konsakrita a la reformo di l’angla ortografio, per helpo di nuva literi, ofte simila a ti di la Fonetikal Internaciona Asocio. Segun l’autoro, Ido pruvas, ke on povas kontentesar per la angla-romana alfabeto. Yes, sed kondicione ke on admisas nur la max simpla, klara ed internaciona soni, e ne la angla soni, tante malklara e malfacila por omna stranjeri ! Ti qui esperas igar la angla linguo universala per ortografial reformo tute ne koncias la vera e chefa malfacilajo : necesa esus prefere reformar la fonetiko, t. e. la pronuncado, di l’angla, se to esus posibla ! e konformigar ol a l’internaciona ortografio. Sed lor la angla divenus tre simila ad Ido, en qua 79/100 de la radiki esas ja angla. On ja ofte formulis la praktikal regulo di internaciona fonetiko yene : « angla konsonanti, kontinentala [t. e. precipue germana ed italiana] vokali ».
Tubantia, jurnalo editita en Enschede (Nederlando) publikigas de septembro seryo de lecioni pri nia linguo da nia konocata samideano So A. den Hengst. Ni dankas il pro ta bona propagado, tante plu facile imitebla, ke ni, havante nula supersigni, povas insertar nia texti en irga jurnalo, sen alterar nia ortografio e domajar l’aspekto internaciona di la vorti, quale facas la Esperantisti per la abomininda procedo di la h.
Bezuidenhout Vooruit (de 3a oktobro) insertas artikli propagema da So A. den Hengst sub titolo : De internationale Taal, e komencis publikigar kurso pri Ido. Danko e gratulo a nia agema samideano, qua konsakras ad Ido la sama fervoro, quan il spensis ante por Esperanto !
La Tribune de Genève (17 novembro) anuncas, ke So Dro Maurice Boubier, sekretaryo di la Delegitaro por franca lingua Suiso, komencos kurso pri « Esperanto reformita » la 18a novembro, en l’Universitato. Danko e gratulo a nia malnuva kunmilitanto !
The British Medical Journal (7 nov. 08) insertis bonega letro da So Fr. Horseman pri e por Ido. Same kam la malnuva biciklo esis vicata da la moderna bicikleto, qua ipsa esis perfektigita per l’invento di la pneumatiki, Esp. esas destinata oblivyesar e vicesar da sa « Ido », nuva e plu bona Esperanto, qua inter altra avantaji, ne havas supersigni e povas imprimesar omnaloke : tre grava avantajo en omna anglolingua landi !
The Evening Post (New-York, 13 okt.) publikigis letro di samideano So John Ed. Hearn, pri la pledo di Arcadius Avellanus por la latina quale LI. Il expozas ke la maxima internacioneso esis la principo di Esp., sed ke nur Ido realigas ol plene.
