ნოტე ამსერი
ქართის მინოხუ
ცა-მუნაფილი
დო ვემკიპალუ
ჟი-მურიცხეფი.
ვითოჟირს ორკუ
აკაბცხა გვალო,
ჸუდეეფიშე
იჭვაჭვუ სინთე...
მტკვარიშ ელალსჷ,
ჭიჭე ქუას
გივოხექ ხვალე
(ვაგგაშინესო ბარათაშვილქჷ!)...
ვაჭვენს დო ვათუნს,
ჩხურ სერი რე,
მა ვამაფ ჩხურუ
დო მახიოლე
თირ მალშასი,
მუშენდა, გოწოს,
ობირგულე თირს
მებხარუნდი,
ჩქიმ მერჩქვანელი
ფალიაშვილით,
ჸუდეშ ხიბაში გონჯამაშა
გურ ელალუდჷ,
გინჯამუდჷნი,
ქენმოძიცანდ
სქვამ თუთაცალო...
ასე ვითოჟირს
ორკუ აკაბცხა,
მალას მოზოჯუნს
წანა ახალი,
ირკოჩ იმენდით
დო ხიოლით
ეხაზირებუ,
მა თაქ გილვოხექ
ეშალს ხვალე
თოლმუნაფილი
დო ვამარჩქილე
ლანდღვე მტკვარიშ
ტომბა ჩიება...
მუშენ და თექჷ
შხვა უჯინე
ხიბაშ გონჯამას,
თის უძიცანსჷ
თუთაცალო
ჩქიმ ჸოროფილი...
ნოტე, ამსერი
ჭიფა-ჭიფათ
მალეშას თირი
ფალიაშვილსჷ
მიოხედას ნოქური ჩქიმი...
ხიბას ლადირი მიკობუდას
ცურუშ ნოჸელა..
ნოტე ამსერი
გელეშას თუთა...