Поладкстомо (2016)/Ютазенть а велявтсак
[272]
| ЮТАЗЕНТЬ А ВЕЛЯВТСАК |
Виренть самай мазый шказо. Пиже тюстнэ пештизь сэрьс-келес, лексияк, маряви, эйсэст. Куракштнэнь ды менельс сэрей чувттнэнь алга сиякс цивтёрдыть куконь понкстнэ. Касы-ашолды тантей чинесэнзэ иредстицясь пандянь-пандянь. Мекс сонзэ, ландышенть, истя лемдизь? Куконь эрьгть! — вана кода тензэ меремаль. Ды [273] мерить кува-кува! Ашо лов панжовксонзо, алкукскак, теке эрьгть. Тия-тува вастневи лопань коряс эрьгтнень ёнов молиця куконькаесь. Сравтынзе «толганзо» вирь-авань сурсемесь.
«Ужока, ужока, те таго ков эскелян? Маряви, седе витев саема. Аволь кершев? Мезеяк а чарькодян: педе-пес велязевинь! Ков ёмась яннэсь?..» — эвтить превсэнь кевкстематне, монсь яла бажан лисемс Вечкевикс эрькезэнек.
Эрьке — те, паряк, виевстэ ёвтазь. Эрькине. Ансяк куншказо, теке атянь кокша пря, валаня, чейсэ-тикшесэ апак вельтя. Кодамо илязо уле, покш, вишкине... Те — Вечкевикс эрьке. Монь седейс сон кадовсь сехте келеекс, сехте мазыекс, сехте домкакс.
Вирев самсто пурдынь кершев ды кеминь: кадозь, лугасо ацазь кись ливтьсамам эрявикс таркантень. Лиссь вана оно кода: малав час чаран чувттнэнь юткова, кепсян, айгшан ютамсто тарадтнэнь, вешнян. Тевем мезеяк а лиси. Ёмась, прок коськсь эрькесь!
«Цюр! Аловпандт, маряви. Валгт. Тов, тов судот кирдть. Истя, виде-виде, эскеляк».
Вандора чире яндавинентень валгомсто чарькодия: стяко, аволь ведь, чейпулынеяк эзь неяво потмакссонзо. А тов эйсэнь уски-вети эвсесь.
«Мезе ней теемс? Ков ки саемс?»
Мурдынь. Арсинь-теинь ды пандыненть чамава карминь валгомо тона ёнов. Ваннан перькам. «Косат, эрькине, косат? Арась, мезеяк а неяви. А тов молян. Ужо, ужо...» Ютынь зяро-бути эскелькст лия ёнов ды апак учо лисинь тов, ков бажинь. Лисни, кадык чуросто, истяяк мукшнови ёмазесь — апак вешне.
«Ды оно косо, велиця реве, оно косо!» — эль эзть кирнявто кеняркстонть кельпрястом валтнэ. Ёмась тей-тов кайсевематнеде сиземамгак. Шождалгадынь.
Сэрей пичень комельтнень юткова кончтась тень чипайденть кекшниця, чирева чейсэ ды калькурынесэ каярдозь эрькинесь. Пандочаминесь, кува валган, ацазь пичень ожо салмукссо ды тюжа ташто пичалсо. Коське.
[274] Кашторды пильгем ало ламо иень перть ацазь чевте кендесь. Эрьва кодамо чинетнеде башка, судос эци пичеоень чинесь. Лексеви шождынестэ, виень раштамга.
Сыргинь «ёмаськем» перька ютамо чипаенть нарамонзо лувсо. Ванстыть сонзэ якстере пильге пичетне. Ванстыть ды мельспаросо ванныть ведентень. Мазыйтяно-аволь? Чись пси, маней. Варма синсть а маряви. Весе кунсолыть. Чувтотне, балягатне, куракштнэ. Кунсолыть вейкест-вейкест, кунсолыть менеленть.
Вана «сырькаенекак». Те тон истя мерилить ведтенть аволь васоло касыця коське пря сыре пичентень.
«Кунсолок! — нейгак гайгезевсть пилесэнь валот. — Несак, косо «псилгали?» Мельсэнь, мельсэнь се чись. Каия сестэ, тонь меремга, прям удалов ды талай ваннынь верев, вешнинь пиже салмукстнэнь ютксто чакалкасо сеедьстэ чавицянть. Сонензэ ялатекель. Шказо арасель явомс мель миненек, азгондицятненень.
