Ni Kapitan Basilio inkuyugna ti asawa na, ni anak na a Sinang ken ti manugang na, ket sisasaganada a mangbusbos iti saan a kumurang a tallo ribo a pisos.
Ni ermana Penchang, adda sadiay, ta mapan gumatang iti singsing a brilyante nga inkarina iti Birjen de Antipolo: pinanawanna ti balay na ket ni Juli a mangipapaulo iti maysa a bassit a pagbasaan a inlako kenkuana ti kura iti siping, adda uppat a pulo nga aldaw a induljensia nga inpaay ti arsobispo kadagiti mangbasa wenno makangngeg a mabasa.
—Jesus! —kinuna daydi naimbag a managlualo ken Kapitana Tika;—tay nakakaasi a babai dimmakkel ditoy a kas lau-ong a inmula ti kaibaan!. . . Saan a limlima pulo daras a pinabasak kenkuana a pinaipukkaw ti pagbasaan, ket awan la ti nabati iti lagip na; ti ulo na kasla kuribot, sipupunno iti danom no adda a siuuper. Iti la panagdengdengngeg mi kenkuana, dakam amin, agraman dagiti as-aso kada puspusa, saan a dudduduapulo a tawen a induljensia ti naalamin!
Ni Simoun indasarna iti rabaw ti lamisaan dagidi dua a malmaleta nga inkuyugna: ti maysa, dakdakkel bassit ngem ti maikadua.
—Dikay ngata kayat ti alajas a “double” ken batbato a saan a pudpudno. . . Toy dunia,—kinunana nga intuduna ni Sinang,—kayatna ngata ti brilyante. . .
Dayta, wen, apo, brilyante, ket dagitay brilyante a kadaanan, dagitay batbato a kadaanan, ammuyo? —insungbatna: —ni ama iso ti agbayad ket iso maay-ayatan unay kadagiti kadaanan, kadagiti batbato a daan.
Ni Sinang napalalo a panagangawna iti kinaado ti latin nga ammo ni ama na ken iti kinabassit ken kinadakes nga ammo ti asawa na.
—Naipatpatang, addada al-alajas ko a kadaanan unay, —insungbat ni Simoun, a inikkatna ti supot ti maleta a basbassit.
Maysa a lakasa a paslep a nakalinlinis, ado dagiti ramramen na a gambang, ket dagiti tutulbekan na napigsada ket di masursurutan.
—Adda uk-ukkor ni Cleopatra, napaypayso ket napudpudno unay, nasarakan kadagiti piramides, adda singsingsing dagidi se-senador ken babaknang a romano a nasarakan kadagiti nakarkarbaan sadi Cartago. . .
—Nalabit ngata aya a dagidi inbaon ni Anibal kalpasan ti bakal sadi Cannes!—insilpo ni Kapitan Basilio, a siraranga unay ket nagkintayeg pay iti rag-o.
