Яҙым килә

← Һин түгелһең икән...

Яҙым килә (Шиғыр) автор Лилиә Һаҡмар

Ярты алма →

Ижад итеү ваҡыты: 18.03.1990. Малеевка. Нәшер ителгән: 2006 йыл. Сығанаҡ: Һаҡмар Л. Эстафета: Шиғырҙар, поэма. – Өфө: Китап, 2006. – 176 бит. (51-се бит) ISBN 5-295-03798-3

Яҙым килә

Иламайым…
Ҡыйыҡтарҙан
Ынйы-ынйы тамсы тама.
Йырламайым…
Ҡайынҡайҙар
Моңға тулып, япраҡ яра.

Атламайым...
Йырғанаҡтар
Йүгерәләр сылтыр-сылтыр.
Ҡарамайым…
Ер төрөнгән
Ебәк боҙға ялтыр-йолтор.

Теләмәйем…
Күҙҙәремде
Сағылдырып, ҡояш көлә,
Яҙмышымда
көҙ артынан,
Көҙ артынан яҙым килә –
Ғашиҡ бер йән
сәскәләрҙән
Һөйөүемдең тажын үрә…
Яҙым килә…

---

Иҫкәрмәләр

• Авторҙың башҡа әҫәрҙәре Author:Лилиә_Һаҡмар