Iti pungtot na kadagiti pammutbuteng daydi praile, a kayatna lattan a ipapati ti turay na iti sango dagiti dadduma nga agab-abang, ni Kabesang Tales immingar, dina kinayat ti nagbayad uray maysa a kuarta, ket gapo ta kankanayon met laeng a makitkitana daydi ulep a nalabaga, kinunana a sananto la ited dagiti taitalon na iti umuna a manibog kadakuada iti dara dagiti ur-urat na.
Ni lakay Selo, idi nakitana ti kasdi a rupa ti anak na, saan na a naitured a inbaga ti buya na, ngem kinayatna a pinagtalna ket sinaritana daydi banga a damili ket inpalagipna pay a kadagiti ringringgor, ti mangabak mabati nga awan bado na.
—¡Agbalintayto amin a tapok, ama, ket nayanaktay nga awan bado na!— insungbatna.
Ket nadi latta a nagbayad ken nangitulok iti uray no sangadangan kadagiti dagdaga na, no saan a umuna a paneknekan dagiti praile ti kinalinteg iti karakar da, babaen ti panangidatag da iti sinurat a pakakitaan iti pudno a panagtagikua da. Ket gapo ta awan met maiparang dagiti praile, adda rimsua a ringgor, ket ni Kabesang Tales immannugot a nakiriri, ta inpapanna a no saan a iso amin dagiti tattao, adda laeng sumagmamano a naayat a iti kinalinteg ken agrukbab kadagiti paglinlintegan.
—Ipapaayko ket nabayag a tawtawen a inpapaayko ti bagi, pirak ken bannog ko iti Ari,—kunkuna kadagidi mangup-upay kenkuana;—ita, dawatek a itedna ti kalintegak, ket itedna la ket di.
Ket iti panangguyod kenkuana ti dakes a gasat ken iti pay met kasna panangibubos iti daydi a ringgor iti amin ti kasakbayan na ken kasakbayan pay dagiti annak na, binusbusna amin dagiti naiduldulin na, a pinagbaybayad kadagiti ab-abogado, es-eskribano, ken proprokurador, sabali pay dagiti op-opisial kada es-eskribiente, isuda a mangpespes iti kinaawan ti ammo na ken iti agdama a pakarigatan na. Agapan-apan iti kabesera, no mano nga al-aldaw a di mangmangan ken no mano a rab-rabii a di matmaturog, ket awan la ti sabali a sasawenna no di eskrito, panagiparang, panagapelo, kdmpy. Naimatangan ngarod, ti napinget unay a bakal a uray kaano, saan pay a naaramid iti babaen ti langit ti Pilipinas: bakal ti maysa a nakakaasi nga indio, nga awan ammona ket awan pay gagayyem na, a sitatalek laeng iti kalintegan na ken iti kinaimbag ti paringgor na, a makidangadang iti maysa a mannakabalin unay a gimong a iti sangwanan na, ti linteg itamedna ti ulo na, dagiti uk-ukom ibbatanda ti ti-
