Seng ge rtsal rdzogs chen po'i rgyud

@1
245
seng ge rtsal rdzogs chen po'i rgyud ces bya ba bzhugs
246
rgya gar skad du
bod skad du
seng ge rtsal rdzogs chen po'i rgyud ces bya ba
bcom ldan 'das drag po rtsal gyis rnam par gnon pa nyid la phyag 'tshal lo
'di skad bdag gis bstan pa'i dus gcig na
e ma ho
sems can kun gyi rang rgyud la
sangs rgyas kun gyi ye shes sku
'gyur ba med par lhun gyis grub par rdzogs
de ston ye shes chen po'i lung
'di bshad pa yis grol bar 'gyur
de skad ces gzugs med pa'i skus
bsam pa dang bral ba'i shes rab la gzigs te
yul chos kyi dbyings kyi pho brang na
rig pa ma bkod par snang ba nas
247
gsungs so
gsung ngo
gsung bar 'gyur ro
'di skad bdag gis thos pa'i dus gcig na
rig pa'i ye shes
bkod pa rin po che'i gzhal yas khang na 'gyur ba med pa rang bzhin gyis rnam par dag pa'i sku lnga dang thabs tsig tu bzhugs so
de nas bcom ldan 'das dpal kun tu bzang po
chos nyid mngon par snang ba'i ting nge 'dzin las bzhengs te
dgongs pa rang gnas ye shes chig chod kyi lta ba 'di gsungs so
e ma ho
ngo mtshar che ba'i lta ba
rang rig pa'i ye shes kun tu bzang po
chos nyid gdod ma'i dbyings las ma g.yos pa'i chig chod blta ba ngas bstan gyis
rdo rje sems dpa' la sogs pa'i 'khor rnams nyon cig
248
blta ba rang snang gi ye shes ngos gzung gi mtha' las 'das kyang
thugs rje rang snang gi rol pa ma 'gags pas
ye nas blta ba rang byung gi ye shes la 'gag pa med do
dgongs pa rang gnas kyi ye shes la rtogs mtha' med do
e ma ho
rigs kyi bu yang dag par rdzogs pa'i sangs rgyas kyi dgongs pa ma nor bar bstan na
dgongs pa ye shes chen po lngas
ye shes yi don ma 'gags par gsal te
de yang dgongs pa lnga gang zhe na
ri bo spyi bcings kyi dgongs pas blta ba la la bzla bar bya'o
ye shes spyi blugs kyi dgongs pas sa gzung bar bya'o
thig le mthong ba rtol gyi dgongs pas snang ba 'char tshul brtag par bya'o
nyi zla khad mnyam pa'i dgongs pas don la bskyal bar bya'o
rgya mtsho klong brdol gyi dgongs pas rig pa dbyings la bskyal bar bya'o
e ma ho
rigs kyi bu
sangs rgyas kun gyi dgongs pa la
'gag med tshal gyis yongs la khyab
ye nas klong 'byams dgongs pa las
lhag mthong rig pa'i ye shes skyes
249
de tshe rang gi bden pa mthong
de las rig pa'i me tog skyes
des ni skye med pha rol phyin
lta ba ye shes don la rtog
rtog na gsang sngags skyes mi 'gyur
mtshan ma'i sems la don btsal bas
don med 'khor ba'i sdug bsngal thob
rang rig ye nas dgongs pa nyid
yul du mi snang kun la rol
rnam rtog med pa'i nam mkha' la
bya byed med pa'i rig pa gsal
'dzin pa med pa'i rang stang la
lta byed med pa'i lta ba gsal
rtogs mtha' med pa'i shes rab la
rtog med rang sangs bsgom pa gsal
bgrod med stong pa'i ye shes la
ma 'gags zhen med spyod pa gsal
'byung ba ye shes sa bon la
rang snang bzlog med 'bras bu gsal
sangs rgyas ye shes gsal bas mdzes
lhang nge lhan ne don gsal ba'o
de nas rnam par snang mdzad kun rig chos kyi rjes 'di skad ces gsol to
kye kye ston pa kun tu bzang po
sangs rgyas dang ye shes kyi mnga' bdag
thugs rje rang snang gi dgongs pa dang ldan pa
bdag cag mos pa'i 'khor rnams la
thig le rnam pa lnga'i don ci lta bu lags
250
gsung du gsol
de nas ston pa kun tu bzang pos ting nge 'dzin rang gnas kyi don las bzhengs nas
rigs kyi sangs rgyas rnams la bka' stsal pa
kye rigs kyi bu 'khor gyi byang chub sems dpa' dang bcas pa rnams nyon cig
ngas dgongs pa lnga'i don ma nor par bstan gyis nyon cig
legs par nyon cig
ri bo spyi bcings kyi dgongs pa shar ba'i dus na
rdzogs chen gyi lta ba mthar phyin te
dbang po rab 'bring tha ma gsum la
lta ba rnam pa gsum 'char te
dbang po rab ye shes kyi snang ba lhug par shar ba'i lta ba ni
rang gi ye shes rtog med kyi rig pa sku dang bcas par rtogs shing
de'i tshe dgongs pa ni gsal ba la mi g.yo ba rgya mtsho la gza' skar shar ba lta bu'o
spyod pa ni 'gag med shugs 'byung gi spyod pa nam mkha' la mdung bskor ba lta bu'o
'bras bu ni skye med rang byung gi snang ba mthong ba'o
dbang po 'bring gi lta ba rang gi rig pa skye med du 'dug pa tsam zhig rtogs pa'o
dgongs pa ni rgya mtsho la dar chags pa lta bur rnam rtog gi phyogs nang bral ba'o
spyod pa ni ma bkag lhug pa smyon pa lta bu ste
251
snang ba la thogs rdug med par spyod pa'o
'bras bu ni mtshan ma zil gyis gnon pa rang gnas kyi dgongs pa dang ldan pa'o
dbang po tha ma'i lta ba ni
snang ba 'di sgyu ma'am
smig rgyu'am
sprul pa lta bur rtog pa'o
dgongs pa ni rang gi snang ba ngo sprad pas
bar do la ye shes 'char bar shes pa
seng phrug mngal rgya dang bral ba lta bu ste
sbubs kyis ye shes bsgribs pa mthong ba'o
spyod pa ni 'khor 'das gnyis 'dzin gyi spyod pa dang ldan pa'o
'bras bu ni lus bor nas rang bzhin sprul pa sku'i zhing khams su dbugs 'byin pa'i 'bras bu 'thob pa'o
ye shes spyi blugs kyi dgongs pa skyes pa'i dus na yang gang zag rab 'bring tha ma gsum gyi lta stangs gsum du 'byung ste
dbang po rab kyis dbang bskur ba de nyid skye med kyi 'bras bu rang chas su bstan par rtogs so
dgongs pa ni sbyor ba'i shes rab kyis stong pa'i thig le la rgyas btab pas
bde ba chen po mkha' mnyam gyi dgongs pa las ma g.yos pa'o
spyod pa ni byang sems dkar dmar la gtsang sme med par spyod pa'o
'bras bu ni rigs kyi sa'i de bzhin nyid mthong ba'o
252
dbang po 'bring gi lta ba ni
snang ba rig pa'i stobs su gyur pa tsam zhig gi blta ba rtogs pa'o
dgongs pa ni gsal la ma yengs ba nyi zla zung du 'brel ba lta bur gnas so
spyod pa ni yang dag pa'i chos nyid rnal 'byor gyi rang la spyod pa'o
'bras bu ni skye shi med pa'i de bzhin nyid thob pa'o
dbang po tha ma'i lta ba ni
dbang bskur ba'i yon tan rgyas par 'byung bar rtogs so
sgom pa ni lha'i sku mtshan ma can la brten te bsgom pa'o
spyod pa ni chos nyid kyi rol par spyod pa'o
'bras bu ni yon tan gyi sgo nas sangs rgyas thob bo
thig le mthong brtul gyi dgongs pa shar ba'i tshe
yang dbang po rab 'bring tha ma gsum la
mthong snang mi mthun pa gsum du 'char te
de yang 'di lta ste
dbang po rab kyi lta ba ni
dper na skar mda' nam mkha' la rgyug pa lta bur ye shes kyi rtsal yon tan du shar nas
skad cig ma gsum la grol bar rtogs so
dgongs pa ni bar snang la nyi ma shar ba lta bur gsal ba zang thal kun la khyab par gnas so
spyod pa ni ye shes kyi sku rnam par dag pa la longs spyod do
253
'bras bu ni skad cig ma gsum la ka dag gi sar de bzhin gshegs pa'o
dbang po 'bring gi lta ba ni
chos nyid kyi bde ba zag med chen po'i snang ba khad kyis skye bar rtogs so
dgongs pa ni skad cig re re la mthong ba'i yul khyad par can re re mthong bas
rtogs pa khyad par can re re skye ba dang
chos kyi sku'i snang ba re re mthong ba dang
thugs ka'i de bzhin nyid rnam par dag pa'i dgongs pa la gnas so
spyod pa ni rang gi thugs ka'i zer thag dang gnyis su med par spyod do
'bras bu ni rang gi rig pa'i snang ba skye ba med pa'i chos skur mthong ba'o
dbang po tha ma'i lta ba ni
ye shes dag pa'i snang ba la nga las pha gi byung ngam
pha gi las nga byung ngam snyam par rtogs
dgongs pa ni snang ba nyid la mthong byed med par gnas
spyod pa ni the tshom dang yid gnyis kyi spyod pa dang ldan pa'o
'bras bu ni rang bzhin sprul pa'i sku'i zhing khams su dbugs 'byin pa'i 'bras bu thob pa'o
nyi zla khad mnyam pa'i dgongs pa klong brdol ba'i dus na
de yang dbang po rab 'bring tha ma gsum la mthong snang rnam pa gsum du shar te
de yang dbang po rab kyis lta ba ye shes zang thal du rtogs so
254
dgongs pa ni 'gag med ye shes chu bo'i gzhung lta bu dang mi 'bral ba'o
spyod pa ni ye shes chen po'i mdzad pas rol pa ma 'gags par spyod do
'bras bu ni thabs dang shes rab gnyis sbyor ba dang sgrol ba rnam pa gnyis te
gzhi 'du 'bral med pa'i 'bras bu 'thob po
dbang po 'bring gi blta ba ni dbyings dang ye shes gnyis med par rtogs so
dgongs pa ni thabs dang shes rab gnyis su med pa'i rang bzhin bar snang la nyi zla shar ba lta bu'i dgongs pa la gnas so
spyod pa ni bde ba chen po'i gsang ba'i thig le dkar dmar la spyod do
'bras bu ni rigs kyi sangs rgyas lnga'i sbyor ba'i lhums su sangs rgyas pa'i 'bras bu thob pa'o
dbang po tha ma'i lta ba ni
yab yum gyi sbyor ba'i byang chub kyi sems sprul pa'i rgyu mtshon pa'i lta bar rtogs so
dgong pa ni lha'i rang bzhin snying po dran pas
ting nge 'dzin gsal ba'i dgongs pa dang ldan pa'o
spyod pa ni sman lnga bdud rtsi lnga la spyod pa'o
'bras bu ni bar do la yi dam lha'i sgyu lus bzung ste
snang bdag pa'i 'bras bu thob pa'o
255
rgya mtsho klong brdol gyi dgongs pa shar ba'i dus na yang
dbang po gsum la mthong snang mi mthun pa gsum 'char te
de yang dbang po rab kyi lta ba ni
ye shes chen po'i mdzad pas
ci snang rang gi snang ba nyid du rtogs so
dgongs pa ni snang ba la chags zhen chung ba chang gis ra ro ba lta bu'i dgongs pa dang ldan pa'o
spyod pa ni 'khor ba nyid mya ngan las 'das par spyod pa'o
'bras bu ni snang ba la mi gnas pa'i ye shes chig chod du skye ba'i 'bras bu thob pa'o
dbang po 'bring gi lta ba ni
gsal ba zang thal ye shes kyi skur rtogs pa'o
dgongs pa ni drag la yun thung ba 'bab chu lta bu'i dgongs pa dang ldan pa'o
spyod pa ni kun gyi spyod yul ma yin pa ri dags lta bu'i spyod pa dang ldan pa'o
'bras bu ni stong pa'i ye shes kyi snying po mthar phyin pa'i 'bras bu thob pa'o
dbang po tha ma'i lta ba ni
'khrul pa'i snang ba khad kyis sangs bar 'dod pa'o
dgongs pa ni lha dang mi'i sems 'dzin la gnas so
spyod pa ni bcos ma gnyis 'dzin gyi spyod pa dang ldan no
'bras bu ni lha dang mi'i rigs mthong 'thob pa'o
256
e ma ho
rigs kyi sangs rgyas sems dpa' dang bcas pa rnams nyon cig
yang dag pa'i sangs rgyas kyi lam lnga shes par bya ba'i thabs ni
thig le rnam pa lnga'i ye shes la mkhas par bya'o
de yang ye shes chen po'i dgongs pa lnga dang
thig le'i snang ba lnga mthar phyin na
chos thams cad kyi de kho na nyid gsang sngags thugs su chud pa'o
de yang dgongs pa'i gsang ba thugs kyi nying khu ni
rnam pa lngar shes par bya ste
ri bo spyi bcings kyi dgongs pa ni
seng ge rnam par bsgyings ba lta bu'o
ye shes spyi blugs kyi dgongs pa ni
rgyal rigs spyi bo nas dbang bskur ba lta bu'o
thig le mthong ba rtol gyi dgongs pa ni
rma bya'i pru gu sgo nga nas thon pa lta bu'i
nyi zla khad mnyam pa'i dgongs pa ni
nyi ma dang zla ba gnyis su med par snyoms par zhugs pa lta bu'o
rgya mtsho klong brdol gyi dgongs pa ni
ri rab kyi mgul nas nyi ma shar ba lta bu'o
de dag ni dpe chen po lngas ye shes kyi snang ba bstan pa'i thabs so
dgongs pa'i gnas gang yin pa de ni 'bras bu'i tshad du bstan pa'o
257
zhes seng ge rtsal rdzogs chen po'i rgyud las
dgongs pa lngas ye shes mtha' la skyel ba'i le'u ste dang po'o
@2
de nas yang rigs bzhi la gnas pa'i sangs rgyas rnams kyis
bcom ldan 'das dpal kun tu bzang po la 'di skad ces gsol to
kye kye bcom ldan reg pa'i ngang
yang dag don gyi gtan tshigs rnams
mos pa'i 'khor la gsung du gsol
zhes zhu ba zhus so
de nas yang rang rig stobs kyi lhas bka' stsal pa
kye ma rigs bzhi'i ye shes bzhi
nga yi dgongs par da gnas nyid
khyed la rgyas par bstan par bya
ma yengs tshul gyis gus pas nyon
sna tshogs sems kyi rtog pa sol
yang dag don gyi gtan tshigs ni
khams gsum sems can thams cad la
rang rang snying gi dkyil na gnas
snying po ye shes sum brtsegs te
de yang ngo bo sgrib med do
sems can rab rib blo yis bsgribs
de yang blo la snang lugs dang
rtogs pa'i dus na 'char lugs so
blo yi yul la 'dzin pa ste
258
rtogs pa'i dus na rang snang ngo
sangs rgyas ye shes sems dpa' yis
rang gi lus la rdzogs par bshad
sna tshogs blo yi the tshom rnams
bsal phyir rgyud 'di bshad pa yin
sems can kun gyi rang lus la
sangs rgyas kun gyi sku gnas pa
sku ni dri med 'od kyi sku
rnam par snang mdzad chos dbyings bdag
sangs rgyas kun gyi rang bzhin yin
sems can kun gyi rang rgyud la
sangs rgyas kun gyi gsung gnas pa
gsung ni 'gag med tshangs pa'i dbyangs
snang ba mtha' yas rang byung sku
sems can kun gyi rang rgyud la
sangs rgyas kun gyi thugs gnas pa
thugs ni rtog med 'khrul pa zad
rdo rje sems dpa' skyi 'jig bral
sems can kun gyi rang rgyud la
sangs rgyas kun gyi rgyu gnas pa
rgyu ni 'khrul med thig le bzang
rin chen 'byung ldan zad med gter
sems can kun gyi rang rgyud la
sangs rgyas kun gyi spyan gnas pa
spyan ni sgron ma 'gag med spyan
don yod grub pa rtog med lam
sems can kun la gnas pa'o
e ma ho
sangs rgyas dgongs pa zab mo 'di
259
yang dag chos nyid rtog med lam
'byung ba lnga yi dri ma bsal
rnam rtog bag chags 'byung mi srid
'byung ba lnga yi phra rags gyis
ye shes lnga yi rang gdangs bsgribs
ma rig nyon mongs rtsa ba yis
rig pa'i ye shes me tog bsgribs
dri ma lnga yi klong dkyil du
stong pa nyid kyi ye shes bsgribs
snang ba'i ye shes dang gis gsal
'byung ba lnga yi ye shes la
rnam dag stong pa'i ye gdangs gnas
snang ba'i phyogs kyis ma bsgribs par
rang 'od gsal na rtogs pa'i mchog
mtshan ma'i yul la mi gnas na
yang dag kun tu bzang po'i thugs
rang gi rgyud la skyes pa yin
rig pa'i ye shes rang byung la
chad pa'i yul snang ga la yod
gsang ba'i rig pa gnyis snang bral
rtogs pa'i thugs rjes las mi 'grub
drang srong chos nyid bden mthong na
sangs rgyas dgongs pa de las med
bden pa gnyis kyis ye nas rtogs
bden pa gsum gyis rang don rnyed
bden pa bzhi yis snang ba mthong
bden pa lnga yis chos sku shes
260
bden pa drug gis rang lus mthong
bden pa bdun gyis de nyid thob
bden pa brgyad kyis rtogs pa rnyed
bden pa'i chos nyid rna pa dgu yis
rang gi ting 'dzin brtan pa thob
bden pa bcu yis sangs rgyas mthong
bden pa bcu gcig sa lam bgrod
rnam pa bcu gnyis rtogs dang ldan
de don rnam pa bcu bzhir ldan
rnam pa bco lngas mkha' la bskyod
de nyid rnam pa bcu drug rig
bcu bdun rnam pas pha rol phyin
bco brgyad chos nyid bden pa mthong
bcu dgu rang gi yul dang 'phrad
rnam pa nyi shus byang chub pa
rnam pa kun rig sangs rgyas mchog
des ni pha rol bgrod pa'o
e ma
rtog med rang sangs rnyog pa med
'dzin med rang grol phyogs ris med
rnam par rtog med mkha' pa rol
skye med chos nyid mnyam pa nyid
yang dag chos la sgro btags med
bsam 'das brjod med ngo bo ni
rnam rtog phyogs su ma lhung ba
rtog med sku la yang dag blta bar bya
mnyam pa nyid kyi shes rab yid med la
snang ba med pa'i chos nyid kun tu bzang
skye 'gag med pa'i rang bzhin bde ba'i sku
261
dmigs pa med pa'i ting 'dzin chos las grol
bsam 'das dngos po'i yul la bdag 'dzin med
sangs rgyas kun gyi ye shes 'od 'bar ni
nyi ma'i zer bzhin kun la snyoms par gnas
thugs rje mnyam nyid sgron ma'i zhags pa ni
'char byed ma 'gags dbang po'i yul las log
yul sems gnyis med rang byung dgongs pa ni
rtog med chos sku rang gsal chen po'i ngang
mnyam nyid dngos bral sangs rgyas dgongs pa ni
ye shes rang snang chos sku'i mkha' la rol
spros bral rig pa nam mkha'i mtha' dang mnyam
spyod pa stong yul 'dzin med rang sar grol
dgongs pa rang gnas ting 'dzin cog bzhag dang
dngos med rang snang dkyil 'khor kun gyi dngos
'gyur med rang sangs chos nyid kun gyi yul
bde chen rig pa'i sa bon 'od po che rang snang yul la mi rtog gcig tu lhang nge gnas
dpyod pa yid kyi rnam rtog bral ba ni
gsang sngags gtan tshigs chen po nga yis bshad
sangs rgyas dgongs pa yang dag gcig pu nyid
262
so so rang rang bden pa'i yul la 'jug
bltar med g.yengs bral nyid kyi sku la rnam par bltas
spyad med spyod pa nyid kyi ting 'dzin ngang la bzhugs
bsgom med bsgom bral nyid kyi ngo bo bzung
'da' med bsrung mtshams bral ba'i nyams len bya
rang snang cig chod nyid kyi rjes su 'brangs
stong pa kun khyab yul dang lhan cig gnas
rtog med phyogs sangs nyid kyi mkha' la gsal
bde ba dngos bral chos nyid yul la 'jug
bcos pa med pa'i ting 'dzin rang snang yul
zhe 'dod med pa'i bsgom pa mkha' la gsal
'dzin chags med pa'i blta ba yul dang bral
rtog pa med pa'i chos nyid dri ma sangs
the tshom med pa'i sku gsum mngon par snang
'dzin chags med pa'i sbyin pa yul las 'das
dri ma med pa'i tshul khrims rnam par dag
rtog zhen med pa'i bzod pa yul la snang
so ma nyi spangs ba'i brtson 'grus ngang las 'byung
thun mtshams med pa'i bsam gtan snang mtha' yas
mngon snang sku yi shes rab pha rol phyin
263
yul dang sems med thabs kyi ngang la gnas
zhe 'dod bral ba'i smon lam rang la rnyed
dmigs pa med pa'i ye shes pha rol phyin
gza' gtad mod pa'i stobs la rnam par gnas
bya bral rdzogs pa'i sa la kun tu chub
g.yeng ba med pa'i chos nyid gting mtha' yas
gcig dang du mar snang ba'i bsam gtan med
rang gi yul la chos nyid ma dang 'phrad
bden pa'i stobs kyis sangs rgyas sku la 'jug
mched pa dang ni sku yi 'od zer 'phro
snang ba rtsal gyi 'byung ba mkha' la 'khyil
yin pa tsam gyis blo yi the tshom bsal
de ni rang gi yul du kun tu bzang pos bstan
rig pa'i zhal ni ma 'gags phyogs bcur gsal
rig pa'i sku la che dang chung ba med
rig pa'i snang ba phyogs dang ris su med
rig pa'i ye shes yul la rnam par snang
rig pa'i sa bon 'phel dang 'grib pa med
rig pa'i ngo bo rtogs dang ma rtogs med
rig pa'i chos nyid nga dang bdag tu med
rig pa nyid la dus gsum g.yo ba med
rig pa'i cho 'phrul sna tshogs cir yang ston
264
rig pa'i ngo bo gcig la 'gyur ba med
rig pa'i rang bzhin tha snyad gcig tu sdud
rig pa'i dngos po sku dang 'od du shar
rig pa'i sgron ma yul dang lhan cig gnas
rtog pa med na chos nyid don dang phrad
chos kyi sku la 'khrul rtog ga la yod
longs spyod sku la ngar 'dzin ngang gis med
sprul pa'i sku la zhe 'dod med par bstan
rig pa'i sku la gsal 'grib yongs kyis med
sems kyi sku ni sna tshogs cir yang 'dzin
yid kyi sku ni sna tshogs gcod par byed
ma rig sku ni thams cad sdud par byed
de dag de phyir 'khrul pa'i sku yin no
rig pa'i sku ni 'di lta ste
yang dag sku la snang srid chos rnams gsal
rdo rje'i sku ni ma skyes gdod nas rdzogs
stong pa'i sku la ngos bzung ga la yod
'od gsal sku la mtshan ma'i rnam rtog med
ye shes sku la gsal dang mi gsal med
rang snang sku la nyon mongs bsam pa med
chos nyid sku la yin min rtsis dang bral
rig pa'i sku la bdag rtog yid dang bral
dbyings kyi sku la rgya chad phyogs dang bral
sangs rgyas sku ni ma bsgribs de bzhin gnas
265
sems can kun gyi nor bu rin chen yin
stong pa'i lam la rang byung ye shes gsal
sngags pas sangs rgyas ye shes spyan du 'dod
phyogs su snang ba'i yul ni rab tu spangs
phyogs su ma lhung nyi zla'i dkyil 'khor bzhin
ye shes snang ba nyams su blang thabs ni
dus gsum gshegs pas 'di ltar rab tu bsngags
grogs med gcig pur 'dug na snang ba grogs su 'char
bltar med sku la bltas na rang gi snang ba mthong
rkang med mkha' la bskyod pas snang srid dbang du sdud
rig pa rkyen dang 'phrad pas rang gi bde ba rnyed
rig pa mkha' la gsal bas rang rig dbyings su tshud
'dzin pa'i chos dang bral na rang snang rtogs pa'i mchog
sangs rgyas thugs la de bzhin gnas pa'o
e ma ho rigs bzhi'i sangs rgyas nyon
gsang sngags kun gyi thabs kyi yan lag ni
gzung 'dzin rnam rtog ngang gis bral bar gsungs
'dzin chags med pa'i rang snang nam mkha' la
zhe 'dod med pa'i sgron ma rnam gnyis gsal
spang thob med pa'i chos sku'i snang ba mthong
266
phyogs dang bral ba'i 'od kyi mu khyud zin
bdag dang bral ba'i sgyu ma'i sku lnga snang
yul dang bral ba'i chos nyid du mar snang
stong rig gsal ba'i sku la 'gyur ba med
'byung ba'i rkyen gyis ma gos rang gsal bde ba'i sku
rtog pa'i phyogs su ma ltung sangs rgyas dgongs pa nyid
chos nyid shes rab khong nas skyes pa yis
yul sems bral ba'i dgongs pa rang snang ngo
mtshan ma'i yul la 'dzin pa'i rtog pa bcom
ma rig klong nas ye shes snang ba sangs
ka dag dbyings su chos sku chen po rnyed
snang ba'i yul dang rtog pa'i chos las grol
sangs rgyas pa dang rang gi rig pa mnyam
bstan du yod cing rang snang mthong ba'i phyir
nyon mongs dri ma ye shes snang bar 'gyur
chos dang chos min gsang sngags las byung ba
rang rig rang gi 'od la rtag tu bzhugs
mtha' sdud don gcod dbyings kyi rang bzhin yin
gcig dang du ma'i sgra dang tha snyad bral
bzang dang ngan pa'i yul med rang gi bde ba che
chos spyod byis pa'i spyod pas bslus gyur na
dgongs pa rnyed par sangs rgyas nyid kyis ma bshad do
267
chos kyis sangs rgyas nyid kyi snang ba bsgribs
nga yi chos ni brjod pa'i mtha' dang bral
nga yi dkyil 'khor chen po ni
sku yi 'od dang gsung gi zer
thugs kyi dgongs par gnas pa'o
