Per la mëssa nevela del preve de Iacun Antonio Prinoth
Per la mëssa nevela del preve de Iacun Antonio Prinoth.
A unì a ti mëssa nevela
Ne ëi dlaurela
Te rengrazie dl nvit
Y per te mandi n pitl scrit!
Eviva Gherdëina, pitla valeda
Tu ies mo fort la fortuneda,
Percie n preve ess minechie
Da i dé per fant a Chël Bel Die!
Ncuei inò na mëssa nevela
De n jëun de nosta comun,
Ël à fat cossa la plu bela,
A stimé l mond sche ferzum!
Sci seniëur Primiziant tu ies chël fortunà
Che per l prim iede ncuei sul autere
L gran sacrifize essa zelebrà
Per ti jënt per ti pere.
Nce ti oma a Idie es recurdà
Per ti oma, per si bel ana ess prià
O cie alegrëza ess ëila abù
A udëi dì mëssa si fi cajù.
Ma Idio l à tlameda al mond dla,
A sci n paravis ncuei l ess judeda.
Y ëila dant Idie per te à prià,
Che sibes fort bon preve te sta valeda.
O gran consolazion, o beleza
A udëi ntëur a te l amich, l parënt.
Che nvidia ti bela sort de cuntentëza,
Che ulëss avëi ti cuer cuntënt!
O consolazion de ti Berba seniëur Bastian
Che t'à judà fort y daniëura
Per pudëi tu studië tudësch, latin y talian
Y tò la streda de dutes mpo la miëura.
O cie bel udëi ti Pastor
L nosc bon seniëur Curat
Che cun dëuceza y cun tant amor
la bela perdica ncuei t'à fat.
O cie bel udëi la cumpania
De tan de prevesc de Gherdëina
Che ncuei cassù a Santa Maria
Ntëur al autere t'à fat ciadëina!
A sci seniëur Primiziant
N bel di iel ncuei per te
Na bela festa per duc pitl y grant,
Na festa la plu bela a ulëi n pue' pensé!
Tan de cosses essi mo da te dì,
Ma l ie na pëina
A ulëi senté sëura y scrì
Bel – per nos linguagio de Gherdëina.
Ntant auter ne resta da fé
Che l bel y bon te dejideré;
Te wünsce cent ani de chisc biei dis
Y po fort mëssa nevela n paravis.
Un eviva scebën da lonc vuei mo te fé
Un eviva dai berghes de Malé
Un eviva a vo duc jënt da noza,
Un eviva cun got y boza.
Datrai n iede seniëur Primiziant
Sota l Sacrifize grant,
Che ess ncomenzà ncuei a zelebré,
Recordete nce de me
De ti bon amich y ujin
Pater Fedel Capuzin!