Umbro [DEFIR] D. Umbraerde, Schattenfarbe, Bergbraun ; E. umber ; F. terre d’ombre ; I. terra d’ombra ; R. umbra ; S. (tierra de) sombra. — Koloro, e kolorizilo.
N. B. La diskuto pri la supera vorti klozesos en la No 38.
Por la facila kompreno di la kompozita vorti (aude), on devas acentizar sempre la lasta elemento kompozanta, quale se ol esus sola ; ex. omnadîa, e ne : omnâdia. Importas ke l’Akademio fixigez ica detalo en la nuva regulo pri acentizo.
Til nun on povis skribar indiferente cadie o ca-die, omna die e omna-die ; ma de nun, pro la nuva regulo di acentizo (III, 322), oportas skribar la du vorti separita, por ke on pozez l’acento sur di (ca-dîe) e ne sur la preiranta silabo (câdie).
Me tote konkordas kun Sro Jespersen pri la nuva formi propozata da il sub ica titolo. A vorti quale sienso, me adjuntas sizo (E. s(c)issors) vice cizo.
Pluse, me propozas, ke on vicigos c da s, ube ca litero trovesas apud altra konsonanto. Exemple, sinsera vice sincera, pronunsar vice pronuncar. Kompreneble, kande ca prinsipo duktus a miskompreno, on ne facus la chanjo ; exemple, lanco e lansar.
Rimarko. — L’autoro ipsa mustas admisar ecepti. Or to esus tre jenanta, nam nun on skribas c omnube existas c en l’ortografio internaciona ; ma kun sa regulo, ante skribar s vice c, on devus questionar su, ka to ne genitas dusenceso ! Exemple, on devus memorar, ke pulco konfliktus kun pulso, punco kun punso, senco kun senso. Pluse, to destruktus l’analogeso di ula vorti, ex. di konsentrar kun centro. Ico anke postulus ecepti ! Nam kredeble on ne chanjus l’ortografio di nia radiki en la kompozaji, ex. on ne skribus samsentra vice samcentra. Do la propozita regulo ne esus simpligo, ma kompliko, e konstanta fonto di erori e dubi. Se ula populi ne povas pronuncar c en kelka kombinuri, ne esas granda detrimento, se li pronuncus s vice c. Ma esus, grava detrimento chanjar e komplikar pro to nia ortografio, ed alterar l’aspekto internaciona di multa vorti, qui divenus preske nerekonocebla (karsero, konsiar, e c.).
- ↑ No 32, p. 405.
