La 6 julio So Avilov facis diskurso en la Idista grupo di Hamburg, qua esis tre interesata da ta experimento di nia linguo kun stranjero.
Prof. E.-F. Bacon, de la State Normal School, fondis Oneonta Ido-Klubo, kompozita ek studenti di moderna lingui en la normala e alta lerneyi. Prez. : L. Chapron ; vice-prez. : Ina Hopkins ; sekr. : Mabel Hoyt[1]. La 30 aprilo eventis vesperal festo aranjita da Prof. Bacon, qua komencis per saluto en Ido recitata da Dlo Grace Scatchard… kun la nedubebla gracio quan indikas elsa nomo.
En Wien l’Esperantisti dissemas nuva prospekto, en qua li konstante aludas « Ido e sa sucedanti » per malforta kritiki. Bone ! to pruvas, ke « Ido existas », pro ke on judikas necesa kombatar ol ! Nur un rimarko ; on asertas, ke esas tre facila por singla imprimeyo aquirar la signizita literi ; ma en ta prospekto ipsa, ica literi havas supersigni aparte pozita (tre alte, en l’interlineo), e konseque tre malbela. Ica prospekto refutas do su ipsa !
La Klubo Esperantista kunsidis la 27 apr., e decidis definitive ke sa nomo devas esar : Stockholms Världspraksfœrening, F. d. Stockholms Esperantofœrening (Mondolinguana Societo, Stockholm.)
So Rindell, sempre agema, propagas Ido inter la fervoyisti. Il informas ni ke 17 fervoyala frenagisti aranjis inter su konkurso pri aquiro di nia linguo. (Segun Sueda M.L. jurnalo.)
La 15 aprilo, la prezidanto di la mondlinguala klubo, So T. V. Bäckström, diskursis pri nia linguo en la salono di la Bontemplani.
En Chemnitz, grupo de Idisti fondesis, efekto di diskurso di ul esperantisto. La prezidanto di la grupo esas samideano B. Hufer, Zollnerstr. 28/11. (Segun Internaciona Socialisto).
- ↑ On devus indikar la sexuo, nam la prenomi (precipue amerikana) ne esas sat sekura indiko. Ico memorigas da ni, ke So Clarence Bicknell, malnuva Esperantisto, ricevis brulanta deklari di amo, mem en versi, de ula tro varma samideani, qui konsideris il quale damzelo !
