- 45
maysa a bassit a disso a linakob ti daan ken nganngani marpuugen a kabiti. Tinurungna daydi baliti nga adda iti tengnga, kayo a napalalo nagdakkel, nalmeng, maikari a pagrukbaban, a binukel dagiti ado a ramramot nga agpangato ken
agpababada a kas da met la puon aminen dagiti ado a kaykayo a nagkakammet iti saan a masursurutan.
Nagsardeng iti maysa a disso a yan dagiti nabunton a batbato, inikkatna ti kallugong na ket kasla naglualo. Sadiay iso ti nakaitabunan daydi ina na, ket ti umuna a sarungkaran na tunggal mapan iti daydi nga ili, iso daydi tanem nga awan makaam-ammo, awan makadkadlaw. Gapo ta inna sarungkaran iti sumuno a bigat ti balay ni Kabesang Tales, dina kayat a palabasen daydi a rabii a di mapan mangtungpal iti daydi nga annong.
Nagtugaw iti maysa a bato ket kasla nagpanunot. Nagparang kadagiti matmata na ti nalabes a biag na, a kasla maysa nga atiddag nga abel a nangisit, napusaksak iti rugi na, sa ngumisit bassit nga adda naipurpuritak a dara, kalpasanna, nangisiten, nangisit, sa agarop dumapo, sa aglawag, lumawlawag a lumawlawag. Ti murdong na saan na a makita, ta kinullaapan ti maysa nga ulep, ulep a kasla pagsalagasagan ti silaw ken bannawag. . .
Sangapulo ket tallo a tawen idin, iso met la nga aldaw, iso met la nga uras, a natay sadiay daydi inana iti let-ang ti nagpaiduma a kinapanglaw, iti maysa a rabii nga ingget sayaat, rabii nga adda bulan na a nagpaiduma iti raniag ken rabii met a panagragragsak dagiti kristyano iti amin ti lubong. Sidadanar ket agpilpilay piman idi a dimmanon sadiay a nangsursurot idi inana; daydi inana, a nagbalin a mauyong ken sipupunno iti buteng, inna itartarayan ti anak na a kas man maysa nga anniniwan. Sadiay ti nakatayan na; adda dimteng idi a maysa a lalaki a dina am-ammo a nangbaon kenkuana a mangbunton iti ado a kayo; iso nagtungpal a nagdardaras ket idi nagsubli, adda manen sabali a tao, a kaskasdi a dina am-ammo, iti arpad ti bangkay daydi immuna. jAnia a bigat ket ania a rabii dagidin! Daydi tao binadanganna a nangbunton iti kayo a nangpuuranda iti bangkay daydi maysa, daydi met la a tao iso ti nagkali iti nangitabunanda idi ina na, ket kalpasan ti pangited na kenkuana iti pirak, inbilinna a pumanaw iti daydi a disso. Iso daydi ti immuna a pannakakita na iti daydi a tao; natayag, nalabaga dagiti matmata na, nabessag dagiti bibbibig na, natirad ti agongna. . .
