- 87
—¡Nil—insengngat ni Simoun, a silalais;—ti ibayad yo, dakayo ken ni Padre Irene, dagitay ar-aramid a kaasi, inlualo, kinasingpet, ¿a?
—Ammuyo a ti kinasingpet a naikawes iti maysa a tao, —insungbat ni Padre Sibyla a siraranga,—saan da a kas brilyante a mabalin a paggiinnallawatan, ilako sa man sublian a ilakon. . . agtalinaedda iti tao, saan da a mabalin a maited iti sabali. . .
—No kasta, uray no nginniwat laeng ti panagbayad yo kaniak, — insungbat a siraragsak ni Simoun; — dakayo, Padre Sibyla, kas pagarigan, lima a tantos ti bayadan yo kaniak, kunayonto: “iti bayat ti lima nga aldaw, pagpanawak ti kinamarigrigat, ti kinapakumbaba ken ti kinasungdo. . ." da kayo, Padre Irene kunayunto met; “yedsok ti kinateppel, ti kinamanangngaasi, kdmpy.” Makitayo, bassit-usit ti dawatek, ket itdek dagiti birbrilyantek.
— Anian a tao daytoy Simoun, ti la mapanpanunutna! —kinuna ni Padre Irene, a nagkatawa.
—Ket ni daytoy, — intuloy ni Simoun, a pinikpikna iti naimo unay ti abaga ni Ekselensia, — ni daytoy, iti tunggal lima a tantos, ikkannakto met iti maysa a bale iti lima nga aldaw a pannakabalod; iti tunggal maysa a solo, lima a bulan; iti tunggal maysa a kodilio, keddeng ti panagpaibelleng, a di pay naikabil ti nagan ti maibelleng; iti tunggal maysa a bola. . . maysa a patay, kas pammaypayan dagiti guardia sibil, no ituladda ti kayatko a mapapatay ka dagiti inilin-ili, kdmpy.
Ti pusta nakaddidillaw. Dagidi tallo nga agpagnapagna immasidegda.
—Ngem, apo Simoun, — sinaludsod daydi nangato nga agturay, ¡ania ti maal-ala yo kadagiti kinkinasingpet a ngin niwat, ken kadagiti bibiag, panagpapaibelleng, panagpappatay a nalaka?
—¡Ado! Nabannugakon nga agdengdengngeg kadagiti kinkinasingpet ket kayatko kuma nga alikumkumen amin amin nga adda iti lubong, saak isupot amin ida, saak ipuruak ida iti taaw, uray amin dagiti birbrilyantek ta ikabil ko a mangilenned kadakuada.
—Ania ket dayta a kinamauyungen!—kinuna ni Padre Irene, a nagkatawa;—¿ ket dagiti panagpapaibelleng ken panagpappapatay a nalaka?
—Tapno madalusan ti ili ket mapukaw amin a dakes a bin-i. . .
— Ala! Kapungpungtutyo pay laeng dagiti tutulisan, ket dida kay ngad inan-ano, idinto ta nabalindakay kuma a