nga la 'od zer yang yod de
sems kyi 'dzin chags spangs pa'i phyir
snang ba zhen med sgron mar gsal
rtog med rang snang bstan pa'i phyir
bde gshegs sku yi 'od ltar snang
stong pa nyid las log pa'i phyir
mdzes pa'i 'od zer rnam lnga gsal
thig le nyag gcig snang ba la
bri ba med cing gang ba med
chos kyi sku yi rang yul dang
sems can snang ba'i rang yul gnyis
stong rig gsal ba'i dngos por snang
sangs rgyas kun gyi lta phugs ni
dbyings rig gnyis las ma 'das pa'o
dbyings dang rig pa'i cho 'phrul las
ye shes rtog med phyogs dang bral
rang snang dngos med dkyil dang 'khor
phra rags yul gyis ma bsgribs so
bsam pa'i ngang las ma 'das na
'khor ba sdug bsngal chen por bshad
dbyings rig shes pa'i rnal 'byor pas
268
gsang sngags dgongs pa tshad mar blta
shes bya yul gyi snang ba la
chos nyid nang gi ting 'dzin gsal
gsal ba'i ye shes phyogs med la
mthar lhung med pa'i lta ba gsal
sgra dang tha snyad ming btags rnams
chos kyi dbyings kyi rgyan du gsungs
rang snang thabs kyi rgyal po la
stobs kyi rig pa ma 'gags pas
rang gi shes rab nyid la dris
dmigs pa med pa'i ting 'dzin ni
bya btsal bral ba'i ngang du dris
yul gsal thog ma med pa'i sems
rnam par dag pa'i dbyings la dris
de ni dgongs pa'i don du bstan
kun gzhi sems kyi rtsa ba dang
rang rig yul gyi rtsa ba gnyis
'dra gzhi gcig la gol sa che
ma rig sems su snang ba dang
rig pa rtog med snang ba gnyis
'dra gzhi gcig la gol sa che
rdo rje sems dpa'i chos nyid dang
rang snang dkyil 'khor dag pa gnyis
'dra gzhi gcig la gol sa che
rang byung ye shes tshig gi mtha' dang bral
stong pa'i ye shes yul gyi rkyen dang bral
mngon sum ye shes tshig gi mtha' dang bral
sangs rgyas kun gyi chos nyid yangs pa 'di
269
kun gyis mthong ba ma yin rang gi thugs la 'char
e ma ho a li ka li'i don brjod pas
sangs rgyas thams cad mnyes par 'gyur
dgongs pa rang gnas don brjod pas
sems can thams cad tshim par 'gyur
'dzin chags med pa'i don brjod pas
ye shes thams cad gsal bar 'gyur
kye ma dngos bral bde ba ni
yul sems bral ba'i nam mkha' la
skye 'gag med pa'i rdo rje gsal
a ho chos nyid rdo rje ni
bag rdul dengs pa'i mkha' la gsal
rdo rje'i rig pa de bzhin no
zhes bka' stsal to
zhes seng ge rtsal rdzogs chen po'i rgyud las
seng ge rang snang gi lta ba bstan pa'i le'u ste gnyis pa'o
@3
de nas bcom ldan 'das dpal kun tu bzang po nyid
chos nyid rang skad kyi ting nge 'dzin la snyoms par zhugs so
de nas yang kun rig chos rje la sogs pa'i 'khor rnams kyis 'di skad ces gsol to
e ma rang snang rig pa'i don
bdag cag rnams la bstan du gsol
ting nge 'dzin las rab tu bzhengs
de nas rang rig kun bzang des
270
ting nge 'dzin las bzhengs nas ni
cho 'phrul chen po'i ting 'dzin bstan
de nas kun rig chos kyi rjes
legs pa'i tshig gis zhu ba zhus
kun bzang rig pas bka' stsal pa
e ma rigs lnga'i sangs rgyas nyon
nga ni rang rig kun tu bzang
kun bzang seng ge'i blta ba ni
nga nyid gcan gzan seng ge bzhin
'jigs pa kun dang bral ba ste
rang gi gdangs la rnal du 'dug
mi 'gyur seng ge kun bzang ngas
rig pa 'gyur med seng ge la
lta ba rtog med seng ge bstan
rang byung rtog med seng ge ngas
sku lnga rang rdzogs seng ge la
'od snang seng ge dag pa bstan
rang rig kun tu bzang po ngas
rtsal rdzogs gcan gzan seng ge bzhin
dogs med stobs bdag seng ge ngas
cho 'phrul phyi yi seng ge rtsal
snang ba nang gi seng ge la
'byung ba 'od snang seng ge'i tshul
rig pa yab kyi seng ge ngas
kun rig rtsa ba'i seng ge bstan
rang snang kun tu bzang po ngas
chags med yul grol seng ge bstan
chos nyid rang gdangs seng ge yis
'khrul pa yul gyi rtsa ba bcad
271
chags med btang snyoms seng ge ngas
zhen chags lam gyi rtsa ba bcad
rtag sangs rig pa'i seng ge ngas
sna tshogs mtshan ma'i rtsa ba bcad
'gyur med kun snang seng ge ngas
yang dag chos sku'i ngo bo mthong
rtsal chen yul 'joms seng ge ngas
bag chags 'khrul pa'i rtsa ba bcad
nga ni rang rig seng ge la
mtshan ma'i chos kyi zhe 'dod med
rang snang 'od kyi seng ge la
dri ma'i mtha' gnyis rnam par dag
stong pa'i ye shes seng ge ngas
slad par byed pa'i ma rig sangs
sku gsum dri med seng ge ngas
rang rig snang ba'i sku gsum mthong
zin pa med pa'i seng ge ngas
byas pa med pa'i ngang du bzhag
'khrul pa med pa'i seng ge ngas
blo yi the tshom bcad pa'o
rang snang chos kyi seng ge ngas
rtogs pa'i rang mdud sangs pa yin
rang bzhin mngon snang seng ge ngas
gzhan 'byung 'khrul pa'i rtsa ba spangs
skyed par byed pa'i seng ge ngas
rang byung rdzogs pa'i sangs rgyas rnyed
phra rags bral ba'i seng ge ngas
rtog pa kun gyi rtsa ba bcad
e ma seng ge bgrod med lam
272
bya btsal med pa'i seng ge yis
btang bzhag med pa'i gangs dkar la
mun pa sangs pa'i rtsal gsum rdzogs
bsam med dangs pa'i seng ge ngas
ka dag dri med gangs bzang la
'byung ba sangs pa'i rtsa gsum rdzogs
dkyil 'khor don gyi seng ge ngas
bag chags zad pa'i gangs bzang la
phyin pa med pa'i rtsal gsum rdzogs
rang snang rtogs pa'i seng ge ngas
yid ma 'gyus pa'i gangs dkar la
rnam dag spyan gyi rtsal gsum rdzogs
dgongs pa rang gnas seng ge ngas
bya byed bral ba'i gangs bzang la
yul drug spyod pa'i rtsal gsum rdzogs
dngos bral chos nyid seng ge ngas
phra rags bral ba'i gangs dkar la
rang snang dag pa'i rtsal gsum rdzogs
rtsal la yang dag don chen rdzogs
'dzin med rang snang de bzhin no
kye ma rigs lnga'i dkyil 'khor nyon
rnam dag brjod med ye shes seng ge'i klong
bskyed pa mi mnga' sangs rgyas ye shes sku
rdzogs pa mi mnga' ye shes don la 'jug
kun bzang seng ge'i chos nyid nam mkha' la
273
rang gnas bsam bral rnam rtog ming dang bral
'dzin pa med par cig char yul la 'jug
yang dag mtshan 'dzin so so'i dkyil 'khor che
che ba'i che bas sangs rgyas sku dang phrad
chung ba'i chung bas rang rig spyan gyis mtshon
phra ba'i phra bas rig pa'i rang mdangs bsgribs
sgron ma'i sgron mas rang gi chos nyid mthong
dag pa'i dag pas rang snang rtsa ba mthong
rnams par yangs pa'i dkyil 'khor rang nyid yin
sangs rgyas chos ni the tshom yul las 'das
chos kyi sku ni snang ba'i yul du med
longs sku mtshan ma dmigs pa'i yul med pa'o
sprul pa'i sku ni nga dang bdag tu med
rdo rje rdo rje sems dpa' che
'das pa'i rdo rje rab bsngags pa
las kyi rdo rje byed 'gyur ba
phrin las rdo rje bstan pa che
rang gi rang bzhin rnam rtog grol
ye nas chub pas kun la gnas
rgya chad med pa'i chos sku rang byung ngas
rtog pa med pa'i chos nyid rang snang la
bcos bslad med pa'i rig pa ting 'dzin gsal
'dzin chags med pa'i rig pa yul la 'jug
274
bden pa mthong ba'i kun bzang seng ge ngas
bag rdul dengs pa'i chos nyid nam mkha' la
spro bsdu med pa'i dbyings kyi sgron ma ru
chags sdang med pa'i lu gu rgyud kyi sku
bcos pa med pa'i mig gis blta bar bya
gza' gtad med pa'i ting 'dzin gsal ba de
rkyen dang bral ba'i chos nyid mkha' la rol
dgag bsgrub med pa'i rang snang chig chod rtogs
sangs rgyas dgongs pa kun gyi rtse mor gsungs
'gro nyal 'dug bsgom ma yengs ngang la spyod
gtang gzhag bya byed bral ba'i nam mkha' la
'dzin rtog yul las 'das pa'i rig pa gsal
gzung 'dzin rnam rtog 'khor ba'i gting rum nas
byas pa med pa'i rang snang mkha' la gsal
bslad pa med pa'i chos nyid yul las 'das
byas pa med pa'i byung sa gcig tu grol
mthong snang ma 'gags ting 'dzin rang la gsal
btang snyoms ma 'dres chos sku de bzhin gshegs
bgrod med rang gsal chos kyi snying po yin
rtog 'dzin med pas chos nyid yul dang 'phrad
snang ba mtha' yas rgyal ba'i zhing dus grol
275
rnam rtog sangs pas chos nyid yul dang mjal
e ma ho a li ka li'i yi ge las
sha la sogs pa'i yi ge 'byung
de bzhin ha dang ma yi don
kun nas kun tu shes par bya
gsang sngags tshig don yi ge las
rig pa'i rang lus mthong bar 'gyur
chos dbyings rgyan dang bcas par ni
yi ge'i yan lag rgyan spros pa
rang snang bsam bral chen po'o
rang byung nyid kyi yi ge ni
yan lag so sor spros pa bzhin
bden pa rnam dag mthong ba'o
chos nyid yul du snang ba la
rnam rtog rlung gis ma gtor cig
rang snang grogs su bsten pa la
gzhan 'byung snang ba ltos 'gyur min
stong dang mi stong dbu ma'i lam
dngos po yod med gnyis dang bral
rig med stong pa ma yin te
rang rig sku lnga'i 'od dang bcas
'gyur med lam snang 'dren pa'i rtags
sems can kun gyi snying la gnas
gsang ba bas kyang ches gsang ba
gab pa mngon du bstan pa yin
dgongs don chen pos yin par gsungs
thabs la ma chags shes rab gdos thag chad
rgyu la mi gnas 'bras bu rang snang ngo
276
rtog pa med pa'i cha lugs mngon par snang
bri ba ma yin gang ba ga la yod
shes bya'i yul las 'das shing don byed pa'o
de nas 'dus pa'i tshogs rnams kyis
kun bzang yab la don zhus pa
kye kye kun bzang seng ge'i bdag
yang dag sangs rgyas dgongs pa nyid
'dus pa'i tshigs la bstan du gsol
de nas rgyal ba seng ge'i skus
'dus pa'i tshogs la bka' stsal pa
e ma rigs lnga rgyal ba'i sras
ye shes klong gi gtan tshigs nyon
sangs rgyas ye shes rgya mtsho'i klong
'gyur med ye shes ngur sa ni
rang rig snying la rdzogs pa'i don
nga yis legs par bstan par bya
kye ma 'dus pa'i 'khor tshogs rnams
chos nyid sku yi snang ba blta 'dod na
ye nas dag pa'i man shes sku la ltos
'od gsal bde ba'i sku la 'jug 'dod na
gzung 'dzin dag pa'i sgron ma rnam gnyis ltos
chos sku rang snang phyogs med blta 'dod na
phra rags bral ba'i nam mkha'i dbyings su ltos
rtog mtha' bral ba'i chos nyid blta 'dod na
g.ya' dag me long dkyil 'khor dangs pa ltos
277
lhun gyis rdzogs pa'i zhing la blta 'dod na
skyed par byed pa'i sa bon 'bru la ltos
chos nyid ngo bo ka dag blta 'dod na
rkyen dang phrad pa'i chu zla'i dkyil 'khor ltos
'byung sdud bral ba'i kun bzang seng ge ngas
chos sku mtshon par byed pa'i tsheg dang yi ge bshad
tshig dang yi ges chos sku ston mi nus
tshig la zhen na rnal 'byor rtog pa'i lam
tshig gis blo yi the tshom rab bsal nas
tshig la mi gnas rang gi don la bskyal
'dzin chags med pa'i chos nyid dngos bral 'di
sangs rgyas rnams kyi dgongs pa mthar thug yin
so sor rtogs dang mtshan ma tshig gi lam
bya btsal med pa'i chos nyid rang sar dag
'ub chub chos nyid rang bzhin yul la 'jug
dag dang ma dag chos nyid bcos su med
gcig dang gnyis las 'das pa'i ye gnas don
rang gi ngang du thig le gcig gis 'ub
dus med rtogs pas ting 'dzin ma yengs gsal
mtha' dbus med pas chos nyid ming dang bral
'gyur ba ma yin drang por yongs la khyab
byas pa ma yin byung bar lhun gyis grub
278
'dzin pa'i yul du med pa'i snang ba la
kun rtog ma yin lhun grub rnam par 'phro
yul du med pas rang nyid sa las 'das
'jug pa'i sa dang lam la bcos su med
chos nyid rang snang rang rtags seng ge la
byung rtog med pa'i chos sku mkha' la khyab
chags 'dzin med pas rnam rtog ga la yod
lhun grub chos nyid rgya ma chad pa yin
bzung ba'i yul dang rang rtog rnam par dag
kye ma yang dag bde ba'i sku la snang ba rdzogs
e ma chos sku gcig la don brjod pas
rang gi sgyu ma'i sku gnyis rnam par snang
bskyed pa ma yin rang byung rdzogs
'gro dang 'od med gcig pu nyid
bya btsal gzung 'dzin med pa'i sku
stong pa yul med nam mkha' la
rang rig gsal dangs ngo bor brtag
yi dam 'gyus pa'i chos nyid la
ye shes mdzes pa'i 'od zer 'phro
snang ba med pa'i chos nyid ni
spyod pa'i mtha' gnyis rnam par gsal
rang byung rig pa'i ngo bo la
mtshan ma'i yul gyis gos pa med
rnam dag dri med skyon bral la
chags pa med pa'i kun tu bzang
gsal cha ma 'gags 'dzin pa med
279
a ti stong dang mi stong pa
dbus mtha' rnam par mi 'byed do
goms pa'i stabs kyis nyams blangs na
rang gi de nyid kun tu gsal
dper na nor bu rin chen bzhin
yon tan zad med gter la spyod
thog ma med pa'i dus dag nas
da ltar ye shes snang ba rnams
gcig las med par nga yis bstan
yin min gnyis kyi sgro 'dogs chod
rig pas pha rol don mi rnyed
rang gi don la rig pa med
nga dang bdag tu bzung ba med
yul dang dbang por phye ba med
gol sgrib ltung ba'i rgyu can med
rang snang nyid la bcos su med
'byung ba lnga nyid sangs rgyas yin
ye shes lnga nyid dbyings la rol
thams cad 'byung ba'i chos sku las
klong yangs yul med ngang du thim
bcas bcos med na spyod pa yin
rang snang mthor na lta ba yin
de las ma yengs bsgom par bshad
gtang gzhag med na ting 'dzin thob
phyogs lhung med na rang sa zin
ma byas rang byung ye nas grub
dang po'i gnas sa gang yin par
tha ma de yi gnas su 'gro
280
de lta de yi don la gnas
bar du ye shes sgyu rtsal 'byongs
'byongs nas ye shes dbyings su thim
thim nas 'od zer phyogs med 'phro
rang snang don gyi dkyil 'khor du
rig pa'i chos nyid ma 'dres rdzogs
rdzogs chen lta ba rang gnas nyid
bag rdul dangs pa'i nam mkha' la
ma yengs tshul gyis gsal ba'o
g.yengs bral chos nyid 'gyur ba med
bsam gtan bsgoms pas chos nyid don mi mthong
rang snang ting 'dzin bsam pa'i phyogs dang bral
spros bral chos nyid nam mkha'i mtha' dang mtshungs
'dzin bral rang snang chu bo'i klong dang mtshungs
dmigs pa dag pa'i yul la 'dzin rtog med
mtha' bzhi bral ba'i sangs rgyas rang rig yin
yod med mtha' las 'das pa chos kyi sku
yin min rtsis dang bral ba'i sangs rgyas nyag gcig dang
spyad spyod gnyis 'dzin med pa'i chos sku rtog med dang
'dzin rtog chos las 'das pa'i rang rig bde ba'i shugs
e ma ho rang byung 'od gsal stong nyid ye shes sku
mi 'gyur seng ge'i don nyid bstan bya'i phyir
281
kun tu bzang po'i zhal ni phyogs bcur gsal
kun gzigs kun tu bzang po'i sku la mdun rgyab med
phyogs bcu gang bar spyan gyis rnam par gzigs
rtog mtha' med par yul la ma yengs spyod
'dzin chags med par rang snang yul la 'jug
mtha' dbus med par rang gi ngang du 'ub
gdos thag med par sgron ma'i ngang du chub
spang thob med par nam mkha'i dbyings su brdal
zhe 'dod med par rang snang yul la khyab
rtog med chos sku bsam pa dngos dang bral
bcos med rang gsal rang rig ting 'dzin gsal
'dzin rtog med pa'i ngang du thams cad 'ub
mun pha sangs pa'i dus na rnam par rol
yul med cig char 'dug pa'i mtha' la bskyod
'khor ba'i yul la mi gnas rang gi sa la phyin
nye ring med pa'i dgongs pa chig chod yin
nga ni stong pa'i tshig dang bral
nga la mun pa'i chos med pas
nga ni rang snang 'od po che
nga la snang ba'i rkyen med pas
nga ni rtags kyi sku lngar gsal
nga la byas pa'i chos med pas
nga ni ye nas skye dang bral
nga la 'byung ba'i skyon med pas
282
nga ni sna tshogs rkyen dang bral
nga la rtog pa'i mtha' med pas
nga ni yin min chos dang bral
nga la mtshon pa'i tshig med pas
nga ni chad pa'i phyogs dang bral
nga la dngos po'i yul med pas
nga ni rtag pa'i yul dang bral
nga la 'dzin rtog med pa yis
nga ni rtag chad mu las 'das
nga la dran byed med pa yis
'khor ba'i sdug bsngal chos las thar
nga la gnyis snang med pa yis
nga ni dge sdig gnyis dang bral
nga la phyogs lhung med pa yis
nga ni 'khrul pa'i sems dang bral
nga la byas pa'i chos med pas
nga ni 'byung bar lhun gyis grub
'dzin rtog med pa'i nam mkha' la
rnam shes yid ma 'gyus pa ni
yengs pa med pa'i ting 'dzin mchog
sangs rgyas nyag gcig gnas lugs ni
dmigs pa can du med pa la
don ni rang bzhin nyid kyi sku
'dzin pa sangs pa'i nam mkha' la
thun mtshams med pa'i ting 'dzin gsal
'gyur med chos la sgro btags med
nga dang bdag tu med pas na
chos nyid ma dang 'phrad pa yin
'byu ba'i mdud pa grol na 'dzin pa'i rtod phur thon
283
bag chags sbubs dang bral na ye shes dbyings su 'khyil
ye shes rang snang mthong na 'byung ba'i gdos thag chod
snang ba'i sgrib shing med na ye shes mkha' la gsal
sangs rgyas nyid la sangs rgyas nyid kyis bsgrib
spyan gsum gsal ba'i ye shes rang sar dangs
'byung ba med pa'i chos nyid kun tu bzang
kun tu bzang mos gsang sngags las la sbyor
'od gsal zung 'jug dbyings su thams cad 'dus
'byung ba lnga yi pho brang dkyil 'khor nas
chos kyi sku yi snang ba rang lus rdzogs
stong nyid ye shes klong nas sangs rgyas lnga
bskyed pa ma yin rang gi snying po nyid
dgongs pa ma yin don la 'gyur ba med pa ni
chos dang chos min snang ba'i sgrib shing bral
don gyi snying po sangs rgyas yul la 'jug
bsam pa nyid las bsam pa'i tshig dang bral
brjod pa nyid las brjod med ngang du thim
bag chags nyid las ye shes sku lnga gsal
rnam rtog nyid las rig pa'i ye shes skye
ma rig nyid las sangs rgyas dgongs pa shar
284
sangs rgyas chos ni ci yang ma yin pas
spyod pa'i tshe na ci yang mi spyod do
bsgom pa'i dus na gang yang mi bsgom mo
blta ba'i tshe na ci yang mi blta'o
e ma rig pa'i ye shes sku
dir ma gsum gyi chos dang bral
rtog mtha' med pa rang sar grol
nyon mongs lnga las ye shes lnga
yul lnga las ni 'od lnga'i sku
phung po lnga las sangs rgyas lnga
'byung ba lnga las yum lngar rtogs
srid pa gsum nyid sangs rgyas zhing
gnyis med lta ba'i rang lugs yin
bya btsal bral nas dbyings la spyod
'dzin chags med par rang snang ba'o
zhes seng ge rtsal rdzogs chen po'i rgyud las
seng ges rang skad smras pa ji le'u ste gsum pa'o
@4
de nas rig pa kun tu bzang po dang
yum kun tu bzang mo gnyis su med par snyoms par zhugs so
de nas rigs kyi sangs rgyas kun rig chos kyi rjes 'di skad ces zhu ba zhus so
e ma bde gshegs kun bzang yab
chos nyid gnyis med don brjod pa'i
thabs dang shes rab gsung du gsol
de nas chos nyid stong pa yis
yab yum gnyis med don sbyar nas
285
sangs rgyas rnams la bka' stsal pa
kye ma rigs kyi sangs rgyas nyon
yul sems gnyis med dgongs pa'am
dbyings dang rig pa gnyis med ni
yab yum gnyis med tshul du gnas
chos nyid yangs pa'i pho brang du
rtog med gsal ba'i ye shes 'du
phyi yi chos ni snang ba la
nang gi chos ni 'dzin par bshad
'gyur med kun tu bzang po ngas
chos nyid rang snang lta ba bshad
bshad pas rtog pa'i the tshom tshod
bag chags bral ba'i kun gzhi la
gzung 'dzin bral ba'i rig pa gsal
gsang sngags rig pa cog gzhag ni
lta sgom spyod pa'i mdor bsdus yin
phyi nang gsal ba'i shes rab la
yid kyi rtog pa ma 'gyus na
gsang sngags gsang ba'i blta bar 'dod
bcom ldan seng ge chos sku la
gzung 'dzin bral ba'i ting 'dzin gnas
mtshan ma med pa'i lta ba la
btang snyoms chen po'i shes rab gsal
yid gnyis bral ba'i nam mkha' la
gsal 'grib med pa'i sgron ma gsal
rang snang rgya ma chad pa la
ye nas lhun gyis rdzogs par gsal
286
chos dbyings dog med yangs pa la
bag chags zad pa'i thig le gsal
mtha' yas don la 'gyur med la
rang snang dag pa'i gzugs snang gsal
stong pa rtog med rang byung la
byas pa med pa'i 'od lnga gsal
stong gsum ye rgyas thebs pa la
'phral 'byung rkyen gyis nga mi sgrib
chos dbyings ye nas yangs pa la
gcong rong dog mos nga mi bsgrib
rang byung ye nas gsal ba la
'khor ba'i mun pas nga mi bsgrib
rig pa ye nas 'chi med la
skye dang 'chi bas nga mi bsgrib
sku gsum ye nas gnas pa la
chags sdang lnga yis nga mi bsgrib
thabs dang shes rab ye gnas pas
sbyor sgrol gnyis kyis nga mi bsgrib
bdud rtsi ye nas nad sel bas
dug lnga'i rtsa bas nga mi bsgrib
rig pa ye nas phyogs med pas
gol sgrib gnyis kyis nga mi bsgrib
chos sku ye nas bdag med pas
bdag gzhan gnyis kyis nga mi bsgrib
snang ba ye nas rang gsal bas
'byung ba lnga yis nga mi bsgrib
longs sku ye nas rang rdzogs la
bskyed rdzogs gnyis kyis nga mi bsgrib
gsal ba ye nas dngos bral la
287
mtshan ma'i chos kyis nga mi bsgrib
rang rig ye nas 'gyur med pas
dge sdig gnyis kyis nga mi bsgrib
rang bzhin rgyu rkyen med pa la
'dus byas chos spyod bya mi dgos
chos sku bde sdug bral ba la
dmyal ba tsha grang nga mi bsgrib
gsang sngags ye nas tshig bral la
tshig dang yi ges nga mi mthong
chos dbyings ye nas bsgom med la
bsgom pa byas pas nga mi rnyed
rang byung ye nas bcos med la
spyod pa byas pas nga mi rnyed
chos sku ye nas blta bral la
blta ba bltas pas nga mi mthong
skye med don la 'da' med la
dam tshig bsrungs pas sangs mi rgya
dkyil 'khor ye nas rang gnas la
dkyil 'khor bris pas lha mi mthong
phyag rgya ma bsgyur ye rdzogs la
rtsol ba'i phyag rgyas dngos grub yal
snying po ye nas rang gnas la
snying po bzlas pas sa bon rul
gzhal yas ye nas rang rdzogs la
gzhal yas bskyed pas rang snang stong
thugs rje'i 'od zer rang shar la
cha lugs bsgoms pas rang don yal
288
lha tshogs ye nas rang gnas pas
ma bskyed lhun gyis rdzogs pa la
bskyed rim spyan 'dren bya mi dgos
rtsol ba'i mchod 'bul lha tshogs gyes
chos sku 'dzin med zang thal la
mtshan ma bsgoms pas don mi rnyed
nga yi nor bu rin chen la
yon tan yod med mtha' las 'das
sangs rgyas nyag gcig ye yod la