Умок, умок те ульнесь — шекшатань кунсоломанок.
Вана овсе веденть чиресэ лагоря Килейнеськак.
Кептерьсэнек, мельсэнь, ансяк зярыя суравкат. Те аволь тонь коряс. Пангонь вешнемань дошузчить содылия. Прок чеерне, празь лопатнесэ каштордозь, потстост-алдост редилик те-тона пангиненть. Монень кадновсь вейке: ландямс ды пеельнесэ мода ёжова керсемс тонь муевкстнэнь, ёжомарязь путнемс, илязт каладо, кептерьс. Вирень ломань. Течис кадовсь тень содамоёвксокс: кода редилик сядо лопа потс кекшезь модапангонть?
Ютынь чиёнкс чирев. Тия седе сеедьстэ савкшнось тенек якамс. Тестэ седе маласо кудов ветиця кись. Те, тундонь чудикерькссэ теезь, уськаз ёнов молиця тикшенть потсто эль неявикс лушминеськак содавикс. Тестэ весть сакшномстонок — уш сёксь малав — кочкакшнынек пешксе кептерь наволкай пангт. Ськамом керсемест сестэ эзинь кенере. Вередемекшнить тонгак.
«Вечкан пангс якамо, ансяк шлямост-урядамост — тевесь аволь монь. Сеске цякскадан. Тельняяк тенек а сэвевить, явшесынек банкань-банка... — аволь весть [275] марсинь пельдеть. — Монсь ялатеке эцян вирентень, вешнемась вечкеви». Тень лангс апак вано, савкшнось тенек котьмамс кавонекак, лиясто мик пелеведе мейлес.
Эскелян седе тов.
«Сынь? Сынь!»
Сыре пинетнеде мейле кадовикс мукортне истят содавикст, прок явовинек мартост исяк, ды ней учость монь. «Шумбратадо!» — эзинь кирдеве, марямга пшкадинь тенст. Седеяк, ванан, латякадсть. Ютыть зярыя иеть, ды теевить модакс, полавтсызь вакссост ломанде кавксть сэрей пичинетне. Весемесь, кода ульнесь. Вейкесь а истя — арасят тон.
Неть коське кавто мукортне ульнесть тенек оймсема таркакс. Кудов сыргамодо икеле ойсилинек лангозост: максылинек лекстямс ламо якамодо увныця пильгтненень, апак эрязкале, седеень витемга ваннылинек перьканок мазычинть лангс. Эрькенть тона чиресэ — од пичинень куро, ютксост — од килей. Мекс ськамонзо?
— Кодамо пиже тюс ведесь! — лиссь весть кургостом. — Те эйзэнзэ ванныця чувттнэде.
— Прок тонь сельметь, — эзь саво тень учомс, мерить тон.
— Кодамо сэняжа велькссэнзэ менелесь! — поладынь валом.
Тон чатьмонить. Чатьмонсь эрькенть чирева Чееськак.
— Кодат тонь сельметь, — ёвтыя, мезе мериксэлинь, чамазот ванозь, — сэнть-сэнть!
— Зяроцеде тень марян, ёвтасак? — пейдезевить мельспародонть. — Симть, лепиямозот симть те мазычиденть!
— Симан, Сэняжа, симан.
Мекшвелекс пиримизь ледстнематне. Гайгезевсь пилесэнь човине, прок кайгань, вайгелеть, пангонь вешнемстэ марявиця эскельксэть. Ансяк вана вакссом мукоресь, «тонь мукоресь», — чаво. Сювордызе седеем нусманячи. Марявсь, ушосонть талаень сёксь.
Тесэ весе истя, кода ульнесь икеле. Мезеяк эзь полавтово. Арасят ансяк тон, а неяви вакссот пангодо верьга пешксе селей керень кептереть.
[276] Эрькенек вешнемстэ косо-бути потсом кирдевсть мель ды ёжо: муса, мезе вешнян, ды Чопавтян сеть ютазь шкатнес. Эзь лисе.
Муевсь эрькесь.
Муевсть килейтне, «пангинев» таркась.
Эзь муеве вейкесь — шкась... Мартонзо...
Эрязасто видемтия рунгом-сэрем ды сыргинь.
Ков?..