sa balay ni Kapitán Tiyago aron siyá pasidunggan pagduaw sa
batan-on.
Sa halapád ug maayong pagkadayandayan nga hawanan sa iyang balay sa Tondo, atua nagalingkód si Kapitán Tinong sa usá ka dakú ug halapád nga siya, masulub-on ang panagway ug nag-utás hapohap sa iyang agtang ug tingkoy, samtang ang iyang asawa nga si Kapitana Tinchang nagahilák ug nagakasabá kaniya sa atubangan sa ilang duhá ka anák dalaga nga sukád sa usá ka suók namati nga walay tingog, nangahasi ug kahilakón.
--Ay, Birhen sa Antipolo!- nagasiyagit ang asawa.— Ay, Birhen sa Rosario ug sa Correa! ay! ay! Nuestra Señora sa Novaliches!
--Nanáy!... matud sa ilang anak kamanghuran.
--Daan pa bitaw akong miingón kanimo!- mipadayon ang asawa nga nagabasul sa iyang bana; daan pa lagi akó! Ay, Birhen sa Carmen, ay!
--Apan ikaw walá gayúy gipasidaán kanako!- nangahas pagtubág ang bana nga nagahilák!- imo hinuon akóng güngón nga maayo nga akó magkanunay sa balay ni Kapitán Tiyago ug makighigala kaniya kay... kay dato man siya... ug imo pa akong gisultihan nga...
--Unsa, unsay giingón ko kanimo? Wala akó magsulti nia na, wala akoy gisulti kanimo! Ay, kon napatuo ka pa lamang unta kanako!
--Karón akó nay imong pakasad-on! mitubág ang bana nga midagpi sa bukton sa siya; walá ka ba magsulti kanako nga maayong gidapit ko siyág paniudto sa atong baláy, kay sang- lit dato siya... matud ugód nimo nga kitá dili angay makighi- gala kon dili sa mga dato lamang. Abá!
--Oo, matuod nga akó misulti kanimo niana kay... tungúd kay dili na man gayúd kalikayán: ikáw ugód nag-utas na man lamag dalayég kaniya. Don Ibarra dinhi, Don Ibarra didto, Don Ibarra bisan asa dapít, abaá! Apan walá ko ikaw tambagi nga makigkita ni makigsulti kaniya niadtong tigum: kiní dili gayúd nimo ikalimúd.
--Nahibaló ba ugód akó nga siyá moadto niadtong higayona?
--Kinahanglan gayúd nga ikaw nasayud untang daan niana!