ka dag snang ba nga mi tshol
tshom bu sna lnga ye rdzogs la
bar do rnam gsum ngas mi 'dod
ye shes ye nas rang gsal la
bzhi sbyor snang ba ngas mi mthong
sna tshogs rang las ye byung la
lhun grub gzhi yis nga mi rnyed
rig pa 'khor ba'i sems med pas
sprul sku phyed snang ngas mi 'dod
nga nyid rig pa rang byung la
byas pa'i chos kyis nga mi rnyed
nga yi bsam gtan 'gyur med la
'dzin rtog bsgom pa bya rgyu med
nga la rang snang ngas mi 'dod
phyi yi snang ba gang la 'byung
rang byung ye nas dag pa la
dri ma rnam bzhi su yis 'chos
nga ni stong gsal gnyis med la
rtag chad gnyis po ga la yod
nga la rnam rtog yul med pas
'byung ba'i rang mdud sangs pa'o
289
nga yi snang ba ma 'gags pas
yin min mthar lhung phyogs dang gral
nga la chags sdang lnga med pas
snang ba'i yul la zhe 'dod med
nga la dgag bsgrub med pa yis
nga yi blta ba gnyis 'dzin med
dri ma rab tu sangs pa'o
de nas kun tu bzang mo yis
rig pa snang ba'i yul dag nas
rang gi snang bas 'di skad smras
kye ma rigs kyi sangs rgyas nyon
rang snang kun tu bzang mo ngas
btang snyoms chen po'i ye shes la
gsang sngags lam gyi 'bras bu gsal
'gyur med kun tu bzang mo ngas
snang ba rang gsal chos skur bstan
brjod med kun tu bzang mo ngas
rtog mtha' bral ba'i rig pa bstan
kun ldan ye shes snying po la
byas pa dang ni byed pa med
mngon snang yul du med pa la
gsal 'grib snang ba ga la yod
rig pa gcig la 'khor 'das rdzogs
'dzin med rang snang chos dang bral
bsam med chos nyid dngos por med
sangs rgyas ye nas rang gdangs la
'byung ba bzhi yi rkyen dang bral
290
'das pa'i sku dang ye shes la
kun tu bzang mo nga yi sems
chos sku rang bzhin ma 'gags pas
bsam gtan nyid la bsam du med
rang gis rang mthong rang lus gsal
kun tu bzang mo'i bha ga'i klong yangs su
gzung ba med par 'byung ba rnam lnga 'ub
'dzin chags med pa'i shes rab yul la snang
kun tu bzang mo ma bcos rang gsal ngas
sna tshogs 'gag med kun tu bzang mo'i dbyings
chos nyid rang snang kun tu bzang mo ste
'gyur med ma bcos mkha' gsal nam mkha' la
byas pa med pa'i kun tu bzang mo gsal
byung ba med pa'i rig pa rang sar grol
kun tu bzang mo chos nyid bha ga'i klong
kun tu bzang mo bla med zhing du grol
sangs rgyas ye shes kun bzang dkyil 'khor nas
re dogs bral ba'i chos nyid mkha' la rol
'dzin rtog bral ba'i kun tu bzang mo ngas
rang snang bcos pa med pa'i nam mkha' la
spro bsdu med pa'i ting 'dzin cig char gsal
rdo rje kun tu bzang mos yang dag rtogs
sangs rgyas sems can thams cad la
291
kun tu bzang mo rin chen phreng
'gyur med rang gi ngo la gnas
sangs rgyas kun tu bzang mo yis
dbyings kyi nang nas sku btsal pas
sku ni rtog mtha' rnam par bral
sku dang sku yi gdangs la thugs
sangs rgyas rnams kyi dgongs pa ni
'gyur med kun tu bzang mo yis
thugs kyi dkyil nas bzung phyung bas
chos nyid kun tu bzang mo yul la snang
rnam dag kun tu bzang mo yul la spyod
ye shes kun tu bzang mo'i mkha' la spyod
rig pa kun tu bzang mo'i dbyings la 'jug
rtag chad med pa'i yab yum snang ba dag
rang snang kun tu bzang mo rgya ma chad
rtogs pa kun tu bzang mos gcig tu sdud
'byung ba kun tu bzang mo bdag tu snang
shes rab kun tu bzang mos rang snang ston
mkha' dbyings kun tu bzang mo mi g.yo zhing
mnyam nyid kun tu bzang mo rtog pa med
'dus pa kun tu bzang mo gcig tu 'khyil
sems dpa' kun tu bzang mos don la 'jog
shes rab kun tu bzang mos sna tshogs sdud
thabs mchog kun tu bzang mo rig par snang
292
gsal 'tsher kun tu bzang mo 'dzin pa med
bcom ldan kun tu bzang mo cig char 'char
'dzin med kun tu bzang mo rang sar 'dug
thig le kun tu bzang mo ngo bos stong
chos 'byung kun tu bzang mo byed pa med
rtog med kun tu bzang mo yengs pa med
kun rdzob kun tu bzang mo sa bon dngos
don dam kun tu bzang mo cho 'phrul cir yang ston
rgyan mdzes kun tu bzang mo yul la snang
dbyings rig kun tu bzang mo chos sku dngos
rang bzhin kun tu bzang mo 'gag pa med
ngo bo kun tu bzang mo 'gyur ba med
thugs rje kun tu bzang mo cir yang snang
ston pa kun tu bzang mos nyon mongs 'dul
stong pa kun tu bzang mo tha snyad bral
gsal ba kun tu bzang mo ngos gzung bral
yab yum gnyis ka kun bzang rig pa'i klong
mun pa snang bar ston pa'i kun bzang mos
bya byed sems kyi gdos thag rbad kyis bcad
'dzin pa'i yul la mi gnas rang snang lhug par 'char
zhe 'dod med par snang ba thad kar gcod
kun tu bzang mo sgron ma rang yin pas
rang snang kun tu bzang mo btsal mi dgos
293
lta spyod gnyis med kun bzang yab yum la
'bras bu bde ldan thig le phyogs bcur 'phro
spyod pas yul med gsal la 'dzin rtog med
phyir 'byung ma yin nang 'byung lhun gyis grub
gnyis ka ma yin so so'i don la spyod
byas pa ma yin byung bar lhun gyis grub
kun bzang yab ni ye shes cir yang ston
kun bzang yum ni thams cad ngang du sdud
mtshan ma'i ming med kun bzang sems nyid sku
'dzin pa'i sems med rang snang thabs kyis spyod
skye med rtogs las rang gi yul la snang
chos sku rtog med kun tu bzang mo ngas
rig gsal chos nyid yul la bar bltas pas
sna tshogs bral ba'i rig pa nang du mthong
rang rig du ma'i yul la phar bltas pas
chos sku rtog med chen po nang du rnyed
sangs rgyas ye shes rgya chad ye nas med
longs sku'i ye shes rgyan la rnam par rol
bya dang byed pa med par lhun grub yin
rtog pa rang snang chos nyid kun gyi rje
bslad pas mi bslad chos nyid nam mkha' 'dra
bkrus pas mi dag shel sgong dag pa 'dra
chos sku rtog med rang sangs bsgom pa yin
294
dmigs pa'i yul med rang gi don rtogs na
'du 'bral med pa'i bsam gtan chen po yin
de ni rang snang 'bras bu chen por bstan pa'o
de nas kun bzang yab yum la
kun rig nyid kyis don zhus pa
kye ma bcom ldan kun tu bzang
bdag cag ma rig 'khor rnams la
rang rig thabs chen bstan du gsol
de nas kun bzang seng ge des
yum gyi sgo nas bka' stsal pa
e ma rigs kyi sangs rgyas nyon
kun tu bzang mo rtog med bha ga la
rgyal ba'i dkyil 'khor rab 'byams ma lus 'du
sangs rgyas dkyil 'khor chen po rnam par bkod
dogs pa med pa'i kun bzang chos kyi dbyings
ston pa kun bzang chos dbyings seng ges bstan
snang ba med pa'i phyogs su song nas ni
rang byung gsal ba'i mar me rnam lnga bteg
'dzin pa mi 'dzin rang gi mtshan dang ldan
yul med gsal gdangs mtho dman yongs la khyab
bya byed gtang gzhag med pa'i bdud rtsi mchog
ngang byung sman gyis 'khor ba'i nad rnams sel
ye shes rlung gis 'dzin pa'i rnam rtog 'thor
295
gsal dag chu yis rig pa rtog med 'dzin
rnam dpyod shes rab me yis ma rig spar sbur bsreg
chos nyid stong pa'i nam mkha' rang rig dbyings su 'byed
rdo rje skyod byed sa yis rtogs pa'i don la bskyal
chos nyid dngos bral 'byung ba rnam lnga yis
ye shes gsal ba'i sgron me byed par 'gyur
sku gsum 'gyur med ye shes seng ge la
bya btsal bral ba'i gcan gzan 'khor gyis bskor
'dzin rtog med pa'i rang byung bde chen ston
sangs rgyas bden pa mthong ba'i rgyal ba'i sras
rtogs pa khong du chud na nams kyang bde
'byung ba grogs su shar na snang ba dag
yin min gnyis shes rtog pa'i mtha' bzhi grol
dpyod byed yid ma 'gyus nas sangs rgyas ngo bo rnyed
phyogs med rang snang shar na chos byed yul dang 'phrad
de ltar 'da' ba med na yul sems gnyis su med
khong du bdud bzhi choms na thar pa'i lam dang nye
snang ba stobs su gyur na 'du 'dzin yeng ba med
rnal 'byor brtan pa thob na gsang sngags rang la 'chad
e ma sangs rgyas rnams kyi dgongs pa la
296
gtan tshigs rigs pas phigs mi 'gyur
dgongs pa nyid la yul med phyir
e ma ho
rang bzhin chos sku'i snang ba chen po las
rang byung thogs pa med pa'i sku lnga shar gyis byung
rang sangs rnyog pa med pa'i ngang du gnyis med thim
rang byung ye shes du mar med pa las
gsang sngags don gyi ye shes shar gyis byung
rtog med dbus mtha' med pa'i ngang du gnyis med thim
rang byung byas pa ma yin yul la 'jug
e ma ho
rang rig rdo rje ye shes kun tu 'bar
mtshan med rang snang rdo rje kun tu che
'bar ba 'jigs bral rdo rje stong pa kun tu che
phra rags dri med rang bzhin rdo rje rab tu 'bar
stong pa kun khyab rdo rje cod pan kun tu che
rang dbang rab bskur rdo rje ma bskur rdzogs
mtha' yas rdo rje dam tshig bsrung dang bral
gcig pa seng ge ye shes 'bras bu spang thob med
rang snang 'dzin bral rdo rje'i blta ba kun nas blta dang bral
phyogs su yangs pa'i rdo rje'i spyod pa kun nas spyad du med
'byung ba kun snang rang rig gsang sngags lam du snang
ma g.yos phyogs bral rdo rje'i sa lam bgrod du med
297
stong pa yang dag rdo rje'i sku la blta dang bral
chos nyid yangs pa rdo rje'i dbyings la skye 'bri med
snang ba rang rdzogs rdo rje'i sku la yin min med
gsang sngags rgyal po rdo rje'i lus la skye 'jig med
snang ba rang snang rdo rje'i gnas la mtho dman med
dri ma rang dag rdo rje'i gsung la 'gyur ba med
chos sku tshig med stong pa'i yul la bdag 'dzin med
yang dag 'jig bral rdo rje'i lam la nye ring med
'dzin med rang snang chos sku nyid la bsam pa med
ngo bo 'gyur med sku la mun pa med
longs sku yang dag yid bral ngang la lhag geb
de nyid rtog med sku gsum gcig gi ngang
ming du med pa'i rang snang bde ba'i shugs
stong pa kun khyab snang ba zil gyis gnon
chos nyid bsam med g.yo ba ngang gis med
du ma rten dang bcas pa ga la yod
mngon sum mi gnas rang snang yul la 'dzin
mun pa ma yin rang bzhin 'od du gsal
gsal la ma 'gags don nyid ye shes sku
dran pa dang ni dran byed yul du med
snang ba'i ye shes dngos po'i mtha' dang bral
298
chos kyi sku yi snang ba rang gsal ni
rang gi ngang las rang gi sku la thim
sku dang ye shes tshig la mi gnas na
gsang sngags rang byung dgongs pa bcos pa med
tshad bzung med pas chig chod rnam par dag
gzigs snang thabs la mi 'gags don gsal ba
yul du med la rang gi yul la gnas
dbus dang mtha' med gsang sngags chad pa nyid
rang snang yin par kun tu bzang pos bstan
phyogs lhud ma yin phyogs dang ris las 'das
e ma ho
nang med nang nas nor bu rin chen mdzod phyung ba
rgyal ba rnams kyi mi 'dzad gter yin pas
de yi don la ma yengs chags pa med par spyad
e ma ho
rang gis la sangs rgyas rnams kyi sku shar ba
'du shes yul du med pa'i zhi ba'i ngang
snang ba rang la yas pa'i rang snang dngos med nyid
rtog pa'i phyogs su ma lhung rang rig gdangs la 'dug
snang ba'i sems bral chos nyid ngang la spyod pa'i don
spro bsdu ma byas rang gi yul la blta bar bya
gting mtha' med pa'i chos nyid kun tu bzang
yin dang min pa'i mtha' gnyis rnam par gsal
299
lhag chad med pa'i nor bu rin po che
skye 'bri med pa'i ngang du rtog pa chod
bsams pas ye shes don mi rnyed
bsams pas ye shes don rnyed na
rang byung ye shes rdzun par 'gyur
bsgoms pas chos kyi sku mi mthong
bsgoms pas chos kyi sku mthong na
rang snang chos nyid rdzun par 'gyur
bltas pas rig pa'i don mi rtog
bltas pas rig pa'i don rtogs na
chos sku 'gag med rdzun par 'gyur
chos kyis ma rig rtsad mi chod
chos kyis ma rig rtsad chod na
ka dag ye shes rdzun par 'gyur
dge bas sangs rgyas don mi rtogs
dge bas sangs rgyas don rtogs na
rdzogs chen gnas lugs rdzun par 'gyur
sdig pas 'khor bar ltung mi 'gyur
sdig pas 'khor bar lhung 'gyur na
skad cig rnam gsum rdzun par 'gyur
stong pas yang dag don mi mthong
stong pas yang dag don mthong na
ye shes 'od lnga rdzun par 'gyur
mtshan mas rang gi don mi mthong
mtshan mas rang gi don mthong na
rang sangs chos nyid rdzun par 'gyur
byas pas lhun rdzogs don mi rnyed
300
byas pas lhun rdzogs don rnyed na
ngo bo 'gyur med rdzun par 'gyur
bzung bas snang ba mthong mi 'gyur
bzung bas snang ba mthong 'gyur na
rang bzhin 'gag med rdzun par 'gyur
spyad pas pha rol sgrol mi nus
spyad pas pha rol sgrol nus na
thugs rje kun khyab rdzun par 'gyur
'khrul pa'i snang bas nga mi bsgrib
'khrul pa'i snang bas nga bsgribs na
sgron ma rnam gnyis rdzun par 'gyur
des ni gsang sngags dgongs pa bstan
yul sems gnyis kyi gnas med pas
ye shes rang la snang ba'o
zhes seng ge rtsal rdzogs chen po'i rgyud las
seng ge gnyis sbyor gi dgongs pa bstan pa'i le'u ste bzhi pa'o
@5
de nas yang rang rig kun tu bzang pos
rang snang kun tu bzang mo dang gnyis su med par snyoms par zhugs so
de nas ting nge 'dzin la bzhengs nas kun tu bzang po rtsol bral gyi dgongs pa 'di brjod do
e ma ho chos nyid kun tu bzang
sems can rtog pa bsal ba'i phyir
rang snang yul gyi gtan tshigs yang byung nga yis bstan
301
rigs lnga'i sangs rgyas legs par nyon
nga yi chos la yul med pas
sna tshogs 'dzin pa'i ma rig med
nga yi ye shes rang snang bas
nga yi blo la bdag rtog med
nga ni yul la mi gnas pas
mtshan ma sna tshogs bya ba med
nga la phyi dang nang med pas
gsal dang 'grib pa ga la yod
nga ni rang byung rtog med pas
yin dang min pa'i tha snyad bral
e ma ho sems can sangs rgyas thams cad la
ngo bo gcig las med par des
dmigs pa can dang dmigs med pas
rang bzhin gcig tu ma nges so
dgongs pa rang byung ye shes ni
rtogs dang ma rtogs mtha' las 'das
yin min blo yi bya ba thong
snang dang mi snang chos nyid kyang
bya byed mtha' lhung chos dang bral
stong pa nyid kyi ye shes las
ma 'gags gsal ba'i 'od lnga byung
chos sku rang gnas dgongs pa la
stong dang mi stong mtha' las 'das
brtags pa gnyis kyi chos rnams kun
kun bzang seng ge'i ngang las byung
sangs rgyas kun tu bzang po ngas
302
gol sgrib gnyis med lta ba bstan
snang dang mi snang med pa'i chos
byas shing brtags pa ma yin te
rang bzhin lhun gyis grub par rtogs
chos sku rig pa'i snang ba ni
sgrib phyogs gnyis dang bral ba'i chos
snang ba rang sar dengs pa la
sgrib phyogs gnyis kyi dri ma med
sku yi snang ba rang snang dang
gsung gi cho 'phrul cir yang ston
thugs kyi dgongs pa rtse gcig go
rang snang gser gyi nam mkha' la
gser gyi 'dab chags bya khyung lding
rtog med yid kyi khyung chen gzung
rang bzhin ma bcos mtsho mo la
rnam dag rang gnas gser gyi nya mo 'gyu
thabs nyid stong pa'i rgya yis thob
'dzin chags bral ba'i nam mkha' la
chags med rtsal rdzogs gser gyi bya khyung lding
bzung ba ma yin sgron mar chub
rtog med rang dangs rgya mtsho la
rang byung lhun rdzogs gser gyi nya mo 'gyu
byas pa ma yin ye rgyas thob
chos sku rang snang yul gyi nam mkha' la
sgron ma 'gag med gser gyi bya khyung lding
rtog med rang sangs chos sku'i ngang du bzung
kun gzhi klong yangs bag chags rgya mtsho na
303
rig pa mi 'gyur gser gyi nya mo 'gyu
bsgrubs pas ma yin rang gi grogs dang phrol
kun tu bzang mo yengs med nam mkha' la
rang snang ma bcos gser gyi bya khyung lding
btang bzhag bral ba'i dgongs pa'i ngang du bzung
chos nyid mi 'gyur spros bral rgya mtsho la
ka dag sems bral gser gyi nya mo 'gyu
blo dngos gnyis med rang byung ye rgyas thob
chos nyid ming dang bral ba'i nam mkha' la
mtshan ma'i yul med rang snang gser gyi bya khyung lding
bcos ma ma yin rang gi bde ba 'byung
rang byung spros bral chos nyid rgya mtsho na
mtshan ma'i dngos med gser gyi nya mo 'gyu
rang snang chos skur gcig pa'i rgya yis thob
sna tshogs zhen pa med pa'i nam mkha' la
chos sku spros bral gser gyi bya khyung lding
rtsol sems ma yengs sgron ma'i ngang du 'ub
chos nyid mtha' yas rnam dag rgya mtsho na
rang byung rtog bral gser gyi nya mo 'gyu
stong gsal 'khor 'das bral ba'i rgya yis thob
bsam pa 'dzin chags bral ba'i nam mkha' la
dgongs pa rang gnas gser gyi bya khyung lding
304
chos nyid yangs pa'i kun khyab ngang du 'ub
'byung rkyen sna tshogs bral ba'i chos nyid rgya mtsho na
'od lnga rang shar gser gyi nya mo 'gyu
snang ba cog bzhag dgongs pa'i rgya yis thob
chos nyid dran pa sang pa'i nam mkha' la
tsho ma bu lngar snang gser gyi bya khyung lding
'dzin chags rtog mtha' bral ba'i ngang du 'ub
chos nyid phyogs bral rtog sangs rgya mtshon
dbugs dang bral ba'i rig pa gser gyi nya mo 'gyu
rang snang dmigs med ting 'dzin rgya yis thob
chos sku spros bral rang sar dengs pa'i nam mkha' la
bya byed bral ba'i rang snang gser gyi bya khyung lding
'khrul pa rtsad gcod chos sku'i ngang du 'ub
rtsol bral chos nyid rdzogs chen nam mkha' la
rig pa rtsol bral rang snang gser gyi bya khyung lding
rtsol bsgrub bral ba'i chos dbyings ngang du 'ub
ma bslad lhun rdzogs ye shes rgya mtsho na
gsal dag snang ba gser gyi nya mo 'gyu
rkyen gzhi bral ba'i rang byung rgya yis thob
chos sku rtog med rten bral nam mkha' la
dgongs pa chig chod gser gyi bya khyung lding
305
snang ba yin min the tshom bral ba'i ngang du 'ub
chos dbyings rgyan bzang sna tshogs rgya mtsho na
gzugs sku mnyam la ma 'dres gser gyi nya mo 'gyu
chos sku dran byed bral ba'i rgya yis thob
rang snang phyogs lhung bral ba'i nam mkha' la
stong gsal spros dang bral ba'i bya khyung lding
snang la 'dzin pa med pa'i ngang du 'ub
rang byung rnyog pa med pa'i rgya mtsho na
mtshan ma rang sar dengs pa'i rig pa gser gyi nya mo 'gyu
'dzin med rang bzhag ting 'dzin rgya yis thob
mtshan ma spros bral rang snang nam mkha' la
gzung 'dzin bral ba'i chos sku gser gyi bya khyung lding
chos nyid rang snang thig le'i ngang du 'ub
gsang sngags ye shes gnas lugs de bzhin no
e ma ho
gsang ba'i ye shes rang snang thabs kyi rgya
yang dag ye shes tshig gis mtshon du med
rang rig ye shes 'od gsal bas
snang ba'i ye shes yul las 'das
rang byung de nyid dngos bral bar
kun gyi phyag rgya'i rgyu yin no
sangs rgyas ye shes chen po ni
kun la gnas shing brtag dka'o
306
kun rdzob don dam gnyis med la
chos dang gang zag bdag med de
'di ni byang chub sems dpa' yin
las dang nyon mongs thams cad la
mnyam pa'i don du mi shes shing
rten 'brel rgyu 'bras yong 'dzin na
'di ni rang sangs rgyas kyi sa
chos rnams ma lus thams cad la
bden bzhi'i dngos po yod blta zhing
spong dang mi spong byed gyur pa
'di ni nyan thos sa yin pas
dge bcu dag la gtsor len cing
dge dang mi dge gnyis mnyam pas
lha dang mi yi skye gnas te
'dod khams dag tu 'khor ba yin
mnyam pa'i don nyid ma rtogs shing
tshad med bzhi dang bsam gtan bzhi
rim pa so sor bdag 'dzin cing
gzugs sogs rnams la bdag tu rtog
de ni tshangs pa'i gnas su skye
mnyam dang gzugs med ma rtogs na
'dzin med rang snang mi shes pas
skye mched mu bzhi'i gnas su skye
thams cad mnyam par ma shes na
ma lus kun la zhe sdang zhing
snying rje yang dag med gyur na
dmyal khams bcu drug dag tu skye
chags med dngos bral ma shes na
thams cad kun la 'dod chags shing
307
lus kyi bsgrib dang zas kyi bsgrib
yi dags bkres skom dag tu skye
bdag gzhan gnyis kyi don ma rtogs
chos rnams kun la rmongs byas pas
rang gsal shes rab med pas na
dge sdig gnyis su mi mthong zhing
shin tu rmugs pa'i gnas su skye
rab tu nga rgyal rags byed cing
thams cad bdag gir bzung bas na
phan tshun 'thab dang rtsod byed cing
rang gi don nyid ma shes na
rtsog ldan rangs pa'i gnas su skye
de ni 'khor ba'i ltung gnas te
sems can kun gyi ma dag lam
ltung ba'i gnas su rgyal bas bshad
rdzogs chen ye shes rang snang yul
ltung ba'i gnas su ga la 'gyur
thams cad mnyam pa'i rang bzhin la
lta ba log par brtags pa rnams
gzhi la yod pa ma yin te
sems can rnam rtog tha dad pas
nga dang bdag tu bzung thas log
log dang ma log thams cad kyang
yang dag rdzogs pa'i byang chub sems
rig pa'i ngo bo rtog med la
ci yang med pas ci yang byung
rdzogs chen a ti'i lta spyod ni
ji ltar spyad kyang rang bzhin med
308
mkha' la khyung chen lding ba bzhin
rang snang chen po'i rgya yis thob
chu la rgyal mkhan 'phyo ba bzhin
ngang snang stobs kyis pha rol sgrol
bar snang khams kyi rlung bzhin du
ye shes ngos gzung kun dang bral
rdzogs chen chos nyid don rtogs na
ma rig pa nyid rig par shar
phyin ci log na yang dag ste
nyon mongs lnga po de bzhin gshegs
'dod chags rnam rtog sems med pas
chags pa'i tshul la chags pa med
de bzhin chags sdang lnga po yang
yang dag don la med par gsungs
sems can ma rig long ba la
mun pa ma lus bsal bya'i phyir
rig pa'i sgron ma 'od gsal bas
nyon mongs lnga yi mun pa sel
ye shes snang ba rang bzhin du
dmigs pa med par rang sar grol
sems can kun gyi rang lus la
ye shes dag pa'i snang ba gnas
rgya phye snang bar mi nus te
dper na mngal dang sgo nga'i rgya
mngon du ma gyur sgrib 'gyur yang
rang rtsal rdzogs nas 'byung ba bzhin
rnam rtog lus 'di bor ma thag
rang snang yul dang 'phrad par 'gyur
ye nas gnas pa'i rang rig nyid
ngo bo rtog med mthong bar 'gyur
309
ye shes dag pa'i snang ba dang
sangs rgyas bden pa mthong bar 'gyur
ye shes rang snang ngo bo ni
yid kyi rnam rtog med pa'o
