Ang "Alferez" daw napuypoy sa hinayhinay ug igo na lamang misuroysuroy sa hawanan sama sa usa ka mananap mabangis nga gisulod sa hawla.
—Lakáw ngadto sa dalan aron hibugnawan kanang imong ulo!matud ni Donya Consolación nga mipadayon pagbugalbugal sa iyang bana diha nga daw nahuman na ang gihikay niyang salikób sa ganghaan.
—Hisakpan ko ngani ikaw, matay pa kón dili ko ba ikaw kasahoson, b..., anak sa buko sa kawayan!
—Oo, makasulti ka kutob sa imong gusto!... Wala ka bitaw mosugot nga magatuman ako sa sugo ni Bathala!- miingon si Donya Consolación nga nagyubit sa iyang bana, nianang pagyubit nga naandan na niya ug dili takus maawat.
Ang "Alferez" mikuha sa iyang kalo, nanghipohipo makadiyot ug unya milakaw nga gipahagtok pag-ayo ang iyang mga sapin, apan tapus ang pilá ka gutlo mibalik nga nagakinto ug wala magsaba: gihubo ang iyang mga sapin. Ang mga binatonan nga, tungud kay nangaanad na, gibanghan nga nanagpaminaw niadtong talan-awon, niining higayona nanghibulong sa pagkakita nga ang "Alferez" naghubo sa mga sapin, ug nagkidhatay sila.
Milingkod ang "Alferez" sa usa ka siya tupad sa ganghaan sa lawak nga gitagoan sa iyang asawa, ug nagaantus paghulat sulod sa tunga sa takna kapín.
—Mitinuod ikaw paglakat kun anaa ka ba gihapon diha, sungayan? nagkanayon si Donya Consolación sukad sa sulod ug pagailis-ilisan niya ang angga sa iyang bana.
Sa nadugay na, gihinayhinay pagpanguha ang mga butang iyang gitapok sa ganghaan: sukad sa gawas ug iyang bana nagpamati sa kasikas ug nagpahiyum.
—Mutsatso!, milakat ba ang sinyor "Alferez”?— misinggit si Donya Consolación.
Ang mutsatso, sa usa ka sinyas sa "Alferez", mitubag:
—Oo, sinyora, milakaw.
Si Donya Consolación mikatawa sa dakung kalipay, ug gilayon gitangtang ang trangka sa ganghaan...
Ang "Alferez" mitindog paghinay; natukas ug diyutay ang ganghaan...
