Page:Mga Binalaybay V.3.pdf/185

177

   Siling n’ya’g kumaphad nga daw diosang’ maanyag
Nga sa iya pagbiya tingulong’ troyanhon
Nagwas-ag matuyom nga amyon kag kasanag
Didto sa mainit dutang’ aprikanhon:
Agi ’ya nagbilin banas nga masidlak
Madasig, kag kaisog kapin nga tawhanon
Kumawas sa dughan ni Miguel nga maidlak
Sa guya sang kagha niya amo’ng nagtulak.
----------
   Ang Sidlangan nagapulapola
Ang banagbanag gayuhom maaga
Nga amo’ng masili nga panguna
Sang iyang’ pagnasnas nga balaan
Nga sang kaagahon kaanyagan.
----------
   Ang mga bulak nagabuloskag
Kag nagabaton lab-as nga bunyag
Nga sang kinaugali natanyag
Nga sa pagdagangdang na sang adlaw
Sang ila kaanyag gapadalawdaw.
----------
   Ang pispis sa huni nga matuyom
Gayaob sa sanga diin sia gatungtong
Sa adlaw, nga sang init gapasulong
Nga' sang tun-og amo’ng nagatiti
Sa hilamon maanyag nga kasili.
----------
   Ang iya sang busay alambahon
Gabuylog sa inawit sang kaagahon
Nga mapamatian sing matam-ison
Ang maathag kag maanyag yang’ huni
Nga sa isip galipay sing labi.
----------
   Hangin gahampang sa latagon!
Sang gab-i nga madulom ginbalon
Iyang’ mga kagha, kasulub-on
Kag sa baylo dugusnon nga kadlaw
Nag-abot buylog sa putling’ silaw.
----------
   Subong man si Miguel nagkalipay
Sang masaksihan ya’ng kinasadya,
Adlaw ng’ maanyag sang makita niya
Pagdumdom sang larawan, nalipay,
Sadto’ng madulom nga gab-i sa iya.