Ҡышҡы урман

← Ямғыр яуа

Ҡышҡы урман (Шиғыр) автор Лилиә Һаҡмар

Күңел атым →

Ижад итеү ваҡыты: 1999.Йомаш. Нәшер ителгән: 2006 йыл. Сығанаҡ: Һаҡмар Л. Эстафета: Шиғырҙар, поэма. – Өфө: Китап, 2006. – 176 бит. (90-сы бит) ISBN 5-295-03798-3

Ҡышҡы урман

Рәхим итсе әкиәт һарайына,
Мөғжизәләр әле бөтмәгән!
Һин үтәһе юлды, эйе, ышан,
Бер кем, бер кем әле үтмәгән!

Һин килә тип, ҡыш-сихырсы һылыу
Һарайына көмөш ялатҡан,
Ағас-кәләштәргә мәрйен һибеп,
Ҡыуаҡтарға ынйы таратҡан.

Һаҡһыҙ ғына тик бер ҡағылһаң да
Сыңлап түгелер төҫлө моң ғына...
Һин ҡағылма!
Шаулы был заманда
Мөғжизәгә бағып тор ғына.
Тын ғына...

---

Иҫкәрмәләр

• Авторҙың башҡа әҫәрҙәре Author:Лилиә_Һаҡмар