'das pa'i yul dang ma 'ongs yul
snang ba thad kar gcod pa'o
ye shes chen po'i rang snang ste
mngon sum yul du med mod kyang
rang byung sgron ma bstan du yod
sgron ma nyid kyi ye shes ni
snang dang mi snang mtha' las 'das
chos nyid rtogs pa'i rnal 'byor pas
stong pa nyid du mi blta zhing
rang bzhin nyid las ma g.yos pa'o
shes rab ye shes rtogs pa'i dpe
dper na glang chen smyon pa la
dmag dpung bzlog par 'dod pa yis
ral gri sna la btags nas ni
dmag dpung rab tu bzlog pa ltar
shes rab chen po'i rnal 'byor gyis
rnal 'byor 'khor ba'i rgyun thag bcad
snang ba'i ye shes mngon sum blta
da ltar ma yin sems can rnams
rang rig rnam rtog 'du 'dzis g.yengs
ji ltar byis pa shed ma bye
bya byed mang pos g.yengs pa ltar
de bzhin ma rtogs sems can rnams
rnam rtog 'khor ba'i bdud kyis g.yengs
310
de yang bstan pa 'di lta ste
la la phyi yi 'dzin pas g.yengs
la la nang gi gzung bas g.yengs
la la bsam gtan bsgoms pas g.yengs
la la bya byed spyod pas g.yengs
la la 'khor ba'i chags sdang g.yengs
de bzhin sems can thams cad kun
nyon mongs lnga yi 'ching bas g.yengs
rang gi ye shes don ma mthong
snang ba 'di la zhen zhen nas
dag snang chen po'i zhal ma mthong
mi la sogs pa'i sems can rnams
rang dbang rang gis ma thob pas
'khor ba dag la yun ring gnas
rang dbang rang gis rtogs pa'i thabs
kun bzang seng ge nga yis bshad
e ma rigs kyi sangs rgyas nyon
chos sku skye ba med pa las
rnam pa 'gyur med dbang thob 'gyur
rang rig ye shes 'od gsal bas
spyan gsum rdzogs pa'i dbang thob 'gyur
dbyings dang rig pa dbyer med pas
snang 'od kyi dbang thob ste
snang yang chags pa med pa'i tshul
'od kyi rang bzhin ye nas zlum
sku yi rang bzhin ye nas 'dril
rig pa'i rang bzhin ye nas stong
311
snang ba rtsol sems rang spangs nas
dbyings dang rig pa mthong bar 'gyur
e ma ho
a yi yan lag rgyas par bshad
a dang na ro gnyis bshad pas
sems can rang rig mig dang ldan
ye shes snang ba mthong bar 'gyur
e ma ho
rdo rje sems dpa' rang byung bcom ldan 'das
kun tu bzang po ye shes thabs la rol
gnyis med rig pa'i snang ba cir yang 'char
chos sku spros bral ye shes thabs kyi rgya
snang ba rang lugs ye 'byams thugs la gnas
zad med rig pa'i snang ba cir yang snang
'gag med sku yi rol pa cir yang 'char
rtog med thugs kyi dgongs pa gar yang gnas
rang byung gsung gi grags pa sna tshogs 'byung
chos nyid yul gyi snang ba thabs dang ldan
dgongs pa rang snang yul la the tshom med
sangs rgyas ye shes lus las g.yos pa med
dbyings dang rig pa me long gzugs brnyan bzhin
snang ba nyid la rang bzhin yongs kyis med
rang bzhin gsang ba'i rig pa chos kyi sku
bya byed gtang gzhag mthar lhung ga la yod
chos kyi sku dang dbyings ni snang bas stong
312
gsang sngags nyid kyi thabs las sna tshogs 'byung
'byung ba'i yul dang dri ma'i mtha' bzhi sangs
thig le nyag gcig sangs rgyas dgongs par gnas
gnyis med stong gsal rig pa'i ngo la thams cad rdzogs
snang ba'i tha snyad tsam du btags pa ga la yod
snang ba ma yin chos nyid yul gyi rgya
bsams pas don mi rnyed pa kun bzang nga yis bshad
e ma ho
rig pa nyid la rig pa nyid bstan pas
snang ba nyid la snang ba'i rgya yis thob
sangs rgyas nyid la sangs rgyas nyid bstan pas
ye shes nyid la ye shes ma 'gags gsal
snang ba nyid kyis ye shes rang snang bsgribs
snang ba'i dri ma bsal bas ye shes mthong bar 'gyur
khyab gdal 'ub chub snying po don gyi mchog
cha snyoms yul 'jug rang byung ngang du thim
mtha' yas don skyod bde chen rang gi sa
ngo bo snang ba sku yi klong du thim
rang bzhin kun khyab dbyings la snang mtha' yas
zag med rang byung rtog pa'i mtha' dang bral
dbyings rig gsal ba rang bzhin khyab gdal lo
byas dang byed pa'i chos med kun las 'das
313
lhun grub rang snang mthar thug kun la rol
gsal dang drod dang bsil ba'i ba dag nyid 'dzin
yin dang min pa'i tha snyad kun las 'das
snang dang mi snang yul gi rtog pa med
e ma ho
de ni sangs rgyas gnas lugs yin
sangs rgyas kun gyi lta phugs ni
kun bzang seng ge nga yis bstan cing bkrol
rang snang yul la bdag rtog na
kun tu bzang po'i don ma rtogs
rin chen gser dang rgya mtsho bzhin
'gyur ba ma yin g.yos pa med
dus gsum snang ba'i rig pa'i yul
phyogs su lhung na don ma rtogs
e ma ho
chos dbyings rang bzhin byang chub sems
rig pa'i rang bzhin stong gsal mnyam
e ma ho
yangs so che'o ches che'o
chung ngu rnams kyi gnyen po yin
chung dang che ba'i rim pa rnams
yang dag sa la med mod kyang
sems can blo la gnyis su byung
sems dang ma rig snang ba ni
yul med pa la 'dzin pas bzung
rig pa ye shes snang ba ni
bdag tu rtog pa'i blo dang bral
yin pa la yang re ba med
314
min pa nyid la the tshom sangs
'khor ba nyid dang mya ngan 'das
gnyis su gdags su ga la yod
sangs rgyas kun gyi rnal 'byor ni
stong gsal yul med bzhag pas zin
de yi ngang du gnyis med 'ub
'das dang ma byon da ltar gyi
dgongs pa dam pa'i snang ba'o
mi shes byis pa'i ngang nyid kyis
nan gyis mkha' la mdud pa bor
yul snang med la snang bar bzung
rtog pa med la rtog par bzung
bdag dang gzhan du med pa la
bdag dang gzhan du bzung bas 'khrul
kye ma ye shes tshig las 'das pa la
tshig dang yi ges nga mi mthong
ye shes rang snang thabs kyis pha rol phyin
shes pa'i yul du med pa la
snang ba rtsol sems 'khrul pa'i sems
lhun gyis grub pa'i chos sku nyid
gsal 'grib snang ba'i mun pa sangs
rtag chad gnyis kyi mtha' las 'das
mun snang gnyis su gzung du med
gcig dang du ma'i chos las 'das
snang dang mi snang gang yang med
skye dang 'jig pa'i phyogs dang bral
gol sgrib bdag rtog ga la yod
315
bsam pa nyid la bsam du med
shes rab pha rol phyin pa'i mtha'
rig gsal chos kyi sku la 'dus
bsam gtan pha rol phyin pa'i mtha'
sgron ma cog bzhag ngang du 'dus
brtson 'grus pha rol phyin pa'i mtha'
rtog med rang byung don la 'dus
bzod pa'i pha rol phyin pa'i mtha'
snang ba thad kar chod la 'dus
tshul khrims pha rol phyin pa'i mtha'
grogs med gcig pur 'dug la 'dus
sbyin pa'i pha rol phyin pa'i mtha'
'khor ba'i 'dzin chags thongs la 'dus
smon lam pha rol phyin pa'i mtha'
snang ba res 'jog med la 'dus
thabs kyi pha rol phyin pa'i mtha'
rig pa cog bzhag ngang du 'dus
stobs kyi pha rol phyin pa'i mtha'
'khrul snang rgya yis thebs la 'dus
ye shes pha rol phyin pa'i mtha'
rkyen dang bral ba'i snang bar 'dus
de bzhin pha rol phyin pa'i don
rang bzhin kun khyab ye shes so
de nas kun rig chos kyi rjes
bcom ldan kun bzang seng ge la
rang rig thabs kyi yan lag zhus
kye kye bcom ldan seng ge'i stobs
316
sems can ma rig long ba la
snang ba'i sgron ma gang gis bgyi
bdag cag rnams la bstan du gsol
de nas kun bzang seng ge des
sangs rgyas rnams la bka' stsal pa
e ma ho
rig pa'i ye shes sgron ma nyon
nga yis don dam yang dag nyid du bstan par bya
khyed kyis 'gyur med yang dag gzung bar byos
e ma ho
rig pa'i ye shes sgron ma ni
sems can kun la rang chas te
rnam pa gnyis kyi tshul du 'char
thig le stong pa'i sgron ma dang
rig pa dbyings kyi sgron ma'o
'du 'bral med pa'i tshul du 'char
sems can kun gyi snang ba bshad
de yang bshad pa 'di lta ste
gnas dang dus dang rtogs pa'o
gnas ni bhri gu ta na gnas
dus ni bar ma do la 'char
rtogs pa nam mkha'i ngang du rtogs
de yang mthong ba'i dus su bstan
de yang dbyings dang rig par bshad
de yang bshad lugs 'di lta ste
gzhi la gnas pa'i dbyings rig dang
lam la snang ba'i dbyings rig dang
mtha' la skyol ba'i dbyings rig go
gzhi yi dbyings rig rnam gnyis ni
rtogs byed thabs kyi gzhi dang ni
317
bya ba rdzogs pa'i gzhi ru bshad
rtogs byed thabs kyi gzhi yi dus
bag chags phung po 'di la bshad
bya ba rdzogs pa'i gzhi gnas ni
chos nyid ka dag snang bar bshad
rtogs byed thabs kyi gzhi bshad pa
dbyings ni dbyings kyi sgron ma la
rig pa lu gu rgyud du gsal
lam la snang ba'i dbyings rig ni
dbyings ni 'od kyi mu khyud la
rig pa sku lnga'i snang bar bshad
mtha' la skyol ba'i dbyings rig ni
dbyings ni rang bzhin snang ba la
rig pa sku dang ngo bor bstan
de phyir dbyings dang rig par bshad
de bzhin nyid du rab tu gnas
dbyings dang ye shes rig pa gsum
'du 'bral med pa'i tshul du gnas
sangs rgyas rnams kyi yul dang spyan
kun la rtogs shing yengs pa med
yengs pa med pa'i rang snang ngo
dbyings dang rig pa'i don nyid ni
lta sgom spyod pa kun gyi dngos
ye shes rang snang gzung 'dzin bral
dbyings dang rig pa gnyis kyi don
'di yi ngang du thams cad 'dus
chos rnams ma lus thams cad kun
318
bdag dang gzhan gyi blo med pas
kun la thogs med spyad gyur kyang
spyad dang spyod pa gnyis med pas
thams cad ye nas stong gsal dang
sems can kun gyi snang ba la
ma byin blangs pas ma rig sangs
snang srid ma lus thams cad la
thogs pa med par spyad gyur kyang
'ching bar mi 'gyur bsod nams rdzogs
chags med ye shes chen po yin
snang ba thams cad ye shes sku
de nyid rang rig yin par bshad
gnyis med yul gyi snang ba'o
chos sku dngos po kun bral zhing
ye nas rang bzhin 'od gsal bas
ngo bo nyid kyi chos sku yang
rang bzhin nyid kyi snang bar bshad
ming btags tshig la dngos po yod ma yin
ma rig 'khrul pa'i log rtog gis
nga dang bdag tu med snang la
bdag dang gzhan gyi blo yis bzung
sna tshogs 'khrul pa rdzun yin pas
rjod byed rdzun gyis nga mi sgribs
rdzun nyid la ni rdzun spyod de
rdzun zhes btags tsam yod ma yin
thams cad kun bzang nga yi rdzun
sangs rgyas ye shes rig pa'i klong
bdag med kun tu 'phro ba'o
319
sems can kun gyi rang rgyud la
yang dag lam gyi ye shes gnas
ngo bo 'khrul rtog yul las 'das
rang bzhin gnyis snang yul las 'das
thugs rje kun khyab rnam par snang
ye shes rang snang lam du 'char
rig pa snang dang mi snang med
de yang gtan tshigs 'di lta ste
snang ba yin min gnyis las 'das
stong pa 'dzin chags yul las 'das
bsgom pa gtang bzhag gnyis las 'das
lta ba phyogs dang ris las 'das
'bras bu rtog mtha' gnyis dang bral
ye shes don la cis kyang bskyod du med
ye shes snang ba gar yang thogs pa med
ye shes sku la mtha' bzhi'i dri ma med
ye shes lam la ye nas tshig dang bral
ye shes rig pa yang dag dgongs pa'i mchog
ye shes ngo bo 'gyur ba'i phyogs dang bral
ye shes rang bzhin gnyis snang mtha' dang bral
ye shes thugs rje snang ba'i rtsal du snang
ye shes yon tan sna tshogs du mar snang
ye shes shes rab rig pa'i don la spyod
ye shes dkyil 'khor ma bris yongs la gsal
320
ye shes nyid la ci yang yod ma yin
ye shes nyid la ye shes nyid rol pa
bzung bas mi zin rlung gi dkyil 'khor 'dra
sangs rgyas lus kyi rgyan bzang ba
ye shes mig gcig dri ma med
de nyid ye shes rol par bstan
ye shes snang ba du ma yin
ye shes sku la gcig las med
ye shes dang ni chos kyi sku
snang ba so so ma yin pas
ye shes gzhi la sku gsum gsal
ye shes lam la sku lnga gsal
ye shes 'bras bu thig le'i ngang
ye shes sangs rgyas rgyan yin pas
cis kyang bskyod pa ma yin no
ye shes nyid kyi sku la yang dag bde spyod pa
sangs rgyas nyid kyi rig pa dngos yin no
lam dang ye shes rtogs pa phyogs bral na
ye shes rang snang blta ba rtogs par bshad
sa dang lam la mi gnas ye shes chen po'i sku
cig char pa dang rim gyis ma yin pas
rang snang chig chod ngang du de bzhin gshegs
yul snang ma yin gcig pur gnas
gsang sngags ye shes rang lugs dang
'khrul pa yul gyi snang lugs gnyis
gcig las tha dad ltar snang ba'o
321
ye nas gnas pa'i rig pa'i sku
gsang sngags gzhi lam 'bras bur gnas
gsang sngags kun gyi gnas lugs dang
snang lugs gcig gis phyogs char bsgribs
de yang bshad pa 'di lta ste
snang thabs dang ni snang lugs so
snang dang rig dang ye shes sku
lam dang ye shes 'byung ba'i sa
dkyil 'khor gcig la don brjod pa
gsang sngags gcig la 'khyer so dgu
de yang rnam pa tsam du snang
rim pa dgu yi ngo bo yis
rang snang ye shes don ma rtogs
snang ba'i rang bzhin snang ba la
don dam dang ni kun rdzob gnyis
tha dad ma yin gcig gi ngang
ye shes rtogs pa'i ngo gang la
mtshan ma'i rnam rtog ci byung yang
thams cad ye shes rol par shar
rig pa gcig la don brjod pas
sku gsum rgyal ba'i ngo bor snang
sku las ye shes cho 'phrul byung
snang dang mi snang chos ma yin
rtogs dang ma rtogs mtha' las grol
snang ba ye shes ngo bor gnas
'byung ba rdo rje'i rkyen gyi bdag
snang ba'i rdo rje kun la rol
322
mtha' yas lam la rnam par rol
stong gsum 'jig rten rab 'byams na
sku yi dkyil 'khor ji snyed pa
thams cad ma lus snang bar gsal
stong gsum 'jig rten rab 'byams na
gsung gi dkyil 'khor ji snyed pa
thams cad ma lus grags pas stong
stong gsum 'jig rten rab 'byams na
thugs kyi dkyil 'khor ji snyed pa
thams cad ma lus rtog pa sangs
sku dang gsung dang rdo rje'i thugs
snang ba med las thams cad snang
sangs rgyas sku dang ye shes 'od
snang ba rang snang nyi du yod
kun tu bzang pos kun tu rig pa'o
zhes seng ge rtsal rdzogs chen po'i rgyud las
seng ge stobs ldan gyi lta ba bstan pa'i le'u ste lnga pa'o
@6
de nas yang kun rig chos kyi rje la sogs pa'i rigs kyi sangs rgyas rnams kyis
bcom ldan 'das dpal kun tu bzang po la 'di skad ces gsol to
e ma ho rdo rje ye shes sku
dbang dang dam tshig don bstan pa
legs par 'khor la bstan du gsol
zhus te rang rang stan la 'dug
de nas kun tu bzang po yis
nye ba'i 'khor la bka' stsal pa
323
kye ma rang snang dkyil 'khor nyon
ye shes sems dpa'i dkyil 'khor ni
dbang dang dam tshig gnyis su 'dus
de yang bstan pa 'di lta ste
dbang la rnam pa bzhi yod de
phyi dang nang dang gsang ba dang
de bzhin yongs su rdzogs pa'o
phyi yi dbang nyid 'di lta ste
snang tshad grag tshad thos tshad rnams
phyi dbang rin chen rdzas su bstan
de yang bshad pa 'di lta ste
bskur ba'i dus dang 'jug pa'i dus
thob pa'i dus dang smin pa'i dus
rnam pa bzhi ni nga yis bshad
de yang ngo bo nges tshig dang
dbye ba'i dus ni rab tu bshad
bskur ba'i dus ni 'di lta ste
rang la gnas pas rtsal dbang bskur
'jug pa'i dus ni 'di lta ste
sman lnga bdud rtsi lnga la 'jug
de yang drag shul stobs kyis bza'
thob pa'i dus ni 'di lta ste
phyi yi snang ba thams cad kun
bdag gi dbang du 'dus pa dang
snang ba thams cad rang snang dang
grag pa thams cad rang gi gsung
bsam pa thams cad ye shes thugs
rtogs shing shes na dbang thob po
smin pa'i dus ni 'di lta ste
phyi 'byung nang du smin pa dang
324
phung lnga rigs lngar smin pa dang
yul brgyad sems dpar smin pa dang
dkyil 'khor lha ru smin pa dang
dug lnga ye shes lngar smin pa'o
ngo bo bstan pa 'di lta ste
sems can ma rig 'khor ba las
ma smin pa rnams smin par byed
de phyir smin par byed par grags
dbang gi nges tshig 'di lta ste
ma thob pa rnams thob par byed
dbang gi dbye ba 'di lta ste
gong du bstan pa kho nar zad
de ni phyi yi dbang du bstan
nang gi dbang bskur 'di lta ste
rang rig rnam rtog ci byung ba
thams cad lha yi ngo bor bskur
de yang bstan pa 'di lta ste
shes dang mthong dang go bar bstan
de yang ngo bo nges tshig dbye ba'o
de yang shes pa 'di lta ste
rnam rtog mtshan ma thams cad kun
rang las byung bar shes pa dang
dkyil 'khor lha tshogs thams cad kun
rang gi snang bar shes pa'o
mthong ba'i dus ni 'di lta ste
rdul tshon dkyil 'khor de dag kun
rang gi snang bar mthong ba dang
sha khrag bdud rtsi la sogs pa'i
rdzas kyi rnam pa de dag kun
rang gi khur bar mthong ba'o
go ba'i dus ni 'di lta ste
325
lha tshogs rang nyid yin par go ba dang
sku gsum rang las byung bar go ba dang
'khrul snang ye shes snang bar go ba'o
ngo bo nges tshig 'di lta ste
ngo bo rtog med shes rab yin
nges tshig ma grol grol bar byed
dbye ba rnam pa bzhi yis bstan
nang gi phyi dang nang gi nang
nang gi gsang ba yongs rdzogs so
nang gi phyi ni 'di lta ste
snang ba'i rdzas la brtan pa'o
nang gi nang ni 'di lta ste
phyag rgya dkyil 'khor rdzad lnga'o
nang gi gsang ba 'di lta ste
ma rig rtsad bcad rig snang ngo
nang gi yongs rdzogs 'di lta ste
yul dang rig pa gnyis su bstan
des ni dbye ba rgyas par bstan
phyi nang don ni rdzogs par bstan pa'o
e ma gsang ba'i dbang nyid 'di lta ste
nus dang mthun 'jug skye tshad phyir
bstan cing bkrol te bstan pa'o
de yang bstan pa 'di lta ste
mtshan brtag pa dang bsdu ba dang
gtor ba dang ni bskur thabs bstan
ngo bo nges tshig dbye ba dang
bshad lugs rgyas par bshad pa'o
de yang mtshan nyid brtag pa 'di lta ste
la la dag na don mang yang
326
'dir ni rnam don gnyis kyis bstan
khyad par dngos grub 'byung ba dang
thun mong dngos grub 'byung bar bstan
thun mong 'byung ba'i rigs bstan pa
gzungs ma shes rab mtshan ldan pa
bu mang bkra shis phun sum tshogs
longs spyod ldan par 'gyur ba dang
khru tshad sum cu so dgu'o
des ni thun mong dngos grub 'byung
khyad par shes rab mtshan brtag pa
skyes pa dag gis ma gtses dang
brtul zhugs che bar gyur pa dang
bzhin bzang yid du 'ong pa dang
mig ni dkyus ring dkar nag phyed
sen mo mdog dmar phra la 'khrul
de la sogs pa'i mtshan rnams ni
rab tu ldan par gyur pa dang
khru tshad bcu bzhi dag gam ni
yang na bcu drug man chad do
de bzhin khyad par dngos grub thob
des ni mtshan nyid brtag pa bstan
bsdu ba bstan pa 'di lta ste
de ltar shes rab mtshan ldan ma
yi ge bsdu ba rab tu bshad
dang po thig le'i bye brag rnams
yi ge mum gyis bsdus nas ni
bskur ba'i gnas dag gang yin pa
de la rab tu bstim par bya
327
de nas yi ge gtor ba bshad
de yang bstan pa 'di lta ste
byang chub sems ni dkar dmar rnams
pad ma rdo rje'i mkha' la rab tu gtor
pad ma la ni yi ge am
dmar po 'od chags bsams pas gtor
rdo rje'i rtse la yi ge om
'od zer dkar po rab bsams pas
bha ga'i nang nas rdo rjes 'dren
rdo rje'i sked par a nyid bsam
rtsa ba dag tu hum nyid bsam
kun tu sva ha shes par bya
de yang drang dang bstim pa'o
drang ba a la sogs pas drang
bstim pa phrum la sogs pas bstim
de nas bskur ba'i yan lag bstan
dmar po dang ni dkar po gnyis
bskur ba'i gnas ni so so'o
tha ma gcig tu bsdom pa'i gnas
mkhas pas rab tu shes par bya
de yang mdor bstan 'di lta ste
lce stengs sam ni gsang ba'i gnas
yang na gnas lnga dag tu bskur
bskur ba'i rgyu dang rim pa ni
'bras bu yon tan rgyas pa'o
de ni sbyor ba'i dkyil 'khor ro
ngo bo bstan pa 'di lta ste
thabs dang shes rab 'khril sbyor ba
gsang ba'i dbang gi ngo bor 'dod
nges tshig gzhan la mi bstan pa'o
328
dbye ba rnam pa bdun gyis bstan
dang po phyag rgya'i dbang bskur ba
bsten pa tsam du bstan pa dang
sbyor ba'i yan lag bstan pa dang
sgrol ba'i yan lag bstan pa dang
byang chub sems su bstan pa dang
brtul zhugs nus pha bstan pa dang
gnyis med 'byung bar bstan pa'o
dang po phyag rgya bstan pa ni
snang ba rgyas 'debs phyag rgya dang
shes rab sems ma'i phyag rgya'o
snang ba rgyas 'debs phyag rgya ni
gsang ba thabs kyi yan lag go
shes rab sems ma'i phyag rgya ni
sor mo'i rtse mo sprad byas te
mum dang a ni rab tu bsam
de ni phyag rgya nyid du bstan
bsten pa tsam du bstan pa ni
dbang bskur las la 'jug pa'i tshe
shes rab yum ni bsams pas 'grub
yang na bsten pa tsam gyis 'grub
sbyor ba'i yan lag bstan pa ni
gong du rgyas par bstan pa'o
sgrol ba'i yan lag 'di lta ste
sems kyi rnam rtog ci byung ba
chos kyi dbyings su sgrol ba dang
dbang po lnga yi cho 'phrul ni
dag pa'i lam lngar sgrol ba dang
mtshan mar snang ba'i 'byung ba rnams
dag pa'i zhing du bsgral ba dang
nyon mongs rnam pa lnga nyid kyang
329
ye shes rnam lngar bsgral ba'o
'khor ba'i sdug bsngal ji snyed pa
dag pa'i zhing du bsgral ba'o
des ni sgrol ba'i yan lag bstan
byang sems dkar dang dmar ba yang
bskur ba nyid du bstan pa dang
bsten pa'i dus su bstan pa'o
bskur ba nyid du bstan pa ni
gsang ba'i gnas dang lce stengs su
de yang brtul zhugs ldan pa dag
pad ma dag la mchu btsugs te
rab tu gzhibs pas dbang thob 'gyur
bsten pa nyid du bstan pa ni
bdud rtsi rnam lnga snod dag tu
byang chub sems dang mnyam sbyar te
mgul lam mchan khung dag tu gdags
sgrub pa pos ni rtag tu bcang
bcangs na dngos grub nye bar 'gyur
brtul zhugs nus pa bstan pa ni
bu mchog dad dang ldan pa zhig
yab yum sbyor ba'i bar dag nas
lce yis rab tu blang bar bya
yang na me long ma gas pas
blangs te rang gis btung bar bya
des na brtul zhugs dngos grub 'byung
snang ba dbang du 'dus gyur nas
ye shes dkyil 'khor mthong bar 'gyur
des ni dbang mchog thams cad thob
330
ma grol ba rnams grol bar 'gyur
gnyis med 'byung bar bstan pa ni
thabs dang shes rab sgo gnyis gsal
shes rab sems ma yum dang ni
thabs kyi sems dpa' gnyis su med
'di yis yang dag don chen 'byung
mun pa drug gi phyogs dag kyang
