aparas ankore sur la lasta pagino di la tomo. Nia samideani konstatos kun plezuro e gratudo, quanta spacon nia linguo okupas en la zorgi e pensi di l’autoro, e quantan importon il atribuas a nia entraprezo. Por plu bone komprenar to, importas lektar la tota libro, qua expozas, sub familiara ed atraktiva formo, la tendenci ed ideali di nia « honor-prezidanto ». Mem ti qui ne povus lektar e komprenar sa ciencala e filozofiala verki, esos tre interesata konoceskante la « homo », quala lu aparas en multa pagini, precipue en l’introduco, ube il explikas la direkto di sua tota vivo. Il certe konquestos lia admiro e simpatio ; e nia samideani esos fiera e joyoza, havar tala homo inter li : l’aprobo e kunlaborado di ta pioniro di omna progresi esas certa garantio di suceso por nia entraprezo.
The Standard Manual of Esperanto, da Jelley (E. F. Do, West Newton, Mass., Usono ; 1908). — Unu de nia amiki komunikis a ni ica kurioza libreto. L’autoro pretendas esar fidela a la « kara linguo », di qua il amas « chiun literon kaj silabon ». Pri Ido il repetas, bonfide e blinde, la senshama rakontachi e kalumnii di sa chefi. Il abominas la « Malzamenhofa Lingvacho Komitato » ! Sed, en la sama pagino, il propozas… la « kin nuva sufixi adoptita da l’Internacia Scienca Oficejo », nome : oz, iv, if, iz e ojd, de qui quar esas Idala ! Ton il ne savas : il anke ne savas, ke la sama profunda cienculo, qua propozis pruntar li tacite de Ido, deklaris pose, ke li esas tute neutila ! Cetere, il nule komprenas lia uzado, e deklaras, ke on ne devas sempre uzar oli, e dicar ex. dolchoza vice dolcha ! Inverse, il propozas uzar de quale prefixo, e dicar deora ringo (vice ora ringo). Do il nule komprenas la principi di la derivado. L’autoro agnoskas anke l’ ambigueso di la prepoziciono de (korespondanta ad E. of, from, by) e serchas moyeno por remedyar ol. To esas tre instruktiva dokumento ; tala esas la mentala stando di ti, quin la Esperantala chefi trompis e blindigis ; li malbendikas Ido, sen konocar ol, e samtempe propozas o serchas plubonigi, qui esas ja realigita (e multe plu bone) en Ido.
Vivarais, broshuro de 16 pagini editata da la Syndicat d’initiative du Vivarais, en Vals-les-Bains (Ardèche, France). — Ica broshuro, elegante imprimita ed ilustrita per fotografuri, esas deskripto di la franca regiono Vivarais, di sa naturala ed artala kuriozaji, kun praktikala informi, tote en Ido : Ol havas quale epigrato ica linei da Eug. Melchior de Vogüé, de la franca Akademio : « Esas plu mayestoza regioni en nia Francio. Me ne konocas ula plu originala, e precipue prizentanta plu brilanta kontrasti ed ube on povas, quale hike, en tempo de poka hori, irar de l’alpala naturo a l’italiana naturo. Nula esas, en qua la terala ed
