This page has been validated.
- 41
- Kon sia buyoy nga manogsakayan
- Sa kadagatang’ tuman kabalod
- Sang pangabuhi, anong’ kusog
- Ang sa iya gaapin kag nagabulig
- Nga nagtigayon sa iya pagdampig
- Sa bahura ko di sia malunod?
- Sin-o, sa puloy-an nga mangitngit
- Diin sia natago nga nasapwan,
- Sa iya nagkuha nga gamhanan
- Kag sa sanag sang adlaw sinangit?
- Ay! sa akon nga mga kasakit
- Ikaw, O Babae! wa’y duhadoha
- May gahum nga makahalangawa
- Sa pagkuha sang puloy-an nakon!
- Tinuga ka nga tumalagsahon!
- San-o ko ikaw sarang mapahawa?
- Ang impyerno na gid... nga pagkalaot!
- Diin natuga’ng mga kasakit,
- Mapintas nga silot kag kangitngit,
- Di tumbas sa wa’y langan kong’ kaugot.
- Ay! ngaa sing himayang’ malulot
- Ako dinid-an sang kapalaran?
- Ngaa ako sang Makagagahum
- Dinid-an nga sa Jakas kong’ kagha
- Ang akon palad akon nakita
- Sa mga buton sang kamatayon?
- Tinuga nga balaanon! Kalag!
- Tinugang’ wa’y palad kag kubos,
- Ikaw ang ginsubol sa pag-antos
- Sang Kamot nga sa imo nagalaglag!
- Kon ang tawo sa duta nagagaab
- Kag pangabuhi gadaot sa iya,
- Sa pagbatas gapangalipay sia
- Nga’ng kabuhi sayod yang’ malip-ot,
- Samtang ang Anghel di maghingabot
- Paghulat sang kamatayon niya!
- Apang ay! pilit nga batason,
- Batunon ko masubo kong’ palad,
- Nga sa away kong’ wala’y katulad
- Malaot ang kapalaran nakon!
- Apang, bisan nga ako’ng narugon,
- Dayunon ko’ng banas nga malaot:
- Sia, maayo’ng ginaakop; ako, ang salot...