snang ba lnga yis rab tu gsal
ma bcos ye shes las byung bas
de phyir gnyis med bstan pa'o
e ma ho
yongs su rdzogs pa'i dbang chen ni
rang rig gzhi yi gnas lugs ston
de yang rab tu bshad pa ni
snang ba sems su dbang bskur dang
sems nyid rig par dbang bskur dang
rig pa chos nyid dbang bskur ro
ngo bo nges tshig dbye ba bstan
snang ba sems su dbang bskur ni
shin tu rags pa lnga rnams kyang
mun pa sel ba lnga ru bskur
mun pas myos pa rnam drug la
bdud rtsi thigs pa'i dbang bskur bya
shin tu gsang ba rnam gnyis la
bcos med nam mkha'i ngang du bskur
mgyogs par byed pa rnam bzhi yang
don la spyod byed rnam bzhi yis
331
dbang bskur dkyil 'khor rdzogs par bya
snang ba rtogs byed rtsa ba ni
stong nyid gsal ba'i ngang du bskur
sems nyid rig pa'i dbang bskur ni
sna tshogs rig pa'i ngo bo rnams
sprul pa nyid du dbang bskur ro
rnam rtog dpyod par byed pa yang
mnyam lam 'dres dbang bskur bya
sna dgu'i bzhed gzhung sna tshogs rnams
theg chen gsang bar dbang bskur bya
rig pa chos nyid dbang bskur ni
blo dang dngos po'i snang ba rnams
stong pa nyid du bskur bar bya
btags pa gnyis kyi chos rnams kun
gtang gzhag med par dbang bskur bya
ye shes yul snang chen po'i dbang
gzhi la de bzhin gnas pa'o
ngo bo bstan pa 'di lta ste
rig pa'i ngo bo rtog med pas
rang rig gsal ba'i ngo bor 'dod
sgra tshig ming la mi gnas pas
stong pa nyid kyi ngo bor 'dod
bya byed gnyis dang bral ba'i phyir
'dzin chags bral ba'i ngo bor 'dod
de ni ngo bo bstan pa'o
nges tshig bstan pa 'di lta ste
thams cad rdzogs pas yongs rdzogs so
dbye ba rnam pa bzhi yis bstan
332
snang ba yul gyi yongs rdzogs dang
bskur ba'i dus la yongs rdzogs dang
rang rig ye shes yongs rdzogs dang
rtogs pa'i dus na yongs rdzogs so
snang ba yul gyi yongs rdzogs ni
rig pa bya byed med pa gnyis
sgron ma gnyis kyi snang ba dang
bcas te mkha' la gsal ba dang
rig pa'i ngang du 'byung ba rdzogs
snang ba'i ye shes yul dang 'phrad gyur nas
rang snang mkha' la gsal ba'o
bskur ba'i dus na rdzogs pa ni
rang gi rig pa'i ye shes nyid
gdams ngag don gyis bkrol gyur na
rang gi sgron ma mthong ba dang
ye shes snang ba shar ba ni
dag pa phyogs gcig dbang bskur rdzogs
ngos gzung bral ba'i dkyil 'khor nyid
rang rig lus la rdzogs pa ni
dus nyid mtshon pa'i ye shes rdzogs
ye shes rgya chad med pa nyid
sna tshogs don du shar ba ni
rtog med shes rab rdzogs lugs so
'khrul pa sna tshogs rdzogs lugs ni
drug las byung ba'i mun pa gsum
de las mun pa lnga 'am drug
de bzhin mun pa chos nyid kyi
333
snang ba gcig las byung ba'o
snang ba lnga yis ngo bor bsgribs
rang snang rdzogs pas mun pa sangs
de bzhin bskur ba'i dus na yongs su rdzogs
rang rig ye nas yongs rdzogs ni
rig pa rtog med snang ba nyid
ye nas kun la gnas pas na
de las bcos shing bsgom med pas
rang snang bzhi rdzogs dbang du bshad
rang snang dkyil 'khor dbang mchog ni
ye shes thabs la sna tshogs rol
rang rig ye nas yongs rdzogs so
rtogs pa'i dus na yongs rdzogs ni
snang ba chos skur rtogs pa dang
stong gsum stong gi 'jig rten na
sku gsung thugs kyi rol pa rnams
rtog med dag tu rtogs pa dang
sems kyi rnam rtog ci snyed pa
yang dag nyid du rtogs pas dang
ye nas rang bzhin 'od gsal pas
snang ba sgron mar rtogs pa'o
de ni yongs rdzogs dag tu bstan
kye ma ye shes rgya mtsho la
ngang gis g.yos pa med par bstan
ye nas lhun rdzogs chos sku la
snang ba'i rang rkyen ngos bzung bas
shes rab lnga yis mchod na
mun pa drug gi spyod yul lo
334
snang ba'i rang rkyen chos kyi sku
'byung ba lnga yi dug ro rnams
rang gdangs lnga yi snang ba'o
sems dang bag chags snang ba yang
yin min gnyis kyi mtha' las 'das
chos kyi sku yi snang ba ni
'gyur ba med pa'i dbang du bshad
yang dag nyid kyi spyod pa ni
ma 'gags zhen med dbang du bshad
ye nas lhun rdzogs chos sku ni
bag chags bral ba'i dbang du bshad
'khrul snang zad pa'i ye shes ni
rang dbang thob pa'i dbang du bshad
des ni dbang gi ye shes bstan
snang ba nyid la mi gnas pa'o
zhes seng ge rtsal rdzogs chen po'i rgyud las
seng ge rang dbang thob pa'i le'u ste drug pa'o
@7
de nas kun rig chos kyi rjes bka' stsal pa
rigs kyi sangs rgyas rnam lnga nyon
gsang ba'i rigs kyi dam tshig rnams
ston pa kun tu bzang po la
bdag gis dri ba rab tu bya
khyed kyis nye bar yid la zung
de nas rigs kyi sangs rgyas rnams kyis
kun rig gsang ba'i chos rje la
de ltar bgyi'o bcom ldan 'das
zhes brjod rang rang stan las langs
335
de nas kun rig chos kyi rjes
ston pa kun bzang seng ge la
zhu ba'i ye shes rab tu zhus
de nas kun bzang seng ge yis
chos kyi rje la bka' stsal pa
e ma rigs kyi bu khyod nyon
nga yis don gyi dam tshig bstan
de yang bshad pa 'di lta ste
snang ba yul gyi dam tshig dang
rtogs byed lta ba'i dam tshig dang
spyad rgyu nges pa'i dam tshig dang
bsrung mtshams bcas pa'i dam tshig go
e ma snang ba yul gyi dam tshig ni
yul gyi snang ba ci snyed pa
thams cad ye shes rol pa las
'das na rang rig mi rtog pas
nyams na gol sgrib ltung bar 'gyur
phyi yi mtshan nyid ji snyed pa
rang gi 'du 'phror ma shes te
sna tshogs zhen par gyur pa ni
nyams te ye shes don mi rtogs
nang gi sems rtog ji snyed pa
rang gi yul du ma shes na
nyams te 'khor ba'i kha mthar brgyud
gzung dang 'dzin pa'i bsam pa rnams
rang byung chen por ma shes na
sna tshogs mtshan ma'i rgyu gsog pas
nyams te dmigs pa can du 'gyur
theg pa mtho dman don brjod rnams
336
rang rig lta bas ma zin na
nyams te gol sgrib ltung bar 'gyur
chos sku rang snang ma shes shing
'dzin pa'i phyogs la brten pa ni
nyams te rang snang don mi rtogs
snang ba yul gyi dam tshig go
rtogs byed lta ba'i dam tshig ni
rang rig chos skur ma rtogs na
gzhan 'byung phyogs su ltung bar 'gyur
snang ba rang du ma shes na
spyod pa'i phyogs su ltung bar 'gyur
rnam dag ngo bor ma shes na
yin min phyogs su ltung bar 'gyur
rtogs byed lta ba'i dam tshig go
spyad rgyu nges pa'i dam tshig ni
rang byung nyid kyi snang ba la
ye shes rol pa ma 'gags pas
snang ba'i spyad rgyu nges par bshad
sems kyi snang ba 'gag med pa
mtshan ma'i spyad rgyu nges par bshad
rang rig bcos pa med pa ni
don dam spyad rgyu nges pa yin
mtshan ma'i klong na rig gsal ba
yang dag spyad rgyu nges pa yin
snang ba'i phyogs kyi sgron ma ni
rtogs pa'i spyad rgyu nges par bshad
de ni spyad rgyu nges pa'o
e ma ho
bsrung mtshams bcas pa'i dam tshig ni
mdo don nga yis bstan par bya
337
dkon mchog gsum ni spang mi bya
dge bcu dag ni spang mi bya
rdo rje slob dpon smad mi bya
rang rig 'dren pa'i ston par bshad
dper na long ba'i sna thag bzhin
ye shes gsal ba'i lam ston pa'o
nyon mongs sdug bsngal mtsho skam yin
slob dpon dag la smod pa ni
dper na mun khung sgron bsad na
mthong ba'i don byed med la bzhin
sdug bsngal nyam thag yun ring gnas
bskal pa mang por myong bar 'gyur
de bas rtag tu gus par mdzod
rang rig skyed pa'i slob dpon la
shin tu gtso bas blang bar bya
lus sems skyed pa'i pha ma la
rtag tu rim gro rgyun mi gcad
rdo rje mched dang lcam dral ni
bla med byang chub 'grogs pa'i spun
chos nyid dam tshig smon lam mthus
rdo rje'i dam tshig lu gu rgyud
rtag tu de dang mi 'bral bar
de las ldog cing 'khu ba ni
rang la rang gis mtshon btab nas
rang srog tshe rabs lnga brgya'i bar
rang gis gcod cing phung bar 'gyur
tshe 'dir mi bde sna tshogs pa
mi 'dod bzhin du 'byung bar 'gyur
'jig rten pha rol dag tu yang
338
ngan song gsum dang mi khom pa'i
sdug bsngal kha brgyud myong bar 'gyur
yun ring dag tu mi thar ro
shin tu nyam thag myong bar 'gyur
grub pa gcig bzhin lhan cig spyod
gnyis med spyod dang rjes spyod spun
bde gshegs dkyil 'khor bla med yin
shes rab gsal bas rtag tu gdung
gsang ba'i theg pa spel mi bya
sku gsung thugs kyi dam tshig rnams
rnal 'byor dbyings rig ldan pa yis
dbyings dang rig pa ltar rtogs nas
nyams pa'i spyod pa las 'das te
phal dang mi 'dra yang dag rtogs
ma rtogs pa yi phyogs rnams dang
skye bo kun la rab tu gsang
gsang phyir gdams ngag sna tshogs gsungs
gsang sngags thabs mkhas spyod par bstan
gsang sngags skyon yod ma yin te
thugs rje chen po thabs mkhas pas
snod ma yin dang blo brtul rnams
las 'phro ngan pa'o don phyir gsang
rdzogs chen a ti'i gsang don ni
blo dman rnams la bsgrags gyur na
dper na gtsub shing mer bcug na
gtsub shing nyid kyang 'tshig par 'gyur
339
gzhan yang 'tshig par 'gyur ba bzhin
gsang sngags nges don med dang 'dra
skal ba chung zhing shes rab dman
blo ngan rgyu 'bras rmongs pa rnams
rdzogs chen don la skur 'debs pas
ngan song gsum la 'phen par 'gyur
nges don ma rtogs sdug bsngal myong
gsang ba 'phel bar byed pa yang
smra byed lce la zhing rmo zhing
sdug bsngal chen po myong bar 'gyur
de phyir nges pa'i don 'di gsang
rlung phyogs tsam du'ang brjod mi bya
yun ring rtag tu mi thar pa'i
sdug bsngal shin tu nyam thag myong
grub pa gcig bzhin lhan cig spyod
'di la gnas par ma byas na
dug lnga'i nyon mongs dgra ldang pas
'khor ba'i gnas las thar skabs med
de yang bstan pa 'di lta ste
nyon mongs sdug bsngal 'dod chags ni
lus dang zas kyis bsgrib 'gyur te
yi dwags sdug bsngal gnas su 'gro
skom dang bkres pa'i sdug bsngal 'gyur
rang khrag ngan skyugs dag mthong nas
de yang spyod pa'i dbang med cing
rtsub cing sdug pas phung bar 'gyur
de la sogs pa'i nyon mongs lnga
340
sdug bsngal lam gnas myong bar 'gyur
e ma bsrung ba'i yon tan 'di lta ste
nyon mongs dug lnga ye shes te
de yang bstan pa 'di lta ste
'khor ba'i lam lnga sgo bcad cing
rig pa'i lam du 'jug par byed
rang rig nges don rnyed par 'gyur
ye shes pho brang rdzogs pa'o
rang rig gsal ba'i ngang du mnyam
rig pa rtog med zhi ba'i ngang
gsangs don nges pa'i ting 'dzin thob
rang rig 'od gsal gti mug gi
mun par rab tu ma rmugs shing
snang ba'i yul snang dag la rol
chos rnams brjod dang bral ba'i phyir
sems can lus la rang rig sku
shin tu 'od gsal rnam dag lam
lu gu rgyud kyi tshul du gnas
sems can kun gyi dug lnga'i gnas
rab tu 'joms par rgyal bas bshad
sems can kun gyi nga rgyal ni
yon tan bskyed pa'i mdzod yin te
nga dang bdag tu mi dmigs pas
sems can gang dag 'khrul pa'i sems
de yang nga rgyal byed par 'gyur
dmag gi dpung la sogs pa yi
nga rgyal shin tu rags pa rnams
ye shes dkyil 'khor yin pas na
rang rig snang ba mthong bar 'gyur
341
sems can kun gyi phrag dog ni
nga dang bdag med don rtogs na
dog dang yangs pa'i blta ba med
bde ba'i ye shes rang la grub
phrag dog dngos po ma shes na
nga dang bdag tu 'dzin gyur pas
lha ma yin gyi gnas su skye
de nas yi dags sdug bsngal myong
gal te mi lus rnyed gyur na
shin tu mi bde dogs par 'gyur
gzhan yang longs spyod thams cad la
rang dbang ma yin gzhan dbang 'gyur
mdor na ye shes rtsa ba stor
phrag dog nyid kyi don mthong na
yangs dang dog par mi 'dzin pas
snang ba'i ye shes chen po la
phyin ci log dang ma log med
sangs rgyas rnams kyi rang rig spyan
dug lnga nyid la btsal bar bya
gzhan yang dam tshig sdom pa ni
gang dag bsrung ba'i rigs dang ni
rab tu gnas pa kho na'o
gsang sngags rdzogs chen a ti'i don
'og ma rnams la smra mi bya
rdo rje slob dpon dpa' bo yis
lung nyid ma thob bar du yang
rdo rje lce yi tshul yod kyang
gsang ba gzhan la bstan mi bya
'og ma'i rigs la dbang ma thob
342
las 'phro ngan par gyur pa la
gsang ba chen po'i don mi bshad
de ni dam tshig rnam grangs yin
rig pa'i sku la dam tshig med
srung dang bsrung bar bya ba med
srung byed dang ni bsrung bya med
snang dang mi snang dam tshig med
rang rig rdzogs chen ngo bo la
dam tshig lung du bstan pa med
de yang bstan pa 'di lta se
shes rab chen po'i spyod yul ni
med pa nyid la med par spyod
gcig pu nyid la gcig pur spyod
phyag ba nyid la phyal pa yis
lhun grub nyid la lhun grub gter
dam tshig dam tshig ces bya ba
gud na yod pa ma yin te
rang rig snang ba'i don rtogs na
dam tshig rgyal po zhes bya'o
sangs rgyas sku la dam tshig med
sems can dus na skyon yon byung
yang dag rig pa'i don rtogs na
nyams dang ma nyams gnyis las 'das
bsrungs dang ma bsrungs phyogs dang bral
gsang sngags gsang ba'i don rtogs na
ye shes ngo bo skye bar 'gyur
bsrung bya dang ni srung byed med
sangs rgyas rnams kyi ye shes sku
snang 'dod rtsol med gnyis su med
yang dag phyag rgya chen po'i don
343
snang dang mi snang gnyis su med
rgyu dang rkyen du med pa la
byas pa byung ba ma yin te
rang gi snang ba rang snang ngo
rig pa'i ye shes sku la yis
snang ba'i ye shes yul du byung
de gnyis mthong dus 'dzom pas na
dam tshig ces kyang de la bya
rig dang ma rig gnyis po yang
rang gi snang ba'i khyad par ro
rtogs dang ma rtogs gnyis po yang
dag dang ma dag khyad kyis bstan
gsang sngags gsang ba'i nges don ni
rigs dang ldan pa'i sems can la
bstan phri med par bstan par bya
sems dpa'i sku dang gtso bo'i sku
khyad med gcig tu rtogs pa yis
gsang sngags theg pa'i don rtogs pa'o
sgra dang tha snyad ming nyid kyang
ngo bo snang ba ma yin pas
dri ma'i snang ba bral ba'o
rang rig dkyil 'khor rdzogs par bshad
dam tshig nyid kyi ngo bo dang
nges tshig dbye ba rab tu gsungs
de yang bstan pa 'di lta ste
ngo bo srung bar byed pa yin
nges tshig ma bsrungs 'tshig par bstan
dbye ba bsam gyis mi khyab bo
bsdu ba dang ni rgyas pa'o
rnam grangs med las rnam grangs byung
344
rnam grangs byung bas rnam grangs med
brjod pa kun dang bral ba'i phyir
dam tshig mnyam pa nyid du grags
rang byung rtogs pa'i dam tshig ni
gnyis dang gsum du bgrang du med
tha snyad du ma med par bshad
gcig gi don nyid rtogs pa na
thams cad ngo bo rtogs par bshad
gsang sngags thabs la rab mkhas pas
yar dag nyid du dam tshig med
chos dang chos min gnyis dang bral
de yang bsrung bar byed pa med
sangs rgyas rnams kyi dam tshig ni
don dam nyid la med pa'o
zhes seng ge rtsal rdzogs chen po'i rgyud las
seng ge'i dam tshig bstan pa'i le'u ste bdun pa'o
@8
de nas kun rig chos kyi rjes bcom ldan 'das dpal kun tu bzang po seng ge rtsal rdzogs de la 'di skad ces zhus so
e ma ston pa kun tu bzang
rang snang rtogs pa'i rig pa la
lta ba rmad byung gzung du gsol
de nas kun bzang seng ge des
rab tu bzhugs nas bka' stsal pa
e ma ho rtogs ldan sangs rgyas nyon
blta ba'i don la bsam yas kyang
nga yis don bsdus khyed la bstan par bya
345
snang ba'i ye shes ngos bzung gis
rig pa rdzogs chen lta ba bstan
legs par yang dag nyid du nyon
e ma ho
rdzogs chen rig pa'i rang skad ni
snang dang stong pa'i yul las 'das
sems dang yid dang chos las 'das
yin dang min pa gnyis las 'das
bzang dang ngan pa'i lta ba med
bsgoms dang ma bsgoms gnyis su med
rdzogs chen rang gnas rig pa la
dge dang mi dge gnyis su med
rang rig rtog dang bral ba'i phyir
khams gsum sems can thams cad rnams
shin tu mtshon cha rno ba yis
thams cad bsad na dngos grub 'byung
thugs rjes thams cad sgrol ba'i phyir
rang gi rdo rje slob dpon nyid
bsgral nas rgya mtshor bsgyur byas na
snang srid chos rnams shes par 'gyur
rang rig ye shes yod pa'i phyir
rtag tu 'grogs pa'i mched lcam gnyis
gcong rong dong du bsgyur byas na
ye shes sku dang mi 'bral 'gyur
lu gu rgyud du yod pa'i phyir
lus srog bskyed pa'i pha ma gnyis
346
thang la bton na rang lus 'phel
ye shes yul dang 'phrad pa'i phyir
mchod rten lha khang la sogs rnams
phyags te rgya mtshor pho byas na
yang dag don gyi snying po mthong
sgron ma mkha' la gsal ba'i phyir
dkon mchog gsum por rgyab phyogs na
zhing khams thams cad mthong bar 'gyur
sku gsum snang ba yod pa'i phyir
sangs rgyas bsgral te dur bcug na
rang rig rang snang rtogs par 'gyur
'byung ba rang la log pa'i phyir
chos rnams mer bsregs chur pho na
rang gi rig pa rtogs par 'gyur
shes rab don la dpyod pa'i phyir
sems can thams cad dus gcig tu
bsgral na snang ba thams cad stong par 'gyur
thugs rje'i don nyid ma 'gags phyir
? srog rang gis bcad byas na
rang rig yul dang 'phrad par 'gyur
sgron ma 'od lngas brgyan pa'i phyir
skye dgu thams cad dbang bsdus na
347
rang nyid stobs dang ldan par 'gyur
ye shes chags pa med pa'i phyir
lha tshogs btson du bzung byas na
dngos grub thams cad nye bar 'gyur
rig pa kun tu yas pa'i phyir
snying po'i rgyun thag bcad byas nas
bskyed rim thams cad gsal bar 'gyur
rig pa rtsol bsgrub bral ba'i phyir
tshogs la bsag tu med pas na
sbyin pa thams cad rdzogs par 'gyur
rang rig btang bzhag bral ba'i phyir
thabs dang shes rab ya phral na
rang don thams cad rnyed par 'gyur
rig pa gcer bur yod pa'i phyir
rgyu 'bras mgo mjug ldog pas na
skye ba med pa thob par 'gyur
rgyu yis bskyed du med pa'i phyir
kun gzhi rtsad nas bcad pa na
mngon sangs rgyas par 'gyur ba yin
chos sku gdod nas dag pa'i phyir
gsad gtsad las rnams byas pas na
dge ba thams cad 'phel bar 'gyur
rig pa srog dang bral ba'i phyir
rang snang ye shes rtogs lugs de bzhin no
e ma ho
snang ba'i ye shes gsal ba che
348
rtog bral ye shes phyogs dang bral
rdzogs chen gsang ba'i ye shes ni
kun gyi rtse mor gyur pa'o
rdzogs chen blta ba'i dper mtshon ni
khyung chen mkha' la ldings dang mtshungs
theg pa'i rang skad grangs mang yang
dper na seng ge wa skad 'don dus mgrin pa ye nas yangs
wa spre seng skad 'don dus mgrin pa ye nas dog
rdzogs chen rang skad 'don pas rang rig ye shes ston par byed
'og mas rang rig bstan tu lta ba ye nas dma'
rdzogs pa chen po'i don mtha' ni
mthar thug rig pa nyid du bstan
de yang bstan pa 'di lta ste
rang snang rig pa'i dngos po de
ye shes lu gu rgyud du gnas
dper na 'dab chags 'phur skyen bzhin
skad cig tsam la kun tu rgyu
de la rtsi yis thebs gyur na
ri dags mgyogs pa tsam du 'gyur
de nas don la ma yengs na
bung ba bcud la 'khor ba tsam
de nas rang snang bltas gyur na
dper na smig rgyu lta bur 'gyur
de nas don la ma yengs na
'gul lam 'phrig pa tsam du 'gyur
de yi don la ma yengs na
ltem bzhin pa dang mer bar 'gyur
de nas shin tu bltas gyur na
349
'gro 'ong ma yin 'od snang mthong
de yi don la bltas gyur na
thig le stong pa'i sgron ma mthong
de la yang dag bltas gyur na
thig le sku dang bcas pa mthong
de nyid la yang ma yengs na
'khrul snang longs skur mthong ba'o
sku yi snang ba de rnams kun
sgyu ma 'ja' tshon ji bzhin no
de la rab tu brtan gyur nas
nyin mo mtshan mo med pa ni
dper na ce spyang mo yi mig
nyin dang mtshan mo med pa ltar
rang snang dkyil 'khor de bzhin no
sku yi snang ba de dag kun
yul gyi snang ba ma yin te
dper na na chung gzhon pa yis
me long mtshan nyid gsal ba la
rang gi bzhin snang mthong ba ltar
chos nyid yul gyi nam mkha' la
rig pa'i snang ba sku ru gsal
rang gi gnas lugs mthong ba ni
yul la yod pa ma yin te
dmigs pa dag pas mngon du gsal
rang gi dkyil dang 'khor dang bcas
ye shes don la yul med kyang
sems can dus na yul du byung
mthong ba'i dus na rtogs pa che
go ba'i dus na bde ba che
snang ba mthong na nyams myong che
rang rig gcig pu grogs kyi mchog
350
snang ba'i yul du med pas na
rdo rje lu gu rgyud nyid las
cha shas sku ni bsam mi khyab
rang byung dbyings kyi sgron ma la
rang snang 'od ni bsam mi khyab
thig le stong pa'i sgron ma la
zer ldan thig le bsam mi khyab
ye shes lnga yi ngo bo la
mtshon pa'i tshig ni bsam mi khyab
rkyen med yul gyi snang ba la
'gag med 'byung ba bsam mi khyab
e ma ho
rdzogs chen lta sgom spyod pa la
tha snyad tshig ni bsam mi khyab
rdzogs chen don dgongs blta ba ni
dge sdig phyogs su ma lhung bas
yin min gnyis kyi snang bar med
rdzogs chen ye shes lta ba ni
rdzogs dang ma rdzogs gnyis su med
rdzogs chen rig pa'i ngo bo la
'khrul dang ma 'khrul med pa'o
sems can blo yi bsams pa rnams
tshig dang yi ges mi chod de
gdams ngag snying po gsum la thug
rang rig chos sku'i snang ba ni
bltas pas mthong bar mi 'gyur te
bzhag thabs ngo bo gsum la thugs
rdzogs chen 'gag med spyod pa nyid
byas pas 'byung bar mi 'gyur te
chags med rang grol gsum la thug
351
rdzogs chen bsgom pa ye rdzogs nyid
bsgoms pas byung ba ma yin te
'gyu med bsam bral gzhi la thug
rdzogs chen don nyid rtogs dka' bas
mtshon pa'i tshig gis mi rnyed de
gdams ngag gsang bcud gnyis la thug
rdzogs chen rig pa rtog med nyid
bsgoms pas rtogs par mi 'gyur te
bskyal sa chen po gcig la thug
rdzogs chen rang byung ye shes nyid
bsgrubs pas 'grub par mi 'gyur te
nges pa'i snying po gnyis la thug
rdzogs chen 'bras bu cig chod ni
bskyed pas rdzogs par mi 'gyur te
chags bral man ngag gsum la thug
