Par ra nozes de Bortel Zambelli con Tresia Michielli
Par ra nozes de Bortel Zambelli con Tresia Michielli
Spose, ancuoi coscì a ra bona
Cuatro verse sentirè
S' i no val na busarona
El poeta scusarè.
Un pitor, ce mai cardeo…!
De fei verse no 'l é bon,
No 'l é bon de fei de meo,
Un pormai de slamacon.
Ma, a ve vede, no pardiana
Taje senpre no se pó…
Beśen śì fora Coiana…
Dei poetes chel 'l é el luó.
Donca ancuoi sé deentade,
Malapena dito… sci
Da noìze maridade,
Inz' el numero dei pì…
Tante i disc che el matrimonio
'L é un afar ben inbroià
Che 'l é un stato del demonio
Da fei propio desperà…
Che viene ca, ch' i se preśente,
I stanpioi che disc coscì
Che viene ca ste maldicentes…
E al contrario i dovrà dì.
Se ió ra femena no aesse,
Canche vedo sti doi ca,
Ra me souta se podesse,
De torname a maridà.
Ca in Anpezo alcuante zurle
I vó dì, senza rajon,
Che a Coiana i é maturle
Ch' i à el disordin cassù in son.
Anpezane sci pardiana,
Podesson buscià ra man,
S' aesson come a Coiana
Dute cuante el zarvel san.
Care spose finalmente,
Un eviva ve farei,
Parmeteme donca śente
Ch' i lo feje meo che sei…
Su, via da brae,
Fajé da sen,
In pes alzave
Col goto pien.
Eviva, a dute
Cuante se ca
A ra salute dei
Spose alzà.
Ch' i vive sane
Come i é ancuoi
Pì de zent' ane
Con ben da fioi.