Pitla Storia bibia/1
La creazion dl mond.
Tel scumenciamënt à Idie cherià l ciel y la tiera. Ma la tiera fova mo zënza forma y ueta, scura y curida d'ega. Idie a po' dit: "Sibe fat l linëus." Y n chël mumënt ie stat fat l linëus. Chësc fova l prim di.
L segondo di à dit Idie: "Sibe fat l firmamënt." Y te n mumënt fovel fat. Al firmamënt i à po' Chël Bel Die metù l inuem "ciel".
L terzo di à dit Idie: "L'ega dla tiera dëssa s'abiné adum te un luech y l dëssa cumparì tiera suta." Y nsci iel suzedù. La tiera suta à Idie numinà "tiera" y al'ega, che s'ova abinà adum te un luech, i àl dat l inuem "mer". Po' à dit Idie: "La tiera feje crëscer ierbes y plantes da fruc." Y nsci iela deventeda. Te n iede à la tiera scumencià a verdië y l chersciova ierbes y lëns y d'uni sort de plantes.
L cuarto di à dit Idie: "Sul firmamënt sibe śën fates lums." Y nsci iela jita. Idie à fat l surëdl, la luna y la stëiles, acioche les luminësse ju sula tiera.
L cuinto di à po' dit Chël Bel Die: "Sibe fac i pësc tel'ega y i uciei tel'aria!" Y te n iede fovel tel'ega d'uni sort de pësc y tel'aria d'uni sort d'uciei, de granc y de pitli.
L sesto di à dit Idie: "L dëssa unì d'uni sort de tieres sula tiera!" Y te n mumënt fovel fat. Da dedò à po' Chël Bel Die mo cherià l uomo y à dit: "Sëura i pësc tel'ega y i uciei tel'aria y sëura duc i tieres sula tiera posses tu cumandé."
L setimo di finalmënter à Idie paussà y l à benedì chël di y l à santificà.