sion; tungpalenyo pay a umuna dagiti ad-adalen yo, sa kayto
sursuruen ti sao ti kastila, ket uray no inkayto agbalin a
inannurat, no iso ti kayat yo. . .
Ket kasta a sao a sao ingga na iti nagpatit ti kampana ken nalpas ti klase, ket dagidi dua gasot tallo pulo ket uppat nga agad-adal, kalpasan ti panaglualo da, rimuarda nga awan ammo da a kas met la idi simbrekda, ngem immangesda ket di, a kas la itay adda naikkat ka dakuada a maysa a nabantot nga awit. Tunggal maysa kadagidi nga agtutubo napukawna manen ti maysa nga uras ti panagbiag na ket adda pay nairaman a napukaw a kinadayag ken kinapateg ti bukod a biang, ngem ket di, rimmangen ti pannakapukaw ti pigsa ti nakem, ti panagkurang ti ayat iti panagadal ken ti pannakadanar dagiti puspuso. Kalpasan toy, dawatan ida iti sirib, dayag, panagyaman!
De nobis, post hoec, tristis sententia fertur!
Ket, kas ka dagidi dua gasot tallo pulo ket uppat, kasta met ti panagpalabas da kadagiti kakanito da dagiti rinibribo a nagad-adal a sinarunuda, ket no saan a mamalbaliw ti agdama a kasasaad, kastanto man met langen dagiti sumarsaruno, ket agbalindanto a nuang, ket ti dayag a nasugat ken ti nadadael a regget ti nakem dagiti agtutubo, agbalindanto a gura ken sadot a kas kadagiti agsasaganad a daldalluyon, a iti panagsublisubli da ken panagbalin da a pitak iti maysa a disso ti baybay, umado nga umado dagiti ibatida a rugrugit. Ngem, daydiay Apo a makaimatang, manipod iti taeng Na a kinaagnanayon, kadagiti banbanagen ti maysa nga aramid a mawarwarwar a kas panait iti kabayatan dagiti ginasgasot a tawtawen, Daydiay nga Apo a mangtimbang iti pateg ti maysa nga apagdarikmat ket inkeddengna kadagiti parparsua Na, a kas umuna a linteg, ti irarang-ay ken isasayaat da, daydiay nga Apo, no Nalinteg, singirennanto a siinget kadagiti rebbeng da ti agbayad, dagiti riniwriwriw a is-isip a nakullaapan ken nabulsekan, ti dayag ti tao a naidadanes kadagiti riniwriwriw a parparsua, ken ti saan a mabilang a gatad dagiti kakanito a napukpukaw ken banbannog nga awan nagmamaayan da! Ket no dagiti pannursuro ti Ebanjelio adda kinapudno da, dagiti riniwriwriw ken riniwriwriw a saan da nga inammo a sinaluadan ti silaw ti isip da, ken ti dayag ti kararua da, indanto met agsungbat, a kas panangdawat ti Apo iti adipen na iti pirak a intalekna kenkuana, ket inna inpaagaw a sitatakrot!
