ಮುಖಾಂತರ. ಆ ಶಬ್ದಲೆಡ್ ಕೆಲಸದ ವಿವರನೇ ಮುಖ್ಯ. ಆ ಶಬ್ದ ಅಥವಾ ಶಬ್ದಲೇ ಕ್ರಿಯಾಪದಲು ಇಂದ್ದ್ ಪುದರ್ ಪಡೆಪಾ, ಕ್ರಿಯಾಪದದಾಂತಿ ಕೆಲಸದ ವಿವರ ತಿಕ್ಕುಜಿ. ಕೆಲಸವಾಪುಜಿ. ಅಂಚನೆ ಕ್ರಿಯಾಪದ ಅಥವಾ ಕ್ರಿಯಾರ್ಥ ತೆರಿಪಾವರೆ ಆವಂದಿನವು ವಾಕ್ಯ ಆಪುಜಿ. ಪಾತೆರೊ ಆಪಿಜಿ. ಪಾತೆರೊ ಇಜ್ಜಿಡ ಕೆಲಸ ನಡಪುಂಡು ಇಂದ್ದ್ ಪಣೆರೆ ಬಲ್ಲಿ: ನಡತ್ತ್ಂಡಲಾ ಕೆಲಸದ ಹದ್ದ್ ತೆರಿಯಂದೆ ಸಾಗುನ ಕೆಲಸದ ಆಯಿತ ಕೇಡಾವು: ಕೆಲಸ ಕುಂಠಿತವಾವು. ವ್ಯವಹಾರದ ಕ್ರಮ ತತ್ತ್‌ದ್ ಪೋಂಡಾ ನಷ್ಟ ಬದುಕ್‌ಗ್. ಅಂಚ ಕ್ರಿಯಾಶಕ್ತಿ ರೂಪದ ಕ್ರಿಯಾಪದ ಇನ್ಪಿನವು ಪಾತೆರೊಗು ಮುಖ್ಯವಾದಿತ್ತಿನಾತೆ, ಜಗತ್ತ್‌ದ ಜನಮಾನಿನ ಬದ್‌ಕ್‌ಲಾ ಮಹತ್ವದವು ಇನ್ನಗ ಅಯಿತ ಮಿತ್ತ್ ಬೇತೆ ವಿವರ ಅನಗತ್ಯ.
9.11 ಕ್ರಿಯಾಪದನೆ ವಾಕ್ಯದ ಅರ್ಥದ ಮಿತ್ತ್ ಪ್ರಭಾವಶಾಲಿ ಆದುಪ್ಪುನಗ ಅಯಿತ ಅರ್ಥ ಸಮರ್ಪಕವಾದ್ ತೆರಿದುಪ್ಪುನ ಅವಶ್ಯ. ಉದಾಹರಣೆಗಾದ್ ಸಾಗುವಳಿದಾಯ‌ಗ್ ಸುದೆ ಪ್ರಯೋಜನಕಾರಿ ಇಂದ್ದ್ ತೆರಿದುಳ್ಳ. ಸುದೆಡ್ದ್ ನೀರ್ ದಿಂಜೆಲಾದ್ ಪರತೊಂದು ಇಪ್ಪನಗ ಸುದೆ ಬರಿತಕುಳು, ಆ ನೀರ್‌ದ ಪ್ರಯೋಜನ ಪಡೆವರೆ ಸಾಧ್ಯ. ಆ ನೀರ್ ದಿಂಜೆಲಾವೆರೆಗ್ ಬರ್ಸೊನೆ ಕಾರಣ. ಇನ್ನಗ ಸುದೆತ ಜಲಾನಯನ ಪ್ರದೇಶೂಡು ಸರಿಯಾದ್ ಬರ್ಸ ಬೂರ್ದ್, ಆ ನೀರ್ ಸುದೆಗ್ ಪರತ್ತದ್, ಸುದೆ ದಿಂಜಿದ್, ನೀರ್ ಉಪಯೋಗೊಗು ತಿಕ್ಕುಂಡು. ಅಂಚನೆ ಕ್ರಿಯಾಪದಲು ಎಳ್ಯ ರೂಪದ ಅರ್ಥ ಮೂಲವಿತ್ತ್‌ದ್, ಆ ಅರ್ಥ ಸಂಗ್ರಹದ ಮೂಲಕ ನಾನಾ ಶಬ್ದರಚನೆ ಆದ್, ಕಾಲ, ಜಾಗ, ವಸ್ತುಲೆನ್ ನಿರ್ದೇಶನ ಮಾಳ್ತ್‌ದ್ ಪಾತೆರೊಗು ಗೋಡಿದ್, ಅರ್ಥ ವೈಶಾಲ್ಯ ಕೊರ್ಪಿನಯಿಕ್ ಸಹಕಾರಿ ಅದುಳ್ಳ ಮೂಲರೂಪದ ಅರ್ಥವಿತ್ತಿನ ಕನಿಷ್ಠ ರೂಪದ ಕ್ರಿಯಾರ್ಥ ಪಿನ್ಪಾವುನವೆ ಧಾತುಲು.
