Поладкстомо (2016)/Вечкемань тешкст
[270]
| ВЕЧКЕМАНЬ ТЕШКСТ |
Мекс удем сормсевкстнэсэ ледстнемакскак а ванстовить эрямосонть вастневиця ламо тевтне, конатнень ванстомальть? Мекс кершасызь — зярдояк а стувтсыть — сювань сталмо тевтнень? Мерят, умок-умок эрявольть [271] ёртомс неть сюватнень шукшпряс, сынь вана мезе мартояк а ёртовить. Кирдевить мельсэть.
...Маней, вийс совиця сёксень чи. Лембе. Анеявиксстэ, састо уить вельксканок — паро эрямо вешнить — сэняжа алкс, ашо кавшаня пельтне. Мазылгавты менельксэнть шканзо коряс лембе, коволонь-ковол пувсиця варминесь. Монськак а содан мекс, содавтни эйсэнь мель: зярдо сы эрямонь меельце чим, ушось улезэ истямокс. Паряк, мекс истят читнестэ ушоды куломо кизэсь?
Кунст мадезь аштетяно певтеме келей ды певтеме сэрей сэнь вельксэнть ало. Кавоненек. Тон ды мон. Чатьмонтяно. Мезекс валтнэ? Сындест — сэньстэ гайгиця менельденть, варминеденть — седе мазыйстэ ды ламо а ёвтат. Сави — ды кецнема миненек тенень! — ансяк кунсоломс ламо содыцятнень кувака-кувака, моразь ёвтневиця ёвксост.
Умок апак сока моданть пиже кумбокс вельтизе уськаз тикше. Потстонзо а неявтано киненьгак. Ансяк чипаентень. Сон ней псистэ а палси, лембесэнзэ марявить нусманячинь пачк ёвтазь валт: чачома — кепетема—кулома. А куш а каш. Паряк, те чатьмонемась сонзэ, Пенть учоманзо?
Уськазонь тенстьке прятне комсить варминенть лексемадонзо. Нулк-нулк, нулк-нулк... «Эрядо, эрядо, — маряви, превс путыть минек, — эрядо кецнезь, алкуксонь, велувонь эрямосо». «Каня те а эрямо, — мелем меремс превс путыця ды седеймариця «тенстькетненень», — улемс истямо олячинь пелькскекс? Неемс ды марямс варманть, чипаенть, вельксканок келейстэ сравтовозь оланя менеленть моронзо?»
Велькссэнек, верьга-верьга, цопи, сёлмосонзо чуросто ахолязь, чары, ванны, мезе кундамс, вадов. Вант, вант, келей сёлмо мучкиця нармунь! Сельметь а сявадыть?
Саия кедезэнь тонь кедеть. Маряса, кода сангат чуди вересь, кода чави седееть; комсевтить пряст кенерезь уськазтнэ, токны седееть. Аволь вейкеде ёвтнить?
— Тон содат, сы шка, ды те мазычись ёми тонь марто миненек. Ды зярдояк а велявты, — сезия арсезь ёвтазь вал сом каштмолеманть.
— Кемат? — нусманясто, тошказь, прок кияк марясамизь, пшкадинь таго ды нолдыя кедеть.
— Э-э! Арась, — сеске, апак кавтолдо, мерить каршом.
— Монгак, — ёвтыя эсь мелем, ды чатьмонезевинек. Шкань ютазь поладынь валом: — Кияк а кеми, вана мейсэ тамашась.
— Ули мелеть содамс, мезе тонь учи? — ней тон саик кедькомором ды пейдезевезь поладык кортамонь лувонть.
— Арась, эрзянь ава. Монь учомам, чивалдынем, умок учовсь... Вана те чизэ, неть минутатне, вайгелеть...
Озынь. Варштынь лыйниця «тенстькетнень» велькска перькам ды стинь. Венстия кедем Тонеть — лездамс стямсто. Стить. Пейдькшнезь кутмордытинь, ды ютынек ожодо арсиця вирентень, косто лисекшнинек паксянь олячинть марто вастовомо.
...Ютасть иеть. Аволь чить, аволь ковткак — иеть. Тень лангс апак вано, се валдо мельде ды валдо ёжодо гайгиця чись ульнесь теке исяк. Вирьга талай лытамодо мейле лотксинек сестэ пакся пес, конатась виренть чиресэ, оймсеме. А палыця ёжот, а морот, а кутморямот-палсемат. Ансяк зярыя, тундокс кувтолдыця, чуросто ёвтазь валт. Весе. Сестэ эно мекс сеть нурькине шкань зэхельтне кадовсть а нардтневиця чапинекс удем яннэзэнь? Ламо покш, седе редявикс тевтне тусть шкань сувтементь пачка, лип ютыцятне, тешкскетне — кадовсть.
Паряк, кенярксто пешксе седеесь тенень лездась?