Tamen, l’artiklo adjuntas, esas ne multa motivi por studyar ta linguo : « La germana linguo ne parolesas exter sa naturala frontieri, sed centrala Europo ne esas por nia komercisti o turisti preferata lando. La germana ne sucesis plentar su dureme, od en la Mediteraneal baseno, od en la Nuva Mondo, e la motivo di ta neexpansiveso esas precize olsa nefacileso… Ol esas linguo arkaika e pezoza, kun nesimpla konstrukto, e kun lexiko abstraktema e nepreciza. Ol esas anakronismo en nia analizal epoko. Tala linguo nule parolesas por plezuro, e parolesas por komerco nur kande l’angla o la franca linguo ne esas admisebla ».
Ni povus adjuntar ke, se linguo parolata da 8o milion homi, okupanta granda situeso en omna relati politikal, social, komercal ed industrial, ne expansas pro sa nefacileso, esus fola expektar, ke Esperanto, qua havas ta nefacilaji sed nula armeo, navaro o komerco, povus konquestar la tuta mondo.
La 8 mayo fondesis Idista Grupo di Besançon : honoral prezidanto, So Saint-Loup, honoral dekano di la Fakultato di cienci ; prezidanto, So Michel, arkitekto ; vice-prezidanto, So Millot, profesoro en la liceo ; sekretaryo, So Ritner ; kasisto, So Muller. Omna korespondo devas sendesar a So Ritner, Bureau de la Société d’agriculture, 73, Grande Rue, Besançon. — Ni debas ta suceso a du membri di la Delegitaro : So Kohler, profesoro di agrokulturo, e So Vincent, profesoro en la liceo.
So prezidanto Pfaundler anuncas a ni la fondo di Reform-Esperanto-Verein (Ido-Klub), Zentralverein für Ostpreussen (Königsberg, Pr. 9). La komitato konsistas ek : So Prof. Do Weise, So Realschullehrer Witt, Konsulats-sekretär Sten-Aschau, Sno A. Schepke, Sno H. Greve, Sno R. Eisenstädt docantino di lingui, kapitano Hoefer, So Eugen apotekisto. — Ica societo esis Esperantista societo, qua per unanima decido transiris ad Ido.
So Ed. Wenk chanjis sua adreso qua esas nun : Spalenring 89. Okazione, il informas ni pri la progresi di la Mondlinguala Societo, qua kontenas 3o aktiva e 9 pasiva membri, e facas kurso a 15 lernanti. La Esperantala societo en Basel mortis. To esas efekto di la « natural evoluco ».
La Weltsprache-Verein di ca urbo apertis, la 27 aprilo, kurso pri Ido en 10 lecioni.
