ჯუმა, მოზოჯ ნანოღუშა
მიფშათ არქეოპოლისშა,
საარიკოს ქჷგოძირა,
ფუთქურამი ქუალეფი
სონს ინგარა, მუს იბირა...
მიარე ბორჯქ მიკიილუ,
ტეხირ მიშ დო ასეთ მურსჷ,
დიდა-მოკაშ ჩილამური
ქუალეფშე გიშმაფუნსჷ...
ჩქინ მაფეფი თაქ ზოჯუნდეს
მაფემს ოსქვანდესჷნ ფერო,
-ჯინჯმანგარო, ღმალიერო,
დუდიშულო, ჩამიერო...
ორქოშ ჸორშემს მილებირდეს
მაფშალიეფ ხონარწკონდა,
ირფელს ქიგეჩიებუქჷ
თექ მუთ ქორდჷნ, ქჷგოკონდა...
ჯუმა, მოზოჯ ნანოღუშა,
საარიკოს ქჷგოძირა:
ფუთქურამი ქუალეფი
წკონდა კოლხურო იბირა...