot?
Ginapamatian kailong’ hibubun-ot. .. .
Sang nakalimutan nga tawong’ kubos?
----------
   Labi sa tanan, ikaw.. . . dakong’ pungsod,
Ang Espana nakon nga makagagahom,
Kon ako sang kagha paglumsan kag patyon,
Wala mo pagdungga taghoy kong’ matuod!
----------
   Siling nga naghipos kag naghibubun-ot
Ang iya kalag nga may kasakitan
Kag duhang’ tulo nga luha nagdalan
Sa iya mga pisngi sing tuman kalulot.
----------
   O ikaw, kagab-ihong’ makatalanhaga
Nga sang wala’y palad ikaw nangin-abyan,
Kag ikaw gatago mga kasakitan
Sa tunga’ng kasanag adlaw nga wa’y dagta;