rdzogs chen snang ba thug phrad nyid
bzung bas zin par mi 'gyur te
rnam dag ngo bo lnga la thug
rdzogs chen rtog med gsal gdangs nyid
chags pas don dam mi rtogs te
yin pa rnam pa drug la thug
rdzogs chen snang ba bzhi rdzogs nyid
dpyad pas mtha' la mi skyol te
'dzin med rnam pa brgyad la thug
rdzogs chen 'gyur med rnam lnga nyid
sbyangs pas phyin par mi 'gyur te
dkyil 'khor rnam pa gsum la thug
352
rdzogs chen 'bras bu rang sangs nyid
bsgrubs pas thob par mi 'gyur te
nyi shu rtsa gcig thabs la thug
rdzogs chen gsang sngags ngo bo nyid
mchod pas dngos grub mi 'byung ste
zil gnon rnam pa gsum la thug
rdzogs chen stong nyid ye shes nyid
bsams pas rang rig mi mthong ste
bstan pa'i snying po gsum la thug
rdzogs chen rang 'od gsal ba nyid
spras pas mthong bar mi 'gyur te
don gyi snang ba gsum la thug
des ni rdzogs chen mtha' la skyol
rang rig ston pa de bzhin no
e ma ho
snang ba chen po gsal ba che
ye nas gnas pa'i gsang sngags bcud
rdzogs pa chen po ye shes ni
sangs rgyas bas kyang che ba nyid
rdzogs chen mthar thug ye gnas don
kun gyi snying po yin pas na
gsang sngags rnams kyi mngon sum don
yang dag ye shes 'od gsal bas
'byung ba'i ye shes 'od du gsal
chags pa med pa'i ye shes ni
rtogs dang ma rtogs gnyis su med
sangs rgyas nyid kyi snang ba ni
phyogs dang ris su ga la yod
353
kun tu bzang po nga yi sems
dngos po med la rtogs mtha' bral
mtha' dang dbus su mi 'byed na
rig pa'i ye shes snang ba nyid
sems dang bral bar rtag tu bstan
yangs pa'i grong khyer gting mtha' yas
gsal ba'i grong khyer thug pa med
rdzogs pa chen po'i ye shes ni
nga dang bdag tu mi rtog na
ye shes snang ba rdzogs par 'gyur
mtha' la mi gnas rdo rje'i sku
rkyen gyis mi shigs stong nyid che
gsang ba'i rig pa kun la khyab
e ma blta ba'i don la thug pa med
thug med ye shes ngo bo nyid
snang ba bzhi yi dri ma bsal
sangs dang ma sangs gnyis med kyang
ltar snang nyid la gnyis su byung
rdzogs chen lta ba'i zhe phugs la
sangs dang ma sangs gnyis dang bral
rdzogs chen lta ba'i bskyal sa ni
yang na ci yang med pa la
yang na sna tshogs 'byung ba'o
yangs dang dog pa gnyis su med
yin dang min pa gnyis su med
'das dang ma 'das gnyis su med
rtogs dang ma rtogs gnyis su med
bzang dang ngan pa gnyis su med
354
mtha' dang dbus su gdags su med
gol dang sgrib pa gnyis su med
dge dang sdig pa gnyis su med
bsrung dang mi bsrung gnyis su med
de ni gnyis med lta ba'o
rdzogs chen rang gsal ngo bo la
mun dang snang ba med shes na
yang dag don gyi snying po rnyed
byar med lhun rdzogs chen po ste
sngags dang phyag rgya ma bsgyur rdzogs
ting 'dzin yig 'bru ma bsgoms gsal
snying po bzlas brjod ma byas grub
gzung 'dzin gnyis su med par rdzogs
bskyed rim ma byas lha tshogs mthong
gom pa gcig gis pha rol phyin
ting 'dzin gcig gis sa rnams gnon
blta ba gcig gis phyi nang mthong
bsgom pa gcig gis chags med rnyed
spyod pa gcig gis rang snang rtogs
'bras bu gcig gis 'dod pa grub
dper na khang stong mun nag nyid
snang ba gcig gis sel ba ltar
ma rig 'khor ba'i mun pa rnams
snang ba gcig gis thams cad sel
sangs rgyas kun gyi ye shes dang
sems can kun gyi rig pa gnyis
gcig las med par mgon pos bshad
355
sangs rgyas snang ba dmigs med dang
sems can snang ba dmigs pa can
gcig nyid yin par rgyal bas bshad
gsal ba'i dkyil 'khor 'od zer ni
mu khyud ra ba zlum por gnas
sku yi 'od snang 'di lta ste
gsal 'tsher lhun sdug gzi byin 'bar
'od zer kun tu 'phro ba'o
mdog bzang lhun yangs dkyil 'khor 'byung
sna tshogs sku las 'byung ba'o
ye khyab lhun brdal kun gsal shar
ye shes 'gag med 'char ba'o
ye shes ngang ni yang dag sems
sku ni sna tshogs 'phro ba'o
rdzogs chen ye shes snang ba nyid
sna tshogs su ni 'byung bar bshad
stong pa dang ni gsal ba'i sku
'byung ba dang ni mi 'byung med
shes pa dang ni mi shes med
mtha' yas dang ni 'gyur med dang
mthar thug rtags la zad pa med
mtshan ma'i thig la thug pa med
rang rig don la 'gyur ba med
gsang sngags don la phyogs lhung med
sems can lus la stong pa med
sangs rgyas sku la skye 'bri med
ye shes don la skye 'gag med
'khrul snang nyid la zin pa med
356
'od zer nyid la chags pa med
rdzogs chen don la tha snyad med
rang rig sku la gzung 'dzin med
kye ma phyogs su bltas pas grub pa med
rig dang bral bas kha dog med
brjod gzhi med pas snang mtha' yas
e ma
dkyil 'khor yangs pa kun tu gsal
rang rdzogs ye shes snang du rung
thog med dus nas rang snang pas
gsang sngags rtogs pa'i mchog tu bstan
dgongs pa rnam dag ye shes don
tha snyad ma yin gcig pu nyid
gsang sngags rdzogs chen ye shes nyid
dper na 'dam gyi pad ma bzhin
rig pa'i ye shes ngo bo nyid
mun pa nyid las snang bar 'gyur
snang ba nyid las ye shes mun pa 'byung
'khrul pa nyid las ye shes skye
dag snang nyid las 'khor bar ltung
phyogs cha gnyis las bral ba'o
sangs rgyas nyid las sems can te
sems can la yang sangs rgyas 'byung
rgyu nyid 'bras bur slong ba'i phyir
yang dag ye shes thugs nyid las
gsang ba'i ye shes 'od du gsal
sgron ma'i snang ba mtha' las 'das
rang rig ye shes brjod pas stong
stong pa'i ye shes 'gyur ba med
357
mtha' gnyis spangs pa rdzogs chen don
'gyur med snang ba rdzogs pa'o
gcig dang gnyis su med snang bas
yul du ma yin rang byung yin
bya btsal nyid dang rab tu bral
klong yangs don la mtha' yas pa'o
zhes seng ge rtsal rdzogs chen po'i rgyud las
seng ge rtsal chen gyi gnas lugs bstan pa'i le'u ste brgyad pa'o
@9
de nas bcom ldan 'das seng ge bzang po des
chos nyid rab tu 'byed pa'i ting nge 'dzin la snyoms par zhugs so
de nas skad cig la rigs bzhi'i sangs rgyas phyogs bzhi nas lhags nas 'di skad ces gsol to
e ma ho
kye kye bcom ldan 'das
bdag cag 'dus pa'i tshogs rnams la
rang snang dkyil 'khor bstan du gsol
ye shes rtags dang rab tu ldan
ming dang mtshan ma las grol ba'i
thabs chen yan lag bstan du gsol
ting nge 'dzin las rab tu bzhengs
de skad zhu ba phul ba dang
bcom ldan kun bzang seng ge des
ting nge 'dzin las bzhengs nas ni
rigs kyi sangs rgyas de rnams la
358
rdzogs pa chen po nyid kyi dbyings
snying po don gyi rig pa'i sku
sems can kun la yod pa'i don
rab tu gsang ba 'di gsungs so
kye ma sangs rgyas rig pa'i sku
nga yis bstan gyis nga la nyon
e ma ho rig pa'i ye shes nyid
sangs rgyas sems can thams cad la
'gyur ba med pa'i tshul du gnas
de yang gnas lugs 'di lta ste
cit ta rin chen gzhal yas dang
rin chen rtsa yi gzhal yas dang
rnam dag dung khang gzhal yas dang
bhri gu ta yi gzhal yas so
gzhal yas chen po de rnams na
rig pa'i ngo bo rtsal ltar snang
de yang bshad pa 'di lta ste
la la dag na sku ru gnas
la la dag na thig le ste
gcig la 'od zer tshul du gnas
gcig na lu gu rgyud du 'byung
de ni gnas pa'i mdo nyid bstan
sangs rgyas ye nas gnas pa'i don
sems can kun la gnas pa'i don
rgyal ba nyid kyis rab tu bshad
rig dang ma rig snang ba nyid
bya byed gnyis kyi mtha' las 'das
yangs pa nyid dang sku ltar 'phro
gsal ba nyid ltar sku ltar byung
stong pa nyid ltar zer ltar byung
359
sangs rgyas dang ni sems can gnyis
rig pa so so ma yin te
snang ba so so nyid du bstan
snang ba so sor ma gsal na
sangs rgyas pa la don go med
sku yi mtshan nyid 'di lta ste
'gyur ba med dang gsal ba dang
stong pa ngang ni rtog bral lo
rig pa'i mtshan nyid 'di lta ste
phra ba nyid dang 'phro ba dang
lu gu rgyud du 'gul ba'o
dbyings kyi mtshan nyid 'di lta ste
yangs dang lhun sdug gting mtha' yas
gsal dang drod dang bsil ba dang
yang zhing g.yo ba'i bdag nyid 'dzin
khyab dang mu khyud ra ba'o
ye shes mtshan nyid 'di lta ste
'byung dang byung dang rang gsal dang
ye dang shes dang rtogs pa'o
gsal dang 'tsher dang 'jam pa nyid
snang dang mun dang go 'byed pa
stong dang gsal ba'i ye shes mchog
gsang sngags mtshan nyid dag tu 'dod
e ma ye shes thabs la mkhas
kun mkhyen ye shes mdzod 'dzin pa'i
sangs rgyas kun gyi sprul pa'i sku
rdo rje sems dpa'i gsang mdzod ston
ye shes sku dang snang mtha' yas
ye shes chags pa mi mnga' yang
360
sems can blo yi snang ba rnams
gsal bar bya phyir rgyud 'di bshad
e ma sngags 'chang thugs rje che
'byung ba lnga yi dra ba nas
ye shes lnga yi snang ba shar
stong pa'i ye shes bdag med cing
gsal ba'i ye shes tshig las 'das
snang mtha' yas kyi zhing khams su
rig pa'i snang ba mthong bar 'gyur
rig pa'i ye shes rtog med nyid
yang nas yang du 'dris par bya
gsang sngags lam gyi ye shes nyid
chags pa med pa'i sa bon gsal
bcos pa med pa'i rang byung nyid
mtha' yas don la 'gyur ba med
sems can ye shes snang ba nyid
gsal dang mi gsal gnyis su med
chos dang chos min snang ba med
rtogs pa'i ye shes tshig las 'das
'das dang ma byon da ltar gyi
dgongs pa ji snyed yod pa de dag ni
rig pa'i ye shes snang ba yin
the tshom gnyis kyi rtog pa med
yul dang sems med dgongs par bstan
ye shes thabs la mkhas pa yis
rtsol sems gnyis su med pa la
rtsol sems gnyis kyi snang ba 'byung
dri med gsal ba'i dngos po ni
361
dper na man shel lta bur bshad
yangs pa'i ye shes tshig mtha' yas
stong pa'i ye shes 'grib pa med
'od gsal dkyil 'khor yar dag sku
rig pa'i ye shes 'od la ltos
rang snang thabs kyi rgyal po las
stobs kyi rig pa ma 'gags pas
sangs rgyas rnams kyi rig par bshad
ye shes don la rtog pa sangs
e ma ye shes sems dpa' nyid
sku yi snang ba kho na'o
kye ma klong yangs don rtogs na
yang dag ngo bo mthong bar 'gyur
gsang sngags gsang ba nyid la yang
rig pa'i ye shes thabs gsang bas
snang ba ngang gis med pa'o
stong pa nyid kyi ye shes las
gsal ba nyid kyi 'od zer byung
nga ni rig pa'i rgyal po la
yul rkyen dang ni dri ma med
e ma yangs pa'i snang ba kun tu 'bar
gsal ba'i ye shes thug pa med
don gyi ye shes gting mtha' yas
mthun pa'i ye shes rab snang bas
rtags kyi ye shes mthong bar snang
thabs nyid ma 'gags don nyid yangs
mtshan ma med pa'i rig pa nyid
'bras bu bcud lan shang lta bu
362
sna tshogs bskyed pa'i ye shes sku
rang gnas yin par nyid kyis bshad
thug pa med par kun tu rtogs
khab len rdol lcags 'du ltar
shes rab chen pos don rtogs na
rig pa'i snang pa thams cad sdud
e ma sku dang rig snang yang
rang byung nyid kyi cho 'phrul lo
shes rab nyid kyi snang ba mthong
rig pa nyid la rig pa med
ci phyir sna tshogs mtshon pa'i phyir
chags pa'i ye shes chu bzhin no
snang ba'i ye shes me bzhin no
bskyod pa'i ye shes rlung bzhin no
gsang ba thabs kyi yan lag nyid
nyi shu rtsa gcig dag tu bstan
ye nas ye shes rang gsal bas
dag pa'i ye shes mtha' dbus med
'byung ba nyid la byung ba med
rig pa nyid la byung ba yod
gsang sngags don gyi snying po la
tshig dang brjod pas don mi rnyed
sgron ma'i ye shes spyan gyi mchog
snang ba'i rig pa ngos bzung bas
snying po rig pa lu gu rgyud
dangs ma 'od lnga'i sgron ma mchog
shes rab rang byung khong nas gsal
ye shes sku nyid rnam par dag
snang ba med pa'i rang gsal ni
363
dri ma'i phyogs su ma lhung ba'o
so ma lhug pa rnal ma nyid
gnas pa'i dus na de bzhin no
rig pa'i gnas lugs rgyas pa ni
sems can kun la yang dag gnas
stong pa'i mu la mi gnas shing
gsal ba'i ngang la de bzhin gshegs
sangs rgyas nyid kyi snang ba la
rnam par rtog pa'i phyogs dang bral
ye nas rang bzhin dkyil 'khor nyid
ye nas rang bzhin 'od gsal bas
mun pa las ni snang ba 'byung
rang rig gnas nas bde gnas pa
shes rab tha snyad rnam par dag
g.yeng ba'i phyogs su ma lhung na
ye shes dri med mthong ba yin
lam la bcos su med par bstan
gzhi la bzang ngan med par bstan
chos la che chung med par bstan
gsang ba dang ni mngon sum pa
khyad med gcig tu de bzhin gshegs
sangs rgyas kun dang mnyam sbyor ba'i
rig pa'i ye shes rtogs dka' ba
rab tu gsang ba 'di bshad do
yang dag nyid las yang dag rnyed
dkyil 'khor nyid las dkyil 'khor 'byung
dgongs pa'i gnas lugs rgyas pa'o
kye ho ye shes lus kyi gzung
364
snang ba bas kyang mun pa che
kun nas mun pa snang bar 'gyur
'khor ba'i bag chags sbyang dka' ba
yang dag nges don 'di mthong na
skye ba med pa thob par 'gyur
rig pa'i ye shes lus las 'das
bag chags dag gis mi bsgrib pa
dben na sprul skog sgyur ba bzhin
skad cig tsam la mi bsgrib pa'o
bag chags dang ni rig pa gnyis
rang snang mthong ba'i khyad yod pas
ye shes don la rab tu gnas
gzung ba'i yul la de bzhin no
rtogs pa'i dus na de ltar med
rang snang rang gis snang ba'o
shes pa'i ngo la gang 'gyus kyang
ye shes rgyal po 'dzin pa med
rig pa'i rgyal po kun tu snang
sems ni sna tshogs sdud par byed
gsang sngags rgyal po thabs la mkhas
kye ma sangs rgyas dgongs pa ni
nang med nang nas nor bu rin chen mdzod phyung ba
'gro med 'ong med gnas su yang dag thim
bltar med sku las cho 'phrul sna tshogs 'byung
grogs med 'dug pas snang ba'i dkyil 'khor mthong
sangs rgyas nyid kyi ye shes rin po che
snang ba nyid dang gnyis med snyoms par bzhugs
365
thabs kyi zhags pas mkha' yi nyi zer 'dzin
ye shes zhags pas thams cad dbyings su sdud
bcom ldan mgon po de bzhin gshegs pa'i sku
snang ba'i dkyil 'khor du mar dbang bsgyur zhing
ye shes rol pa mkha' la nyi zer bzhin
snang ba'i cho 'phrul gcig tu ma nges te
'byung ba'i cho 'phrul cing yang ston par mdzad
ye shes sdud pa'i 'khor lo sna tshogs bskor
mtshon bral lung gi pad ma sna tshogs gsal
'byung ba'i rkyen bral chos nyid mkha' la rnam par rol
skye med chos sku gdod nas bsam dang bral
yin min the tshom sna tshogs ngang gis med
sangs rgyas rnams kyi dgongs pa'i thugs rje ni
'gro ba kun la rang bzhin ye nas khyab
gsang ba'i rig pa yul la snang gyur na
snang ba'i 'od lnga ma bu phrad pa'i tshul
ma yi snang ba bu la thim pa'i tshe
bya byed blo yi snang ba kun sangs te
'khrul rtog lung gi the tshom chod gyur nas
ye shes nyi zer kun tu snang 'gyur zhing
mtshan ma dngos po rab tu dengs par 'gyur
rnam rtog blo yi the tshom bral ba'i tshe
366
rig pa'i shes rab stobs su gyur nas ni
bsam bral ngang las de bzhin rnam par 'byung
snang ba med pas ye shes cir yang mthong
de tshe gsang sngags 'bras bu bcud dang ldan gyur nas
rig pa'i ye shes thug pa med par snang
de tshe rang gi dran pa sad nas ni
yul rkyen 'byung ba'i ngo bo rnam par dag
yangs pa'i grong khyer shel gyi khang bur gnas
tha snyad bral ba'i ye shes don la spyod
gsang sngags tshad ma'i snang ba mthong bar 'gyur
shes rab yul gyi snang ba rnam par dag
nga yi yin dang min pa'i shes pa ma zhugs na
zhag lnga dag na ting 'dzin thob par gsungs
yang dag nges pa'i lung chen 'di
de tshe snang ba sad gyur nas
ye shes mtha' pas 'byung bar gsungs
shes rab yul gyi snang ba rnam par dag
dmigs pa'i yul nyid dag pas na
ye shes thogs rdug med par 'char
ye shes nges pa'i gsang don 'di
snang ba du ma bu dum bu'i tshe
mkhas pas rab tu brtag par bya
shin tu 'phra dang 'gyu ba'i tshe
goms pas rab tu gnas par bya
'phrig dang 'bra dang 'gyu pa'i tshe
367
mthong bas rab tu gzung bar bya
zlum dang 'phra dang 'khril ba'i tshe
mkhas pas yengs med ting 'dzin brten
ltem dang mer dang sku yi tshe
goms pas snang ba mched pa bzung
yang dag kun tu snang ba'i tshe
mkhas pas snang ba bsdu bar bshad
chags dang zhen pa med pa'i tshe
mkhas pas gzung thabs shes par bya
gsang sngags goms pa'i mtshan nyid do
de nas ye shes bskyed pa'i tshe
'byung ba rnam lnga thim 'gyur nas
ye shes chags pa med pa de
snang ba'i yul du phyin pa'i tshe
'khrul med snang ba mthong gyur na
goms pas bden pa mthong bar 'gyur
'od snang zung 'jug lta bur bshad
lus dang lus med khyad par che
kye ma mkhas pas lus 'di nyid
de ltar shes na rtogs pa'o
yang dag nges pa'i lung las kyang
rab tu bshad pa 'di bzhin no
gsal ba ye shes kun tu snang
'byung ba'i ye shes thabs las byung
thabs mkhas don la ye shes skye
sangs rgyas nyid kyang thabs las byung
thabs med sangs rgyas 'ga' yang med
368
den dang rtags dang tha dad la
ye shes ngo bo 'gyur ba med
sems kyi snang ba tha dad kun
gcig gi ngo bor ma shes na
gsang sngags lam gyi gtan tshigs med
rig pa'i ye shes 'gyur ba med
rig pa'i snang ba kun tu snang
rig pa'i thugs rje kun la khyab
rig pa'i shes rab thug pa med
rig pa'i spyod yul cir yang snang
snga phyi med pa dus gcig 'char
rig pa'i snang ba gcig nyid la
sems can blo bsam ma nges pas
du ma tha dad dag tu rtogs
gcig gi ngo bor shes gyur na
thams cad snang ba mthong bar 'gyur
gcig dang gnyis su snang ba yang
sems can 'khrul pa nyid du bstan
sangs rgyas nyid kyi snang ba nyid
gcig las med par rgyal bas gsungs
gsang sngags kun gyi dgongs pa yang
de ltar shes na rab tu bsngags
rigs sngags dang ni gsang sngags dang
de bzhin gzungs sngags nyid las kyang
mdo don 'di ltar bshad pa yin
sangs rgyas mar me mdzad kyis kyang
dgongs pa 'di ltar rab tu bshad
369
rig pa'i gnas lugs de lta bu
kun gyi gsang don de bzhin no
zhes seng ge rtsal rdzogs chen po'i rgyud las
seng ge bzhugs thabs kyi dgongs pa bstan pa'i le'u ste dgu pa'o
@10
de nas rigs kyi rgyal po sangs rgyas sems dpa' dang bcas pa rnams kyis 'di skad ces gsol to
kye kye bcom ldan kun tu bzang
rang gnas rdzogs pa chen po yi
don gyi rnam pa gsung du gsol
de skad rab tu zhus pa dang
kun bzang seng ge'i rtsal gyis bka' stsal pa
kye ma rigs kyi sems dpa' dang
gtso bo nyid du bcas pa nyon
mtshan ma'i rdzogs chen tshig gnas kyang
yang dag rdzogs chen tshig las 'das
tshig dang yi ge'i rnam grangs rnams
sems can blo la snang ba yin
de yang don bkrol 'di lta ste
rdzogs chen seng ge rtsal sprugs la
mtshan mar snang ba'i yul med de
'on kyang sems can rtog pa la
blo dang yul gyi snang bar shar
e ma ho gsang ba'i theg pa ni
'byung bar shin tu dka' ba yin
des na khyod kyis legs par nyon
thabs la mkhas pa'i ye shes sku
370
'byung ba'i dri ma med par gsal
gsang dang mi gsang gnyis su med
rnam par bgyings pa'i ting 'dzin ni
gsang ba'i dkyil 'khor bsam yas so
dgongs pa'i don la rab gnas na
nyams kyi ting 'dzin skye bar 'gyur
sangs rgyas nyid kyi dgongs pa'o
theg pa 'og ma'i rigs rnams ni
rang snang ting 'dzin ma shes par
phyogs gcig dag la gnas pa'o
ye shes chen po'i snang ba nyid
phyogs su bltas pas grub pa med
dper na nor bu rin chen ltar
zad pa med pa'i yon tan 'byung
de bzhin rig pa'i sku mthong na
yon tan sku la bsam mi khyab
sangs rgyas rnams kyi ye shes lnga
nyi zer bzhin du rab tu 'phro
snang dang mi snang tshig las 'das
rig pa'i ye shes don rtogs na
'khor ba'i sdug bsngal ji snyed pa
thams cad rang snang nyid du grol
dper na chu dar 'thags pa bzhin
chu nyid bkad kyi rang bzhin pas
sna tshogs thabs kyis spun du 'gyur
de bzhin rang rig 'od gsal bas
sna tshogs mtshan ma ci 'phros kyang
thams cad rang gi ngo bor grol
dper na gser 'gyur nyid kyi rtsi
371
rtsi btang nor gyi dbyig 'grub ltar
rig pa'i ye shes rang snang la
gdams ngag don gyis thebs gyur na
rig pa'i rang 'od mthong nas don chen 'grub
sa dang lam dang tshogs med pas
byas pas mthong bar mi 'gyur ro
ye shes byung tshul drug ldan pas
snang ba'i rtsal la drug tu 'byung
snang ba'i lam la lngar gnas pas
'jug pa'i lam la lnga ltar byung
'khrul pa'i dus ni gcig ltar 'gyur
gnas pa'i dus ni gsum ltar gnas
rtogs pa'i dus na gnyis ltar rtogs
ldog pa'i dus na gsum ltar ldog
snang ba'i dus na lnga ltar snang
grol ba'i dus na gcig ltar grol
de ni gnas pa'i ye shes so
dang po byung sa ma shes na
tham ldog pa'i skyon du 'gyur
bar du gnas sa ma shes na
nyams blangs phyogs gcig stong par 'gyur
tha ma'i 'gro sa ma shes na
rang rig snang ba stong par 'gyur
de nas bskyal sa ma shes na
rig pa'i ye shes brdug par 'gyur
de la dbye ba ma shes na
snang ba cha mi phyed par 'gyur
rang gi snang ba ma shes na
gnas skabs bzhi la ldog par 'gyur
372
snang ba'i 'char tshul ma shes na
ye shes ma bu 'dzol bar 'gyur
de nas rang yul ma shes na
'khor ba dpyad thag chad par 'gyur
bden pa rtse gcig ma shes na
rang snang yul la the tshom 'gyur
de ni snang ba'i skye tshul lo
e ma ho
rtogs pa'i shes rab mkha' la gsal
ma rtogs shes rab gting na gsal
shes rab ye shes rnam par dag
rig pa'i ye shes rtogs par dka'
dper na sbrib shing nor bu ltar
snang ba'i ye shes lus kyis bsgribs
rtogs pa'i ye shes snang ba ni
gzhi la gnas dang lam la 'char
de bzhin mtha' la skyol ba'o
gzhi la gnas pa'i rig pa ni
ye shes dbyings na sku gsum rdzogs
dper na rma bya'i sgo nga bzhin
nang 'od ye shes gsal bar bstan
lam la 'char ba'i rig pa ni
dper na 'ja' tshon lta bur bstan
mtha' la skyol ba'i rig pa ni
