Ni MATANGLAWIN iso ti pagkigkigtutan da sadi Luson. Dagiti tattao na pagammuan la ta rautenda ti maysa a pangukuman a saan a maipagpagarop, wenno inna serken ti maysa nga agsagsagana a sumaranget kenkuana. Sadi Batangas adda puuranna a dadapilan, dadaelenna dagiti mulmula; iti sumuno a bigat, papatayenna ti Jues de Pas sadi Tiani, iti sabali nga aldaw, rautenna ti maysa nga ili sadi Kabite ket agawenna dagiti ig-igam nga adda iti tribunal. Dagiti pangpangukuman iti tengnga, manipod Tayabas ingga na Pangasinan, maparigatanda kadagiti ar-aramid na, ket ti nakabutbuteng a nagan na dumanon sadi Albay, iti Abagatan, ken sadi Kagayan, iti Amianan. Gapo ta awan igam dagiti il-ili maipuon iti kurang ti panagtalek ti maysa a Turay a nakapoy, matnagda kadagiti im-ima na, a kas nalaka a kayaw; no umasidegen, dagiti agtaltalon talawanda da giti dagdaga da, dagiti tartaraken maksayanda, ket maysa nga anniniwan ti dara ken apoy ti mangted iti tanda ti panaglasat na. Ni Matanglawin katkatawaanna amin dagiti naiget a bilbilin a maituyang a maikanniwas kadagiti tutulisan: isuna la a parigaten dagidi a bilbilin dagiti agindeg kadagiti awaway, a tiliwen wenno kabkabilenna no inda kenkuana umingar, ket no makitulagda kenkuana, inda met pasaplit wenno paibelleng ida ti Turay, no kas ta makadatengda pay iti pakaibellengan da a disso ket saan da a matay iti dalan. Yaman pay itoy nakakigkigtot a kasasaad, ado kadagiti taga aw-away ti timmipon kenkuana.
Gapo itoy a panagkigkigtot, ti panagtagilako kadagiti ilili nga agnguynguyan, matay ngad la a maminpinsanen. Ti baknang dina maitured ti agbaniaga, ket ti napanglaw mabuteng met a baluden dagiti sibil, dagitoy gapo ta inda mapilit a mangkamat kadagiti tutulisan, kaaduan na ti tiliwenda ti umuna a tao a masarakanda ket inda dusdusaen iti di masao. Iti kaawan a mabalin na, ti Turay ipaspasindayagna ti pigsa na kadagiti tattao a kunana a nakaaatap, tapno, iti bin-ig a ranggas, dagiti il-ili saan da a maammuan ti pagkapuyan na, ti buteng a mangituyang kadagidi a bilbilin.
