Sibinom volapük te bal
Penedi nitedik se S. Peterburg kanon logön in kolüm votik gaseda at. In et, kobü yegs votik, lantel[1] esesagom das "Kadem bevünetik vpa" in S. Peterburg, no dasteifom menodami vpo, sod gebom omi nepevotöl, du dasteifom püki sembal pötikum. De zülags kadema at kanon noetön das sosag löpnik binom velätik, e das pük at nulik pastuköm[2] nekonsidü staba'noms vpa. Kludo, liko kanom kadem at nog flagön gidiko tiädi "Kadem bevünetik Volapüka? Osötom lensumön tiädi sembal votik, a.s. "Kadem bevünetik püka bevünetik füdik."
I redak ela "Volapükagased Valemik" bisumom püki bevünetik nulik votik, e klülükos das pük at odifom feleigü vp in tefods ti valik.
Publüg sötom kapälön lefulo das ä "Kadem bevünetik vpa" in S. Peterburg, ä redakel ela "Volapükagased valemik" ekludoms dejötiko das volapük no pötom as pük bevünetik, e das alikan de ats jäfom steifami fomön püki sembal gudikum pladalü et.
Klülükos das no binos velätik gebamön nemi "volapük" tefü püks nulik at kels pofablüdoms ba eventuo fa datuvels löpnik. Okodos kofudi nefinik givÖn nemi "volapük" pükes kil löliko difik balvoto, e sikodo oyufos vobädamis klada et menas kels binoms neflenik natiko ta nindugam püka bevünetik aikelik, bi atos odämos kudadinis omsik.
Püks nulik popüböl taelü vp osötoms nedoto lensumön nemi sembal lönik, äsliko edunoms ya Spelin, dil, Esperanto, e.l.
Zelädo nem "volapük" lönom gidiko datuvale, e men kel omosumom nemi gudik at de om, omekom omi dido pöfik.
NOETS. (Vükifonät)
Se Kosmopolan 1894, Nüm: 18, Pad: 197.