Pitla Storia bibia/A3

Creazion dl uomo. Paravis terester.

L sesto di à Chël Bel Die cherià l uomo y à dit: "Fajons n uomo, che semea a Nëus per cumandé sëura i pësc dl'ega, i uciei dl'aria, i tieres dla tiera y sëura duta la tiera. Per cherië l uomo à po' Chël Bel Die tëut tiera tumia, à fat dainora n corp y ti à suflà ite n'ana imurtela. Po' fovel vif y Chël Bel Die ti à dat l inuem "Adam", che uel dì "uem de tiera".

Chël Bel Die ova bele njenià n bel verzon, che fova l paravis terester y le chësc verzon fovel laite n grum y d'uni sort de ciofes y lëns da fruc y a mez l verzon fovel l lën dl bën y dl mel. Idie à po' metù Adam ite te chësc verzon, acioche l cële lessù y l lëure. Idie à ënghe fat passé via dant Adam duc i tieres, y Adam à dat a uni tier si drë inuem. Da dedò à Chël Bel Die mustrà a Adam dut l verzon y à dit: "Chësc te déi dut a ti, tu posses adurvé dut y maië d'uni lën, medrë no de chël lën a mez l verzon ne dausses maië, percie sce te maies de chël lën, po' muesses murì.

Adam fova ntlëuta mo l sëul uomo y de duta la creatures, che Idie ti ova mustrà, ne n'ovel udù deguna, che semiova ad ël. Po' à Chël Bel Die dit: "L ne n'ie nia bon, che l uomo sibe sëul, ulon ti fé na cumpania, che semeia ad ël; y ël à lascià unì sëura Adam na gran suenn sota. Ntan che Adam durmiva, ti à Chël Bel Die tëut ora na rëpa y à fat dainora n'ëila. Canche Adam se à po' descedà, ti à Chël Bel Die menà chësta ëila daujin, y Adam a la udëi ova na gran legrëza y ti à dat l inuem Dieva, che uel dì: oma de duc i vives.

Chël Bel Die à benedì tramedoi, Adam y Dieva. Ëi vivova cuntënc tl paravis terester y fova inuzënc; ëi ne savova nia dl mel, i fova liberi da uni malatia, i n'ova nia da patì y ënghe no da murì. NB! Duc union ca da Adam y Dieva y son sun chësc mond per amé Idie y i servì ad ël y ruvé paravis.