ಭಾಷೆಡ್ ಕ್ರಿಯಾಪದತ ಉಗಮವಾಪಿನ ಧಾತುಲು ತೆರಿಯಂದೆ ಇಪ್ಪನಗ ಭಾಷೆದ ತಿಳುವಳಿಕೆ ಅಪೂರ್ಣ. ಭಾಷೆ ಇನ್ನಗ ಅರ್ಥ, ಅರ್ಥ ಇನ್ನಗ ಕ್ರಿಯೆ, ಕ್ರಿಯೆ ಇನ್ನಗ ಜಗತ್ತ್‌ದ ನಿಯಮ, ಜಗತ್ತ್‌ದ ವ್ಯವಹಾರ ಅರ್ಥವಿತ್ತಿನವೆ. ಆ ಅರ್ಥ ನಂಕ್ ತೆರಿಜಡ, ಅಯಿಕ್ ಅರ್ಥವಿಜ್ಜಿ ಇಂದ್ದ್ ಪಣ್ಣಿನವು ಮೂರ್ಖತನ. ಉದಾ: ಸೂರ್ಯ ಚಂದ್ರ ಮೂಡೊಂದು ಕಂತೊಂದು ಇತ್ತಿನಲೆಕ್ಕೊ, ಬರ್ಸ ಚಳಿ ದೊಂಬುದ ಕಾಲೋಲು ಉರುಳೊಂದು ಇತ್ತಿನಲೆಕ್ಕೊ, ಕಾಲೊಗು ಸರಿಯಾದ್, ಪುಣ್ಣಮೆ ಅಮಾಸೆ ಆಪಿನವು ನಮ ಕಣ್ಣಿಗ್ ತೋಜುಂಡು: ಗ್ರಹಣವಾಪಿನವು ನಂಕ್ ತೂವರೆ ಆಪುಂಡು; ಅಂಚನೆ ಸೂರ್ಯ ಒಂಜಿ ರಾಶಿಡ್ದ್ ನನ ಒಂಜಿ ರಾಶಿಗ್ ಪೋಪಿನವುಲಾ, ಶ್ರಮ ದೆತ್ತೊಂದು ತೂವನಗ ತೆರಿವುಂಡು. ಈ ಕ್ರಿಯೆಲು ಸ್ವಯಂ-ಶಕ್ತಿಡ್ ಕ್ರಮಬದ್ಧವಾದಿತ್ತಿನ ಅರ್ಥವಿತ್ತಿನ ನಿಯಮಲು. ಅಂಚನೆ ಪಾತೆರೊದ ನಿಯಮಬದ್ಧವಾದ ಕೆಲಸ ಆವೊಡು ಇಂದ್‌ದಾಂಡ, ಕೆಲಸೊಲೆನ್ ಸೂಚನೆ ಮಾಳ್ಪುನ ಕ್ರಿಯಾಪದಲು ಶಕ್ತಿ ಪಡೆಪಿನ ಕ್ರಿಯಾರ್ಥದ ಮಿತ್ತಡ್ ರಚನೆ ಆವೊಡು.
161
ಬುಧಾನಂದ ಶಿವಳ್ಳಿ
