Apan pasaligon ko ikaw nga ako dili gayud modagmal sa tawo nga walay sala. Nakita mo kining samad? Aron lamang dili nako mapatay ang usa ka kwadrilyero nga igo lamang nagtuman sa iyang katungdanan, gipasagdan ko nga iya akong samaran.
—Apan tan-awa — miingon si Elias human mohilum makadiyot—; hunahunaa pag-ayo ang makalilisang kadaut nga imong himuon sa atong mga alaut nga kalungsoran. Kon tumanon mo ang imong panimalus pinaagi sa imong kaugalingong kamut, makalilisang uyamut ang balus usab nga himuon sa imong mga kaaway, dili batok kanimo, dili batbk sa may mga hinagiban, kon dili batok sa lungsod nga, sumala sa nabatasan na, maoy lagmit pasanginlan, ug kon kana mahitabo unya, kadaghang mga walay sala nga manghiangin!
—Nga ang lungsod magtuon paglaban sa iyang kaugalingon. nga ang tagsatagsa iyahay lamag panalipod!
—Sayud ka na nga kana dili gayud mahimo! Ginoo, ako nakaila kanimo sa panahon nga ikaw bulahan pa; niadtong panahona pagahatagan mo ako mga maayong tambag; tugotan mo ba kaha ako karon nga? . . .
Ang tigulang mihakus ug daw naminaw. —Ginoo, — mipadayon si Elias nga nagatimbang pag-ayo sa iyang mga pulong; —nakabaton akog maayong palad sa paghinabang sa usa ka batan-on nga bahandianon, maayog kasingkasing, mapuanguron ug nahagugma sa kaayohan sa iyang lungsod. Ginaingon nga kining batan-on^ adunay mga higala didto sa Madrid, ambut lamang, apan ikapasalig ko kanimo nga siya higala sa Kapitan Heneral. Unsay pulong mo kon siya maoy atong tugyanan sa pagdala sa mga mulo sa lungsod, kon danihon ta ba siya aron molaban sa katungod sa mga alaut?
Ang tigulang milingolingo sa ulo. —Miingon ikaw nga manggaranon kanang batan-ona? Ang gihunahuna sa mga dato mao lamang ang pagpatubo sa ilang bahandi; binutaan sila sa kamapahitas-on ug sa mga kalipay nga kalibutanon, ug, sanglit masabug man nga maayo ang ilang pagkabutang, labi na kon adunay mga higalang makagagahum, walay usa kanila nga mangitag labad sa ulo tungud sa paglaban kun pagpanlimbasug alang sa kaayohan sa mga alaut. Sayud ako niana kay ako nadato man kanhi!
—Apan ang tawo nga akong gihisgotan dili samil sa uban:
