| یە واتش شێرۆ بێ ڕای بێ ئەندێش
|
خورۆشا بە قین، پا نیا وە پێش
|
| جۆشیا بە خیشم سی ستارە
|
جۆشیا جە قین، قین دا نە چارە
|
| گێڵا بە سەد ڕەنگ، توندیا بە تار
|
خوونیی غەزەبناک وێنەی ژار مار
|
| لەب گرت بە دندان، پا نیا نە وەر
|
دەست بەرد دەشنەی تێژ کێشا نە کەمەر
|
| جە قین قاتڵ غەنیم خوون ڕێز
|
ئاما بێ ئامان پەی قەتڵ پەروێز
|
| یاوا بە خوسرەو مدرا بێ ئەدێش
|
پای چەپ ونارا، ڕاست ئاوەرد وە پێش
|
| پەنجەش دا وە تێغ تازە ساو تێز
|
بە قووەت پێکا نە جەرگ پەروێز
|
| تێغ تازە ساو خوون ئالووی غەزا
|
کێشا نە مەوداش زوانەی قەزا
|
| مەودای موو شکاو بەرق بێ ئامان
|
قەبزەی قەزای قەسد ئاوەرد وە دامان
|
| جە بەرقەی برووت بەرق بەد نە دەم
|
برووسکەی بوڕڕان چون شەفاف چەم
|
| جە سەهم سیمای سەر نووک خوێن ڕێز
|
سەما لەرزیا، زەمین دا ستێز
|
| قووەت دا بە قەسد بێ ڕای بێ ئەدەو
|
بە زۆر بازوو پێکا بە خوسرەو
|
| پێکا نە جەرگش سەر ساو تازەش
|
مەوداش بەرلوا جە موهرەی مازەش
|
| پێکا نە ڕووی جەرگ، بەند دڵ بڕی
|
لیحاف شکاوا، دۆشەک هوردۆی
|
| تەکاندا بە تاو نە جەرگش بەرشی
|
نمەنا بەرقەی بەرق ئاتەشی
|
| چەند زەرب کاری ئێد جە ئەو بەتەر
|
یەک یەک نە جەرگش کریا کاریگەر
|
| حەربەی زەرب زۆر سەر مەودای خەنجەر
|
پێکاش بە خوسرەو سەر مەودای خەتەر
|
| خوسرەو جە هەیبەت دەشنەی تازە ساو
|
هار و هەراسان هەراسا جە خاو
|
| یەک زەربێ هەنی بە نەبەرد قەست
|
شانا جە جەرگش بەر لوا جە دەست
|
| بەرشی جە خوسرەو بەدەن کەردش چاک
|
مەودای موو شکاو جەولاش نێشت نە خاک
|
| خوسرەو خەستەی زام زیڕنا بە زار
|
گورێزا و بەرشی شێرۆی شەرمەسار
|
| پەروێز شەو بە شاد بادە وەردەبێ
|
بازووش نە بالین شیرین کەردەبێ
|
| نەلەخشا نە جاش خوسرەو بە ئاسمان
|
نەک شیرین جە خاو ببۆ هەراسان
|
| وێش کێشا وە پەس، جیا بی جەو بۆن
|
نەک بەرگ شیرین بدریۆ بە هوون
|
| بە نەرم و نازک بە جەستەی خەتەر
|
مناڵا بە زار چوۆ گاو کەبووتەر
|
| لاو دا نە جاگەی جەمین جامەوە
|
سەرنیگوون هوون، دەس بە زامەوە
|
| زەدەی زام خەتەر، جەرگ جگەر چاک
|
خەستەی خەتەرناک غەڵتیا نە خاک
|
