Se̿ng-géng/Mǎ-tuo̿i Hŭ-éng/18
Di̿ 18 Cióng
[edit]- 1 Ǔ-cì-sî hǎ-sáing lâ̤ mōng Iǎ-Sú, uā, Tíng gǒ-di̿ sū sī děng duōi?
- 2 Iǎ-Sú hǎng cì-ciă gṳ̌ing-ciě lâ̤, káing gṳ̀ gṳè hā dô̤ng ó̤ng-séng-di̿,
- 3 Uā, Uòi ì-cài iáu nì uā, Nì lâ̤ ēng gǎi-bi̿ng bǒ̤ ca̿ gṳ̌ing-ciě gâ̤ gǎ̤-sǐ, cǒng mài nì tíng gǒ-di̿ ko̤̿.
- 4 Gu̿-chu̿ mǎu-lō̤ng sū-mū nêng cù-cī kǎing kéng-hṳ́, su̿-siōng iǒ̤ng gṳ̌ing-ciě, iǒ̤ng nêng da̿u tíng gǒ sī děng duōi.
- 5 Mǎu-lō̤ng sū-mū nêng éng-ṳē uòi gâ̤ miâng ciě-duòi cì-ciă iǒ̤ng-gǎ̤-sǐ gâ̤ gṳ̌ing-ciě, ciū-sī ciě-duòi uòi.
- 6 Mǎu-lō̤ng sū-mū nêng nà cì-ciă iǒ̤ng se̿ng uòi gâ̤ gṳ̌ing-ciě huōi gṳ̀ iǔ gua̿-ngāi gâ̤ dī, gu̿ hǎu nà mō̤ mīng-hó gâ̤ mō̤ gua̿ hā iǒ̤ng nêng dē̤ng-dē̤ng-di̿, nà gṳ̀ de̿ng hā huǒi di̿ cèng chéng gâ̤ sù-cài, gû iǔ ǐ gṳ̀.
- 7 Iǒ̤ng si̿-gáing iǔ huā da̿u, éng-ṳē huōi nêng iǔ gua̿-ngāi, cǒng iǔ iǒ̤ng dī; lâ̤-sī iǒ̤ng dī giǎng sū-mū nêng-di̿ kǐ, iǒ̤ng nêng ciū iǔ huā da̿u.
- 8 Lâ̤-sī nì ciǎ siǔ, ciǎ káu, huōi nì iǔ gua̿-ngāi, ciū niōng dǔ à lâ̤, diú-atiāu; nì siǎu ciǎ siǔ, ciǎ káu, nì ě̤ng-ṳ̌ing gâ̤ sáng-miāng , iâng-gua̿ iǔ liòng-ciǎ siǔ, liòng-ciǎ ḱáu, diú hā ě̤ng-ṳ̌ing gâ̤ hǒ-di̿.
- 9 Lâ̤-sī nì cì ga̿i-ti mì-ciú huōi nì iǔ gua̿-ngāi , ciū niōng lé chṳ̆ lâ̤, diú-tiāu ; nì cì-ciă mì-ciú nì ě̤ng-ṳ̌ing gâ̤ sáng-miāng, iâng-gua̿ iǔ liòng-ciǎ mì-ciú diú hā dī-ngṳ̀ gâ̤ hǒ-di̿.
- 10 Nì niōng siǎu-séng, ēng gǒ̤ng chū-kiáng cì-ciă iǒ̤ng-gǎ̤-sǐ gâ̤ gṳ̌ing-ciě ; uòi iáu nì uā, cia̿u-gu̿ gṳ̀ gâ̤ ciū-sī Cṳ̌ sǎ̤-chṳ̄ sǎ̤-chṳ̄ gâ̤ da̿u tíng ciōng sî-sî kǎ̤-kǎ̤ chū-gi̿ng uòi tíng ciōng gâ̤ Dá gâ̤ mīng.
- 11 Nêng gâ̤ Gṳ̌ing lâ̤, sī niōng giù ǔ mǎu-tiāu gâ̤ nêng.
- 12 Bǐ-piāng nêng iǔ cì-bǎ tê iông, cě ko̤̿-tiāo cì-tê, í nì siǒng gōng-ciōng lōng? Cǒng sī běng-cie̿ iǒ̤ng giǔ-sī-giǔ tê, cù-cī ko̤̿, súing-di̿ lāu u cě-tiāu gâ̤ iông, ēng sī?
- 13 Lâ̤-sī lāu-diō̤ làu, uòi ì-cài iáu nì uā, gṳ̀ éng-ṳē iǒ̤ng cì-tê iông, piāng ǔ giǔ-sī-giǔ tê ēng-nǎing cǒ ko̤̿-tiāu gâ̤ iông, ga̿ing ka̿u-uòi,
- 14 Iǒ̤ng-gǎ̤-sǐ nì tíng ciōng gâ̤ Dá iǎ ēng o̿ cì-ciă iǒ̤ng-gǎ̤-sǐ gâ̤ gṳ̌ing-ciě miè-tiāu.
- 15 Lâ̤-sī hiáng-dī dǎ̤-cò nì, nì ciū niōng ko̤̿ cǒng-lâ̤ nì liōng nêng gâ̤ sù-cài, uā gṳ̀ gâ̤ cho̤̿-chṳ̿: gṳ̀ lâ̤ kǎing tia̿ng-nī, nì ciū-sī nì gâ̤ hiáng-dī.
