Pitla Storia bibia/A6

La frabica dl ciampanil de Babel y l scumenciamënt d'aduré i dieies fauc.

I descendënc de Noé vivova da prima tla gran planures de Senaar. Fina ntlëuta fovel na sëul lingua (rujeneda) sula tiera. Do che la jënt se ova n stragran mesura aumentà, ai dit un al auter: Unide, frabicons na zità y n ciampanil, che à la piza fina al ciel – y fajons inuem, dan che unions spartii per duta la tiera. Per frabiché chësc ciampanil ai tëut pantan dla tiera y l à brujà tl fuech y per mauta ai tëut reja dla tiera y à scumencià a frabiché.

Ma Idie à fat jì n nia si fé superbe. Ël à dit: "L ie na sëul lingua (rujeneda) de duta la jënt sula tiera – sturbonsi si lingua, che i ne possa plu se ntënder un l auter!" Per chësc ài po' messù lascé de frabiché y ie jic un n do l auter d'un y dl auter vieres. Da chësc vën ca, che l ie tan de populi y tan de parleies. La zità, ulache i ova scumencià a frabiché, à l inuem "Babel", che vuel dì "Sturbà".

Dai trëi fions de Noé Sem, Cam y Iafet ven śën ca duta la jënt dla tiera. I fions de Sem ie restei tl'Asia y da dëi vën ca l popul d'Israel; i fions de Cam ie jic per gran pert dl vieres dl'Africa; i fions de Iafet ie unii tl'Europa.

Tosc à po' duc scumencià a se desmincë Idie y a aduré mpo de Die la creatures: l surëdl, la luna, la stëiles, i uomini, i tieres, sci ënghe imagines de lën, sas y mitel. Per castich à po' Chël Bel Die lascià pro, che i ie stac adurbei da si pascions y che i ie tumei for plu y plu sot ti picëi y vic d'uni sort – nsci che i ie ruvei a sacrifiché ai dieies fauc ënghe persones.

NB! Idie dà de contra ai superbesc y dà la grazia medrë ai omli – y sce Idie ne dà si grazia, iesen n pericul de tumé te duc i picëi.