Pened hiela A. Kirchhoff gasede: Volapükabled Tälik 1
Vobuk veütikün mulas lätik plo ledivam vpa in Deut binom bukil de Hugo Schuchardt, plofed pükava romanik in Graz: “Auf Anlass des Volapüks„ (pepüböl fa Oppenheim in Berlin).
Smatapüks gledinikün, kelis geilon lä obs in Deut ta vp, binoms at: 1, pük kanik kanom nena patikön, binom leo nemöigik, 2, pük valemik, if sibinomla su tal adelo, ya odelo obeginonöv votis, e oyelo mens, ba lenu püköl püki ot len Newa e len Tajo, in Yulop äso in Silop u in Melop, no kapälomsöv balvoto.
Ab plofed Schuchardt plösenom, das pük alik nen sesum pelemekom fa mens; sikod pük alik binom veläto pük kanik, ye püks netas (u “püks natik„) mütoms binön luumo diseinik, bi pedisojedoms in kül yelamilas fädes jenik nenumik; te pÜk licinöl süename lebalik kanom vedön lefulik o. b. lediseinik. Lautel jonom bigoleli nitedik vpa: bodugänapüki et keli bodugänels ädatuvoms in yelatum 16id (baliköl püki okik) al dagetön bälami ko lönedels möpeükik kinän oka kolunik in Solüsilop.
Pük kanik at bodugänelas elovelifom kinäni at gletik, lifom nog nu pos ti yels foltum, no pekipöl dub literat. Ab vp, pük patidöl e papenöl, kikod no kanom dalön nepevotöl äsliko latin nolelas, ebliböl leigik in läns valik e da yelatums so mödik?
Blefo Hugo Schuchardt, vestigel peläsevöl, blöfom, das vp no binom din nesiämik, e lüvokom patiko pükaveles deutik (mödiküno leneflens vpa) ko Max Müller in Oxford: “Te pük kanik kanom nilön dölol püka valiko!„
I dem ninöf lemanik (pükavik e dadukavik) vobuk de Schuchardt melidom palovepolön, bufo in püks romanik, kelas völadi tidamik sütovom.
- Halle len Saale.
Se Volapükabled Tälik 1888, Nüm: 3, Pad: 23.