dper na rma bya'i phru gu sgo nga nas
brdol te don pa lta bu'o
snang ba drug gi phyogs dag nas
ye shes gnas lugs che chung tshad
rab tu bshad pa 'di lta ste
dga' ldan rnams la khru gang tshad du gnas
373
rtsod ldan rnams la sor gzhir gnas
cha mnyam rnams la tshon gang ngam
myos ldan rnams la rang gsal tsam
bkres ldan rnams la til 'bru tsam
sdug bsngal ldan la rta rnga tsam
de bzhin rab tu gnas par bshad
sangs rgyas rnams la dpag tu med
byang chub sems dpa' mda' gang ngo
sprul pa'i sku la mtho gang gnas
sangs rgyas byang chub sems dpa' dang
sprul pa'i sku dang lha rnams la
mngon sum yul la snang ba'o
de rnams man chad yul rnams la
ma bstan mthong 'ong bar mi 'gyur ro
gnas lugs drug la gnyen po drug
gnyen po drug gis ye shes bsgribs
de la gnyen po rnam drug gis
de yi rtsal nyid 'joms ma nus
yang dag gnyen po chen po ni
dbyings rig thabs kyi man ngag go
sems can blo yi snang ba nyid
du mar snang zhing sna tshogs sdud
the tshom med par ma shes na
snang ba tha dad gzhan du 'gyur
gsang ba'i ye shes ye gnas pas
de la gnyen pos bshig tu med
rgyu dang rkyen la rag ma lus
ye nas rang rig 'od gsal bas
mun pa'i phyogs kyis nga mi bsgrib
374
rang rig ye shes gting zab pas
snang ba'i phyogs kyis nga mi mthong
mun pa snang ba'i mtshams shed na
rang byung ye shes 'od gsal pa
sus kyang mi rnyed rin chen ltar
rnyed na yon tan sna tshogs 'byung
snang ba dang ni mun pa gnyis
gnyis gsang la sgrib par byed
rig pa'i don la mun snang med
sangs rgyas kun gyi la ma rtogs phyir
rtogs pa'i ye shes spyod yul ldan
rig pa'i snang ba rang gsal ba
ye nas gnas pa'i yul nyid las
so sor 'byung zhing rtogs pa'o
e ma ho
snang ba'i phyogs dang mun pa'i phyogs
gcig dang gnyis su ma yin te
sems can rtog pa ma zad par
theg pa'i mtha' la zad mi 'gyur
snang ba'i ye shes rtogs dka' bas
theg pa'i grangs las mi 'byung ste
rang gi don yang de bzhin no
snang ba rnam pa lnga nyid las
mun pa lnga yi cho 'phrul ston
ngo bo lnga yi 'byung tshul ston
phra rags lnga yi dri mas bsgribs
mthong bas goms pa'i rang rig la
bya btsal med pas rang byung mthong
rab rib dri ma gnyis su med
phyogs dang ris su med mod kyang
snang ba'i ye shes ma mthong na
375
yang dag nges don rtogs mi 'gyur
thig le nyag gcig chos kyi sku
tshig med yul gyi 'dzin pa med
chos nyid rtogs pa'i yul las 'das
gsang ba'i ye shes mtha' yas kun
rang rig dkyil 'khor de bzhin gshegs
sangs rgyas nyid las 'od byung bas
sems can rnams rnams kyi snang bar 'gyur
goms pas rig pa gcer bur 'byung
rtogs pas snang ba sku ru 'gyur
ma rig pa yi rkyen rnams kyang
rtogs na ye shes ngo bo nyid
snying po 'dus pa'i nges pa yis
rig pa'i ye shes ngos 'dzin pa'o
sku nyid bstan pa'i theg pa rnams
rang gi rig pa nyid la rdzogs
gsang sngags ye shes mngon sum pa
da lta yul du ma yin pas
dang po gcig las med pa la
de nas brtags pas gnyis su byung
de yang rgyu la khyad med pas
snang ba so sor byung ba'o
gnas pa'i dus dang rtogs pa'i dus
ngo bo gcig la rtsal snang ba'o
e ma rig dang ma rig thams cad kun
rtsal dang snang ba nyid du bstan
ye shes don la gnyis med pas
snang dang mi snang gnyis su med
ye shes lam la 'gyur med pas
376
gol ba dang ni sgrib pa med
ye shes rkyen med snang ba la
byang chub sems kyi rtags snang ba
spros pa med pa'i dbyings nyid las
'od gsal thogs med rig pa byung
snang ba'i dus na 'od snang ste
rtogs pa'i dus na rang snang ngo
goms pa'i dus na sku ru 'gyur
shes rab thabs dang 'brel pa yis
don dam dkyil 'khor rnam lnga mthong
mdzod kyi snying po bstan pa ni
kun gzhi chos 'byung chen po'i mdzod
rig pa'i ye shes gong bur gnas
snang ba 'dzin med yul gyi mdzod
rig pa'i ye shes dbyings su gnas
gsang 'dus rin chen zur brgyad mdzod
rig pa'i ye shes yab yum tshul
srog 'dus rin chen gzer bzhi'i mdzod
rig pa'i ye shes thig ler gnas
don 'khyil bhan dha'i gzhal yas mdzod
rig pa'i ye shes khro skur gnas
'gag med gsal ba'i sgo gnyis mdzod
dbyings dang lu gu rgyud du gnas
stong pa mtshan bral nam mkha'i mdzod
rig pa'i ye shes 'od du gnas
de ni gsang ba'i mdzod du bstan
'gyur med rang byung sku yi mdzod
chags med rnam dag gsung gi mdzod
377
rtog med bsam bral thugs kyi mdzod
mdzod gsum rin chen lde mig stor
de nas rang rig gtso bo des
thabs mkhas man ngag mgar ba btsal
de nas lcags btsal lde mig brdungs
nges pa gnyis kyi lde mig gis
ye shes gsal ba'i mdzod phye bas
nor gyi phul du rin po che
yon tan gang ltar bsam pa 'byung
yon tan nor bu rin chen de
gang du bzhugs pa'i sa phyogs su
ci bsam thams cad gser du 'gyur
yon tan gter chen rab zab pas
thugs ni dri med rab gsal lo
yon tan 'gag med kun tu 'byung
sna tshogs ye shes don du sbyor
'dus pa'i dus na thig le ste
gyes pa'i dus na 'od du shar
sangs rgyas 'od mi 'gyur ba nyid
thugs kyi dkyil na rab gnas pas
rang bzhin gsang ba chen por bshad
mtshon pa'i dpe yis rab bstan pas
thugs kyi ye shes mthong bar 'gyur
gsang ba ye nas don gnas pas
de ni thugs med smra bsam 'das
thig le gcig la sku ltar shar
ye shes lta bu ma yin te
sgyu ma'i dkyil 'khor lta bur snang
the tshom blo dngos gnyis med pas
378
snang ba lam gyi ye shes gsal
kun gzhi yul gyi snang ba nyid
rtogs pa'i ye shes rab tu bstan
bskyed pa med cing rdzogs pa med
bskyed rdzogs gnyis dang bral ba'o
e ma ho
don dam theg pa rab bshad pa
mtshon bral dkyil 'khor rnam par dag
brjod med tshig gis snying po bstan
rgyud kyi rgyal po 'di nyid las
rab tu gsal bar bstan pa 'di nyid do
gsang sngags blta ba'i don bstan pa
ye shes rtogs pa khyad par che
theg pa gsum gyi dbu 'dren la
ye shes lung gi khyad par te
gnas pa'i 'khor lo nyid bstan pa
gsang sngags thugs kyi 'khor lo dang
snang ba yul gyi 'khor lo dang
rtsol bral theg pa'i 'khor lo ni
yang dag lung gi 'khor lo bstan
rgyud dang lung dang man ngag kyang
gud na yod pa ma yin te
rig pa'i ye shes nyid du bstan
rgyud kyi rgyal po bshad du med
lung gi dngos po rtsol ba bral
man ngag dngos po don la 'brel
rang rig rtsa ba'i rgyud chen ma shes na
sems can rtsol bral dgongs pa thob par ga la 'gyur
thams cad tshig la yan pas don la thug pa med
379
'gyur med rtsa rlung ma shes na
sems can tshig la rten 'cha' bas
lung la thug pa med par 'gyur
stong pa'i shes rab ma shes na
chos la thug pa med par 'gyur
dbyings dang rig pa ma shes na
don la thug pa med par 'gyur
snang ba chos skur ma shes na
dkyil 'khor thug pa med par 'gyur
'gyur med ka dag ma shes na
sku la thug pa med par 'gyur
'khrul bral rtog sangs ma shes na
thugs la thug pa med par 'gyur
grag stong 'dzin med ma shes na
gsung la thug pa med par 'gyur
rang byung ye rdzogs ma shes na
yon tan thug pa med par 'gyur
ma btsal lhun grub ma shes na
phrin las thug pa med par 'gyur
snang ba cig chod ma shes na
lta ba thug pa med par 'gyur
ri bo cog bzhag ma shes na
bsgom pa thug pa med par 'gyur
'gag med shugs 'byung ma shes na
spyod pa thug pa med par 'gyur
lu gu rgyud du ma shes na
'bras bu thug pa med par 'gyur
stong gsum rgyas 'debs ma shes na
dam tshig thug pa med par 'gyur
380
rang byung gzhi rdzogs ma shes na
dbang la thug pa med par 'gyur
chos nyid spros bral ma shes na
dbyings la thug pa med par 'gyur
dmigs med zang thal ma shes na
chos sku thug pa med par 'gyur
'gag med cig char ma shes na
longs sku thug pa med par 'gyur
sna tshogs gcig sdud ma shes na
sprul sku thug pa med par 'gyur
sems dang rig pa ma shes na
sangs rgyas thug pa med par 'gyur
yid dang shes rab ma shes na
rtogs pa thug pa med par 'gyur
kun gzhi chos sku ma shes na
gnas la thug pa med par 'gyur
sangs rgyas sems can ma shes na
gzhi la thug pa med par 'gyur
'byung ba dangs snyigs ma shes na
lam la bzang ngan med par 'gyur
e ma ho
sangs rgyas nyid kyi mdzad pa ni
ci yang ma yin cir yang grub
sems can snang ba dmigs pa ni
spangs pas spong par mi 'gyur te
spang bya spong byed gnyis med na
rang byung rig snang mthong bar 'gyur
yang dag nyid kyi sangs rgyas sku
phyi na med de nang na med
phyi nang med de rtsis las 'das
thig le nyag gcig rtsis las 'das
381
thig le nyag gcig chos min sku
snang ba'i ye shes 'od gsal bas
stong pa nyid las ye shes 'byung
gsang sngags bdag po a li ka
a ni rab tu brtan gyur pas
kun gyi gzhi la gnas par bshad
a ni yig 'bru kun gyi gtso
sha la sogs pa'i yan lag lnga
rab tu brtan pa 'dir bshad bya
sems can blo yi snang ba nyid
sangs rgyas nyid kyis bstan pa'i phyir
a la sogs pa'i yi ger bshad
yan lag lnga ldan yi ge a
skye med sku yi rang bzhin bstan
yi ge a nyid gsal gyur na
chos rnams kun gyi spyan du 'gyur
a yi mtshan nyid rab rtogs na
lhag pa'i ting 'dzin rtse gcig thob
de nyid don snang yi ge rnams
a la thams cad rdzogs pa'o
gsang sngags gsang ba'i yi ge ste
yan lag bshad kyis mi langs te
bsdus don yi ge a la 'dus
snang ba'i dus na 'ong ltar snang
rtogs pa'i dus na sku ltar rtogs
gsang sngags nges pa bstan pa ni
gcig dang du ma ma yin te
snang ba gcig la don rnams ni
so so tha dad dag tu 'byung
382
kye ma klong yangs bcom ldan 'das
'gro ba'i mgon po 'od dpag med
thugs rje thabs kyi spyan mnga' bas
skye med snang ba'i dkyil 'khor la
rang snang thabs kyi zhags pas bzung
gsang ba'i ye shes 'od la 'jug
mthun pa'i ye shes sku ltar shar
snang ba'i ye shes yul la snang
gsang sngags theg pa rnams kyi mdo
snang 'dus don gyi the tshom gsal
rtogs dang ma rtogs tshogs drug dang
rim rtsol blo yi theg pa rnams
dpyad yang don med ne tso bzhin
btang snyoms lteng po'i mun par 'gyur
bltas kyang phyam chad yal bar 'gyur
gsang sngags dgongs don de bzhin no
zhes seng ge rtsal rdzogs chen po'i rgyud las
seng ge rnam par bsgyings pa'i dgongs pa bstan pa'i le'u ste bcu pa'o
@11
de nas yang bcom ldan 'das dpal kun tu bzang po nyid
chos nyid zab mo 'dus ma byas pa'i ting nge 'dzin la snyoms par zhugs so
de nas yang rigs kyi sangs rgyas rnams kyis 'di skad ces gsol to
kye kye bcom ldan seng ge'i bdag
ting nge 'dzin las rab tu bzhengs
bdag cag rjes mthun sangs rgyas la
383
yul sems gnyis su med pa yi
dgongs pa'i nges don rab tu gsungs
de nas bcom ldan kun bzang yab
ting nge 'dzin las bzhengs nas ni
rigs kyi sangs rgyas rjes mthun pa
gsang ba'i tshig don legs gsungs pa
e ma sangs rgyas sems dpa'i rigs
don gyi dgongs pa ngas bstan gyis
legs par zung zhig rdo rje 'chang
yul la rtogs byed mi snang bas
sems kyi 'dzin pas nga mi bsgrib
ye shes chos las 'das pas na
sna tshogs blo yis nga mi bsgrib
snang yul gnyis su mi 'dzin pas
rnam shes brgyad kyis nga mi bsgrib
sangs rgyas sems can mi 'byed pas
bzang ngan gnyis kyis nga mi bsgrib
stong gsal gnyis su mi 'byed pas
bying rgod gnyis kyis nga mi bsgrib
bya byed gnyis su mi 'dzin pas
theg pa'i rtsol bas nga mi bsgrib
rtogs dang ma rtogs gnyis med pas
yin min gnyis kyis nga mi bsgrib
shes dang ma shes gnyis med pas
blo dngos gnyis kyis nga mi bsgrib
phyogs dang ris su mi 'dzin pas
dgra gnyen gnyis kyis nga mi bsgrib
384
mtha' dang dbus su mi 'byed pas
gol sgrib gnyis kyis nga mi bsgrib
gsang dang mi gsang gnyis med pas
sdug bsngal nyid kyis nga mi bsgrib
rig dang ma rig gnyis med pas
mun dang snang bas nga mi bsgrib
dug lnga ye shes gnyis med pas
'dzin rtog gnyis kyis nga mi bsgrib
phyi dang nang du mi blta bas
'byung ba'i rkyen gyis nga mi bsgrib
tha dad gcig tu mi 'byed pas
gcig dang du mas nga mi bsgrib
'das dang ma 'das mi rtog pas
'khor 'das gnyis kyis nga mi bsgrib
gsal 'grib gnyis su mi 'dzin pas
yengs dang rmugs pas nga mi bsgrib
e ma ho
rin chen rnam dag byang chub sems
bskyed pa mi mnga' rang la rdzogs
rdzogs pa ma yin ye nas don
bskyed rdzogs gnyis kyi mtha' dang bral
'gyur ba ma yin drang por gnas
bsgyur ba ma yin lhun gyis grub
gsang sngags don la de bzhin gshegs
tshig gcig bstan pas don rnams go
snang ba mkha' klong gnyis su 'dus
sems nyid dkyil 'khor bsam mi khyab
rig pa thug phrad ye shes don
385
snang ba thug phrad dgongs pa'i don
dkyil 'khor yid bzhin 'byung ba'i gter
rgya mtsho las ni rlabs bzhin du
bder gshegs thams cad sku las 'byung
don dam dkyil 'khor bsam yas klong
ye shes dkyil 'khor kun tu 'byung
mtha' yas dkyil 'khor 'gyur ba med
sems dang rig pa mi shes shing
snang ba'i yul la zhen gyur na
thar lam byang chub ring bar bshad
ye shes rtse gcig ma shes shing
chos la rtsol ba'i phyir 'brangs na
rtogs par mi 'gyur yun ring gnas
sangs rgyas dgongs pa gcig pu nyid
sems can blo yi nad mang yang
theg pa gcig las med par gsungs
theg pa gcig gi ngo bo ni
rang rig gtan la 'bebs par bshad
gsang ba'i ye shes don gyi sku
don dam ye shes lhun gyis grub
gsang don sku la phra rags gsal
theg pa'i mtha' ni gcig gam gnyis
du ma med par rgyal bas gsungs
yi ge gcig dang theg pa gcig
rig pa gcig tu thams cad 'dus
yi ge rnams kyi rang bzhin ni
yi ge a la rdzogs par bshad
386
theg pa rnams kyi rang bzhin ni
a ti nyid la rdzogs par bshad
rig pa nyid kyi dngos po ni
lu gu rgyud la yod par bshad
thabs mkhas ye shes thugs rje can
'gro ba rnams kyi mgon gyur pas
gsang 'dus theg pa'i spyi bor bshad
a ti shin tu ngo mtshar che
des ni yang dag don rtogs 'gyur
thams cad thar lam 'thob par 'gyur
skye med chos sku rnyed pa'o
e ma a 'bri rab tu gsal
thig le klong las 'das
mtshan ma'i yul med pas
snang ba 'od du gsal
ye shes mkha' la khyab
rang byung rtog mtha' chod
dgongs pa'i don la gnas
thugs rje'i nyi zer ldan
thams cad kun la snyoms
ye shes rnam par dag
phyogs bral rgya chad med
mtshan med dngos snang yin
gsal 'tsher lhun sdug ldan
snang med mkha' la gsal
yul med gcig pu nyid
don dam yangs pa che
thogs med rlung gis bskyod
cig char don la 'jug
mtha' yas gcig tu sdud
rgya che gting zab cing
zad med nor bu ltar
dgos 'dod sna tshogs 'byung
yin min rtsis las 'das
387
'byung ba'i shes rab che
gsal ba'i snang ba che
rang snang goms pa che
srid pa dus gcig rdzogs
mtha' yas kun tu chub
thugs rjes thabs mkhas spyod
rang snang dkyil 'khor ston
dmigs pa'i yul las 'das
bsam 'das dngos pos stong
shes rab don la dpyod
stong pa nyid kyi sku
'dzin rtog yul las 'das
me long gzugs brnyan bzhin
gza' gtan chos dang bral
gnyis med rang sangs rgyas
bsgrub med gcig pu nyid
phyi nang gnyis ka med
rnam dag dgongs pa che
stong pa'i mu mtha' bral
rang byung bcos pa med
'dzin chags gnyis dang bral
gsang ba'i don la 'jug
mthun pa'i yul du snang
byas pa ma yin te
byung bar lhun gyis grub
tha snyad tshig las 'das
kye ma yang dag bsgrub med gcig pu nyid
mkha' la nyi shar 'dra
dri med bsam las 'das
thog med dus kyi cho
sangs rgyas mar me mdzad
sku dang 'od star snang
shes bya'i yul du med
chos sku brjod dang bral
longs sku spros dang bral
sprul sku 'dzin dang bral
388
ngo bo nyid kyi sku
bsam med yul las 'das
bsam pa dngos bral sku
theg chen zung du 'brel
phyi nang kun gyi sku
dngos po'i yul las 'das
stong gsal rig pa'i sku
bsam yas brjod du med
rdo rje snying po'i sku
yul sems gnyis su med
snang ba ka dag sku
'byung ba'i rkyen dang bral
gsang sngags thabs mkhas nyid
kun gyi snang bar 'dod
yangs pa chos nyid sku
re dogs gnyis dang bral
brdal ba dbyings kyi sku
yangs dog gnyis dang bral
gsal ba'i shes rab sku
snang rung ming dang bral
gcod pa thogs med sku
ngang du ma yengs gsal
rdo rje 'chang gi sku
thogs med kun tu rgyu
skye shi gnyis dang bral
stong pa rdo rje'i sku
mtha' dbus gnyis su med
rnal 'byor don gyi sku
g.yeng ba'i bdud dang bral
dmigs med zang thal sku
phyogs cha kun dang bral
gzi brjid 'od 'bar sku
mtshon ma'i chos dang bral
mnyam nyid stong pa'i sku
gzung 'dzin gnyis dang bral
brtan pa ri bo'i sku
spro bsdu gnyis dang bral
kun 'byung nam mkha'i sku
389
tha snyad chos dang bral
sra mkhregs rdo rje'i sku
'jigs pa kun dang bral
thig le snang ba'i sku
dbyings dang yul las 'das
rdo rje mtshon cha'i sku
thogs med kun tu rgyu
e ma snang ba 'od po che
gting gi mun pa sel
rig pa thogs pa med
don gyi snying po mthong
dper na rlung dang mtshungs
chos dbyings spros bral nyid
nam mkha' sprin dengs 'dra
mtshan nyid lnga ldan pas
so so'i don rtogs 'gyur
ye shes rang snang nyid
'byung ba'i phyogs dang bral
mtha' yas gcig tu snang
don dam kun rdzob gnyis
gcig dang du mar med
sa dang lam med pas
ye shes 'dzin chags bral
stong pa bdag med sku
dbyings dang rig par gsal
sangs rgyas snang ba ni
don gyi stong gsal ldan
'gyur med thig le'i sku
don dam 'gyur ba med
yang dag mtha' yas nyid
phyogs dang ris su med
rtog med snang ba sangs
yul sems gnyis su med
sku gnyis mthar phyin pas
ye shes don la zhog
stong pa chos nyid sku
'dzin pa'i phyogs dang bral
390
rtog med dkyil 'khor nas
ye shes sku shar ba
snang sems yul dang bral
rdo rje sems dpa' las
sprul pa'i tshogs byung bas
sems can rtog pa sel
bag chags sgyu lus las
rig pa'i sku byung bas
rang gsal 'dzin med skyes
'byung ba nam mkha' las
lu gu rgyud shar bas
kun gyi ngo bor 'gyur
yang dag rig sku las
ye shes don gsal bas
rnal 'byor don chen 'byung
chos lnga rang snang bas
snang ba thug phrad byung
de ni mkhas pas thabs su bstan
de las med par gsungs pa'o
e ma ho
nang med nang nas ye shes gter byung bas
'byung ba'i ye shes snang ba kun las 'das
rtogs pa'i shes rab don la rnam par bsgyur
yangs pa'i sku la phyi nang kun gsal zhing
sku gsum don la mthar phyin chog chod pa
stong pa'i ngang las sku ltar 'char
gsal ba'i ngang las shes rab mnyam nyid rdzogs
skye 'gag med med pa'i nor bu rin po che
sems dang bral ba'i chos nyid rang ga ma
don dam kun rdzob gnyis kyang mtha' dang bral
sangs rgyas gsang bar dam pas rab bsngags pa
391
rig pa'i rgyal po ye shes nyi zer gyis
sems can blo yi rtog pa'i mun pa rab tu bsal
thogs med gsal ba'i mar me bsam pa kun dang bral
thams cad mkhyen nyid chos sku'i spyan dang ldan
snang ba'i ye shes rtog mtha' rab tu spangs
tha snyad gnyis dang bral ba'i chos sku byang chub la
dri ma'i skyon dang snang ba'i phyogs cha med
sangs rgyas lus kyi rgyan bzang ba
sems can kun gyi snang bar 'gyur
chos dbyings phyogs su ma lhungs pas
rig pa'i ye shes kun tu snang
dngos po blos brtags chos can dang
ngo bo rang gnas dgongs pa gnyis
rkyen phyir ma yin kun tu snang
blo yi theg pa grangs mang yang
dngos po'i don nyid mthong ba med
snang ba'i ye shes phyogs med pas
ci yang ma yin lhun gyis grub
so sor ma yin gcig tu gnas
byas pa ma yin skye 'jig bral
de yang lta spyod sgom par bshad
re re nyid la gsum gsum ste
ngo bo nges tshig dbye ba dang
rnam pa gsum du kun tu grags
lta ba'i ngo bo mthong bar bshad
lta ba'i nges tshig go bar bshad
392
dbye ba nges pa med par bstan
de yang 'dod pa 'di lta ste
chos nyid yul gyi lta ba dang
spyod pa thabs kyi lta ba dang
rang rig rgyun gyi lta ba dang
ma nor lung gi lta ba'o
chos nyid yul gyi lta ba ni
chos nyid dang ni chos can no
spyod pa thabs kyi lta ba ni
sgron ma nyid kyi lta stangs so
rang rig rgyun gyi lta ba ni
rig pa ye shes snying po de
ye nas yod par bstan pa'o
ma nor lung gi lta ba ni
rdzogs chen a ti yo gar bstan
des ni lta ba'i don nyid bstan
spyod pa la yang don gsum ste
spyod pa'i ngo bo mi chags pa
nges tshig 'dzin pa thongs par bstan
dbye ba nges pa ma yin te
'on kyang gsang don 'di lta ste
'dzin med yul gyi spyod pa dang
rang snang thabs kyi spyod pa dang
zhen med chags bral spyod pa dang
stong pa lam gyi spyod pa dang
rtsol med snang ba'i spyod pa dang
brtul zhugs dbang gi spyod pa dang
'dzin med 'khor ba'i spyod pa dang
rnam pa bdun du grags pa'o
'dzin med yul gyi spyod pa ni
dper na smyon pa lta bur bstan
rang snang thabs kyi spyod pa ni
dper na ri dags lta bur bstan
393
zhen med chags bral spyod pa ni
dper na bu chung lta bur bstan
stong pa lam gyi spyod pa ni
rgya mtsho gza' skar lta bur bstan
rtsol sems snang ba'i spyod pa ni
glang chen smyon pa lta bur bstan
brtul zhugs dbang gi spyod pa ni
dper na stag mo lta bur bstan
'dzin med 'khor ba'i spyod pa ni
nam mkha'i mdud bskor lta bur bstan
sgom pa la yang don gsum ste
sgom pa'i ngo bo mi rtog pa
nges tshig 'du 'phro chod par bstan
dbye ba'i don la ma nges kyang
gsang ba'i don la 'di ltar gsungs
rnam rtog rgyun gyi bsgom pa dang
stong nyid mtha' med bsgom pa dang
mtshan ma gzung 'dzin bsgom pa dang
gzung 'dzin gsal bar bsgom pa dang
rtsol bral bzhag thabs bsgom pa'o
rnam rtog rgyun gyi bsgom pa ni
dper na sbre'u lta bur bstan
