This page has been validated.
—Bathala, Bathala ko!— misinggit ang pari dungan sa pagsampong sa iyang nawong sa duha niya ka kamot;— buut mo ako silotan: dawaton ko ang imong silot, apan bantaye intawon ang akong anak!...
Ug unya, milingi sa dalaga ug miingon: —Buut gayud ikaw magamongha? Mahimo; dili ako buut nga ikaw mamatay.
Gigunitan ni Maria Clara ang duha ka karnot sa pari, gipig-it niya, ug, human hagki, miluhod siya ug nagkanayon:
—Padrino, padrino ko!
Tapus niini, si pari Damaso migula nga masulub-on, nagatungok ug nagsamot panghupaw.
—Bathala, Bathala, ako motuo gayud kanimo kay natagamtam ko man ang kapait sa imong silot! Apan ari kanako panimalus ug ayaw dagmali ang walay sala: luwasa intawon ang akong anak!
