ჯიმა, მა ვავორექო ქორთუ?
აგრეთვე ენას, "ქართულთან მეგრულს, - ხმა ამოიღოს უფლება არ აქვს"
მ.ლებანიძე
ოქორთუეშ ნტერეფწკუმა
ზისხერ მაფნა დჷნაბუნა,
კოლხემსჷ დო კოლხურ ნინას
ვამიჩქ მუს რე გჷმაბუნა...
მუ მოჭირა, ჯიმალეფი,
შურო ვავორწყეთო თესჷ,
- ჭიე-ჭიეთ მუშ ნინაშა
მარგალს გური გეუჸოთესჷ...
ხეშქა გურშა გემიჭარუ
მი მი გური სოვრე მორთუ,
მი რე გური კოლხ-იბერი
დო გვარ გიმნათირა ქორთუ...
ლაბაძინეშ ღანჯით რსქინი
ღურა დღაშა ვა გმოჭყორდუ,
ნძალო მორაგადაფუანს:
ჯიმა, მა ვავაორექ ქორთუ...
თათარულსჷ ურჩქილექჷ
სომეხურით ჰამო გაფუ,
მუ ღორონთიქ გუგაჭყორუ
მარგალური გორჯოგაფუნ...
ზისხერ ჸვაშა ქომისხაპუნს,
შურ ხურხიშა ქეთმაკათუ,
თიწკმა სო ურქ, ცოდაშ სქუა
კოლხეფ ართო გაკიკათუნ...
გურქ ვამაჩინ, მუს მობანძღუქ,
ვამორწონს ჩქიმ ჰამო ბირა,
გაჩენდ ვარა, დიდაშ შურმე,
მა სი თოისერს ქუგოძირა!
ჭალაბ გურსჷ ქუგომხუნე,
ასე ნინას მიდმამიღა
მუთ მიდამღინ, დებაღინე
ვარა ცოდას სოიშახ იღა...
ჯგირ მენძელო დორხვადუქჷ,
შურ დო გურით მოზოჯუნქდა,
სი სქან ჸუდეს იუნჩაში,
სი სქან ოხვენს ქოზოჯუნდა...
გურ მულირ მაფ, ვა მოხოჯუ
ჟღამით ილაკარტუქ თინა,
ვარა ჯილოს მუთას დარკენს
მაწირღიაშ ნაჩამინა...
ომარგალე, ვემიოტუა
სქან ზეფირით,წიმი ულა,
ოგვამეშა ქაბურინე
ლაბანიძეშ ნაძღაბულა!...
1999წ. ქართი - ზუგდიდი