stong pa mtha' med bsgom pa ni
bya long nam mkha'i mtha' 'tshol 'dra
mtshan ma gzung 'dzin bsgom pa ni
me la chu ru bsgyur ba 'dra
gzung 'dzin gsal bar bsgom pa ni
'bangs kyis rje ru 'chos pa 'dra
gzhag thabs rtsol bral bsgom pa ni
394
dper na seng ge lta bur bstan
de bzhin lta sgom ye gnas don
sus kyang mthong ba ma yin te
rang rig thabs kyis go bar bstan
e ma ho bde gshegs dgongs pa nyid
gsal ba'i 'od dang sku yi mkha'
gsung gi zer gyis kun tu khyab
byang chub sems dang rdo rje'i bdag
skye ba'i snang ba ma yin te
yul gyi rkyen dang rnam par grol
phyogs cha ma yin lhun gyis grub
bya ba dang ni byed pa rnams
snang ba goms pa'i phyogs su blta
rig pa mun pa'i phyogs nas blta
ma rig snang ba'i phyogs nas blta
ye shes stong pa'i phyogs nas blta
'od snang sku yi phyogs nas blta
chos nyid dngos po'i phyogs nas blta
chos can dngos med phyogs nas blta
'khor ba stong pa'i phyogs nas blta
myang 'das nyon mongs phyogs nas blta
snang ba mun pa'i phyogs nas blta
mun pa snang ba'i phyogs nas blta
e ma ho sangs rgyas ye shes sku
kun snang dang ba'i dkyil 'khor ston
thabs nyid las ni ye shes sku
dus dang mtha' la mi gnas shing
phyogs cha'i snang ba ma yin te
395
sems dang ye shes bag chags dngos ma yin
ye shes bag chags kun dang bral gyur kyang
sems kyis sna tshogs bag chags sdud par byed
sems dang ye shes gnyis su ma phye na
snang ba yul gyi rtsa ba mi chod pas
rkyen bral chos nyid kun gyis rtogs par dka'
de yang yang dag don dam nyid du bstan
sems dang ye shes sna tshogs rkyen dang bral
yin min gnyis kyi snang ba'i phyogs med pas
tha snyad gnyis la nga yi chos mi gnas
yang dag dkyil 'khor bsam gyis mi khyab ste
chos kyi sku la rnam rtog ming med kyang
'dzin pa'i yul la bag chags skye med kyang
sku dang ye shes snang ba'i phyogs med ltar
snang ba'i ye shes gtan tshigs kun dang bral
chos sku nyid la bsam gtan ye nas gnas
mtshan ma nyid la mtshan ma nyid gnas pas
grol lam mi thob rtag tu yun ring gnas
rtogs pa'i ye shes skye tshul de bzhin no
zhes seng ge rtsal rdzogs chen po'i rgyud las
snang ba'i seng ge bstan pa'i le'u ste bcu gcig pa'o
@12
de nas yang rigs kyi sangs rgyas rnams kyis bcom ldan 'das dpal kun tu bzang po la 'di skad ces gsol to
396
kye ma bcom ldan dgongs pa'i bdag
ye nas gnas pa'i gsang sngags don
rab tu bshad pa ji ltar don
gzhi yi ye shes rang snang ba
lam gyi ye shes thug pa med
'bras bu'i ye shes rgyu mthun snang
de ni go ba'i dus yin pas
nges par gtan la phebs ma phebs
mos pa'i 'khor la bstan du gsol
'khor gyi tshogs kyis de skad zhus
de nas kun bzang seng ge des
mos pa'i 'khor la bka' stsal pa
kye ma rigs ldan sangs rgyas nyon
sangs rgyas rnams kyi mdzad pa ni
sna tshogs cir yang mdzad pa ste
don gyi dgongs pa gcig las med
sangs rgyas rnams kyi sku dang ni
gsung dang thugs kyi dkyil 'khor dang
yon tan phrin las lnga ltar snang ba'o
de rnams la yang gsum gsum ste
ngo bo dang ni nges tshig dang
rab tu dbye na mchog tu gsungs
de yang bshad pa 'di lta ste
sku yi ngo bor 'gyur ba med
sku yi nges tshig gsal 'tsher ldan
dbye na rnam pa gsum du bstan
chos sku longs sku sprul skur bshad
chos sku'i mtshan nyid bsam pa bral
397
longs sku'i mtshan nyid gsal rtog med
sprul sku'i mtshan nyid sna tshogs ston
gsung gi don nyid 'di lta ste
gsung gi ngo bo grags pas stong
gsung gi nges tshig sna tshogs 'byung
dbye ba rnam pa drug gis bstan
sangs rgyas mdzad pa'i gsung dang ni
tshangs pa lha yi mchog gsung dang
'gro drug 'khrul pa'i rang skad dang
sems can mos pa'i 'dul skad dang
gsang ba yul gyi brda' skad dang
grags pa sna tshogs gsung du bstan
de ni gsung don rgyas pa'o
thugs kyi ngo bo 'khrul pa med
thugs kyi nges tshig bsam par snang
dbye ba rnam pa gsum nyid bstan
thugs kyi dran pa sangs ba dang
rdo rje 'gyur med bstan pa dang
sna tshogs pa yi thugs su bstan
yon tan la yang rnam gsum ste
yon tan ngo bo thams cad bskyed
yon tan nges tshig sna tshogs 'grub
dbye ba rnam pa gsum nyid bstan
gzhi la gnas pa'i yon tan dang
lam la snang ba'i yon tan dang
mtha' la skyil ba'i yon tan no
phrin las la yang don gsum ste
398
phrin las ngo bo grub par byed
phrin las nges tshig bya ba byed
dbye ba rnam pa bzhis bstan pa'o
e ma ho
zhi ba dang ni rgyas pa dang
de bzhin dbang dang drag por bshad
zhi bas chos nyid dbyings su sdud
rgyas pas sna tshogs ngo bor ston
dbang gis ma smin smin par byed
drag pos thams cad tshar gcod pa'o
de yang thams cad smin mdzad pa
dbang gi dkyil 'khor chen por bshad
chu bo rnam bzhi ma shes na
'khor ba'i rtsa ba chod mi 'gyur
brgyud pa rnam bzhi ma shes na
gsang ba'i dbang bskur shes mi 'gyur
babs lugs rnam bzhi ma shes na
rig pa'i ye shes don mi mthong
bskur thabs rnam bzhi ma shes na
dam rdzas don la sbyor mi nus
dbang gi rdzad bzhi ma shes na
rig pa'i ye shes mtshon mi nus
bskur ba'i gnas bzhi ma shes na
rtogs thad don la bskyal mi nus
dus tshod rnam bzhi ma shes na
rdzad dbang rnams la don med 'gyur
phyi nang dbang bzhi ma shes na
ye shes gnas lugs ston mi nus
thob pa'i rtags bzhi ma shes na
don dam yid ches med par 'gyur
399
bar do rnam bzhi ma shes na
rig pa'i rtsal mi 'byongs par 'gyur
gnas lugs rnam bzhi ma shes na
mtshon pa'i dpe la don med 'gyur
dkyil 'khor rnam bzhi ma shes na
rdzas dbang bskur ba don med 'gyur
'byung ba rnam bzhi ma shes na
sgron ma'i ye shes ston mi nus
'jug pa'i dus bzhi ma shes na
dbang bskur gdams pa ston mi nus
'byung ba'i dus bzhi ma shes na
rig pa'i 'pho tshul ston mi nus
bsgom thabs rnam bzhi ma shes na
tshe dbang rgyas par bskur mi nus
bstim pa rnam bzhi ma shes na
dbang bskur ba la don med 'gyur
gdams ngag rnam bzhi ma shes na
bu la nges shes skye mi nus
rang byung dbang la de ltar rdzogs
de yang rab tu bshad pa ni
rdzogs lugs rnam bzhi ma shes na
theg chen don la sbyor mi nus
thob lugs rnam bzhi ma shes na
rig pa'i ngo bo mthong mi 'gyur
grol lugs rnam bzhi ma shes na
skye ba rnam bzhi'i don mi rtogs
rang byung dbang la de bzhin gnas
rig pa'i dbang la de bzhin no
400
e ma rang byung rdzogs pa'i dbang
lam la byang chub rim gnas pas
khams gsum 'khor ba'i sems can rnams
ma smin pa rnams smin bya'i phyir
bcom ldan thugs rje thabs mkhas pas
gsang ba'i don nyid bstan pa'o
e ho
e ma ho
ma grol ba rnams grol bya'i phyir
gsang ba'i ye shes dkyil 'khor bstan
dkyil 'khor ye shes gsang ba'i don
'das pas mchon par mi nus pas
da lta nyid du dkyil 'khor rnams
rgyal ba yab nyid thabs mkhas pas
thabs mkhas thugs rjes yang dag bzung
brgyad khri bzhi stong theg pa'i sgos
gsang ba'i ye shes ston mi nus
de phyir gsang ba'i theg pa 'di
rang snang ston phyir rgyal bas gsungs
bcom ldan pad ma he ru kas
gsang ba nges pa'i dbang rnams bstan
e ma ngo mtshar shin tu che
a hum dkyil 'khor thams cad 'dus
gsang ba phyi yi rtags bstan pa
yongs su rdzogs pa rang lus mthong
rig pa'i ye shes dkyil 'khor ni
lus la rnam pa bzhir gnas pas
401
'di nyid du yang bzhir bstan pa'o
gsang sngags thabs kyi gtan tshigs las
rang lus mtshon phyir dkyil 'khor bstan
om dang a gnyis ston pas
yi ge 'khor lo bsgom par bshad
rnam rtog yi ge hum du bsdus gyur na
rig pa'i ye shes yi ge hum du gnas
dag pa'i dus na yi ge a yi rang bzhin no
'byung ba'i dus na yi ge om du 'byung
rig pa'i rang bzhin de bzhin rab gnas pas
gnas pa'i dus na yi ge phat du 'byung
mthong ba'i dus na yi ge sva ru byung
shes pa'i dus na yi ge ha ra gnas pa'o
rig pa'i chos sku rkyen dang rab bral nas
rig pa'i rang bzhin btsal na mi rnyed de
sems kyi rang bzhin sna tshogs kun tu rgyu
ming gi rang bzhin sna tshogs btags pas stong
sgra yi rang bzhin sna tshogs ming dang bral
sngags kyi rang bzhin bzlas brjod yul las 'das
chos kyi rang bzhin ye nas bsgrub dang bral
sku yi rang bzhin ye nas rnam par dag
ye shes rang bzhin ye nas rtog mtha' bral
'od kyi rang bzhin ye nas thug pa med
402
tshig gi rang bzhin brjod pa nyid du med
bdag dang gzhan snang gnyis kyi mtha' dang bral
zad med nor bu rin chen rin thang med pa yang
zang zing longs spyod sna tshogs rab snang bas
sems can dbul ba'i sdug bsngal sel ba ltar
rang byung ye shes yon tan sna tshogs kyis
ma rig nyon mongs thams cad sel bar byed
e ma ho
sangs rgyas ye shes dbang rdzogs pa
'gyur ba med pa'i dbang chen thob
yang dag lhun rdzogs dbang ldan pas
ye gnas lhun 'byams rtsal dbang thob
rtog med rig pa'i dbang rdzogs pas
dbyings rig gsal ba'i brda dbang thob
zag med thig le'i dbang rdzogs pas
lhun 'byams stong pa'i rtsal dbang thob
dgongs pa cig chod dbang rdzogs pas
ye gsal lhun mnyam rtsal dbang thob
rig pa ye shes dbang rdzogs pas
bya bral lhun rdzogs rtsal dbang thob
sangs rgyas sku yi dbang rdzogs pas
gsang ba'i ye rgya'i rtsal dbang thob
sku dang ye shes rtsal la so sor gnas
nam mkha'i mthongs nas nyi shar pas
403
sems can thad ka'i mun pa bsal ba ltar
gsang ba'i dus na rig pa rang gnas pa
ye gnas dgongs pa chu bo'i gzhung dang 'dra
de lta bu yi rtsal dbang thob gyur na
stong pa'i ye shes rang gnas rdzogs par gsungs
phyi nang gsang ba'i dbang rdzogs na
yongs su rdzogs pa'i rig pa'i dbang
ma bskur ye nas rdzogs par 'gyur
snang ba rigs kyi lung lta bu
byar med lhun mnyam ngang du rdzogs
ye shes dbang bskur dam pa 'di
sems can rnams kyis thob bya'i phyir
thabs la mkhas pa'i skyes bus bshad
de ni rtsal dbang rdzogs pa'o
zhes seng ge rtsal rdzogs chen po'i rgyud las
seng ge rtsal rdzogs bstan pa'i le'u ste bcu gnyis pa'o
@13
de nas yang kun rig chos kyi rjes 'di skad ces gsol to
kye kye bcom ldan kun bzang yab
bdag cag dad pas zhus pa la
don gyi dkyil 'khor bstan du gsol
sems can rnams la phan gdags phyir
bdag gis zhus pa'i tshig rnams kun
ma nor legs par gsung du gsol
404
de nas kun bzang seng ge des
rnam pa bgyings te bka' stsal pa
gsang ba'i sgron ma ye gnas pas
dgongs pa'i don la rnam par brtags
kye ma sangs rgyas rnams kyi 'khor
khyed la gzung 'dzin mi mnga' yang
sems can ma rig long ba rnams
'khor ba nyid las bsgral bya'i phyir
nga yis bstan gyis khyed kyis gzung
khyed kyis zhus pa de legs so
legs so legs so rigs kyi bu
stong pa'i ye shes mtha' med kyang
dag pa'i ye shes dri ma med
dgongs pa'i ngang la gang gnas pa
rang byung ye shes de dang nye
rtogs pa'i shes rab yul la 'char
'byung ba lnga yi dri mas kyang
dag pa'i ye shes sgrib nus na
ma rig la sogs nyon mongs kyis
dag pa'i ye shes skye dbang med
ma rig la sogs 'dzin pa rnams
rkyen dang bral na rang rig grogs
sku yi 'od dang gsung gi zer
nyon mongs nyid las skye bar 'gyur
gsang ba'i ye shes khong gsal ba
dper na dbul mo'i gter dang mtshungs
dag pa'i ye shes yul gsal ba
dper na nyi zla'i 'od dang mtshungs
405
sangs rgyas ye shes sku mnga' ba
ye shes chig chod rnam par dag
gsang ba'i ye shes rnyed dka' ba
kun gyis go ba ma yin te
gsang sngags thabs kyi sgom pa yang
dag pa'i ye shes rtogs pa med
lu gu rgyud du rtogs pa med
yang gsang nges pa'i lung chen 'di
dri ma gnyis dang rab tu bral
e ma ye shes dag pa'i sku
'ga' dang 'ga' la snang ba las
kun gyis mthong ba ma yin no
yang gsang rig pa'i sgron ma nyid
gtang gzhag gnyis su med pa'i phyir
thabs ldan shes rab ldan pas rtogs
gsang sngags ye shes tshogs kyi sku
mthun pa'i 'od dang bcas pa'o
'dzin pa med pa'i sa phyogs nas
dag pa'i ye shes ngos gzung bya
snying rje chen po'i thabs mnga' bas
sems can thams cad gzung bya'i yul
snang ba'i ye shes 'od sku la
snang ba thams cad rdzogs pa'o
ye nas rang gsal chos nyid ni
gsang ba'i ye shes mkha' la gsal
don dam kun rdzob gnyis med ni
dus gsum sangs rgyas rnams kyi lta bar 'dod
406
thabs mkhas rtogs pa'i klong gnas pas
ye shes thugs rje rgyun mi 'chad
ye shes thabs la mkhas pa yis
rang gi de nyid nyams su blangs
de la goms te nyams lon na
ye shes skye ba'i rim pa dang
ye shes gnas pa'i rim pa dang
rig pa 'char ba'i lta stangs brtags
ye nas gnas pa'i snying po'i sku
rgya ma chad pa'i ye shes yin
lhun gyis grub pa'i bud dha dang
gnyis su med par snyoms par zhugs
yang dag don gyi ngo bo la
sangs rgyas sems can gnyis med kyang
sems can blo yi 'khrul tshul la
rnam pa gnyis ltar snang du zad
snang ba'i go na rig pa nyid
mthar lhung nyid du gnas pa yin
gcig dang gnyis la sogs pa yi
mtha' bzhi'i dri ma phra rags kun
bsal nas ye shes don la 'jug
'byung ba'i ye shes thabs kyi sku
kun gyi snying por gnas pa'o
e ma ho
yangs pa'i grong khyer shel gyi khang bu'i nang
dgongs pa rang gnas nyi zla lnga shar bas
rnam dag rtog med sku lngar lhun gyis grub
thugs rje'i zer ldan ye shes lnga rtogs pas
407
snang ba rgyas 'debs snang srid dbang du 'dus
ye shes stobs kyi khyad par ni
gang gis snang ba bcad pa dang
gang gis snang ba 'phrog pa dang
gang la snang ba 'dus pa'o
gang gi snang ba chos kyi sku
phyogs dang ris su mi snang bas
thabs dang shes rab 'brel rtogs na
thabs kyi yan lag chos kyi sku
shes rab rang byung don la spyod
thugs rje gnyis su med par grol
gsal ba'i ye shes ye gnas don
mtha' dang dbus su mi 'byed pas
mtha' gnyis rtogs na dbus kyi ngang
skyon nyid rtogs na yon tan rdzogs
nyon mongs ye shes nyid du rtogs
gsang thabs rdo rje'i lus tshogs ni
don dam kun rdzob ltar snang ba'o
ye nas chos skur rang gnas pas
mtha' dang dbus su mi gnas pa
chos nyid rtogs pas thabs la mkhas
ye shes dkyil 'khor bsam yas rnams
ma bcos bsam yas lhun gyis grub
bde ba bsam yas dkyil 'khor che
snang ba'i ye shes skur gnas pas
bde ba'i sku gsum rdzogs par bshad
snang ba'i sku gsum 'od gsal bas
408
shes rab sku gsum don la spyod
'das pa'i sku gsum yul du med
ma 'ongs sku gsum snang mtha' yas
mtshon pa'i sku gsum dang re spro
sangs rgyas ye shes sku gsum gsal
shes rab ye shes gnas lugs ni
don dam ye shes thugs la rdzogs
gsal ba'i ye shes mtha' las 'das
rtog med ye shes kun tu snang
yang dag ye shes zla 'od bzang
skye med ye shes nor bu'i tshul
'gag med ye shes snang ba'i tshul
e ma ho
sangs rgyas rnams kyi ye shes ni
sems can kun gyi thugs la gnas
lam dang rig pa'i gnas la mkhas
snang ba'i rig pa shin tu che
sgron ma'i ye shes rang gsal ba
dus med chos nyid snang ba ni
phyogs cha med pa'i yul la snang
'dzin pa med pa'i rnam dag rtogs
bgrod du med pa'i lam dang 'phrad
bstan du med pa'i lung chen rtogs
bshad du med pa'i rgyud la gnas
thob med rtsal rdzogs 'bras bu thob
yang dag nges pa'i snang ba zin
shes rab sku lnga lhun gyis grub
mdzad pa lam du sku lnga shar
thig le chos min rang byung shar
sangs rgyas dang ni sems can gnyis
409
gcig pa la ni gnyis ltar snang
sku gsung thugs ldan rdo rje'i sku
kun la yod pas snang mtha' yas
brjod du med pas rtsal gsum rdzogs
mtshon du med pas the tshom bral
yid du med pas dpyod byed med
sems su med pas bag chags med
ma rig med pas rang sar grol
rtog pa med pas rtsis las 'das
mthar lhung med pas 'od du snang
bya rtsol bral bas ye nas gnas
yin min med pas rang las byung
chos nyid ye shes rang gnas pas
gzhan nas rnyed par 'gyur ma yin
gsang sngags gsal ba'i shes rab ni
gcig tu snang dang du mar med
snang ba'i ye shes sku ltar snang
mtha' yas ye nas rang la gnas
don sdud dkyil 'khor rnam lnga byung
ye nas rgya nyid ma chad par
lhun grub chen po'i snang bar rtogs
sa dang lam la rab gnas pas
dri mar bzung ba'i dngos po med
byas pas rnyed par mi 'gyur ro
snang ba'i ye shes lhun sdug ldan
stong pa'i ye shes thabs mtha' yas
'gran zla med pa'i nyag gcig po
410
mtshan nyid med par rang sar grol
ye shes gsal ba'i rlung chen gyis
dran pa sangs pa'i mkha' la bskyod
mtha' la mi gnas yangs pa'i sku
brdal ba chos nyid snang ba'i sems
yul la rtog cing don du sdud
rig pa'i ye shes rang shar bas
stong pa'i ye shes lhun mnyam gsal
dri med ye shes mkha' gsal gnas
snga phyi med par bde gnas pa
phyogs cha med par don dam rtogs
spang thob med pa'i sku la blta
gsal 'grib med pa'i snang ba mthong
ye shes bde bar lus la gnas pa'o
e ma ho skye med rang bzhin gsal
'dzin pa'i ye shes rang bzhin gsal
gnyis 'dzin thogs med gcig tu sdud
yangs pas bde brdal gnyis su 'dzud
rig pa'i ye shes 'gyur med pas
bstan pa'i ye shes thogs pa med
gsal ba'i ye shes stong pa'i sku
'das pa'i tshig tu med snang bas
mtha' yas gcig tu thams cad 'dus
rang rdzogs rang gnas lhun gyis grub
bde 'byams chos nyid snying por gnas
sangs rgyas rig pa cog bzhag nyid
411
'dzin pa sangs pa'i nam mkha' la
lta dang bral ba'i lta ba ltos
rtogs bya ye nas mtha' bral la
'dzin med shes rab go rar chug
gnas pa med pa'i lhun 'byams nyid
stong pa chen po'i rgya yis thob
gsang sngags thabs nyid rtog med pas
las rab rdzogs pa'i thabs su bshad
sangs rgyas rnams kyi phyag rgya'i dbang
gsang sngags las kyi sku ltar 'phro
don dam ye shes dkyil 'khor ldan
yang dag lhun rdzogs bde ba chen po'i sku
sems dang yid kyi snang ba'i phyogs cha sgribs
snang ba'i ye shes stobs su ma gyur na
lhun rdzogs gsang sngags thabs mkhas pas
thugs rjes sems can thams cad la
blta ba'i don las mi 'da' zhing
rang rig nyams su blang ba'i phyir
bsam 'das dngos po'i yul du med
gsang ba'i shes rab thug med pas
rig pa'i cho 'phrul cir yang ston
ye shes thabs la mkhas pa yis
dbyings dang rig pa ldan byas na
rang rig sa la bde bar gnas
gsang ba'i ye shes lhun rdzogs pas
412
bya ba'i yul du mi gnas pas
mtshan ma g.yengs pa'i dus med pas
rang rig dkyil 'khor rnam lnga rdzogs
gsang ba'i ye shes khong gsal bas
brjod pa'i tshig las 'das pa'o
ye shes sku la rab gnas pas
dus dang mtha' la mi gnas pa'o
gcig tu med pas don dam nyid
phyogs su med pas lta dang bral
bcos su med pas sgom dang bral
yin min med pas spyod dang bral
rigs kyi kha dog lngar snang bas
ye shes lnga yi rang rtsal rdzogs
'byung ba lnga yi rtsal snang ba
rang byung ye shes ngo bor rdzogs
shes rab lnga yi don rtogs pas
lu gu rgyud gyi ngang du rdzogs
rtsal gyi ye shes rang snang bas
dmigs pa'i yul med rnam par dag
med pa rtsal snang rig pa'i sku
'dzin med ngo bor rnam par dag
gsal ba zang thal ngo bor rdzogs
e ma gsang ba'i glu blangs pas
ye shes can la rab tu snang
las rab rdzogs pa'i chos sku ni
bya ba thams cad zin pa'o
snang ba'i yul du med pa ste
brjod pa'i tshig las 'das pa'o
mtha' bral don dam lhun grub dag
413
gsang sngags phyag rgya chen po'o
thabs ldan las kyi phyag rgya yis
gsang ba'i yul dang lhun sbyor bas
ye shes rtsal la 'gag pa med
mtha' yas dkyil 'khor thams cad 'byung
don 'byung bsam yas lhun gyis grub
ye nas sgrib med ka dag klong
'khrul med rgyud dang rang rtags bstan
sangs rgyas lam dang ye shes bstan
rig pa'i gnas dang longs spyod bstan
rang rig thabs dang lam nyid bstan
ye shes sku dang snang ba bstan
'byung ba'i rkyen dang yul rkyen bstan
sangs rgyas sa dang sems can bstan
snang ba'i yul dang rang bzhin bstan
thig le sku dang rang rtags bstan
dgongs pa'i don dang rjes mthun bstan
bde ba'i zhing dang yangs pa bstan
yang dag sku dang chos sku bstan
snang ba nyid dang rang lus bstan
kun bzang sems dang ye shes bstan
dkyil 'khor lnga dang gzugs sku bstan
bsgrub pa'i dus dang rig pa bstan
mkha' khyab yangs pa sku dang mnyam
rtog med gsal bas yang dag rnyed
sangs rgyas kun gyi bstan pa ni
414
rab tu gsang ba 'di nyid do
sems can blo yi theg pa rnams
'di bstan pa yis mig tu 'gyur
ma grol ba rnams grol bar bshad
ma smin pa rnams smin par bshad
theg chen gsang ba'i don 'di yis
thams cad bla med dbyings su sgrol
ye shes thabs kyis don chen rtogs
thabs mkhas pa yi skyes bu yis
don dam dkyil 'khor rang la rdzogs
ye shes dkyil 'khor bsam yas 'grub
sems kyi snang ba bsam mi khyab
ye shes snang ba gcig las med
don gyi ye shes rtogs dka' ba
bsam pa'i chos nyid tshul mthun pas
don dam ye shes thabs nyid rtogs
e ma ngo mtshar che ba'i rgyud
'di yis thams cad grol bar 'gyur
ye shes rab tu rtogs pa'o
zhes seng ge rtsal rdzogs chen po'i rgyud las
dgongs pa'i mdo bsdus pa'i le'u ste bcu gsum pa'o
de ltar ston pa kun tu bzang pos 'og min gyi gnas su 'khor rnams la rig pa'i thabs bstan pa
gsang sngags kun gyi blta ba'i don
ma nor bar ston pa'i rgyud
415
ye shes lag 'phrod du bstan pa
rig par rang lugs su bstan pa
dbang bzhi yongs rdzogs su bstan pa'i rgyud seng ge rtsal rdzogs chen po'i rgyud ces bya ba
thams cad kyi dgongs pa bstan pa rdzogs so
seng ge rtsal rdzogs nyid la ma bu bcu
dge'o
dge'o
dge'o