- 16 Gṳ̀ lâ̤ ēng kǎing tia̿ng-nī, nì ciū iáu cì liōng nêng câi ko̤̿, iǔ liōng sāng nêng ca̿ gúing-ce̿ng, uā gâ̤ dī, cì gṳ̄, cì gṳ̄, dú iǔ běng-gṳ̀.
- 17 Lâ̤ cuo̿i ēng kǎing tia̿ng-nī gṳ̀, ciū ko̤̿ iáu ga̿u-hō, ciū niōng chū gṳ̀ su̿-siōng biē-gǒ-nêng iáu siú-sṳe̿ siú-sṳe̿ gâ̤ nêng ǐ-búing.
- 18 Uòi ì-cài iáu nì uā, Nì da̿u si̿-gáing mǎu-lō̤ng gǎi-diū gǎi-diū sū-mū dī, da̿u tíng ciōng iǎ ŏ̤ tiǎ-kṳé.
- 19 Uòi ì-cài iáu nì uā, Nì dǐ-bíng lâ̤ iǔ liōng nêng da̿u si̿-gáing câi-câi gōng séng gōng ï giǔ sū-mū dī, uòi gâ̤ Dá da̿u tíng ciōng cǒng ŏ̤ ta̿i gṳ̀ ca̿-chěng iǒ̤ng di̿.
- 20 Éng-ṳē mǎu-lō̤ng sū-mū sù-cài iǔ liòng sáng-ciǎ nêng da̿u uòi gâ̤ miâng cṳ̀ cì-dó, uòi iǎ da̿u gṳ̀ ǔ-di̿.
- 21 Ǔ-cì-sî Bǐ-dǎ̤ lâ̤ mōng Iǎ-Sú, uā, Cṳ̌, hiáng-dī dǎ̤-cò uòi, uòi niōng niâu gṳ̀ gǐ-lê̤ng, dau chǐ-lê̤ng ŏ̤ sǎ̤-dǎ̤?
- 22 Iǎ-Sú uā, Ēng sī uā da̿u chǐ-lê̤ng, ciū-sī da̿u chǐ-sī-ciǎ chǐ-lê̤ng iǎ niōng niâu gṳ̀.
- 23 Tíng gǒ su̿-siōng cì-ciă uǎng-di̿, niōng iáu gṳ̀ nû-gě sō̤ng-dio̤̿ng.
- 24 Dō̤-di̿ sō̤ng gâ̤ sî-hē, iǔ nêng nà cì-ciă ki̿ng cì-cháing-uāing liǒng ngê̤ng gâ̤ duo̿i lâ̤.
- 25 Éng-ṳē gṳ̀ mǎu-bǒ̤ng-sū hi̿ng, cṳ̌-nêng ciū gáu-dō nà gṳ̀ iáu gṳ̀ sē-mǎ gṳ̌ing, gìng gṳ̀ lǒng-cǒng iǔ gâ̤ mî-dī, dú māi-tiāu hīng gṳ̀ gâ̤ dio̤̿ng.
- 26 Iǒ̤ng ciǎ nû-gě pǔ-diū ba̿i gṳ̀, uā, Cṳ̌, kúing-hāing uòi, uòi dú hīng chéng-chǔ.
- 27 Gṳ̀ cṳ̌-nêng ciū kǒ̤-lǐng gṳ̀, bo̿ng gṳ̀ ko̤̿, ēng niōng gṳ̀ hi̿ng iǒ̤ng dio̤̿ng.
- 28 Iǒ̤ng ciǎ nû-gě chṳ̌ ko̤̿ pōng-diō̤ cì-ciă iáu gṳ̀ gōng bó̤ng gâ̤ nû-gě, ki̿ng gṳ̀ sí liǒng ngê̤ng; ciu niǔ-diū gṳ̀, ká gṳ̀ gâ̤ ǔ-liǎng-gǒ̤ng, uā, Nì ki̿ng uòi gâ̤ niōng hi̿ng uòi.
- 29 Ǔ ciǎ ōng bó̤ng gâ̤ nû-gě pǔ-diū, giǔ gṳ̀, uā, Kúing-hāing uòi, uòi ciū ŏ̤ hi̿ng nì.
- 30 Iǒ̤ng ciǎ nû-gě ēng kǎing: nà gṳ̀ sū hā lâu-dī, dǎing gṳ̀ gâ̤ diōng hi̿ng chéng-chǔ.
- 31 Iáu gṳ̀ gōng bó̤ng gâ̤ biē nû-gě chū-gi̿ng iǒ̤ng dī, cèng ki̿, ciū nà iǒ̤ng dī ko̤̿ iáu cṳ̌-nêng uā,
- 32 Cṳ̌-nêng ciū hǎng iǒ̤ng ciǎ nû-gě lâ̤, uā, Nì iǒ̤ng ŏ̤ gâ̤ nû-gě, nì ki̿ng uòi cèng cāi, éng-ṳē nì giǔ uòi, uòi dú ēng niōng nì hi̿ng:
- 33 Nì ia e̿ng-gái kǒ̤-lǐng nì gōng bó̤ng gâ̤ nû-gě, su̿-siōng uòi kǒ̤-lǐng nì ǐ-búing.
- 34 Gṳ̀ cṳ̌-nêng duōi nū-ki̿ , nà gṳ̀ gáu nǎ hěng-gúing, dǎing gṳ̀ gâ̤ dio̤̿ng hi̿ng chéng-chǔ.
- 35 Nì duōi-gá-nêng séng-dǐ lâ̤ ēng niâu hiáng-dī gâ̤ gua̿-sǐ, uòi tíng ciōng gâ̤ Dá iǎ ŏ̤ iǒ̤ng-gǎ̤-sǐ duòi nì.