დელფინი
ბჟაქ ელეკინ, თიშ ჩხორიაქ
გაკურცხინუ დოლო წვანე,
ოჭიშგოსარკილი ზღუაშა
მიბნჭუაფუქ უმაჸალეთ...
...დუდ ქიბნწყვე დო თოლ გუვონჯი:
ქვინჯის გერანწკ ქუალეფი,
ჩხომეფ გუმაბუძოლუნა
..დიდეფი დო ჭიფანეფი...
დელფინი მილაჸაფუანს,
შხვეფი ხოლო იბათქუნა,
მინ უკახლე მილუანა,
მინ წოხოლე ეწმანთხუნა...
ართიქ ფსუა ქელამისვუ,
ქჷმომფერუ მუშინერო,
თიშ ფსუაში ელნაცხანტა
კვარჩხან განთხის გაგმოხენო...
ეშვოჯანუქ ტიბ ქვიშასჷ
ორთუმელო მემიძ ქუა,
ზღუაშე მილაჸაფუანსჷ
დელფინიში ჭიჭე სქუა...
სოხუმი - გუმისთა
1969 წანა, კვირკვე